အိန္ဒိယက နိုင်ငံ၏အဆင်းရဲဆုံးလူ သန်း ၅၀၀ အတွက် ကမ္ဘာ့အကြီးဆုံး ကျန်းမာရေးစောင့်ရှောက်မှု အစီအစဉ်ကို ကြေညာ

အိန္ဒိယက နိုင်ငံ၏အဆင်းရဲဆုံးလူ သန်း ၅၀၀ အတွက် ကမ္ဘာ့အကြီးဆုံး ကျန်းမာရေးစောင့်ရှောက်မှု အစီအစဉ်ကို ကြေညာ
Published 2 February 2018

၂၀၁၇ ခုနှစ် အောက်တိုဘာ ၁၇ ရက်က တီလန်ဂါနာပြည်နယ်ရှိ ဆေးရုံတစ်ရုံတွင် မွေးကင်းစကလေးများအား စောင့်ရှောက်ထားမှုကို တွေ့ရစဉ် (Photo: AFP)

အိန္ဒိယအစိုးရက ဖေဖော်ဝါရီ ၁ ရက်တွင် နိုင်ငံ၏ အဆင်းရဲဆုံး လူသန်း ၅၀၀ အတွက် ကျန်းမာရေးစောင့်ရှောက်မှု အစီအစဉ်တစ်ရပ်ကို ကြေညာခဲ့သည်။ အထွေထွေ ရွေးကောက်ပွဲမတိုင်မီ တင်သွင်းသည့်နောက်ဆုံး ဘတ်ဂျက်ဖြစ်သော ယခုနှစ်ဘတ်ဂျက်တွင် အိန္ဒိယ၏ အဆင်းရဲဆုံးသော မိသားစုများသည် ဆေးရုံတွင် တစ်နှစ်လျှင် ၇၈၅၅ ဒေါ်လာ (ရူပီး ၅၀၀၀၀၀) အထိ ကျန်းမာရေး စောင့်ရှောက်မှု ခံယူနိုင်မည်ဟု ဘဏ္ဍာရေးဝန်ကြီး အာရွန်ဂျိုက်တလေက ပြောကြားခဲ့သည်။

အိန္ဒိယသည် ပြည်သူ့ကျန်းမာရေး စောင့်ရှောက်မှုအတွက် ဂျီဒီပီ၏ တစ်ရာခိုင်နှုန်းကျော်သာ သုံးစွဲပြီး ကမ္ဘာတွင် ကျန်းမာရေးစောင့်ရှောက်မှု အသုံးစရိတ် အနည်းဆုံး နိုင်ငံတစ်နိုင်ငံဖြစ်သည်။ ယခုအခါ အိန္ဒိယအစိုးရက ၂၀၂၅ ခုနှစ်မတိုင်မီ ကျန်းမာရေး စောင့်ရှောက်မှုစရိတ်ကို ဂျီဒီပီ၏ ၂ ဒသမ ၅ ရာခိုင်နှုန်းအထိ မြှင့်တင်ရန် ရည်မှန်းထားသည်။

လတ်တလောတွင် အိန္ဒိယအစိုးရသည် ဆင်းရဲသောမိသားစုများအတွက် ကျန်းမာရေးစောင့်ရှောက်မှုစရိတ် ရူပီး ၃၀၀၀၀ ထောက်ပံ့ပေးနေသည်။ သို့သော်လည်း ထိုပမာဏသည် ကျန်းမာရေးစရိတ်များအတွက် မလောက်မငှ ဖြစ်နေသည်။ အိန္ဒိယအစိုးရသည် အားလုံးအတွက် လွှမ်းခြုံသော ကျန်းမာရေးစောင့်ရှောက်မှု စနစ်တစ်ခုကို တဖြည်းဖြည်းချင်း တိုးတက်ရရှိမည်ဟု အာရွန်ဂျိုက်တလေက ပါလီမန်ဘတ်ဂျက် မိန့်ခွန်းတွင် ပြောကြားခဲ့သည်။

အိန္ဒိယ၏ အဆင်းရဲဆုံးလူ သန်း ၅၀၀ အတွက် နိုင်ငံတစ်ဝန်းတွင် အာမခံအစီအစဉ် ဆောင်ရွက်သွားမည်ဖြစ်ပြီး ရန်ပုံငွေ လုံလုံလောက်လောက် ထောက်ပံ့သွားမည်ဖြစ်ကြောင်း ဘဏ္ဍာရေးဝန်ကြီးက ပြောကြားခဲ့သည်။ အိန္ဒိယ၏ ဆင်းရဲသူများက အားကိုးနေရသည့် ဒေသန္တရ ကျန်းမာရေးဌာနများ တိုးတက်စေရန်အတွက် ဒေါ်လာ သန်း ၁၉၀ နီးပါး သုံးစွဲရန် လျာထားထားကြောင်း ၎င်းက ထပ်မံပြောကြားခဲ့သည်။

လူဦးရေ ၁ ဒသမ ၂၅ ဘီလျံရှိသော အိန္ဒိယသည် ဆရာဝန် လုံလုံလောက်လောက် မရှိဘဲ ပြည်သူ့ဆေးရုံများ၏ ဝန်ဆောင်မှု ပေးနိုင်စွမ်းသည် အဆုံးစွန်သို့ ရောက်ရှိနေပြီဖြစ်သည်။ အသေးစား ကုသမှုများအတွက်ပင် လူနာများသည် အကြာကြီး စောင့်ဆိုင်းရသည်။ ထို့ပြင် ပုဂ္ဂလိက ဆရာဝန်နှင့် ပြသပါက တစ်ကြိမ်လျှင် ၁၅ ဒေါ်လာ (ရူပီး ၁၀၀၀) ကုန်ကျနိုင်သည်။ တစ်ရက်လျှင် ဝင်ငွေနှစ် ဒေါ်လာအောက်သာရရှိသော ဆင်းရဲသူသန်း ပေါင်းများစွာအတွက် ထိုပမာဏသည် များပြားသောကုန်ကျမှုဖြစ်သည်။

ဆေးရုံများတွင် ကျန်းမာရေးစောင့်ရှောက်မှု ပြည့်ဝစွာရရှိရန်အတွက် အိန္ဒိယ ပြည်သူသန်းပေါင်းများစွာသည် ပိုင်ဆိုင်မှုများ ရောင်းချရခြင်း၊ ငှားရမ်းရခြင်းတို့ ဆောင်ရွက်နေရသည်ကို အစိုးရက အလွန်စိုးရိမ်ကြောင်း ဂျိုက်တလေက ပြောကြားခဲ့သည်။

အိန္ဒိယတွင် ဆရာဝန် ၈၄၀၀၀၀ ခန့်သာရှိပြီး လူ ၁၆၇၄ ဦးလျှင် ဆရာဝန်တစ်ဦးနှုန်းသာရှိသည်။ ထိုပမာဏသည် လူ ၁၀၀၀ လျှင် ဆရာဝန်တစ်ဦးနှုန်း ရှိရမည်ဟု ကမ္ဘာ့ကျန်းမာရေးအဖွဲ့က အကြံပြုထားသည်ထက် နိမ့်ကျနေသည်။ ဝန်ကြီးချုပ် နရင်ဒရာမိုဒီသည် အိန္ဒိယ၏ အဆင်းရဲဆုံးသူများအား ကာကွယ်ရန် အားလုံးအတွက် ကျန်းမာရေး စောင့်ရှောက်မှုအစီအစဉ် ဆောင်ရွက်ပေးမည်ဟု ၂၀၁၄ ခုနှစ် ရွေးကောက်ပွဲကတိတွင် ထည့်သွင်း အာမခံထားသည်။

Ref: AFP

Most Read

Most Recent