ဒီဇင်ဘာ ၆ ရက်က ယူကရိန်းပါလီမန်ရှေ့၌ ထောက်ခံသူများကို ပြောကြားနေသော ဂျော်ဂျီယာသမ္မတဟောင်း မီခေးဆာကက်ရှ်ဗီလီ (Photo: AFP)

ယူကရိန်းတွင် ဂျော်ဂျီယာသမ္မတဟောင်း မီခေးဆာကက်ရှ်ဗီလီသည် ရုရှား၏ထောက်ပံ့မှုဖြင့် အာဏာသိမ်းရန် လျှို့ဝှက်ကြံစည်ခဲ့သည်ဟု စွပ်စွဲလျက် တာဝန်ရှိသူများက ၎င်းအား ဖမ်းဆီးရန် ကြိုးပမ်းခဲ့ပြီးနောက် ဒီဇင်ဘာ ၅ ရက်တွင် မြို့တော်ကိဗ်၌ ဝရုန်းသုန်းကားများ ဖြစ်ပွားခဲ့သည်။

ယူကရိန်းရှိ ပြည်နယ်တစ်ခု၏ အုပ်ချုပ်ရေးမှူးဟောင်းလည်းဖြစ်သော ဆာကက်ရှ်ဗီလီသည် ယူကရိန်းသမ္မတပီထရိုပိုရိုရှင်ကို နှင့် သဘောထားကွဲလွဲခဲ့ပြီး ၎င်း၏ယူကရိန်း နိုင်ငံကူးလက်မှတ် ပယ်ဖျက်ခံခဲ့ရသည်။ ၎င်းသည် ထောက်ခံသူများ၏အကူအညီဖြင့် ပြီး ခဲ့သောစက်တင်ဘာတွင် နိုင်ငံထဲသို့ မတော်တဆ ဝင်ရောက်လာခဲ့ပြီးနောက်ပိုင်း ဆာကက်ရှ်ဗီလီသည် ပိုရိုရှင်ကိုအား ရာထူးမှဖယ်ရှားရန်အတွက် တောင်းဆိုသည့် ဆန္ဒပြမှုများကို ဦးဆောင်ခဲ့သည်။

ဒီဇင်ဘာ ၅ ရက်နံနက်တွင် ရဲတပ်ဖွဲ့က ကိဗ်မြို့လယ်ရှိ ဆာကက်ရှ်ဗီလီ၏ တိုက်ခန်းကို စီးနင်းခဲ့ရာ ၎င်းသည် တိုက်ခန်းအမိုးပေါ်သို့တက်ခဲ့ပြီး တိုက်အောက်ရှိ ထောက်ခံသူများအား မိန့်ခွန်းပြောခဲ့ပြီးနောက် တာဝန်ရှိသူများက ၎င်းအား ခေါ်ဆောင်သွားခဲ့သည်။ ယင်းဖြစ်စဉ်သည် အသက် ၄၉ နှစ်ရှိ ဆာကက်ရှ်ဗီလီနှင့် ယူကရိန်းအာဏာပိုင်တို့အကြား ထိပ်တိုက်တွေ့မှုအထွတ်အထိပ်သို့ ရောက်ရှိခဲ့ခြင်းဖြစ်သည်။

ယူကရိန်းအစိုးရရှေ့နေယူရီလက်ဆင်ကိုက ဆာကက်ရှ်ဗီလီနှင့် ၎င်း၏ မဟာမိတ်များသည် အနောက်လိုလားသော ယူကရိန်းအစိုးရအား ဆန့်ကျင်သည့် ဆန္ဒပြမှုများအတွက် ရုရှားရင်းမြစ်များထံမှ ဒေါ်လာ ၅၀၀,၀၀၀ ရရှိခဲ့ကြောင်း၊ ၎င်းသည် ၂၀၁၄ ခုနှစ် လူထုအုံကြွမှုတွင် ရာထူးမှဖြုတ်ချခံခဲ့ရသော ယူကရိန်းသမ္မတဟောင်း ဗစ်တာယာနူကိုဗစ်ချ်နှင့် ပူးပေါင်းကြံစည်နေခဲ့ကြောင်း စွပ်စွဲခဲ့သည်။ ယင်းစွပ်စွဲချက်များသည် ရန်စမှုဟု ဆာကက်ရှ်ဗီလီက တုံ့ပြန်ခဲ့သည်။

ဆာကက်ရှ်ဗီလီ ထိန်းသိမ်းခံခဲ့ရပြီးနောက် ရာပေါင်းများစွာသော ထောက်ခံသူများသည် ၎င်းအား ခေါ်ဆောင်သွားမည့် ဗင်ကားအား ဝိုင်းရံပိတ်ဆို့ခဲ့ပြီး နောက်ဆုံးတွင် ဆာကက်ရှ် ဗီလီသည် လွတ်မြောက်ခဲ့ကြောင်း သိရသည်။ အပြန်အလှန်ပဋိပက္ခများ ဖြစ်ပေါ်ခဲ့စဉ် ရဲများနှင့် ဆာကက်ရှ်ဗီလီထောက်ခံသူများသည် မျက်ရည်ယိုဓာတ်ငွေ့များဖြင့် အပြန်အလှန် ပစ်ခတ်ခဲ့ကြကြောင်း သိရသည်။ လက်ထိတ်တစ်ဖက်ခတ်ခံရလျက် ကားထဲမှပြန်ထွက်လာသော ဆာကက်ရှ်ဗီလီက ၎င်းအား ထောက်ခံသူများကို ယူကရိန်းပါလီမန်သို့ ချီတက်၍ သမ္မတအား စွပ်စွဲပြစ်တင်မှု အဆိုတင်ရန်အတွက် တောင်းဆိုကြရန် တိုက်တွန်းခဲ့သည်။

ခေါင်မိုးပေါ်မှ အစောပိုင်း ပြောကြားမှုတွင် ဆာကက်ရှ်ဗီလီက ပိုရိုရှင်ကိုသည် သူခိုးတစ်ဦးဖြစ်ပြီး ယူကရိန်းပြည်သူများအား သစ္စာဖောက်တစ်ဦးဖြစ်ကြောင်း စွပ်စွဲခဲ့သည်။ ၎င်းသည် ဒီဇင်ဘာ ၆ ရက်တွင် စုံစမ်း စစ်ဆေးခံရမည်ဖြစ်ကြောင်း အစိုးရရှေ့နေများက ပြောကြားခဲ့သည်။

သို့သော် ၂၀၀၄ ခုနှစ်နောက်ပိုင်းတွင် ထင်ရှားသော လူထုအုံကြွမှုနှစ်ကြိမ် ဖြစ်ပေါ် ခဲ့သည့် ယူကရိန်း၌ နောက်ထပ် ဝရုန်းသုန်းကား အခြေအနေဖြစ်ပေါ်လာစေရန် ဖြစ်နိုင်ခြေ နည်းပါးကြောင်း စောင့်ကြည့်သူများက သုံးသပ်ခဲ့ကြသည်။