အီဂျစ်တရားရုံးက သမ္မတဟောင်း မော်စီကို ထောင်ဒဏ် သုံးနှစ်ချမှတ်

အီဂျစ်တရားရုံးက သမ္မတဟောင်း မော်စီကို ထောင်ဒဏ် သုံးနှစ်ချမှတ်
Published 1 January 2018

၂၀၁၂ ခုနှစ် ဇွန် ၂၉ ရက်က ကိုင်ရိုရှိ တာရီရာရင်ပြင်၌ ထောင်နှင့်ချီသောလူများအား မိန့်ခွန်းပြောနေသော အီဂျစ်သမ္မတဟောင်း မော်စီ (Photo: AFP)

ရာထူးမှ ထုတ်ပယ်ခံခဲ့ရသည့် အစ္စလာမ္မစ်သမ္မတ မိုဟာမက်မော်စီကို တရားစီရင်ရေးအား စော်ကားမှုဖြင့် အီဂျစ်တရားရုံးက ဒီဇင်ဘာ ၃၀ ရက်တွင် ထောင်ဒဏ်သုံးနှစ် ချမှတ်ခဲ့သည်ဟု ၎င်း၏ ရှေ့နေက ပြောကြားခဲ့သည်။

မော်စီနှင့်အတူ အခြား ၁၉ ဦးကိုလည်း ယင်းပြစ်မှုဖြင့် ထောင်ဒဏ်နှင့် ဒဏ်ငွေများ ချမှတ်ခဲ့သည်။ ပြစ်ဒဏ်ချမှတ်ခံရသူများထဲတွင် လွှတ်တော်အဖွဲ့ဝင်ဟောင်း၊ တက်ကြွလှုပ်ရှားသူများနှင့် ဂျာနယ်လစ်သုံးဦးလည်း ပါဝင်သည်။

ထောင်ချခံထားရသော တက်ကြွလှုပ်ရှားသူ အလာအဗ္ဗဒယ်ဖာတာ အပါအဝင် နောက်ထပ်တရားခံငါးဦးသည် ဒဏ်ငွေ ဒေါ်လာ ၁,၆၈၀ (အီဂျစ်ပေါင် ၃၀,၀၀၀) စီ ချမှတ်ခံခဲ့ရသည်။

မော်စီသည်လည်း တရားသူကြီးများအဖွဲ့၏ ဥက္ကဋ္ဌနှင့် နောက်ထပ်တရားသူကြီး တစ်ဦးကို အီဂျစ်ပေါင်နှစ်သန်းပေးဆောင်ရန် အမိန့်ချခံခဲ့ရသည်။ နောက်ထပ် တရားခံ ၂၂ ဦးသည်လည်း တရားသူကြီးများအဖွဲ့၏ဥက္ကဋ္ဌကို အီဂျစ်ပေါင်တစ်သန်းစီ ပေးဆောင်ရန် အမိန့်ချမှတ်ခံခဲ့ရသည်။

မော်စီသည် ဂျူရီအဖွဲ့၏ အဆုံးအဖြတ်ကို အယူခံဝင်မည်ဟု ၎င်း၏ရှေ့နေ အဗ္ဗဒယ် မိုနိမ်းအဗ္ဗဒယ်မက်ဆွက်က ပြောကြားခဲ့သည်။

မော်စီသည် ၂၀၁၃ ခုနှစ်တွင် ရာထူးမှ ဖြုတ်ချခံခဲ့ရပြီးနောက် အခြားသော ရုံးတင်စစ်ဆေးမှုနှစ်ခုတွင်လည်း စုစုပေါင်း ထောင်ဒဏ် ၄၅ နှစ် ချမှတ်ခံခဲ့သည်။

မော်စီကိုနုတ်ထွက်ရန် တောင်းဆိုသည့် ဧရာမဆန္ဒပြမှုများဖြစ်ပွားခဲ့ပြီး စစ်တပ်က သဘောထားကွဲလွဲသည့် မော်စီကို ရာထူးမှ ဖြုတ်ချခဲ့ပြီးနောက် ၎င်းကို ထောက်ခံသည့် ထောင်နှင့်ချီသော အစ္စလာမ္မစ်များကို ဖမ်းဆီးပြီး ရုံးတင်စစ်ဆေးခဲ့သည်။

နှိမ်နင်းမှုတွင် ယင်းအချိန်က စစ်ဦးစီးချုပ် (လက်ရှိသမ္မတ) အယ်လ်စီစီ၏ အခြားပြိုင်ဘက်များအထိ ပါဝင်ပတ်သက်ခဲ့သည်။ စီစီသည် မော်စီရာထူးမှဖြုတ်ချခံရပြီး တစ်နှစ်အကြာတွင် သမ္မတအဖြစ် ရွေးချယ်တင်မြှောက်ခံခဲ့ရသည်။

Ref: AFP

Most Recent