တောင်ကိုရီးယားက မြောက်ကိုရီးယားနှင့် ဆွေးနွေးမှုများပြုလုပ်ရန် ရှားရှားပါးပါး ကမ်းလှမ်း

၂၀၁၅ ခုနှစ် သြဂုတ် ၉ ရက်က တောင်ကိုရီးယားနိုင်ငံ ပါဂျူရှိစစ်မဲ့ဇုန်ထဲတွင် ပေါက်ကွဲမှုဖြစ်ပွားခဲ့သည့် နေရာအနီး စောင့်ကြပ်နေသော စစ်သားတစ်ဦး (Photo: AP)

မြောက်ကိုရီးယားသည် ၎င်း၏ပထမဆုံး တိုက်ချင်းပစ် ပဲ့ထိန်းဒုံးကျည်ကို စမ်းသပ်ခဲ့ပြီးနောက် မြင့်တက်လာသည့် တင်းမာမှုများကို လျှော့ချရန်အတွက်ရည်ရွယ်ပြီး တောင်ကိုရီးယားက မြောက်ကိုရီးယားနှင့် ရှားရှားပါးပါး စစ်ရေးဆွေးနွေးမှုများပြုလုပ်ရန် ဇူလိုင် ၁၇ ရက်ကကမ်းလှမ်းခဲ့ကြောင်း သိရသည်။

တောင်ကိုရီးယား၏ ငြိမ်းချမ်းရေးသမ္မတ မွန်းဂျေအင်း တက်လာခဲ့ပြီးနောက်ပိုင်း ပထမဆုံးအကြိမ်အနေဖြင့် ယခုကဲ့သို့ကမ်းလှမ်းချက် ထွက်ပေါ်လာခြင်းဖြစ်သည်။ တစ်ချိန်တည်းမှာပင် ဆိုးလ်မြို့ရှိ ကြက်ခြေနီအဖွဲ့ကလည်း ၁၉၅၀-၅၃ ခုနှစ် ကိုရီးယားစစ်ပွဲအတွင်းက ကွဲကွာခဲ့ကြသည့် မိသားစုများ ပြန်လည်ဆုံစည်းရေးအတွက် ဆွေးနွေးရန် သီးခြားဆွေးနွေးပွဲတစ်ခုလုပ်ရန်လည်း အဆိုပြုထားသည်။

တောင်ကိုရီးယား ကာကွယ်ရေးဝန်ကြီးဌာနက နယ်စပ်ရှိ အပစ်အခတ်ရပ်စဲရေး ရွာပန်မန်ဂျွန်တွင် ဇူလိုင် ၂၁ ရက်၌ ဆွေးနွေးပွဲပြုလုပ်ရန် ရည်ရွယ်ထားသည်။ ကြက်ခြေနီအဖွဲ့ကလည်း အဆိုပါနေရာမှာပင် သြဂုတ် ၁ ရက်၌ ဆွေးနွေးပွဲကျင်းပရန် ရည်ရွယ်ထားကြသည်။

အစိုးရဆွေးနွေးပွဲပြုလုပ်ဖြစ်ပါက ယင်းသည် ၂၀၁၅ ခုနှစ် ဒီဇင်ဘာလနောက်ပိုင်း ပထမဆုံးအကြိမ် ကိုရီးယားနိုင်ငံအချင်းချင်း တရားဝင် ဆွေးနွေးပွဲဖြစ်လာမည်ဖြစ်သည်။ ယခင်သမ္မတ ပက်ကွမ်ဟီးကမူ မြောက်ကိုရီးယားဘက်မှ နျူကလီးယားလက်နက် မဖျက်သိမ်းသရွေ့ ထိရောက်သည့်ဆွေးနွေးပွဲကျင်းပရန် ငြင်းဆန်နေခဲ့သည်။

“နယ်စပ်တစ်လျှောက်မှာ စစ်ရေးတင်းမာမှုများကို မြင့်တက်စေတဲ့ ရန်လိုတဲ့အပြုအမူများအားလုံးကို ရပ်တန့်စေဖို့အတွက် အခုလိုမျိုးဆွေးနွေးမှုလုပ်ဖို့ အဆိုပြုလိုက်ရတာ ဖြစ်ပါတယ်” ဟု တောင်ကိုရီးယား ကာကွယ်ရေးဝန်ကြီးဌာနက ထုတ်ပြန်ခဲ့သည်။

ကြက်ခြေနီအဖွဲ့ကလည်း မြောက်ကိုရီးယားဘက်မှ အပြုသဘောဆောင်သည့် တုံ့ပြန်မှုပြန်ရရန် မျှော်လင့်နေပြီး မိသားစုများပြန်လည်တွေ့ဆုံပွဲကို အောက်တိုဘာလအစောပိုင်းတွင် ပြုလုပ်နိုင်ရန်လည်း မျှော်လင့်နေသည်။ ယင်းတွေ့ဆုံပွဲသာ အမှန်တကယ်ဖြစ်လာပါက နှစ်နှစ်အတွင်းပထမဆုံးအကြိမ် ဖြစ်လာမည်ဖြစ်သည်။

“မြောက်ကိုရီးယားအနေနဲ့ ကိုရီးယားကျွန်းဆွယ်မှာ ငြိမ်းချမ်းရေးကို အမှန်တကယ်လိုလားတယ်ဆိုရင် ကျွန်တော်တို့ရဲ့စိတ်ရင်းနဲ့ ကမ်းလှမ်းချက်ကို တုံ့ပြန်သင့်ပါတယ်” ဟု တောင်ကိုရီးယား ပြန်လည်ရင်ကြားစေ့ရေး ၀န်ကြီးချိုမြောင်ဂျွန်က ပြောကြားခဲ့သည်။ မြောက်ကိုရီးယား ပျက်သုဉ်းရေး (သို့မဟုတ်) မြောက်ကိုရီးယားကို သိမ်းသွင်းပြီး နိုင်ငံပေါင်းစည်းရေးတို့အတွက် ကြိုးပမ်းမည်မဟုတ်ကြောင်း ချိုက အလေးပေးပြောကြားခဲ့သည်။ ထို့ပြင် ဖြတ်တောက်ထားသော စစ်ဘက်အရေးပေါ်ဖုန်းလိုင်းအပါအ၀င် ကိုရီးယားနိုင်ငံအချင်းချင်း ဆက်သွယ်ရေးလမ်းကြောင်းများကို ပြန်လည်ထိန်းသိမ်းရန်လည်း ချိုက တိုက်တွန်းခဲ့သည်။

မေလက အာဏာရလာသည့် မွန်းသည် နျူကလီးယားလက်နက် ပိုင်ဆိုင်သော မြောက်ကိုရီးယားနှင့် ဆွေးနွေးပွဲပြုလုပ်ရေးအတွက် နှစ်မြှုပ်လုပ်ကိုင်နေသူဖြစ်သည်။ ဆွေးနွေးရန် ယခုကမ်းလှမ်းချက်များသည် ၁၀ နှစ်တာကာလအတွင်း မြင့်တက်လာသည့် တင်းမာမှုများအား ဖြေလျှော့ရန် ရှားရှားပါးပါးအခွင့်အရေး ဖြစ်လာမည်ဟု ဆီဂျောင်အင်စတီကျူ့မှ လေ့လာသူ ချောင်ဆောင်ချန်ကဆိုသည်။ “မြောက်ကိုရီးယားအနေနဲ့ သူ့ရဲ့လက်နက်စီမံကိန်းတွေကို လက်မလျှော့ဘူးဆိုရင်တောင်မှ ဒီဆွေးနွေးပွဲဟာ အနည်းဆုံးတော့ လက်ရှိပြဿနာတွေကို အရှိန်လျော့စေနိုင်မှာ ဖြစ်ပါတယ်” ဟု ၎င်းကဆိုသည်။                    

Writer: 
Ref: AFP