ဖေဖော်ဝါရီ ၂၁ ရက်က Transparency International ဝက်ဘ်ဆိုက်၌ နိုင်ငံအလိုက် အကျင့်ပျက်ခြစားမှု အညွှန်းကိန်းကို ဖော်ပြထားစဉ် (Photo: Transparency International)
နိုင်ငံတကာ ပွင့်လင်းမြင်သာမှုအဖွဲ့ Transparency International က ၂၀၁၇ ခုနှစ်အတွက် အကျင့်ပျက်ခြစားမှု အညွှန်းကိန်းကို ဖေဖော်ဝါရီ ၂၁ ရက်က ထုတ်ပြန်ခဲ့ရာ မြန်မာနိုင်ငံသည် အမှတ် ၃၀ ရရှိပြီး နိုင်ငံပေါင်း ၁၈၀ အနက် အဆင့် ၁၃၀ ၌ရှိကြောင်း သိရသည်။ မြန်မာနိုင်ငံသည် ၂၀၁၆ ခုနှစ်က အဆင့် ၁၃၆ ၌ ရှိခဲ့သောကြောင့် ယခုနှစ်တွင် အဆင့်ခြောက်ဆင့် မြင့်တက်လာသည်ဟု ဆိုနိုင်သည်။
TI အဖွဲ့၏ ယခုနှစ် ထုတ်ပြန်မှုသည် ၎င်းတို့အဖွဲ့၏ ၂၅ နှစ်မြောက် နှစ်ပတ်လည်နေ့ အထိမ်းအမှတ်လည်းဖြစ်သည်။ ၎င်းအဖွဲ့၏ ထုတ်ပြန်ချက်အရ ကမ္ဘာတစ်လွှားတွင် ခြစားမှုတိုက်ဖျက်ရေး ကြိုးပမ်းမှုများ ပြုလုပ်နေကြသော်လည်း နိုင်ငံအများစုသည် ကြိုးပမ်းအားထုတ်မှု လွန်စွာနှေးကွေးလျက်ရှိကြောင်း သိရသည်။ လွန်ခဲ့သည့်ခြောက်နှစ်အတွင်း နိုင်ငံပေါင်းများစွာတို့၌ တိုးတက်မှု မရှိသလောက် နည်းပါးခဲ့သည်ဟုဆိုသည်။
TI ၏ လေ့လာသုံးသပ်မှုအရ စာနယ်ဇင်းများနှင့် အစိုးရမဟုတ်သော အဖွဲ့အစည်းများ (NGOs) များကို ကာကွယ်စောင့်ရှောက်မှု အနိမ့်ဆုံးနိုင်ငံများသည် အကျင့်ပျက်ခြစားမှုနှုန်း အမြင့်မားဆုံး ဖြစ်နေသည်ကိုလည်း တွေ့ရှိရသည်။
ယခုနှစ် အညွှန်းကိန်းတွင် အကျင့်ပျက်ခြစားမှု အနည်းအဆုံးအဖြစ် ထိပ်ဆုံးရရှိသော နိုင်ငံများမှာ နယူးဇီလန်၊ ဒိန်းမတ်၊ ဖင်လန်၊ နော်ဝေ၊ ဆွစ်ဇာလန်နှင့် စင်ကာပူတို့ဖြစ်ကြသည်။
TI က ထုတ်ပြန်သည့် ၂၀၁၇ ခုနှစ် အညွှန်းကိန်းသည် ကျွမ်းကျင်ပညာရှင်များ၏ လေ့လာသုံးသပ်ချက်များနှင့် လုပ်ငန်းရှင်တို့၏ အမြင်များ အပါအဝင် စစ်တမ်းကောက်ယူမှု ၁၃ ခုအပေါ် အခြေခံထားပြီး ခြစားမှု အမြင့်ဆုံးအဖြစ် သုံညဟုသတ်မှတ်ပြီး ခြစားမှု အကင်းစင်ဆုံးအဖြစ် ၁၀၀ ဟု သတ်မှတ်ထားသည်။
၎င်းအပြင် World Justice Project က ထုတ်ပြန်သည့် ၂၀၁၇-၂၀၁၈ တရားဥပဒေစိုးမိုးမှု အညွှန်းကိန်းတွင် မြန်မာနိုင်ငံသည် အမှတ် ၀ ဒသမ ၄၂ ဖြင့် နိုင်ငံပေါင်း ၁၁၃ နိုင်ငံအနက် အဆင့် ၁၀၀ ၌ရှိကြောင်း သိရသည်။
Ref :TI
