အခွန်ပြုပြင်ပြောင်းလဲရေး ဥပဒေမူကြမ်းကို ဖိလစ်ပိုင်အတည်ပြု

အခွန်ပြုပြင်ပြောင်းလဲရေး ဥပဒေမူကြမ်းကို ဖိလစ်ပိုင်အတည်ပြု
Published 17 December 2017

ဒီဇင်ဘာ ၁၄ ရက်က မနီလာတွင် ယာဉ်များသွားလာနေမှုအား ရိုက်ကူးထားသော ဓာတ်ပုံ (Photo : AFP)

ဖိလစ်ပိုင်သမ္မတ ရိုဒရီဂိုဒူတာတေး၏ စီးပွားရေး စီမံကိန်းတွင် ဗဟိုချက်ဖြစ်သော အခွန်ပြုပြင်ပြောင်းလဲမှု ဥပဒေမူကြမ်း တစ်ခုကို  အစိုးရက အတည်ပြုခဲ့သည်ဟု တာဝန်ရှိသူများက ဒီဇင်ဘာ ၁၄ ရက်တွင် ထုတ်ပြန်ခဲ့သည်။ ယင်းဥပဒေ မူကြမ်းအရ နိုင်ငံ၏ ယိုယွင်းနေသည့် အခြေခံ အဆောက်အအုံအတွက် ငွေကြေးပံ့ပိုးရန် ကျောက်မီးသွေး၊ မော်တော်ကား၊ အချိုရည်နှင့် အလှအပဆိုင်ရာ ခွဲစိတ်ပြုပြင်မှုကို အခွန်စည်းကြပ်မှုများကို တိုးမြှင့်မည်ဖြစ်သည်။

ဖိလစ်ပိုင်သည် ယခုသီတင်းပတ်တွင် အပြည်ပြည်ဆိုင်ရာ ကြွေးမြီပြန်ဆပ်မှု စိတ်ချရမှု အဆင့်သတ်မှတ်သည့် Fitch Ratings အေဂျင်စီထံမှ အဆင့်မြှင့်တင်မှု ရရှိခဲ့မှု၊ ကျောက်မီးသွေးအား အခွန်တိုးကောက်မှုကို သဘာဝပတ်ဝန်းကျင်ဆိုင်ရာ လှုပ်ရှားတက်ကြွသူများက ကြိုဆိုဂုဏ်ပြုမှုနှင့်အတူ အခွန်ပြုပြင်ပြောင်းလဲမှု ဥပဒေမူကြမ်းကို စီးပွားရေး ပညာရှင်များနှင့် သဘာဝပတ်ဝန်းကျင် ထိန်းသိမ်းရေး ပညာရှင်များက အမွှမ်းတင်ခဲ့ကြသည်။

“ရင်းနှီးမြှုပ်နှံမှု၊ အလုပ်အကိုင် ဖန်တီးမှုနဲ့ ဆင်းရဲမွဲတေမှု လျှော့ချဖို့ တွန်းအားပေးဖို့ ပိုမိုနည်းပါးတဲ့နှုန်းနဲ့ ကျယ်ပြန့်တဲ့ အခြေခံ အကြောင်းရင်းတွေ ပါဝင်ပြီး ရိုးရှင်းမှု၊ မျှတမှုနဲ့ ပိုမိုအကျိုးရှိတဲ့ အခွန်စနစ် ရရှိဖို့ ကြိုးစားသွားမှာပါ” ဟု ဘဏ္ဍာရေးဝန်ကြီး ကားလို့စ်ဒေါမနစ်က ပြောကြားခဲ့သည်။

ယိုယွင်းသည့်လမ်းများ၊ လူပြည့်နှက်နေသည့် မီးရထားများနှင့် ဆိုးရွားသည့် အင်တာနက်မြန်နှုန်းက ဖိလစ်ပိုင်နိုင်ငံ၏ ယှဉ်ပြိုင်မှုကို အဟန့်အတား ဖြစ်စေခဲ့ပြီး သန်းနှင့်ချီသောသူများကို ဆင်းရဲမွဲတေမှုမှ လွတ်မြောက်ရန် ကြိုးပမ်းမှုများကို  လမ်းချော်သည့် အလားအလာ ဖြစ်ပေါ်စေသည်ဟု အစိုးရက သတိပေးခဲ့သည်။

ကျောက်မီးသွေးအခွန်ကို  ၂၀၂၀ မတိုင်မီ တစ်တန်လျှင် ၁၀ ဆ (သို့မဟုတ်) ၁ ဒသမ ၉၈ ဒေါ်လာ (၁၀၀ ပီဆို) အထိ တဖြည်းဖြည်း တိုးမြှင့်မည်ဟု ဒီဇင်ဘာ ၁၃ ရက်နှောင်းပိုင်းတွင် ကွန်ဂရက်က အတည်ပြုခဲ့သည့် အဆိုအရ သိရသည်။

ယင်းဥပဒေမူကြမ်းတွင် မော်တော်ကား၊ ဒီဇယ်၊ ဓာတ်ဆီနှင့် ဓာတ်ငွေ့တို့ ပါဝင်သည့် ရေနံထုတ်ကုန်များအား အခွန်ကောက်ခံမှုကို သိသိသာသာ တိုးမြှင့်မှုနှင့် သတ္တုတွင်း အခွန်စည်းကြပ်မှုကို တိုးမြှင့်မည်ဖြစ်သည်။

ဒူတာတေးက ၎င်း၏သက်တမ်း ခြောက်နှစ်အတွင်း ကားလမ်း၊ မီးရထားလမ်းနှင့် လေဆိပ်များအတွက် ဒေါ်လာ ဘီလျံ ၁၇၀ ခန့် အသုံးပြုမှုနှင့်အတူ ရွှေခေတ်အခြေခံ အဆောက်အအုံတစ်ခု စတင်မည်ဟု ကတိပြုခဲ့သည်။

Ref : AFP

Most Read

Most Recent