မတ် ၁ ရက်က မော်စကိုရှိ မာနက်ဇ်ပြပွဲစင်တာတွင် လုပ်ငန်းရှင်များနှင့် ဥပဒေပြုအမတ်များအား သမ္မတပူတင်က မိန့်ခွန်းပြောနေစဉ် (Photo: AFP)

ရုရှား၏ ဆင်းရဲမွဲတေမှု အခြေအနေသည် လက်ခံနိုင်ဖွယ်ရာ မရှိဘဲ လာမည့်ခြောက်နှစ်အတွင်း ထက်ဝက်လျှော့ချရန် ရည်မှန်းထားဟု ရုရှားသမ္မတ ဗလာဒီပူတင်က မတ် ၁ ရက်တွင် ပြောကြားသော နိုင်ငံတော်မိန့်ခွန်းတွင် ပြောကြားခဲ့သည်။

၂၀၀၀ ပြည့်နှစ်တွင် ဆင်းရဲမွဲတေမှု သတ်မှတ်ချက်အောက်တွင် နေထိုင်ရသူ ၄၂ သန်းရှိခဲ့ပြီး ယနေ့အချိန်တွင် ရုရှား သန်း ၂၀ ခန့်သည် ဆင်းရဲမွဲတေမှု သတ်မှတ်ချက်အောက်၌ နေထိုင်နေရကြောင်း ပူတင်က နှိုင်းယှဉ်ပြောကြားခဲ့သည်။ တစ်လလျှင် ဒေါ်လာ ၁၈၀ နှင့် ညီမျှသော ဝင်ငွေရရှိမှုကို ဆင်းရဲမွဲတေသည်ဟု ရုရှားက သတ်မှတ်ထားသည်။

မတ် ၁၈ သမ္မတရွေးကောက်ပွဲပြီးနောက် ကရင်မလင်တွင် နောက်ထပ်ခြောက် နှစ်သက်တမ်းအတွက် ထမ်းဆောင်မည်ဟု သတ်မှတ်ခံထားရချိန်တွင် ပူတင်က မူဝါဒ အခြေပြမိန့်ခွန်းကို ပြောကြားခဲ့ခြင်းဖြစ်သည်။ ရုရှားကို ဦးဆောင်ခဲ့သည်မှာ ၁၆ နှစ် ရှိခဲ့ပြီဖြစ်သော ပူတင်က ယင်းမိန့်ခွန်းတွင် ပြည်တွင်းရေးများကို အဓိကထားခဲ့ပြီး လာမည့်နှစ်များသည် ရုရှားအတွက် အရေးကြီးမည်ဖြစ်ကြောင်း ပြောကြားခဲ့သည်။ ရုရှားပြည်သူတို့၏ဘဝနှင့် ရုရှားနိုင်ငံသားများ၏ အရေးသည် ကိစ္စအရပ်ရပ်အတွက် အခြေခံဖြစ်ရမည်ဖြစ်ကြောင်း ပူတင်က ပြောကြားခဲ့သည်။

အနောက်အုပ်စုနှင့် ဆက်ဆံရေးတင်းမာမှုနှင့် ကမ္ဘာ့ရေနံဈေးနှုန်းကျဆင်းမှုကြောင့် စီးပွားရေးနှေးကွေးနေသော်လည်း ပူတင်ကို ထောက်ခံမှုနှုန်းသည် ၈၀ ရာခိုင်နှုန်းထိ ရှိနေသည်။ ထိပ်တန်းတာဝန်ရှိသူများနှင့် ဥပဒေပြုအမတ်များရှေ့မှောက်တွင် ပြောကြားခဲ့သော ပူတင်က အောင်မြင်သော အနာဂတ် ဖွံ့ဖြိုးမှုအတွက် အခြေခံအုတ်မြစ်ချရန် ရုရှားသည် နည်းပညာ ထိုးဖောက်အောင်မြင်မှုကို လိုအပ်နေကြောင်း ပူတင်က ပြောကြားခဲ့သည်။

ရုရှားပြည်သူတို့၏ လူနေမှုနှင့် စီးပွားရေး တိုးတက်ရန်အတွက် နည်းပညာတိုးတက်ရေးကို ပူတင်က တိုက်တွန်းခဲ့ပြီး နည်းပညာ နောက်ကျကျန်နေခြင်းသည် ရုရှားအတွက် အဓိက ခြိမ်းခြောက်မှုနှင့် အဓိက ရန်သူဖြစ်ကြောင်း ၎င်းက ပြောကြားခဲ့သည်။

ကျန်းမာရေးစောင့်ရှောက်မှုစနစ် တိုးတက်ရန်နှင့် ပျမ်းမျှလူ့သက်တမ်း တိုးတက်ရေးအတွက် ရုရှားသည် အရေးယူ ဆောင်ရွက်မှုများ ဆောင်ရွက်ရမည်ဟု ပူတင်က ပြောကြားခဲ့သည်။ လောလောဆယ်တွင် ရုရှားနိုင်ငံသားများ၏ ပျမ်းမျှသက်တမ်းသည် ၇၃ နှစ်ဖြစ်ပြီး လာမည့် ဆယ်စုနှစ်တွင် ၈၀ ကျော်သို့ ရောက်ရှိရန် ပူတင်က ရည်မှန်းချက်ချခဲ့သည်။

ရုရှား၏ ကြီးမားသော နယ်မြေပိုင်နက်များ ဖွံ့ဖြိုးရေးအတွက် ဆောင်ရွက်ရန် လိုအပ်ကြောင်း ပူတင်က ပြောကြားခဲ့ပြီး လမ်းသစ်များ ဖောက်လုပ်ရေးအတွက် နှစ်ဆတိုး ရင်းနှီးမြှုပ်မည်ဟု ကတိပေးခဲ့သည်။ ထို့ပြင် သယ်ယူပို့ဆောင်ရေး စနစ်သစ်များနှင့် ခေတ်မီဆက်သွယ်ရေးစနစ်များအတွက် ရင်းနှီးမြှုပ်နှံမှုများ ဆောင်ရွက်မည်ဟုလည်း ပူတင်က ပြောကြားခဲ့သည်။

ရုရှားစွန့်စားလုပ်ကိုင်သူများအတွက် အာဏာပိုင်များ၏ ဖိအားများကို စုံစမ်းဖယ်ရှားပေးရန် ပြည်ထဲရေးဝန်ကြီးဌာနအား ပူတင်က တိုက်တွန်းခဲ့ပြီး စီးပွားရေးဖွံ့ဖြိုးမှုကို အားပေးသည့် အခြေအနေတစ်ရပ် ဖန်တီးပေးရန် တောင်းဆိုခဲ့သည်။

Ref: AFP