ဗီယက်နမ်တွင် ထင်ရှားသောတက်ထိုးစစ်ဆင်နွှဲမှု အနှစ် ၅၀ ပြည့်အခမ်းအနား ကျင်းပ

ဗီယက်နမ်တွင် ထင်ရှားသောတက်ထိုးစစ်ဆင်နွှဲမှု အနှစ် ၅၀ ပြည့်အခမ်းအနား ကျင်းပ
Published 1 February 2018

 

ဇန်နဝါရီ ၃၁ ရက်က ဟိုချီမင်းမြို့တွင် တက်ထိုးစစ်ဆင်မှု အနှစ် ၅၀ ပြည့် အခမ်းအနားသို့ တက်ရောက်လာသည့် စစ်ပြန်များ (Photo: AFP)

ဗီယက်နမ်စစ်ပွဲအား အလှည့်အပြောင်းဖြစ်စေခဲ့သော ထင်ရှားသည့်တက်ထိုးစစ်ဆင်နွှဲမှု အနှစ် (၅၀) ပြည့်အခမ်းအနားအား ဗီယက်နမ်တွင် ဇန်နဝါရီ ၃၁ ရက်၌ကျင်းပခဲ့ကြသည်။

၁၉၆၈ ခုနှစ်တွင် တက်နှစ်သစ်ကူးမတိုင်မီ ကွန်မြူနစ်မြောက်ဗီယက်နမ်တပ်ဖွဲ့ဝင်များသည် အံ့အားသင့်ဖွယ် ထိုးစစ်ဆင်နွှဲခဲ့ပြီး တောင်ဗီယက်နမ်ရှိ မြို့နှင့်စခန်းပေါင်း ၁၀၀ ကျော်အား ပစ်မှတ်ထားတိုက်ခိုက်ခဲ့ခြင်းဖြစ်သည်။ ယင်းထိုးစစ်သည် နောက်ဆုံးတွင် အမေရိကန်ကို အကျအဆုံးများသော ယင်းစစ်ပွဲမှ ရုပ်သိမ်းစေရန်ဖြစ်စေခဲ့သည်။ ယင်းအချိန်ကမူ ဟနွိုင်းအတွက် စစ်ဘက်ဆိုင်ရာ ကပ်ဘေးတစ်ခုဖြစ်ခဲ့ပြီး ခန့်မှန်းခြေတပ်ဖွဲ့ဝင် ၅၈၀၀၀ သေဆုံးခဲ့ရသည်။

ဇန်နဝါရီ ၃၁ ရက်က ဟိုချီမင်းမြို့၌  ကျင်းပခဲ့သောအခမ်းအနားတစ်ခုတွင် စစ်သားများနှင့် လယ်သမားများပုံစံဝတ်ဆင်ထားသော ဖျော်ဖြေသူများက ဖြေဖျော်ခဲ့ကြပြီး အလံလွှမ်းထားသည့် ကချေသည်များနှင့် အနီနှင့်ရွှေရောင်ဝတ်ထားသည့် ကိုယ်ခံပညာသရုပ်ပြသူများက ဖျော်ဖြေမှုမျိုးစုံ ပြုလုပ်ခဲ့ကြသည်။ ရဲဘော်ရဲဘက်များ ဆုံးရှုံးခဲ့ရပြီးနောက် ပြင်းပြင်းထန်ထန်တိုက်ခိုက်ခဲ့ရသည့် ယင်းတိုက်ပွဲအား ပြန်ပြောင်းအောက်မေ့သော အခမ်းအနားသို့ စစ်ပြန်တချို့ကလည်း တက်ရောက်ခဲ့ကြသည်။

အသက် ၇၅ နှစ်ရှိ စစ်ပြန်တစ်ဦးဖြစ်သူ ငုယင်ဗန်ဒူက ၎င်းတို့သည် ရန်သူများအား ကျည်ကုန်သည်အထိ ခုခံခဲ့ကြကြောင်း၊ သေနတ်များအားထားခဲ့ပြီး ဆုတ်ခွာခဲ့ကြကြောင်း၊ တိုက်ပွဲတွင်သေဆုံးခဲ့သော ရဲဘော်ရဲဘက်ရှစ်ဦး၏ အလောင်းများကို မတွေ့ရတော့ကြောင်း ပြောကြားခဲ့သည်။

တက်ထိုးစစ်ဆင်မှုအား အမှတ်ရမှုသည် ဗီယက်နမ်တွင် ခံစားမှုရောထွေးနေကြပြီး အထူးသဖြင့် တောင်ဗီယက်နမ်စစ်သားဟောင်းများက မြို့တော်ဟနွိုင်းတွင် ကျင်းပသောအခမ်းအနားများကို သဘောမတူကြပေ။ သို့သော် တာဝန်ရှိသူများကမူ ဇန်နဝါရီ ၃၁ ရက်အခမ်းအနား၌ ယင်းစစ်ပွဲ၏အမှောင်ခြမ်းများအား ဖော့ပြောထားပြီး သူရဲကောင်းဆန်သောစွန့်လွှတ်မှုကို အမှတ်ရမှုအဖြစ်သာ ပုံဖော်ခဲ့သည်။

၁၉၆၈ ခုနှစ် ဇန်နဝါရီတွင် မြောက်ဗီယက်နမ်စစ်သား ၈၀၀၀၀ ကျော်နှင့် ဗီယက်ကောင်းတိုက်ခိုက်ရေးသမားများသည် တောင်ဗီယက်နမ်မြို့တော်ဟောင်း ဆိုင်ဂုံ၊ ဟူနှင့် ဟိုချီမင်းမြို့ စသည့်အဓိကမြို့များ အပါအဝင် နေရာအများအပြားကို တစ်ပြိုင်နက်တည်း တိုက်ခိုက်ခဲ့ကြခြင်းဖြစ်သည်။ အမေရိကန်နှင့် ၎င်း၏မဟာမိတ် တောင်ဗီယက်နမ်က ကွန်မြူနစ်ရန်သူများအား နောက်ဆုံးတွင် ပြန်လည်တိုက်ထုတ်နိုင်ခဲ့သော်လည်း ယင်းထိုးစစ်ကြောင့် အမေရိကန်တွင် စစ်ဆန့်ကျင်ရေးလှုပ်ရှားမှုအား အရှိန်အားကောင်းစေပြီး နောက်နှစ်အနည်းငယ်အကြာတွင် ယင်းစစ်ပွဲမှနုတ်ထွက်ရန် နိုင်ငံရေးသမားများကို ဆွဲဆောင်နိုင်ခဲ့သည်။

ဗီယက်နမ်တို့အကြား အမေရိကန်စစ်ပွဲဟု လူသိများသော ဗီယက်နမ်စစ်ပွဲတွင် ခန့်မှန်းခြေ အရပ်သားသုံးသန်းခန့်နှင့်အတူ မြောက်ဗီယက်နမ်တိုက်ခိုက်ရေးသမား ၂ ဒသမ ၅ သန်း၊ အမေရိကန်တပ်ဖွဲ့ဝင် ၅၈၀၀၀ ခန့် သေဆုံးခဲ့ရသည်။ ခန့်မှန်းခြေ ဗီယက်နမ်စစ်သား ၃၀၀၀၀၀ ၏အလောင်းများ ပျောက်ဆုံးနေဆဲဖြစ်သည်။

Most Read

Most Recent