မက္ကဆီကို နယ်စပ်တံတိုင်းတိုးချဲ့ရန် ထရန့်အစိုးရက ဒေါ်လာ ၁၈ ဘီလျံတောင်းခံ

မက္ကဆီကို နယ်စပ်တံတိုင်းတိုးချဲ့ရန် ထရန့်အစိုးရက ဒေါ်လာ ၁၈ ဘီလျံတောင်းခံ
Published 7 January 2018

၂၀၁၇ ခုနှစ် ဇန်နဝါရီ ၂၆ ရက်က အမေရိကန်နှင့် မက္ကဆီကိုကြား နယ်စပ်တစ်နေရာအား ဒရုန်းဖြင့် ရိုက်ကူးထားသော ဓာတ်ပုံ(Photo - AFP)

ထရန့်အစိုးရက လာမည့် ၁၀ နှစ်အတွင်း မက္ကဆီကိုနှင့် နယ်စပ်တစ်လျှောက် နယ်စပ်တံတိုင်း တိုးချဲ့ရန်အတွက် ဒေါ်လာ ၁၈ ဘီလျံ သုံးစွဲရန် အဆိုပြုခဲ့သည်။

အကောက်ခွန်နှင့် နယ်စပ်ကာကွယ်ရေး၏ အဆိုပြုချက်တွင် ၂၀၂၇ ခုနှစ် စက်တင်ဘာမတိုင်မီ တံတိုင်းကို ၃၁၆ မိုင် (၅၀၅ ကီလိုမီတာ) ထပ်တိုးချဲ့ရန် တောင်းဆိုခဲ့ရာ စုစုပေါင်း မိုင် ၉၇၀ (၁,၅၅၂ ကီလိုမီတာ) သို့မဟုတ် နယ်စပ်၏ ထက်ဝက်နီးပါးခန့်အထိ လွှမ်းခြုံနိုင်မည်ဟု နယ်စပ်တံတိုင်းဆောက်လုပ်မှု စီမံကိန်းနှင့်နီးစပ်သည့် အမေရိကန် တာဝန်ရှိသူတစ်ဦးက ပြောကြားခဲ့သည်။

အကောက်ခွန်နှင့် နယ်စပ်ကာကွယ်ရေး စာရွက်စာတမ်းတွင် မျှော်စင်များ၊ ထောက်လှမ်းရေး ကိရိယာများအတွက် ဒေါ်လာ ၅ ဒသမ ၇ ဘီလျံနှင့် ငါးနှစ်အတွင်း လမ်းဆောက်လုပ်ရေးနှင့် ထိန်းသိမ်းရေးအတွက် ဒေါ်လာ တစ်ဘီလျံ၊ ခုနစ်နှစ်အတွင်း နယ်စပ်ကင်းလှည့်အဖွဲ့ဝင်  ၅,၀၀၀၊ နယ်စပ်စောင့်ကြည့် စစ်ဆေးသူ ၂,၅၀၀ နှင့် အခြားဝန်ထမ်းများအတွက် ဒေါ်လာ ၈ ဒသမ ၅ ဘီလျံ တောင်းဆိုခဲ့သည်ဟု အမေရိကန်တာဝန်ရှိသူများက ပြောကြားခဲ့သည်။

ယင်းအဆိုပြုချက်တွင် ၄၀၇ မိုင် (၆၅၁ ကီလိုမီတာ) အသစ်လဲလှယ်ရန် သို့မဟုတ် ဆင့်ပွားဝိုင်ယာကြိုး တပ်ရန်လည်း တောင်းဆိုခဲ့သည်ဟု တာဝန်ရှိသူတစ်ဦးက အေပီသတင်းဌာနသို့ ပြောကြားခဲ့သည်။ ယင်းစီမံကိန်းကို လူသိရှင်ကြား မကြေညာရသေးသောကြောင့်  ယင်းတာဝန်ရှိသူက အမည်မထုတ်ဖော်ခဲ့ပေ။

ထရန့်က ၎င်း၏ သမ္မတသက်တမ်းတွင် မက္ကဆီကိုနယ်စပ်၌ ကြီးမားကောင်းမွန်သော တံတိုင်းတစ်ခု ရှိစေရမည်ဟု ကတိပေးခဲ့သော်လည်း ယင်းတံတိုင်းဆောက်လုပ် မည့်နေရာ၊ အချိန်နှင့် ကုန်ကျစရိတ် အသေးစိတ် အချက်အလက်များကို အနည်းငယ်သာတင်ပြခဲ့သည်။ ထရန့်အစိုးရအဖွဲ့က  တက္ကဆက်နှင့် ကယ်လီဖိုးနီးယားပြည်နယ်တို့တွင် ခြံစည်းရိုး ၇၄ မိုင် (၁၁၈ ကီလိုမီတာ)   အစားထိုးရန် သို့မဟုတ် တည်ဆောက်ရန် ယခုနှစ်အတွက် ဒေါ်လာ ၁ ဒသမ ၆ ဘီလျံ တောင်းဆိုခဲ့သည်။ တာဝန်ရှိသူများကလည်း လာမည့်နှစ်အတွက် ဒေါ် လာ ၁ ဒသမ ၆ ဘီလျံတောင်းဆိုမည်ဟု ပြောကြားခဲ့သည်။

ဝေါစထရိဂျာနယ်က ပထမဆုံး ဖော်ပြခဲ့သည့် ၁၀ နှစ်စီမံကိန်းသည် ဥပဒေပြုအထက်လွှတ်တော် အမတ်များနှင့် ဆွေးနွေးမှုများမှ ရလဒ်ဖြစ်သည်ဟု တာဝန်ရှိသူက ပြောကြားခဲ့သည်။

အိုဘားမားလက်ထက် Deferred Action for Childhood Arrivals (DACA) စီမံချက်တစ်ခုအရ ပြည်နှင်ဒဏ်ပေးခြင်းမှ ယာယီကာကွယ်ပေးထားသည့် လူ ၈၀၀,၀၀၀ ခန့် အတွက် ဥပဒေအခြေအနေအရ  ခွင့်ပြုပေးမှုပါဝင်နိုင်သည့် အဆိုပြုချက်ကို အစိုးရအဖွဲ့က ကွန်ဂရက်တွင် ခိုင်ခိုင်မာမာ စေ့စပ်ဆွေးနွေးခဲ့ပြီးနောက် ယင်းစီမံကိန်းထွက်ရှိခဲ့ခြင်း ဖြစ်သည်။

သမ္မတဒေါ်နယ်ထရန့်က DACA စီမံချက်ကို ရပ်ဆိုင်းခဲ့ကြောင်း ပြီးခဲ့သည့်နှစ်က ပြောကြားခဲ့သော်လည်း ဥပဒေဆိုင်ရာ ပြင်ဆင်မှုပြုလုပ်ရန် ကွန်ဂရက်ကို ယခုနှစ်မတ်အထိ အချိန်ပေးထားခဲ့သည်။

Ref ; AFP

Most Read

Most Recent