ကုလသမဂ္ဂ လူ့အခွင့်အရေးကောင်စီ၏ ဘင်္ဂါလီအရေးဆိုင်ရာ ဆုံးဖြတ်ချက်သည် ပြဿနာကို မဖြေရှင်းနိုင်ဟု တရုတ်ပြောကြား

ကုလသမဂ္ဂ လူ့အခွင့်အရေးကောင်စီ၏ ဘင်္ဂါလီအရေးဆိုင်ရာ ဆုံးဖြတ်ချက်သည် ပြဿနာကို မဖြေရှင်းနိုင်ဟု တရုတ်ပြောကြား
Published 7 December 2017

မြန်မာနိုင်ငံတွင် လူနည်းစု ဘင်္ဂါလီ (မူရင်းတွင် ရိုဟင်ဂျာဟုဖော်ပြ။) မွတ်စလင်များအား လူသားချင်းစာနာမှုမရှိသည့် ရာဇဝတ်မှု ကျူးလွန်နေဖွယ်ရှိမှုအား ရှုတ်ချသည့် ကုလသမဂ္ဂ လူ့အခွင့်အရေးကောင်စီ၏ ဆုံးဖြတ်ချက်သည် တင်းမာမှုများ ပြေလျော့စေရန် နှင့် ပြဿနာကိုဖြေရှင်းနိုင်ရန် အထောက်အပံ့ မဖြစ်စေနိုင်ကြောင်း တရုတ်က ဒီဇင်ဘာ ၆ ရက်တွင်ထုတ်ပြန်ခဲ့သည်။  မြန်မာတွင် ဘင်္ဂါလီမွတ်စလင်များအား ပြုမူဆက်ဆံမှုများသည် လူသားချင်း စာနာထောက်ထားမှုမရှိသော ရာဇဝတ်မှုများ ကျူးလွန်နေဖွယ်ရှိကြောင်း ရှုတ်ချသည့် ယင်းဆုံးဖြတ်ချက်ကို ကန့်ကွက်မဲ ပေးခဲ့သည့် သုံးနိုင်ငံတွင် တရုတ်ပါဝင်ခဲ့သည်။ ယင်းဆုံးဖြတ်ချက်အား ကုလသမဂ္ဂ လူ့ အခွင့်အရေးကောင်စီအဖွဲ့ဝင်နိုင်ငံ ၄၇ နိုင်ငံ အနက် ၃၃ နိုင်ငံက ထောက်ခံခဲ့ကြသည်။

ယင်းဆုံးဖြတ်ချက်ကြောင့် အဆိုပါ အကြောင်းအရာကို ရှုပ်ထွေးသွားနိုင်ခြေရှိကြောင်း၊ မြန်မာနှင့် ဘင်္ဂလားဒေ့ရှ်တို့အကြား ရရှိထားသော သဘောတူညီချက်အား အကောင်အထည်ဖော်မှုတွင် အနုတ်သဘော သက်ရောက်မှုအချို့ရှိကြောင်း တရုတ်နိုင်ငံခြားရေး ဝန်ကြီးဌာန ပြောခွင့်ရ ပုဂ္ဂိုလ် ကန်ရှုအန်က ပြောကြားခဲ့သည်။ ဘင်္ဂါလီမွတ်စလင်များအား နှစ်လအတွင်း ပြန်လည်လက်ခံရန် မြန်မာနှင့် ဘင်္ဂလားဒေ့ရှ်တို့အကြား ပြီးခဲ့သော နိုဝင်ဘာတွင် ရရှိခဲ့သည့်သဘောတူညီချက်ကို ၎င်းက ရည်ညွှန်းခဲ့ခြင်းဖြစ်သည်။

တရုတ်နိုင်ငံခြားရေးဝန်ကြီးဝမ်ယီသည် ပြီးခဲ့သောလတွင် မြန်မာနှင့်ဘင်္ဂလားဒေ့ရှ်တို့သို့ သွားရောက်ခဲ့ပြီး အဆင့်သုံးဆင့်ပါသော ဖြေရှင်းနည်းတစ်ရပ်ကို အဆိုပြုခဲ့သည်။ ယင်းမှာ ရခိုင်ပြည်နယ်၌ အပစ်အခတ်ရပ်စဲမှုအား စတင်ပြုလုပ်ရန်၊ ယင်းနောက် နှစ်နိုင်ငံအကြား ဆွေးနွေးပွဲများ ဆက်လက်ပြုလုပ်ရန်နှင့် ဆင်းရဲမွဲတေမှု လျော့ပါးစေရေးကို အာရုံစိုက်သော ရေရှည်တည်တံ့သော ဖြေရှင်းနည်းတစ်ခု ရှာဖွေရန်တို့ဖြစ်သည်။

 

 

Most Recent