ဇန်နဝါရီ ၃၁ ရက်က မနီလာတောင်ဘက် လီဂတ်ပီမြို့တွင် လထွက်လာမှုကို ရိုက်ကူးထားသော ဓာတ်ပုံ (Photo: AFP)
အပြာရောင်လ၊ စူပါမွန်းနှင့်လအပြည့်ကြတ်ခြင်းတို့ ပေါင်းစပ်ထားသော ရှားပါးလဖြစ်စဉ်သုံးခုကြောင့် ကမ္ဘာ့နေရာအများအပြား၌ ဧရာမကြက်သွေးရောင်သန်းနေသောလကို ဇန်နဝါရီ ၃၁ ရက်တွင် မြင်တွေ့ခဲ့ကြရသည်။
လသည် ကမ္ဘာ၏အရိပ်အောက်သို့ ဖြတ်သန်းသွားပြီး အနီရောင်ပြောင်းသွားချိန်တွင် ‘နီပြာစူပါမွန်း’ ဟု နာဆာကစကားလုံးထွင် လိုက်သည့်မြင်ကွင်းသည် အမေရိကန်ပြည်ထောင်စု အနောက်ပိုင်းတွင် အရုဏ်ဦးကောင်းကင်ကို လှပစေလိမ့်မည်ဖြစ်သည်။
“မိုးလေဝသကောင်းရင်တော့ အနောက်ကမ်းရိုးတန်း၊ အလက်စကာနဲ့ဟာဝိုင်ယီတို့ဟာ လှပတဲ့လအပြည့်ကြတ်တဲ့မြင်ကွင်းကို အစအဆုံးမြင်တွေ့ကြရပါလိမ့်မယ်’ ဟု နာဆာရှိ လကျွမ်းကျင်ပညာရှင် ဂေါ်ဒန်ဂျွန်ဆင်က ပြောကြားသည်။
လသည်ကမ္ဘာ့အနောက်ခြမ်းတွင် ထွက်ပေါ်လာချိန် သြစတြေးလျနှင့်အာရှတို့အပါအဝင် ကမ္ဘာ၏အခြားသောနေရာဒေသများကလည်း ညဘက်တွင်လကြတ်ခြင်းကို မြင်တွေ့ကြရမည်ဖြစ်သည်။
လတစ်လ၏ ဒုတိယမြောက်လပြည့်တွင် နောက်ဆုံးအကြိမ် လအပြည့်ကြတ်မှုသည် ၁၉၈၂ ခုနှစ်ဒီဇင်ဘာ ၃၀ ရက်တွင်ဖြစ်ပေါ်ခဲ့သည်။ ယင်းအချိန်က လအပြည့်ကြတ်သည့် ဖြစ်စဉ်ကို ဥရောပ၊ အနောက်အာရှနှင့် အာဖရိကတို့တွင် ဒေသစံတော်ချိန်အတိုင်း မြင်တွေ့ခဲ့ကြရသည်။
အမေရိကန်နှင့်မြောက်အမေရိကတို့က မြင်တွေ့ရသည့်နောက်ဆုံးအကြိမ် လပြာအပြည့်ကြတ်မှုဖြစ်စဉ်သည် ၁၈၆၆ ခုနှစ် မတ် ၃၁ ရက်တွင်ဖြစ်ပျက်ခဲ့သည်။
