<

ပြင်သစ်က အငြင်းပွား လူဝင်မှုကြီးကြပ်ရေး ဥပဒေမူကြမ်းကို ထုတ်ပြန်

၂၀၁၇ ခုနှစ် ဒီဇင်ဘာ ၂၁ ရက်က ပါရီတွင် ခိုလှုံခွင့်တောင်းခံသူများအား လက်ခံသည့် စင်တာတစ်ခုအပြင်ဘက်၌ စောင့်ဆိုင်းနေသော ရွှေ့ပြောင်းအခြေချများအား တွေ့ရစဉ် (Photo: AP)

တရားမ၀င် နယ်စပ်ဖြတ်ကျော်မှုများကို ရာဇ၀တ်မှုအဖြစ် သတ်မှတ်ပြီး စီးပွားရေး အကျိုးအမြတ်အတွက် ရွှေ့ပြောင်းအခြေချသူများကို နေရပ်ပြန်ပို့ရန် လုပ်ငန်းစဉ်များ အရှိန်မြှင့်တင်ရေး အကြံပြုထားသည့် အငြင်းပွား လူဝင်မှုကြီးကြပ်ရေးဥပဒေမူကြမ်းကို ပြင်သစ်အစိုးရက ပထမဆုံးအကြိမ် ထုတ်ပြန်ခဲ့သည်။

ယင်းဥပဒေသည် လူထောင်ပေါင်းများစွာအား နေရပ်ပြန်ပို့မှုဖြစ်စေမည်ဟု အာဏာရပါတီမှ ဥပဒေပြုအမတ်အချို့နှင့် လူ့အခွင့်အရေးအဖွဲ့များက ဝေဖန်ခဲ့သော်လည်း ပြင်သစ်အစိုးရက ဥပဒေသစ်သည်  အလုံးစုံ ဟန်ချက်ညီမှုရှိသည်ဟု ဖေဖော်ဝါရီ ၂၁ ရက်တွင် ပြောကြားခဲ့သည်။

လူဝင်မှုကြီးကြပ်ရေးဥပဒေကြမ်းသည်  ဖိနှိပ်မှုတစ်ခုဖြစ်သည်ဟု NGO များက ပြောကြားခဲ့သည်။ သို့သော်လည်း ပြင်သစ်သမ္မတမက်ခရွန်၏  အလယ်အလတ်ဝါဒီ အစိုးရအဖွဲ့က ဥပဒေသစ်သည် ပြင်သစ်၌ ပိုမိုကောင်းမွန်သော ဘ၀ရရန် ကြိုးပမ်းသူများနှင့် စစ်မှန်သည့် ဒုက္ခသည်များကို သီးခြား ခွဲထုတ်ပေးရေးအတွက် ပိုမိုထိရောက်သည့် စနစ်တစ်ခု ဖန်တီးပေးမည်ဖြစ်ကြောင်း အခိုင်အမာပြောကြားခဲ့သည်။

ဂျာမနီ၊ ပြင်သစ်၊ အီတလီ၊ နယ်သာလန်နှင့် ဆွီဒင်ကဲ့သို့သော နိုင်ငံများတွင် အလားတူ လုပ်ငန်းစဉ်များရှိကြောင်း ပြင်သစ် ပြည်ထဲရေးဝန်ကြီး ဂျရတ်ကိုလန်က သတင်းစာရှင်းလင်းပွဲတွင် ပြောကြားခဲ့သည်။ အသက် ၄၀ အရွယ် မက်ခရွန်သည် ယမန်နှစ် မေလက သမ္မတအဖြစ် ရွေးချယ်ခံခဲ့ရပြီးနောက် လူဝင်မှုကြီးကြပ်ရေးပြဿနာသည် ၎င်း၏ သမ္မတတာဝန်တွင် အရေးအကြီးဆုံး တာဝန်တစ်ခုဖြစ်လာခဲ့သည်။

မူဝါဒသစ်သည် လူသားဆန်မှုနှင့် ထိရောက်မှုတို့ကို ဟန်ချက်ညီစွာဆောင်ရွက်ရန် ရည်ရွယ်ကြောင်း မက်ခရွန်က ပြောကြားခဲ့သည်။ ဒုက္ခသည်များအတွက် ခိုလှုံခွင့်ကြိုးပမ်းမှု လုပ်ငန်းစဉ်များ လျင်မြန်စွာဆောင်ရွက်ရန် ဥပဒေသစ်က ဆောင်ရွက်ပေးမည်ဖြစ်ပြီး  ခိုလှုံခွင့်လျှောက်ထားမှု မအောင်မြင်သော ဒုက္ခသည်များသည် ရက် ၉၀ အထိ ထိန်းသိမ်း ခံထားရနိုင်သည်။ ယင်းကဲ့သို့ ထိန်းသိမ်းကာလကို နှစ်ဆတိုးမြှင့်ခဲ့ခြင်းကြောင့် ဒုက္ခ သည်များအား နေရပ်ပြန်ပို့ရန် ပိုမိုလွယ်ကူစေမည်ဖြစ်သည်။ လူဝင်မှုကြီးကြပ်ရေးဥပဒေကြမ်းကို ဧပြီ၌ ပါလီမန်တွင် တင်သွင်းမည်ဖြစ်ပြီး ဆွေးနွေးငြင်းခုံမှုများကို သီတင်းပတ်ပေါင်းများစွာ ဆောင်ရွက်ကြမည်ဖြစ်သည်။ လက်ဝဲများက ဥပဒေကြမ်းသည်ဖိနှိပ်လွန်းသည်ဟု ပြောကြားပြီး လက်ယာစွန်း အတိုက်အခံတို့ကမူ ယင်းဥပဒေကြမ်းသည် ပျော့ပျောင်းလွန်းသည်ဟု ပြောကြားခဲ့သည်။

 

 

February 22, 2018














Copy Protected by Chetan's WP-Copyprotect.