တရုတ်နိုင်ငံတောင်ပိုင်းရှိ  မြေအောက်ဘူတာရုံဆောက်လုပ်ရေးလုပ်ငန်းခွင်တစ်ခုတွင် ရေယိုစိမ့်မှုကြောင့် အဓိကလမ်းမကြီးတစ်ခုပြိုကျမှုဖြစ်ပွားခဲ့ပြီးနောက် လူရှစ်ဦး  သေဆုံးပြီး သုံးဦး ပျောက်ဆုံးနေသည်ဟု အာဏာပိုင်များက ဖေဖော်ဝါရီ ၈ ရက်တွင် ပြောကြားခဲ့သည်။

မြေအောက်လုပ်ငန်းခွင်တွင် ရုတ်တရက်ယိုစိမ့်ပြီး ရေလွှမ်းမိုးမှုဖြစ်ပွားခဲ့ပြီး ဖေဖော်ဝါရီ ၇ ရက် ညပိုင်းတွင်ကွမ်တုံ ပြည်နယ်၊ ဖူရှန်မြို့လယ်ကောင်၌ လမ်းသွယ်များစွာ ပါဝင်သည့်လမ်းမကြီး ပြိုကျခဲ့သည်ဟု မြို့အုပ်ချုပ်ရေးအဖွဲ့က ထုတ်ပြန်ခဲ့သည်။

ဆောက်လုပ်ရေးအလုပ်သမား ကိုးဦးကို  ကယ်ဆယ်ထားကြောင်း၊ ကယ်ဆယ်ရေး နှင့် ပြန်လည်ထူထောင်ရေးအလုပ်ကို လုပ်ဆောင်နေဆဲဖြစ်ကြောင်း ကြေညာချက်တွင် ဖော်ပြခဲ့သည်။ သေဆုံးသူနှင့် ပျောက်ဆုံးနေသူများသည် ဆောက်လုပ်ရေးအလုပ်သမားများ ဟုတ်၊မဟုတ် ရှင်းရှင်းလင်းလင်း  မထုတ်ပြန်ခဲ့ပေ။

ပြိုကျခဲ့သော အကျယ်အဝန်းသည် ဘတ်စကတ်ဘောကစားကွင်းနှစ်ခုစာ ကျယ်ပြီး အနက်သည် ခြောက်မီတာမှ ခုနစ်မီတာ( ပေ ၂၀ မှ ၂၃ ပေ)အထိရှိသည်ဟု အစိုးရသတင်းစာ China Daily က ဖော်ပြခဲ့သည်။

ဘေးကင်းလုံခြုံရေးစည်းမျဉ်းစည်း ကမ်းများပြဋ္ဌာန်းမှုအားနည်းသည့် တရုတ် နိုင်ငံတွင် လုပ်ငန်းခွင်ဆိုင်ရာ မတော်တဆမှုများဖြစ်ပွားနေကြဖြစ်သည်။ ၂၀၁၇ ခုနှစ်တွင် လုပ်ငန်းခွင်၌ သေဆုံးသူ ၃၈,၀၀၀ ရှိသည်ဟု အစိုးရထုတ်ပြန်သည့် စာရင်းအင်းများတွင် ဖော်ပြခဲ့သည်။