ပူတင်က ၂၀၁၈ ခုနှစ် ရွေးကောက်ပွဲတွင် ထပ်မံ ယှဉ်ပြိုင်မည်ဟု ကြေညာ

ပူတင်က ၂၀၁၈ ခုနှစ် ရွေးကောက်ပွဲတွင် ထပ်မံ ယှဉ်ပြိုင်မည်ဟု ကြေညာ
Published 8 December 2017

ဒီဇင်ဘာ ၆ ရက်က မော်စကိုတွင် စေတနာ့ဝန်ထမ်းများဆိုင်ရာ ဖိုရမ်၌ မိန့်ခွန်းပြောရန် ရောက်လာသော ရုရှားသမ္မတ ပူတင် (Photo : AFP)

ရုရှားသမ္မတ ဗလာဒီမာပူတင်သည် အလွယ်တကူ အနိုင်ရရန်ရှိသော ၂၀၁၈ ခုနှစ် သမ္မတ ရွေးကောက်ပွဲကို ယှဉ်ပြိုင်မည်ဟု ဒီဇင်ဘာ ၆ ရက်တွင် ကြေညာခဲ့ရာ ဆိုဗီယက် အာဏာရှင် ဂျိုးဇက်စတာလင်နောက်ပိုင်း  ရုရှား၏ သက်တမ်းအရှည်ဆုံး ခေါင်းဆောင် ဖြစ်လာရန် လမ်းကြောင်းသို့ ရောက်ရှိသွားခဲ့သည်။

ပူတင်၏ လူထုထောက်ခံမှုသည် ပုံမှန်အားဖြင့် ရာခိုင်နှုန်း ၈၀ ဝန်းကျင်၌ ရှိနေခဲ့ပြီး လာမည့်နှစ် မတ်တွင် ကျင်းပမည့် ရွေးကောက်ပွဲ၌ ၎င်းက အပြတ်အသတ်ဖြင့် အနိုင်ရရန် သေချာနေခဲ့သည်။ အသက် ၆၅ နှစ်ရှိ ပူတင်က ရွေးကောက်ပွဲ ထပ်မံပြိုင်မပြိုင်နှင့် ပတ်သက်၍ လူအနည်းငယ်က သံသယဝင်နေချိန်တွင် ယင်းကဲ့သို့ ကြေညာရန် နှောင့်နှေးနေခြင်းက လျှို့ဝှက်ပူးပေါင်း ကြံစည်မှုဆိုင်ရာ သီအိုရီအချို့ကို ထွက်ပေါ်စေခဲ့ပြီး ကရင်မလင်၏ နိုင်ငံရေးဆိုင်ရာ လှည့်ကွက်တစ်ခုဟု ရှုမြင်ခံခဲ့ရသည်။

ပူတင်နှင့် အလားအလာရှိသော ပြိုင်ဘက်များမှာ ယခင်ရွေးကောက်ပွဲများ၌ အနိုင်မရခဲ့သော ကိုယ်စားလှယ်လောင်း အများအပြားနှင့် ထင်ရှားသည့် နိုင်ငံရေးမျက်နှာသစ် တစ်ဦးဖြစ်သူ ရုပ်သံတင်ဆက်သည့် အသက် ၃၆ နှစ်ရှိ ကေစီနီယာဆော့ချက်တို့ဖြစ်သည်။ ကွန်မြူနစ်ပါတီ အကြီးအကဲ ဂင်နာဒီဇူဂါနော့၊ အစွန်းရောက် အမျိုးသားရေးဝါဒီ ဗလာဒီမာဇီရီနော့စကီးနှင့် လစ်ဘရယ်ပါတီခေါင်းဆောင် ဂရီဂိုရီယယ်လီစကီးတို့က ရွေးကောက်ပွဲ ယှဉ်ပြိုင်မည်ဟု ကြေညာခဲ့သည်။ ၁၉၉၀ ပြည့်လွန်နှစ်များတွင် ပူတင်၏ ဆရာဖြစ်ခဲ့သော ကွယ်လွန်သူ စိန့်ပီတာစဘတ်မြို့တော်ဝန် အနာတိုလီဆော့ချက်၏ သမီးဖြစ်သူ ဆော့ချက်ကလည်း ရွေးကောက်ပွဲကို ယှဉ်ပြိုင်မည်ဖြစ်သည်။

ပူတင်က ဆုံးဖြတ်ချက်အားလုံးကို ချမှတ်နေသည့် စနစ်ကို မယုံကြည်ကြောင်း၊ အခြေအနေများကို ပြောင်းလဲရန် ၎င်းတို့၏ စွမ်းဆောင်ရည်ကို ယုံကြည်ကြရန် တိုက်တွန်းလိုကြောင်း ဆော့ချက်က ဒီဇင်ဘာ ၆ ရက်တွင် မဲဆန္ဒရှင်များကို ပြောကြားခဲ့သည်။

ပူတင်၏ အထင်ရှားဆုံး ရန်ဘက်ဖြစ်သော အလက်ဇီနာဗာညီသည် စွဲချက်များ စွဲဆိုခံထားရသော်လည်း သမ္မတရွေးကောက်ပွဲ ယှဉ်ပြိုင်ရန် ဆန္ဒရှိနေသည်။ နာဗာညီသည် ၎င်းအား ရွေးကောက်ပွဲ ယှဉ်ပြိုင်ခွင့် ပြုရန်အတွက် အာဏာပိုင်များကို ဖိအားပေးရန် ရုရှားတစ်ဝန်း၌ စုဝေးမှုများ ပြုလုပ်ခြင်းနှင့် အောက်ခြေ မဲဆန္ဒရှင်များကို စည်းရုံးခြင်းများ ဆောင်ရွက်ခဲ့သည်။ နာဗာညီ၏ ရွေးကောက်ပွဲ မဲဆွယ်အဖွဲ့ခေါင်းဆောင် လီယိုနက်ဗိုကော့သည်လည်း Nizhny Novgorod မြို့တွင် ခွင့်ပြုချက်မယူဘဲ စုဝေးမှုတစ်ခုအား ဆောင်ရွက်ခဲ့မှုအတွက် ပြီးခဲ့သော သီတင်းပတ်တွင် ထောင်ဒဏ်တစ်လ ချမှတ်ခံခဲ့ရသည်။ နာဗာညီ ကိုယ်တိုင်လည်း နောက်ထပ် စုဝေးမှုတစ်ခုအား စီစဉ်ခဲ့မှုအတွက် ပြီးခဲ့သော အောက်တိုဘာတွင် ထောင်ဒဏ် ရက် ၂၀ ကျခံခဲ့ရသည်။ ၎င်း၏မဲဆွယ် အဖွဲ့ခေါင်းဆောင် ထောင်ဒဏ်ကျခံနေရသည့် နေရာမှ တစ်မိုင်ပင် မဝေးသော နေရာတွင် ပူတင်က ရွေးကောက်ပွဲ ယှဉ်ပြိုင်မည်ဟု ကြေညာခဲ့မှုသည် ရုရှားတွင် ရွေးကောက်ပွဲများ အတွက် မည်သို့ဆောင်ရွက်နေကြောင်း အကောင်းဆုံး သာဓကဖြစ်သည်ဟု နာဗာညီက ပြောကြားခဲ့သည်။

ပူတင်က ရွေးကောက်ပွဲ ထပ်မံယှဉ်ပြိုင်မည်ဖြစ်ကြောင်း Nizhny Novgorod မြို့ရှိ GAZ ကားစက်ရုံ၌ ကြေညာခဲ့ခြင်းဖြစ်သည်။ ယင်းစက်ရုံသည် ရုရှား၏ သင်္ကေတအဆန်ဆုံး စက်မှုလုပ်ငန်းကြီးများအနက် တစ်ခုဖြစ်သည်။ ၁၉၃၂ ခုနှစ်တွင် ဆိုဗီယက် စက်မှုလုပ်ငန်း ခေတ်မီရေး ကြိုးပမ်းမှုများအတွင်း တည်ဆောက်ခဲ့သည့် ယင်းစက်ရုံမှ  ဗင်နှင့် စစ်သုံးထရပ်ကားများမှသည် ဆိုဗီယက်ခေတ် အထက်တန်းလွှာများအတွက် Volga ဆီဒင်ကားများနှင့် ဇိမ်ခံကားများအထိ သန်းပေါင်းများစွာသော ကားများကို ထုတ်လုပ်ခဲ့သည်။

Ref : AP

Most Read

Most Recent