၂၀၁၃ ခုနှစ် မတ် ၅ ရက်က ပါရီတွင် အီးစီးကရက်သောက်နေသူတစ်ဦးကို တွေ့ရစဉ် (Photo: AFP)
အီးစီးကရက်မှအငွေ့သည် ဆေးရွက်ကြီးအငွေ့ထက် ကင်ဆာဖြစ်နိုင်သော ကာစီနိုဂျင်ပါဝင်မှုနည်းသော်လည်း အီးစီးကရက်သောက်သုံးခြင်းသည် ဒီအန်အေပျက်စီးခြင်းကို ဦးတည်စေသဖြင့် ကင်ဆာဖြစ်နိုင်ခြေကို မြင့်တက်စေနိုင်သည်ဟု အမေရိကန်လေ့လာမှုတစ်ခုက တွေ့ရှိခဲ့သည်။
သို့သော် အမျိုးသားသိပ္ပံအကယ်ဒမီမှထုတ်ပြန်သည့် ထိုလေ့လာမှုတွင် အီးစီးကရက်ကြောင့် ကင်ဆာဖြစ်နိုင်ခြေနှင့်သာ မန်စီးကရက်တို့၏ ကင်ဆာဖြစ်နိုင်ခြေတို့ကိုမူ နှိုင်းယှဉ်ပြထားခြင်းမရှိခဲ့ပေ။
ဓာတ်ခွဲခန်းထဲတွင် ကြွက်များကို စမ်းသပ်ချက်အရ အီးစီးကရက်မီးခိုးနှင့်ထိတွေ့ခဲ့သော ကြွက်တို့သည် စစ်ထုတ်ထားသည့် လေကိုရှူရှိုက်ထားသည့် ကြွက်တို့ထက် နှလုံး၊ အဆုတ်၊ ဆီးအိမ်တို့၌ ဒီအန်အေပျက်စီးမှု ပိုမိုများပြားသည်ကို တွေ့ရှိခဲ့ရသည်။
လူ၏ အဆုတ်နှင့်ဆီးအိမ်မှဆဲလ်များသည်လည်း နီကိုတင်းဓာတ်၊ နီကိုတင်းမှ ဆင်းသက်လာသည့် nitrosamineketone (NNK) တို့နှင့်ထိတွေ့ပါက အလားတူရလဒ်များထွက်ပေါ်သည်ကို တွေ့ရသည်။ ထိုဓာတ်များနှင့် ထိတွေ့ထားသည့် ဆဲလ်များသည် ပုံမှန်ဆဲများထက် ပိုမိုပြောင်းလဲနိုင်ခြေရှိကာ ကင်ဆာဖြစ်နိုင်ကြောင်း သိရသည်။
“အီးစီးကရက်ရဲ့အငွေ့ဟာ ဆေးရွက်ကြီးအငွေ့ထက် ကင်ဆာဖြစ်နိုင်ခြေနည်းပါတယ်။ ဒါပေမဲ့ အီးစီးကရက်သောက်သူတွေဟာ မသောက်သူတွေနဲ့ နှိုင်းယှဉ်လိုက်ရင်တော့ အဆုတ်နဲ့ ဆီးအိမ်ကင်ဆာ၊ နှလုံးရောဂါဖြစ်ပွားနိုင်ခြေဟာ ပိုပြီးမြင့်တက်နေပါတယ်” ဟု နယူးယောက်တက္ကသိုလ်၏ သဘာဝပတ်ဝန်းကျင်းဆိုင်ရာ ဆေးဝါးအင်စတီကျူမှ မွန်းရှောင်တန်ဦးဆောင်သည့် လေ့လာမှုအရသိရသည်။
ပြင်ပမှကျွမ်းကျင်သူများကမူ အီးစီးကရက်သောက်သုံးခြင်း၏ အန္တရာယ်ဖြစ်နိုင်မှုအစစ်အမှန်တို့ကို ဖော်ထုတ်ရေးအတွက် လုပ်ဆောင်ရန် အများကြီးလိုအပ်နေသေးသည်ဟု ဆိုကြသည်။
အီးစီးကရက်သောက်သုံးခြင်းသည် စီးကရက်သောက်သုံးမှုထက် အန္တရာယ်နည်းသော်လည်း လူငယ်များတွင် စွဲလမ်းမှုကို ဖြစ်ပေါ်စေနိုင်သည်ဟု ယခုလအစောပိုင်းက အမေရိကန်အမျိုးသားသိပ္ပံအကယ်ဒမီကပင် ထုတ်ပြန်သည့် ကျယ်ပြန့်ပြည့်စုံသည့် သုံးသပ်ချက်တစ်ခုတွင် ဖော်ပြထားသေးသည်။
မည်သို့ပင်ဖြစ်စေ အီးစီးကရက်သောက်သုံးခြင်း အလေ့အထ၏ အန္တရာယ်ဖြစ်စေနိုင်မှုကို ယခုတိုင် တိတိကျကျမသိရသေးပေ။ နီကိုတင်းအရည်ပါဝင်သည့် ဘတ်ထရီအသုံးပြုသော ကိရိယာဖြစ်သော အီးစီးကရက်ကို သောက်သုံးနေသည့် အမေရိကန် ၁၈ သန်းရှိနေကြောင်း သိရသည်။
