၂၀၁၂ ခုနှစ် မေ ၁၇ ရက်က ကွမ်တုံပြည်နယ်တွင် လက်မှတ်ထိုး အခမ်းအနား တစ်ခု၌ တွေ့ရသော Evergrande ကုမ္ပဏီဥက္ကဋ္ဌ ရွှီကျားယင် (ဝဲ) ကို တွေ့ရစဉ် (Photo: AFP)

တရုတ်အိမ်ခြံမြေလုပ်ငန်း Evergrande ၏ သူဌေး ရွှီကျားယင်သည် ပြီးခဲ့သည့်နှစ်အတွင်း သုံးဆနီးပါး ပို၍ ချမ်းသာလာခဲ့ပြီး ဒေါ်လာ ၄၃ ဘီလျံအထိ ပိုင်ဆိုင်ခဲ့ကာ တရုတ်၏ အချမ်းသာဆုံးပုဂ္ဂိုလ် ဖြစ်လာခဲ့ကြောင်း ရှန်ဟိုင်းအခြေစိုက် Hurun Report က ထုတ်ပြန်သည့် စစ်တမ်းတစ်ခုတွင် ဖော်ပြခဲ့သည်။

Hurun က ပြုစုသော တရုတ်အချမ်းသာဆုံးပုဂ္ဂိုလ်များ စာရင်းတွင် ဒေါ်လာ သန်း ၃၀၀ အထက် ချမ်းသာသူများကို စာရင်းပြုစုရာ လူ ၂၁၃၀ အထိ စံချိန်တင် ပါဝင်လာခဲ့သည်။ ယခုနှစ်တွင် ယင်းစာရင်းတွင် ထပ်တိုးလာသူ ၇၄ ဦး ရှိခဲ့ကြောင်း Hurun Report က ပြောကြားခဲ့သည်။ တရုတ်၏ အချမ်းသာဆုံးပုဂ္ဂိုလ် ၂၁၃၀ ၏ စုစုပေါင်း ပိုင်ဆိုင်မှုသည် ဒေါ်လာ ၂ ဒသမ ၆ ထရီလျံ ရှိခဲ့ပြီး ကမ္ဘာတွင် ပဉ္စမမြောက် အကြီးဆုံး စီးပွားရေးဖြစ်သော ဗြိတိန်၏ ဂျီဒီပီနှင့် အတူတူနီးပါးဖြစ်သည်။

ယမန်နှစ်က အချမ်းသာဆုံး ပုဂ္ဂိုလ် ဖြစ်ခဲ့သော Wanda လုပ်ငန်းစုကြီး၏ သူဌေး ဝမ်ကျားလင်သည် ယခုနှစ်တွင် အဆင့်ငါးသို့ ကျဆင်းသွားခဲ့သည်။ ဝမ်၏ ပိုင်ဆိုင်မှုသည် ၂၈ ရာခိုင်နှုန်း ကျဆင်းခဲ့ပြီး ဒေါ်လာ ၂၃ ဘီလျံသို့ ရောက်ရှိသွားခဲ့သည်။

ပြည်ပတွင် ကုမ္ပဏီများ လွှဲပြောင်းဝယ်ယူမှုကို ဆောင်ရွက်ရာမှ ကြွေးအလွန်အမင်း တင်နိုင်သည်ကို စိုးရိမ်မှုများကြောင့် တရုတ် အာဏာပိုင်များသည် Wanda အုပ်စု စီးပွားရေး အင်ပါယာကို ပစ်မှတ်ထားမှုကြောင့် ဝမ်၏ လုပ်ငန်းရှယ်ယာများ ကျဆင်းသွားခဲ့ခြင်း ဖြစ်သည်။

တရုတ်၏ အကြီးဆုံး အိမ်ခြံမြေလုပ်ငန်း ဖြစ်သော Evergrande ၏ ရှယ်ယာများသည် ရာခိုင်နှုန်း ၄၅၀ အထိ မြင့်တက်ခဲ့သောကြောင့် ရွှီကျားယင်၏ ပိုင်ဆိုင်မှုသည် ပြီးခဲ့သည့်နှစ်တွင် သုံးဆနီးပါး ခုန်တက်ခဲ့သည်။ အသက် ၅၉ နှစ်အရွယ် ရွှီသည် အဆင့်ကိုးဆင့် ခုန်တက်ပြီး အဆင့်တစ်သို့ ရောက်ရှိခဲ့ခြင်းဖြစ်သည်။

တရုတ်၏ ဒုတိယ အချမ်းသာဆုံး ပုဂ္ဂိုလ်မှာ အသက် ၄၆ နှစ်အရွယ် ပိုနီမားဖြစ်သည်။ တရုတ်၏ လူမှုမီဒီယာဆော့ဖ်ဝဲ WeChat ကို ပိုင်ဆိုင်သည့် ဆက်သွယ်ရေးလုပ်ငန်းကြီး Tencent ၏ ဥက္ကဋ္ဌ ပိုနီမားသည် ယခုနှစ်တွင် ဒေါ်လာ ၃၇ ဘီလျံအထိ ချမ်းသာလာခဲ့ပြီး ယမန်နှစ်က ဒုတိယအချမ်းသာဆုံး ပုဂ္ဂိုလ် ဂျက်မား၏ နေရာကို အစားထိုး ရယူလာခဲ့သည်။

အွန်လိုင်းကူးသန်းရောင်းဝယ်ရေး လုပ်ငန်းကြီး Alibaba ၏ ဥက္ကဋ္ဌ ဂျက်မားသည် ဒေါ်လာ ၃၀ ဘီလျံဖြင့် တတိယ အချမ်းသာဆုံးပုဂ္ဂိုလ် ဖြစ်ခဲ့သည်။ ယခုနှစ် အချမ်းသာဆုံး စာရင်းတွင် Alibaba နှင့် လုပ်ငန်းခွဲ Ant Financial တို့မှ ၄၃ ဦး ပါဝင်လာခြင်းက Alibaba ၏ လွှမ်းမိုးမှု ကြီးမားလာခြင်းကို ထင်ရှားစေခဲ့သည်။ တရုတ်အချမ်းသာဆုံး ပုဂ္ဂိုလ်များ စာရင်းတွင် စတုတ္ထ ရခဲ့သူမှာ အိမ်ခြံမြေလုပ်ငန်း Country Garden ၏ ဒုဥက္ကဋ္ဌ ယန်ဝေရန် ဖြစ်သည်။ ယန်ဝေရန်၏ ပိုင်ဆိုင်မှုသည် ဒေါ်လာ ၂၄ ဘီလျံရှိပြီး တရုတ်၏ အချမ်းသာဆုံး အမျိုးသမီးလည်း ဖြစ်ခဲ့သည်။

Ref: AFP