အကျင့်ပျက်ခြစားမှု စုံစမ်းစစ်ဆေးမှုတွင် ဆမ်ဆောင်းဆက်ခံမည့်သူ ဖမ်းဆီးခံရ

ဖေဖော်ဝါရီ ၁၆ ရက်က ဆိုးလ်ရှိ ဗဟိုခရိုင်တရားရုံးမှ ထွက်ခွာလာသော ဆမ်ဆောင်း ဆက်ခံမည့်သူ လီဂျဲယောင် (ယာ) ကို တွေ့ရစဉ် (Photo: AFP)

တောင်ကိုရီးယားသမ္မတ ပက်ကွမ်ဟီးအား စွပ်စွဲပြစ်တင်မှုအဆို ကြုံတွေ့စေခဲ့သော နိုင်ငံရေး အကျင့်ပျက်ခြစားမှုအရှုပ်တော်ပုံ နှင့် ဆက်နွှယ်၍ တောင်ကိုရီးယား အကြီးဆုံး လုပ်ငန်းစုကြီး ဆမ်ဆောင်းကို ဆက်ခံမည့်သူသည် လာဘ်ထိုးမှုနှင့်အခြားစွဲချက်များဖြင့် ဖေဖော်ဝါရီ ၁၇ ရက်တွင် ဖမ်းဆီးခံခဲ့ရကြောင်း သိရသည်။ ဖခင်ဖြစ်သူ နာမကျန်း ဖြစ်နေစဉ် အီလက်ထရွန်နစ် မိသားစုလုပ်ငန်း ကုမ္ပဏီကြီးကို ကြီးကြပ်နေရသည့် ဒုတိယဥက္ကဋ္ဌ လီဂျဲယောင်အား ခရိုင်တရားရုံးတစ်ရုံးက သက်သေ အထောက်အထားသစ်များအရ ဖမ်းဝရမ်း ထုတ်ရန် အတည်ပြုခဲ့ပေးခြင်းဖြစ်ကြောင်း သိရသည်။ လီသည် နိုင်ငံရေးဆိုင်ရာ မျက်နှာသာပေးမှု ရရှိနိုင်ရန်အတွက် သမ္မတပက်၏ လျှို့ဝှက်လူယုံအား ဒေါ်လာ သန်း ၄၀ နီးပါး လာဘ်ထိုးခဲ့သည်ဟု  အခြား စွပ်စွဲချက်များလည်း ရင်ဆိုင်နေရသည်။

ယင်းဖမ်းဆီးမှုက အီလက်ထရွန်နစ် ကော်ပိုရေးရှင်း ကုမ္ပဏီကြီး၏ ပုံရိပ်ကို ထပ်မံ ထိုးနှက်ချက်ဖြစ်ခဲ့ပြီး ကုမ္ပဏီ၏ ရှယ်ယာများသည် နံနက်အစောပိုင်း ရောင်းဝယ်မှုတွင် ၁ ဒသမ ၅ ရာခိုင်နှုန်းခန့် ကျဆင်းခဲ့ပြီးနောက် ကုမ္ပဏီက ချင့်ချင့်ချိန်ချိန် တုံ့ပြန် သွားမည်ဖြစ်ကြောင်း ထုတ်ပြန်ခဲ့သည်။

လီအား ဖမ်းဝရမ်း ထုတ်သင့်၊ မသင့်အား တရားသူကြီးက စဉ်းစား ချင့်ချိန်နေချိန်တွင် ဖေဖော်ဝါရီ ၁၆ ရက်၌ တရားရုံးသို့ လာရောက်လာခဲ့ပြီးနောက် လီသည် ထိန်းသိမ်းရေး စင်တာ၌ ထိန်းသိမ်းခံခဲ့ရပြီးဖြစ်သည်။ လာမည့်လ အနည်းငယ်အတွင်း စတင် ဖွယ်ရှိသော ရုံးတင် စစ်ဆေးမှုအား ခံယူရန် စောင့်ဆိုင်းနေစဉ် လီသည် စစ်ဆေးမေးမြန်းမှု ခံယူရမည်ဖြစ်ကြောင်း သိရသည်။ ဆမ်ဆောင်းအုပ်စု ဥက္ကဋ္ဌ လီကန်ဟီး၏သားဖြစ်သူ လီသည် ယင်းအကျင့်ပျက်ခြစားမှု အရှုပ်တော်ပုံနှင့် ပတ်သက်၍ ကြိမ်ဖန်များစွာ စစ်ဆေးမှု ခံရပြီး ဖြစ်သည်။

အသက် ၄၈ နှစ်ရှိ လီသည် ပြီးခဲ့သောလတွင် ၎င်းအား ဖမ်းဝရမ်းထုတ်ရန်အတွက် အစိုးရရှေ့နေများ၏ကြိုးပမ်းမှုမှ သီသီကလေး လွတ်မြောက်ခဲ့သည်။ သို့သော် ယင်းရှေ့နေများက ပြီးခဲ့သော သီတင်းပတ်များအတွင်း သက်သေ အထောက်အထားသစ်များ စုဆောင်းခဲ့ပြီး လီအား ဖမ်းဝရမ်း ထုတ်နိုင်ရန်အတွက် ဖေဖော်ဝါရီ ၁၄ ရက်တွင် ဒုတိယအကြိမ်မြောက် ကြိုးပမ်းခဲ့သည်။ ယခုဖမ်းဆီးခံခဲ့ရမှုကြောင့် တောင်ကိုရီးယား စီးပွားရေး၏ အဓိက အစိတ်အပိုင်းတစ်ခုဖြစ်သော ဆမ်ဆောင်းကုမ္ပဏီ၏ ပုံရိပ်သည် ကမ္ဘာလုံးဆိုင်ရာ အမှတ်တံဆိပ်အဖြစ် ရေတိုကာလတွင် ထိုးနှက်ချက်တစ်ခု ဖြစ်လာမည်ဖြစ်ကြောင်း HMC Investment Securities မှ သုတေသီ ဂရက်ရိုက သုံးသပ်ခဲ့သည်။

ဆမ်ဆောင်းက ရှုပ်ထွေးမှုရှိသော ပြန်လည်တည်ဆောက်မှု ပြုလုပ်ရန် ကြိုးပမ်းနေသည့်အချိန်တွင် ကုမ္ပဏီအကြီးအကဲတစ်ဦး ပထမဆုံးအကြိမ် ဖမ်းဆီးခံခဲ့ရမှုကြောင့် ကုမ္ပဏီသည် ပြည်ပ၌ လုပ်ငန်းခွဲများ ပေါင်းစပ်ခြင်းနှင့် ၀ယ်ယူခြင်းကဲ့သို့သော ရေရှည် ရင်းနှီးမြှုပ်နှံမည့် အစီအစဉ်များ ပြုလုပ်ခြင်းကို ရှောင်ကြဉ်ဖွယ်ရှိကြောင်း IBK Investment Securities မှ လီဆန်ဝူက ပြော ကြားခဲ့သည်။                               

 

Writer: 
Ref: AFP