အောက်တိုဘာ ၆ ရက်က မနီလာတွင် အခမ်းအနားတစ်ခု၌ ဂုဏ်ပြုတပ်ဖွဲ့အား စစ်ဆေးနေသော သမ္မတ ဒူတာတေး (Photo - AFP)

ဖိလစ်ပိုင်သမ္မတ ရိုဒရီဂိုဒူတာတေးက ၎င်း၏ အငြင်းပွားဖွယ် မူးယစ်ဆေးဝါး နှိမ်နင်းရေးစစ်ပွဲအား ဆန့်ကျင်မှုမြင့်တက်လာနေစဉ် ယင်းနှိမ်နင်းမှုအား ဦးဆောင်နေသည့် ရဲတပ်ဖွဲ့အား တစ်ဖန်အဆင့်လျှော့ချခဲ့ပြီး ဖိလစ်ပိုင် မူးယစ်ဆေးဝါးတိုက်ဖျက်ရေး အေဂျင်စီ (PDEF) ထံ ဦးဆောင်မှု တာဝန်လွဲှပေးခဲ့ကြောင်း တာဝန်ရှိသူများက အောက်တိုဘာ ၁၁ ရက်တွင် ပြောကြားခဲ့သည်။ PDEF သည် ယင်းနှိမ်နင်းမှုအား ဦးဆောင်မည်ဖြစ်သော်လည်း ရဲတပ်ဖွဲ့သည် မူးယစ်ဆေးမှောင်ခိုကူးသူများနှင့် သုံးစွဲသူများအား အဟန့်အတား ဖြစ်စေရန်အတွက် မြင်သာသော အနေအထား၌ ရှိနေမည်ဖြစ်ကြောင်း သမ္မတရုံးက ထုတ်ပြန်ခဲ့သော သမ္မတအမိန့်၌ ဖော်ပြခဲ့သည်။

ပြီးခဲ့သောနှစ်လယ်တွင် ဒူတာတေး သမ္မတအဖြစ် တက်လာခဲ့ပြီးနောက်ပိုင်း မူးယစ်ဆေးဝါးတိုက်ဖျက်ရေး စစ်ဆင်မှုများတွင် ရဲတပ်ဖွဲ့က လူ ၃၈၅၀ ကို သတ်ခဲ့သည်ဟု သိရသည်။ တရားမဝင် မူးယစ်ဆေးဝါးအား နှိမ်နင်းမည်ဟု ဒူတာတေးက ကတိပြုစဉ် လူ ၁၀၀၀၀၀ အား သတ်ပစ်မည်ဟု ကတိဖြင့် ၎င်းက ရွေးကောက်ပွဲကို အလွယ်တကူ အနိုင်ရခဲ့သည်။

ဖိလစ်ပိုင်ပြည်သူအများအပြားက ယင်းနှိမ်နင်းရေးစစ်ပွဲကို ဆက်လက်ထောက်ခံနေကြသော်လည်း ပြီးခဲ့သောလတွင် ထုတ်ပြန်ခဲ့သည့် သဘောထားစစ်တမ်းတစ်ခု၌ ဒူတာတေးအား ထောက်ခံမှုသည် ပထမဆုံးအကြိမ် ကျဆင်းခဲ့ကြောင်း သိရသည်။

မူးယစ်ဆေးဝါးနှိမ်နင်းမှုအား ဦးဆောင်မည့် PDEF တွင် အဖွဲ့ဝင် ၂၀၀၀ အောက် သာရှိပြီး ဖိလစ်ပိုင်ရဲတပ်ဖွဲ့သည် အင်အား ၁၆၅၀၀၀ ကျော် ရှိခဲ့သည်။ ဒူတာတေးသည် ပြီးခဲ့သော ဇန်နဝါရီကလည်း ရဲတပ်ဖွဲ့သည် အတွင်းပိုင်း၌ ခြစားမှုလှိုက်စားနေသည်ဟုဆိုပြီး မူးယစ်ဆေးနှိမ်နင်းမှုတွင် ဘေးဖယ်ခဲ့ကာ PDEF ကို တာဝန်လွဲှပေးခဲ့သည်။ ယင်းအချိန်က ရဲများသည် မူးယစ်ဆေးရှာဖွေရန် စီးနင်းမှုပုံစံပြုလုပ်၍ တောင်ကိုရီးယား လုပ်ငန်းရှင်တစ်ဦးအား ပြန်ပေးဆွဲခဲ့ကာ ရဲဌာန ချုပ်အတွင်း၌ပင် သတ်ဖြတ်ခဲ့ကြောင်း စစ်ဆေးဖော်ထုတ်နိုင်ခဲ့ပြီးနောက် ရဲတပ်ဖွဲ့အား တာဝန်လျှော့ချခဲ့ခြင်း ဖြစ်သည်။

သို့သော် ဒူတာတေးသည် ရဲတပ်ဖွဲ့အား အရေးပါသောပြုပြင်ပြောင်းလဲမှုများ မဖော်ဆောင်ဘဲ မူးယစ်ဆေးဝါးနှိမ်နင်းရေးတွင် အလျင်အမြန်ပင် ပြန်လည်ဦးဆောင်စေခဲ့သည်။ ယခုအကြိမ်တွင်မူ ရဲတပ်ဖွဲ့က ဆယ်ကျော်သက်နှစ်ဦးအား သတ်ဖြတ်ခဲ့သည်ဟု စွပ်စွဲချက်များကြောင့် ဒေါသထွက်ခဲ့ပြီး လမ်းပေါ်ထွက် ဆန္ဒပြမှုများ ဖြစ်ပေါ်ခဲ့အပြီး ဒူတာတေးက ယခုကဲ့သို့ PDEF ကို ဦးဆောင်မှု လွဲှပေးခဲ့ခြင်း ဖြစ်သည်။

ဒူတာတေး၏ မူးယစ်ဆေးနှိမ်နင်းရေး စစ်ပွဲအား ဝေဖန်သူ ကွန်ဂရက်အမတ်ဂါရီ အလီဂျနိုက ဒူတာတေး၏နောက်ဆုံးအမိန့်သည် သတ်ဖြတ်မှုများအား ရပ်တန့်နိုင်မည် ဟုတ်၊ မဟုတ် သံသယရှိနေသည်။ ယင်းသည် ရဲတပ်ဖွဲ့၏ဂုဏ်သိက္ခာ သန့်စင်စေရန်  အဓိကရည်ရွယ်မှု ဖြစ်နိုင်ခြေရှိသော်လည်း လက်တွေ့တွင်မူ ရဲများသည် PDEF နောက်ကွယ်၌ လှုပ်ရှားလိမ့်မည်ဖြစ်ကြောင်း အလီဂျနိုက ပြောကြားခဲ့သည်။

Ref း AFP