ထိုင်းဝန်ကြီးချုပ်ဖြစ်ခဲ့သော တရားခံပြေး သက်ဆင်ရှင်နာဝပ်၏ တစ်ဦးတည်းသောသားသည် ငွေကြေးခဝါချမှုဖြင့် စွဲချက်တင်ခံထားရသည်ဟု အထူးစုံစမ်းစစ်ဆေးရေးအဖွဲ့က အောက်တိုဘာ ၁၈ ရက်၌ ပြောကြားခဲ့သည်။
ပန်သောင်တေ ရှင်နာဝပ်သည် ၂၀၀၄ ခုနှစ်က အစောပိုင်းခြစားမှုတစ်ခုနှင့် ပတ်သက်နေသော ဘတ် ၁၀ သန်း (ဒေါ်လာ ၃၀၀၀၀၀) တန်ချက်လက်မှတ်ကို လက်ခံရရှိခဲ့သည်ဟု စွပ်စွဲခံထားရသည်။ ထိုအစောပိုင်းက ခြစားမှုဆိုသည်မှာ သက်ဆင်ဝန်ကြီးချုပ်ဖြစ်စဉ်က နိုင်ငံပိုင် Krungthai ဘဏ် ပါဝင်ပတ်သက်နေသော ဘတ်ငွေ ၉ ဒသမ ၉ ဘီလျံ (ဒေါ်လာ၂၉၆ သန်း) ဖိုးရှိသည့် မရိုးဖြောင့်သည့် ချေးငွေကိစ္စများနှင့် ပတ်သက်သောအမှုကို ဆိုလိုသည်။
ပန်သောင်တေသည် ၎င်းအပေါ် မည်သည့်ဝရမ်းမှမထုတ်ထားသော်လည်း အောက်တိုဘာ ၁၇ ရက်က ကိုယ်တိုင်လာရောက် အဖမ်းခံပြီးနောက် ပြန်လွှတ်ပေးခံရကြောင်း အထူးစုံစမ်းစစ်ဆေးရေးအဖွဲ့ (DSI) မှ ဒုတိယပြောခွင့်ရပုဂ္ဂိုလ် ဝါရန်နန်သီရိလန်က ပြောကြားခဲ့သည်။
DSI က ယခုအမှုကို ရာဇဝတ်မှုဆိုင်ရာ တရားရုံးသို့ တင်၊ မတင်နှင့်ပတ်သက်ပြီး စဉ်းစားနေစဉ် ပန်သောင်တေအနေနှင့် ယခုအမှုအတွက် သက်သေများကို စုဆောင်းနိုင်ပြီဖြစ်သည်ဟု ဝါရန်နန်က ပြောကြားခဲ့သည်။ ယခုအမှုနှင့်ပတ်သက်ပြီး ပန်သောင်တေထံမှ တစ်စုံတစ်ရာ မှတ်ချက်ပေးမှုမရရှိခဲ့ပေ။ ပြီးခဲ့သည့်လကမူ ပန်သောင်တေသည် မတရားဖိနှိပ်ခံရကြောင်း တိုင်ကြားခဲ့ပြီး ငွေကြေးခဝါချမှုနှင့် ပတ်သက်သော စုံစမ်းမှုများ မပြုလုပ်ရန် တောင်းဆိုခဲ့သည်။
ရှင်နာဝပ်တို့အား ထောက်ခံသူများကမူ ယခုဖြစ်စဉ်သည် နိုင်ငံရေးလောကမှ ရှင်နာဝပ်မိသားစု ထွက်သွားစေရန်၊ ၎င်းတို့၏ သြဇာလွှမ်းမိုးမှုများ လျော့ပါးစေရန် စစ်အစိုးရ အုပ်စိုးသော ထိုင်းအာဏာပိုင်တို့၏ နောက်ဆုံး တရားရေးအရ ကြိုးပမ်းမှုဖြစ်သည်ဟု ဆိုကြသည်။
သက်ဆင်အပေါ် စွဲချက်တင်ထားသည့် အမှုဟောင်းအချို့သည်လည်း မကြာသေးမီက ပြန်ပေါ်လာခဲ့သည်။ ယင်းတို့အနက် သက်ဆင်သည် ဝန်ကြီးချုပ်ဖြစ်စဉ်က ၎င်း၏ စီးပွားရေး အကျိုးစီးပွားများ ကြီးထွားစေရေးအတွက် ၂၀၀၆ ခုနှစ်တွင် မြန်မာနိုင်ငံသို့ အတိုးနှုန်းနည်းနည်းဖြင့် ငွေများချေးရန် ထိုင်းပို့ကုန်၊ သွင်းကုန်ဘဏ်သို့ ညွှန်ကြားချက်ပေးခဲ့ပြီး အာဏာအလွဲသုံးစားပြုခဲ့သည်ဟု စွပ်စွဲခံရခြင်းလည်း ပါဝင်နေသည်။
ရဲဝန်ထမ်းဟောင်းတစ်ဦးဖြစ်သည့် သက်ဆင်သည်၁၉၈၀ ပြည့်လွန်နှစ် နှောင်းပိုင်းမှစ၍ ဆက်သွယ်ရေးကုမ္ပဏီကြီးတစ်ခုကို တည်ထောင်ခဲ့ပြီး ထိုင်းနိုင်ငံ၏ အချမ်းသာဆုံးနှင့် သြဇာအကြီးဆုံးပုဂ္ဂိုလ်တစ်ဦး ဖြစ်လာခဲ့သည်။
Ref း Reuters