သြဂုတ် ၁၂ ရက်က နိုင်ရိုဘီရှိ ဆင်းရဲသားရပ်ကွက် မတ်သာရီတွင် အတိုက်အခံများအား ထောက်ခံသည့်ဆန္ဒပြသူများထံ ချီတက်နေသည့် ကင်ညာ လုံခြုံရေးတပ်ဖွဲ့ဝင်များ (Photo: AFP)

ကင်ညာလက်ရှိ သမ္မတအူဟူရူကင်ညက်တာ ထပ်မံရွေးကောက်ခံရမှုအတွက် ပြင်းပြင်းထန်ထန် အငြင်းပွားမှု ဖြစ်ပွားခဲ့ပြီး နောက်သြဂုတ် ၁၂ ရက်တွင် အတိုက်အခံများ၏ ဆန္ဒပြမှုများအတွင်း ကလေးတစ်ဦး အပါအဝင် လူသုံးဦးသည် သေနတ်ပစ်ခတ်ခံခဲ့ရမှုကြောင့် သေဆုံးခဲ့ကြောင်း သိရသည်။ ရှုံးနိမ့်ခဲ့သော သမ္မတကိုယ်စားလှယ်လောင်း ရွိုင်လာအိုဒင်ဂါက ရွေးကောက်ပွဲတွင် ကြီးမားသော မဲမသမာမှုများရှိခဲ့ကြောင်း အခိုင်အမာထုတ်ပြန်ခဲ့သည့် ယင်းရွေးကောက်ပွဲ ရလဒ်အား အတိုက်အခံများ အင်အားကောင်းသည့်ဒေသများတွင် ဒေါသထွက်ခဲ့ကြပြီးနောက် မြို့တော်နိုင်ရိုဘီရှိ ဆင်းရဲသားရပ်ကွက်များတွင် ဆန္ဒပြမှုများ၊ ရဲများနှင့် ပဋိပက္ခများ ဖြစ်ပွားခဲ့သည်။

မြို့တော်ရှိ ဆင်းရဲသားရပ်ကွက်တစ်ခုဖြစ်သော မတ်သာရီတွင် ဆန္ဒပြမှုများကို လေးထပ်အဆောက်အအုံ လသာဆောင်မှနေ၍ ကြည့်ရှုနေသည့် အသက်ကိုးနှစ်အရွယ် ကောင်လေးတစ်ဦးသည် နောက်ကျောတွင် သေနတ်ကျည်ဆန်ထိမှန်ခဲ့ပြီး သေဆုံးခဲ့ရကြောင်း ၎င်း၏မိသားစုက ပြောကြားခဲ့သည်။ ယင်းအင်အားသုံး တိုက်ခိုက်မှုများသည် ၂၀၀၇ ခုနှစ်သမ္မတရွေးကောက်ပွဲတွင် အငြင်းပွားမှုဖြစ်ပွားခဲ့ပြီးနောက် လူ ၁၁၀၀ ကျော်သေဆုံးပြီး လူ ၆၀၀၀၀၀ ခန့်နေရပ်စွန့်ခွာခဲ့ရသော လူမျိုးရေးအစွဲပြုသည့် နှစ်လကြာ အင်အားသုံးတိုက်ခိုက်မှုများကို ပြန်လည်အမှတ်ရစေခဲ့သည်။

ရွေးကောက်ပွဲရလဒ်များအား သြဂုတ် ၁၁ ရက်တွင် ကြေညာခဲ့ပြီးချက်ချင်း အိုဒင်ဂါ၏ ခြေကုပ်ယူရာနေရာများဖြစ်သော နိုင်ငံအနောက်ပိုင်းရှိ ကီဆူမူကောင်တီနှင့် နိုင်ရိုဘီရှိ ဆင်းရဲသားရပ်ကွက်များတွင် ဆန္ဒပြမှုများဖြစ်ပွားခဲ့ပြီး သေနတ်သံများ ကြားခဲ့ရကာ လမ်းပေါ်တွင် ပစ်ခတ်မှုများ ဖြစ်ပွားခဲ့သည်။

သေနတ်ဒဏ်ရာများဖြင့် လူတစ်ဦးသည် သေဆုံးခဲ့ပြီး အခြားလေးဦးအား ဆေးရုံတင်ပို့ခဲ့ကြောင်း ကီဆူမူကောင်တီ၏ဒေသဆိုင်ရာ ကျန်းမာရေးဌာနအကြီးအကဲ ဒေါက်တာအိုဂျေဝမ်လူစီက ပြောကြားခဲ့သည်။ နိုင်ငံအနောက်တောင်ပိုင်းရှိ ဆိုင်ယာယာမြို့တွင် ဆန္ဒပြမှုတစ်ခုအတွင်း လူတစ်ဦးပစ်သတ်ခံခဲ့ရကြောင်း အမည်မဖော်သောရဲတစ်ဦးက ပြောကြားခဲ့သည်။ မတ်သာရီတွင် လူ ၁၉ ဦးဒဏ်ရာရခဲ့ကြောင်း နယ်စည်းမခြား ဆရာဝန်များအဖွဲ့ (MSF) က Twitter တွင်ထုတ်ပြန်ခဲ့သည်။

သမ္မတရာထူးအတွက် နောက်ဆုံးအကြိမ် ယှဉ်ပြိုင်ခဲ့သည်ဟု ရှုမြင်ခံခဲ့ရသော အသက် ၇၂ နှစ်ရှိ ဝါရင့်အတိုက်အခံ နိုင်ငံရေးသမား အိုဒင်ဂါသည် သမ္မတရွေးကောက်ပွဲကို လေးကြိမ်မြောက် ယှဉ်ပြိုင်ခဲ့ခြင်းဖြစ်သည်။ ၂၀၀၇ ခုနှစ်၊ ၂၀၁၃ ခုနှစ်နှင့် ယခုနှစ် ရွေးကောက်ပွဲတွင်လည်း ၎င်း၏အောင်ပွဲသည် ခိုးယူခံခဲ့ရသည်ဟု ယုံကြည်ရကြောင်း အိုဒင်ဂါက ပြောကြားခဲ့သည်။

ကင်ညာနိုင်ငံရေးသည် လူမျိုးစုကိုလိုက်၍ သဘောထားနက်ရှိုင်းစွာ ကွဲလွဲနေခဲ့ပြီး နိုင်သူအကုန်ယူသည့် ရွေးကောက်ပွဲစနစ်ကလည်း ကာလရှည်ကြာ လူမျိုးစုဆိုင်ရာ တင်းမာမှုများကို ဖြစ်ပေါ်စေခဲ့သည်။

Ref: AFP