အကြမ်းဖက်မှုကို ပူးပေါင်းနှိမ်နင်းရန် တရုတ်၊ ပါကစ္စတန်၊ အာဖဂန်နစ္စတန်တို့ သဘောတူ

အကြမ်းဖက်မှုကို ပူးပေါင်းနှိမ်နင်းရန် တရုတ်၊ ပါကစ္စတန်၊ အာဖဂန်နစ္စတန်တို့ သဘောတူ
Published 28 December 2017

တရုတ်နိုင်ငံခြားရေးဝန်ကြီး ဝမ်ယီ (လယ်) ကို အာဖဂန်(ဝဲ) နှင့် ပါကစ္စတန် နိုင်ငံခြားရေးဝန်ကြီးတို့နှင့်အတူ ဒီဇင်ဘာ ၂၆ ရက်က ပေကျင်း၌ သတင်းစာရှင်းလင်းပွဲတွင် တွေ့ရစဉ် (Photo- AFP)

အာဖဂန်၊ ပါကစ္စတန်နှင့် တရုတ်ဝန်ကြီးများသည် ဒီဇင်ဘာ ၂၆ ရက်က ပေကျင်း၌ တွေ့ဆုံကာ တရုတ်မှ ကျယ်ပြောလှသော ရှင်းကျန်ဒေသနှင့် ဆက်စပ်မှုရှိသည့် အကြမ်းဖက် ခြိမ်းခြောက်မှုများကို တိုက်ဖျက်ရန် အတူတကွ ပူးပေါင်းရေးကို သဘောတူညီခဲ့ကြသည်။

တရုတ်သည် ဒေါ်လာထရီလျံနှင့်ချီ၍ တန်ဖိုးရှိသော ၎င်း၏ One Belt One Road ရင်းနှီးမြှုပ်နှံမှုစီမံကိန်း၏ တစ်စိတ်တစ်ပိုင်းအဖြစ် အိမ်နီးချင်းနိုင်ငံများတွင် ရင်းနှီးမြှုပ်နှံမှုများ တိုးမြှင့်လုပ်ဆောင်လျက်ရှိစဉ် ထိုသုံးနိုင်ငံမှ နိုင်ငံခြားရေးဝန်ကြီးများ၏ ပထမဆုံး အစည်းအဝေးကို ကျင်းပခဲ့ခြင်း ဖြစ်သည်။

တရုတ်သည် ၎င်း၏ ရှင်းကျန်နယ်စပ် ဒေသများကို ထိန်းချုပ်ရာတွင် ကူညီရေးအတွက် အာဖဂန်နစ္စတန်၊ ပါကစ္စတန်တို့အပေါ် မှီခိုနေရသည်။ လေ့လာသူများ၏ ပြောကြားချက်အရ တရုတ်အစိုးရ၏ ဖိနှိပ်သောမူဝါဒများကြောင့် ရှင်းကျန်ဒေသတွင် အများစု နေထိုင်သည့် မွတ်စလင် ဝီဂါလူနည်းစုမျိုးနွယ်ဝင်တို့၏ အုံကြွမှု၊ အကြမ်းဖက်တိုက်ခိုက်မှုများ ဖြစ်လာရန် အန္တရာယ်ရှိနေသည်ဟု သိရသည်။

ရင်းမြစ်ကြွယ်ဝသော ရှင်းကျန်ဒေသနှင့် တရုတ်နိုင်ငံထဲမှ အခြားနေရာများ၌ တိုက်ခိုက်မှုလုပ်ဆောင်ရန် အရှေ့တာကစ္စတန် အစ္စလာမ္မစ်လှုပ်ရှားမှု (ETIM) အစရှိသည့် အုပ်စုများ၏ အရိပ်လွှမ်းမိုးမှု မကင်းသော ပြည်ပရောက် ဝီဂါခွဲထွက်ရေးအုပ်စုများက စီစဉ်နေသည်ဟု တရုတ်အစိုးရက ပုံမှန်ပြစ်တင်လေ့ရှိသည်။  ထို့ပြင် တရုတ်အစိုးရသည် ဝီဂါစစ်သွေးကြွများ အာဖဂန်နှင့် ပါကစ္စတန်တို့တွင် ခိုလှုံရာနယ်မြေရှာတွေ့သွားမည်ကို စိုးရိမ်လာခဲ့သည်။

“အကြမ်းဖက်မှုရဲ့ ပုံစံမျိုးစုံကို ပူးပေါင်းတိုက်ဖျက်သွားဖို့ ကျွန်တော်တို့ သဘောတူခဲ့ကြပါတယ်” ဟု အာဖဂန်နိုင်ငံခြားရေးဝန်ကြီး ဆာလာဟူဒင်ရာဘာနီက အစည်းအဝေးအပြီးတွင် ပြောကြားခဲ့သည်။ အာဖဂန်နစ္စတန်ဟာ “ETIM နဲ့ ယင်းကထောက်ခံတဲ့အဖွဲ့တွေ၊ ကွန်ရက်တွေကို တိုက်ဖျက်ဖို့ ဆုံးဖြတ်ချက်အတိုင်း လုပ်ဆောင်သွားမှာ ဖြစ်ပါတယ် ဟု ၎င်းက ပြောကြားခဲ့သည်။

ရှင်းကျန်ဒေသထဲသို့ စိမ့်ဝင်ပျံ့နှံ့နေသော အစွန်းရောက်ဘာသာရေးအဖွဲ့များထံမှ အရင်းခံသည်ဟု တရုတ်အစိုးရက ဆိုနေသည့် ထိုပြဿနာကို ဖြေရှင်းရာတွင် ကူညီကြရန် တရုတ်သည် နိုင်ငံတကာ အသိုင်းအဝိုင်းကိုလည်း တိုက်တွန်းနေသည်မှာ ကာလရှည်ကြာရှိပြီ ဖြစ်သည်။

တရုတ်၊ အာဖဂန်၊ ပါကစ္စတန် သုံးနိုင်ငံသည် အကြမ်းဖက်မှုကိုတိုက်ဖျက်ရန် ပြီးပြည့်စုံသော သဘောတူညီချက်တစ်ခုကို ရရှိခဲ့သည်ဟု တရုတ်နိုင်ငံခြားရေးဝန်ကြီး ဝမ်ယီက ပြောကြားခဲ့သည်။ ထို့ပြင် ရှင်းကျန်ဒေသကို အိမ်နီးချင်းချင်းနိုင်ငံများနှင့် စီးပွားရေး ပူးပေါင်းမှု အခြေစိုက်နေရာအဖြစ် အလုံးစုံကြိုးပမ်းသွားမည်ဟုလည်း ဝမ်ယီက ဆိုသည်။

တရုတ်သည် ပါကစ္စတန်နှင့် အာဖဂန်တို့တွင် စီးပွားရေးတိုးချဲ့နေသော်လည်း အချို့သော အကြမ်းဖက်မှုကိစ္စများက ထိုတိုးချဲ့မှုများကို နောက်ပြန်ဆွဲစေသည်။

Ref ; AFP

Most Read

Most Recent