၂၀၁၅ ခုနှစ် စက်တင်ဘာ ၃ ရက်က ပေကျင်းတွင် ဒုတိယကမ္ဘာစစ်ပြီးဆုံးမှု နှစ် ၇၀ ပြည့် အခမ်းအနား၌ ပြသခဲ့သော သင်္ဘောဖျက်ပဲ့ထိန်းဒုံး DF -21 D များကို တွေ့ရစဉ် (Photo: AP)

တရုတ်က ၂၀၁၈ ခုနှစ်အတွက် ကာကွယ်ရေးအသုံးစရိတ်အား ၈ ဒသမ ၁ ရာ ခိုင်နှုန်းတိုးမြှင့်သွားမည်ဟု မတ် ၅ ရက်တွင် ကြေညာခဲ့ရာ ယခင်နှစ်နှစ်အတွင်း ကာကွယ်ရေးအသုံးစရိတ် လျှော့ချခဲ့ပြီးနောက် ကမ္ဘာ့အကြီးဆုံးစစ်တပ်အား ခေတ်မီစေရန်လုပ်ဆောင်မှုကို အရှိန်မြှင့်တင်ခဲ့ခြင်းဖြစ်သည်။

ပေကျင်းသည် ယခုနှစ်တွင် ကာကွယ်ရေး အသုံးစရိတ်ယွမ် ၁ ဒသမ ၁၁ ထရီလျံ (ဒေါ်လာ ၁၇၅ ဘီလျံ) သုံးစွဲသွားမည်ဟု နှစ်စဉ်ပြုလုပ်နေကျ အမျိုးသားပြည်သူ့ကွန်ဂရက် (NPC) ၏ အစည်းအဝေးမစတင်မီ တင်သွင်းခဲ့သောအစီရင်ခံစာ၌ ဖော်ပြခဲ့သည်။

တရုတ်က ၎င်းင်း၏မြေပြင်တပ်ဖွဲ့ဝင် အရေအတွက်များအား လျှော့ချနေပြီး အဆင့်မြင့် အကြီးစားလက်နက်များနှင့် အမျိုးမျိုးသော လက်နက်များအတွက် သုံးစွဲနေသည်။ စစ်တပ်ခေတ်မီစေရန် တရုတ်၏ကြိုးပမ်းမှုများကို တရုတ်၏အိမ်နီးချင်းများအပြင် အမေရိကန်တို့ကပါ သတိဖြင့်စောင့်ကြည့်နေခဲ့ကြသည်။ တရုတ်ပြည်သူ့တပ်မတော်မှ တပ်ဖွဲ့ဝင်အရေအတွက်အား နှစ်သန်းအထိ ရောက်ရှိစေရန် တပ်ဖွဲ့ဝင် သုံးသိန်းလျှော့ချရေး ရည်မှန်းချက်သည် ပြီးစီးခဲ့ကြောင်း ဝန်ကြီးချုပ်လီခယ်ကျင်းက ပြောကြားခဲ့သည်။

တရုတ်သည် ပြီးခဲ့သောနှစ်တွင် ကာကွယ်ရေးအသုံးစရိတ်ကို ခုနစ်ရာခိုင်နှုန်း၊ ၂၀၁၆ ခုနှစ်တွင် ၇ ဒသမ ၆ ရာခိုင်နှုန်း တိုးမြှင့်သုံးစွဲခဲ့ရာ ခြောက်နှစ်အတွင်း ပထမဆုံးအကြိမ်အဖြစ် တရုတ်ကာကွယ်ရေးအသုံးစရိတ်သည် ၁၀ ရာခိုင်နှုန်းထက် မကျော်သည့်နှစ်များ ဖြစ်ခဲ့သည်။ တရုတ်သည် ပြီးခဲ့သောနှစ်တွင် စစ်တပ်အတွက် ဒေါ်လာ ၁၅၁ ဘီလျံ သုံးစွဲခဲ့ရာ ကမ္ဘာတွင် ကာကွယ်ရေးအသုံး စရိတ် ဒုတိယအများဆုံးဖြစ်ခဲ့သော်လည်း အမေရိကန်၏အသုံးစရိတ် ဒေါ်လာ ၆၀၃ ဘီလျံထက်မူ လေးဆခန့် နည်းပါးနေဆဲဖြစ်ကြောင်း လန်ဒန်အခြေစိုက် ပညာရှင်များအဖွဲ့ International Institute for Strategic Studies က ထုတ်ပြန်ခဲ့သည်။

တရုတ်ကာကွယ်ရေးအသုံးစရိတ်တိုးမြှင့်မှုသည် မကြာသေးမီနှစ်များတွင် နိုင်ငံစီးပွားရေးတိုးတက်မှုနှုန်းနှင့် အကြမ်းဖျင်းအားဖြင့် မတိမ်းမယိမ်းရှိနေခဲ့သည်။ တရုတ်သည် ၂၀၁၇ ခုနှစ်တွင် စီးပွားရေးတိုးတက်မှုသည် ၆ ဒသမ ၉ ရာခိုင်နှုန်းရှိခဲ့ပြီး ၂၀၁၈ ခုနှစ်တွင် ၆ ဒသမ ၅ ရာခိုင်နှုန်းဝန်းကျင် တိုးတက်မည်ဟု ခန့်မှန်းထားကြောင်း အစိုးရက ထုတ်ပြန်ခဲ့သည်။

တရုတ်သည် ပြီးခဲ့သောနှစ်များအတွင်း စတဲ့သ်လ်တိုက်လေယာဉ်များ၊ စစ်သင်္ဘောများ၊ အဆင့်မြင့်လက်နက်များအား စုဆောင်းနေခဲ့သည်။ လုပ်ထုံးလုပ်နည်းအရ ပြောရလျှင် တရုတ်စစ်တပ်သည် မကြာသေးမီနှစ်များအတွင်း စစ်လက်နက်များအား ကိုယ်ပိုင် သုတေသနပြုမှုနှင့် တည်ဆောက်မှုများ နှင့်အတူ တိုးတက်ခဲ့ကြောင်း၊ အမေရိကန်စစ်တပ်နှင့် ကွာဟချက်ကို လျှော့ချရာတွင် အရည်အသွေးများ တိုးတက်လာခဲ့ကြောင်း စင်ကာပူရှိ နန်ယန်းနည်းပညာတက္ကသိုလ်မှ စစ်ရေးကျွမ်းကျင်သူ ဂျိမ်းစ်ချားက ပြောကြားခဲ့သည်။

တရုတ်သည် ပြီးခဲ့သောနှစ်တွင် ပထမဆုံးပြည်တွင်းထုတ် လေယာဉ်တင်သင်္ဘောအား ထုတ်ပြခဲ့ပြီး ယင်းသင်္ဘောသည် J-15 တိုက်လေယာဉ်များအား တင်ဆောင်နိုင်မည်ဟု ဆိုသည်။ ထို့ပြင် ဖျက်သင်္ဘောအမျိုး အစားသစ်တစ်မျိုးကို ထုတ်ဖော်ခဲ့သည်။ တရုတ်သည် အာဖရိကအငူရှိ ဂျီဘောက်တီတွင်လည်း ပထမဆုံးပြည်ပစစ်စခန်းတစ်ခုကိုလည်း ဖွင့်လှစ်ခဲ့သည်။