စင်ကာပူက ၂၀၂၂ ခုနှစ်မှစပြီး မောင်းသူမဲ့ဘတ်စ်ကားများ စတင်ပြေးဆွဲရန်စီစဉ်

စင်ကာပူက ၂၀၂၂ ခုနှစ်မှစပြီး မောင်းသူမဲ့ဘတ်စ်ကားများ စတင်ပြေးဆွဲရန်စီစဉ်
Published 24 November 2017

အောက်တိုဘာ ၂၅ ရက်က ဂျာမနီတောင်ပိုင်းတွင် ပထမဆုံးအကြိမ် မောင်းသူမဲ့ဘတ်စ်ကားတစ်စီး စမ်းသပ်မောင်းနှင်မှုကို တွေ့ရစဉ် (Photo - AFP)

မြေရှားသည့် မြို့ပြနိုင်ငံ စင်ကာပူတွင် သယ်ယူပို့ဆောင်ရေးတိုးတက်ရန် အစီအစဉ် တစ်စိတ်တစ်ပိုင်းအဖြစ် ၂၀၂၂ မှစပြီး မောင်းသူမဲ့ဘတ်စ်ကားများကို စတင်အသုံးပြုသွားမည်ဖြစ်ကြောင်း စင်ကာပူ သယ်ယူပို့ဆောင်ရေးဝန်ကြီးက နိုဝင်ဘာ ၂၂ တွင် ပြောကြားခဲ့သည်။ စင်ကာပူသည် လမ်းအသုံးပြုခပြဋ္ဌာန်းခြင်း၊ အများသယ်ယူပို့ဆောင်ရေးအတွက် အမြောက်အမြား ရင်းနှီးမြှုပ်နှံခြင်းတို့ကြောင့် အခြားအာရှမြို့များကဲ့သို့ ယာဉ်ကြောပိတ်ဆို့မှုကို ရှောင်ရှားနိုင်ခဲ့သည်။

သို့သော် အနာဂတ်တွင် စင်ကာပူ၌ ကားများကို မှီခိုမှုလျှော့ချရန်နှင့် လူများရွှေ့ပြောင်းသွားလာရေးအတွက် မောင်းသူမဲ့နည်းပညာကို အသုံးပြုရန် စီစဉ်နေပြီ ဖြစ်သည်။ စမ်းသပ်စီမံကိန်းအဖြစ် နယ်အစွန်မြို့ သုံးနေရာတွင် အစည်ကားဆုံးအချိန်ပြင်ပ၌ မောင်းသူမဲ့ကားများကို ပြေးဆွဲသွားမည်ဖြစ်ကြောင်း သယ်ယူပို့ဆောင်ရေးဝန်ကြီး ခေါ်ဘွန်းဝမ်က ပြောကြားခဲ့သည်။ မောင်းသူမဲ့ယာဉ်များကြောင့် သယ်ယူပို့ဆောင်ရေးစနစ်၏ ချိတ်ဆက်မှုနှင့် ထိရောက်မှုတို့ တိုးတက်လာမည်ဖြစ်ကြောင်း၊ အထူးသဖြင့် ကလေးငယ်များသာရှိသော သက်ကြီးရွယ်အိုမိသားစုများအတွက် အသုံးဝင်လာမည်ဖြစ်ကြောင်း၊ မောင်းသူမဲ့ယာဉ်များ စမ်းသပ်ဌာနဖွင့်လှစ်သည့် အခမ်းအနားတွင် ၎င်းက ပြောကြားခဲ့သည်။

မောင်းသူမဲ့ယာဉ်စီမံကိန်းအား အကောင်အထည်ဖော်ရန်အတွက် လိုအပ်သည့် အကြံပြုချက်များကို ၂၀၁၈ မေ နောက်ပိုင်းတွင် စက်မှုလုပ်ငန်းများနှင့် သုတေသနအဖွဲ့များထံမှ ရယူတောင်းဆိုသွားမည်ဖြစ်ကြောင်း ခေါ်ဘွန်းဝမ်က ပြောကြားခဲ့သည်။ လောလောဆယ်တွင် စင်ကာပူ၌ မောင်းသူမဲ့ယာဉ် နည်းပညာကို စမ်းသပ်နေသော ပြည်တွင်းပြည် ပကုမ္ပဏီ ၁၀ ခုခန့်ရှိသည်။

Ref ; AFP

Most Read

Most Recent