မတ် ၈ ရက်က တိုကျိုတွင် အထက်လွှတ်တော်၌ ဝန်ကြီးချုပ်အာဘေး (ဝဲ)နှင့် ဘဏ္ဍာရေးဝန်ကြီး အာဆိုတို့ကို တွေ့ရစဉ် (Photo: AFP)

ဂျပန်ဝန်ကြီးချုပ် ရှင်ဇိုအာဘေးကို ထိခိုက်စေခဲ့သော မျက်နှာသာပေးမှု အရှုပ်တော်ပုံတစ်ခုနှင့်ဆက်နွှယ်သည့် တရားဝင်စာရွက် စာတမ်းအထောက်အထားများကို အပြောင်းအလဲ ပြုလုပ်မှုရှိခဲ့ကြောင်း ဂျပန်ဘဏ္ဍာရေးဝန်ကြီး တာရိုအာဆိုက မတ် ၁၂ ရက်တွင် ဝန်ခံခဲ့သည်။ သို့သော်လည်း အာဆိုက ထိုအရှုပ်တော်ပုံနှင့်ပတ်သက်ပြီး ရာထူးမှနုတ်ထွက်ရန် အစီအစဉ်မရှိကြောင်း ငြင်းဆိုခဲ့သည်။

နိုင်ငံပိုင်မြေတစ်ခုအား အာဘေးကို ထောက်ခံသူတစ်ဦးထံ ဈေးကွက်တန်ဖိုးထက်နိမ့်သော ဈေးနှုန်းဖြင့် ၂၀၁၆ ခုနှစ်က ရောင်းချခဲ့မှုနှင့် ပတ်သက်ပြီး မကြာသေးခင် ရက်များအတွင်း အာဘေးအစိုးရကို ဖိအားပေးမှု မြင့်တက်လာနေခဲ့သည်။ ဝန်ကြီးချုပ်ရုံး အပြင်ဘက်တွင် သတင်းထောက်များကို ပြောကြားခဲ့သော အာဘေးက အစိုးရလုပ်ငန်းစဉ်များတွင် ယုံကြည်မှုကို လှုပ်ကိုင်နိုင်သော ထိုဖြစ်ရပ်အတွက် ပြည်သူလူထုကို လှိုက်လှိုက်လှဲလှဲ တောင်းပန်ကြောင်း ပြောကြားခဲ့သည်။

ယမန်နှစ်အစောပိုင်းက ပေါ်ပေါက်ခဲ့သော ထိုအရှုပ်တော်ပုံနှင့် သက်ဆိုင်သည့် အထောက်အထားများကို ပြောင်းလဲမှုရှိခဲ့ကြောင်း ပေါ်ပေါက်ခဲ့ပြီးနောက် ဘဏ္ဍာရေးဝန်ကြီး တာရိုအာဆိုက ယင်းဖြစ်ရပ်ကို စုံစမ်း စစ်ဆေး သွားမည်ဖြစ်ကြောင်း မတ် ၁၂ ရက် အစောပိုင်းတွင် ပြောကြားခဲ့သည်။

အာဘေး၏ဇနီးက ဂုဏ်ထူးဆောင် ကျောင်းအုပ်အဖြစ် ဆောင်ရွက်နေသော တိုကျိုအနီးရှိ ကျောင်းတစ်ကျောင်းကို မြေရောင်းချမှုနှင့် ပတ်သက်သည့် အထောက်အထားများ၌ အာဘေး၏အမည်ကို ဖျက်ထားပြီး ဇနီးဖြစ်သူ အာကိအဲနှင့် အာဆိုတို့၏ အမည်များကိုလည်း ဖျက်ထားကြောင်း အတိုက်အခံ ဥပဒေပြုအမတ်များက မတ် ၁၂ ရက် အစောပိုင်းတွင် ထုတ်ပြန်ခဲ့သည်။

ထိုအပြောင်းအလဲပြုလုပ်မှုများအတွက် ဘဏ္ဍာရေးဝန်ကြီးဌာနရှိ ဝန်ထမ်းအချို့ကို အာဆိုက အပြစ်တင်ခဲ့သည်။ ထို့ပြင် ထိုအထောက်အထားများအကြောင်းကို မတ် ၁၁ ရက်မှသာ သိခဲ့ခြင်းဖြစ်ကြောင်း အာဆိုက ပြောကြားခဲ့သည်။

ပုဂ္ဂလိကပိုင် ကျောင်းပိုင်ရှင်သည် အာဘေးမိသားစုနှင့် ရင်းနှီးသောကြောင့် ဈေးကွက် တန်ဖိုးထက် သက်သာသော နှုန်းထားဖြင့် မြေကို ရရှိခဲ့ခြင်းဖြစ်ကြောင်း အတိုက်အခံနိုင်ငံရေးသမားများက စွပ်စွဲထားသည်။

အစိုးရသည် ပါလီမန်ကို လိမ်လည်ခြင်းဖြင့် ဒီမိုကရေစီကို တန်ဖိုးလျော့ကျစေခဲ့ကြောင်း အတိုက်အခံဥပဒေပြုအမတ် ရီနိုက ပြောကြားခဲ့သည်။

ယင်းအရှုပ်တော်ပုံနှင့်ပတ်သက်သည့် ဘဏ္ဍာရေးဝန်ကြီးဌာန တာဝန်ရှိသူတစ်ဦးသည် မတ် ၉ ရက်က သေဆုံးခဲ့ပြီး ယင်းသေဆုံးမှုသည် အရှုပ်တော်ပုံနှင့် ဆက်နွှယ်ခြင်း  ရှိ၊ မရှိ ရှင်းရှင်းလင်းလင်း မသိရကြောင်း ဘဏ္ဍာရေးဝန်ကြီးဌာနက ပြောကြားခဲ့သည်။

ဝန်ကြီးချုပ်အာဘေးသည် စက်တင်ဘာတွင် အာဏာရပါတီ LDP ၏ ဥက္ကဋ္ဌအဖြစ် ပြန်လည်ရွေးချယ်ခံရန်ပြင်ဆင်နေစဉ် ထိုရှုပ်တော်ပုံကြောင့် လူထုထောက်ခံမှုနှုန်း ကျဆင်းခဲ့ရသည်။ ယိုမီယုရီသတင်းစာက မတ် ၁၂ ရက်တွင် ထုတ်ပြန်ခဲ့သော စစ်တမ်းတစ်ခု၌ အာဘေးကို ထောက်ခံမှုနှုန်းသည် ပြီးခဲ့သည့်လကထက် ခြောက်ရာခိုင်နှုန်းကျဆင်းခဲ့ပြီး ၄၈ ရာခိုင်နှုန်းသို့ ရောက်ရှိခဲ့ကြောင်း  ပြသခဲ့သည်။