၂၀၁၅ ခုနှစ် နိုဝင်ဘာ ၁၁ ရက်က ကင်ဘာရာရှိ သြစတြေးလျစစ်အထိမ်းအမှတ်နေရာတွင် တွေ့ရသော ဗြိတိန်မင်းသားချားလ် (Photo: AFP)
ဗြိတိန်တော်ဝင်မင်းသား ချားလ်သည် ယခုလနှောင်းပိုင်းတွင် အရှေ့တောင်အာရှ နှင့် အိန္ဒိယသို့ လာရောက်မည်ဖြစ်သော်လည်း မြန်မာနိုင်ငံသို့ လာရောက်တော့မည် မဟုတ်ကြောင်း သိရသည်။
ချားလ်မင်းသားသည် ဗြိတိန်အစိုးရ၏ကိုယ်စား မြန်မာနိုင်ငံသို့ လာရောက်ရန် စီစဉ်ထားခဲ့သော်လည်း ယခုအခါ သူ၏တရားဝင် ခရီးစဉ်အစီအစဉ်တွင် မြန်မာနိုင်ငံကို ချန်လှပ်ခဲ့ခြင်းဖြစ်သည်။
ချားလ်မင်းသားသည် မြန်မာနိုင်ငံသို့ တရားဝင်ခရီးစဉ် သွားရောက်မည်ဟု ပြီးခဲ့သည့်လတွင် မီဒီယာများက ဖော်ပြခဲ့ကြသည်။ သို့သော်လည်း မြန်မာနိုင်ငံတွင် သြဂုတ် ၂၅ ရက်နောက်ပိုင်းမှစပြီး ဖြစ်ပွားခဲ့သော အကြမ်းဖက်မှုများနှင့် ပဋိပက္ခများပြီးနောက် ချားလ်မင်းသား၏ ခရီးစဉ်တွင် မြန်မာနိုင်ငံ မပါဝင်တော့ခြင်းဖြစ်သည်။
အောက်တိုဘာ ၄ ရက်တွင် တရားဝင် ထုတ်ပြန်ခဲ့သော ချားလ်မင်းသား၏ ခရီးအစီအစဉ်၌ ချားလ်နှင့် ဇနီးဖြစ်သူ ကမီလာတို့ သည် စင်ကာပူ၊ မလေးရှားသို့ သွားရောက်မည်ဖြစ်ပြီး ထို့နောက် အိန္ဒိယသို့ ဆက်လက် သွားရောက်ကာ ဝန်ကြီးချုပ် နရင်ဒရာမိုဒီနှင့် တွေ့ဆုံမည်ဖြစ်သည်။
“ကျွန်တော်တို့ ဒေသတွင်းမှာ ရွေးချယ်မှု စုံလင်ရေးကို သေချာစဉ်းစားခဲ့ပါတယ်။ ဒီနေ့ကျွန်တော်တို့ ကြေညာခဲ့သလိုပဲ စင်ကာပူနဲ့ မလေးရှားကို ကျွန်တော်တို့ သွားမှာပါ” ဟု ဗြိတိန်၏ နိုင်ငံခြားရေးနှင့် ဓနသဟာယဆိုင်ရာရုံးမှ ဒုတိယဥက္ကဋ္ဌ ဖိလစ်မာလိုနီက သတင်းထောက်များကို ပြောကြားခဲ့သည်။
မာလိုနီနှင့် တော်ဝင် တာဝန်ရှိသူများက ခရီးစဉ်နှင့်ပတ်သက်၍ မှတ်ချက်ပေးရန် ငြင်းဆိုခဲ့ကြသည်။ မြန်မာနိုင်ငံတွင် လူမျိုးစုအလိုက် သန့်စင်မှုများ ဆောင်ရွက်နေသည်ဟု ဗြိတိန်အာဏာပိုင်များက စွပ်စွဲထားပြီး မြန်မာ နိုင်ငံအတွက် စစ်ဘက်ဆိုင်ရာ လေ့ကျင့်သင် တန်းပေးရေးအစီအစဉ်ကို ပြီးခဲ့သည့်လတွင် ဗြိတိန်က ရပ်ဆိုင်းခဲ့သည်။
မြန်မာနှင့် ဗြိတိန်တို့၏ သံတမန်ဆက်ဆံရေး ယိုယွင်းလာခဲ့ပြီး လူ့အခွင့်အရေး လှုံ့ဆော်သူများကလည်း တော်ဝင်ခရီးစဉ်ကို ဆန့်ကျင်ခဲ့ကြသည်။
“ချားလ်မင်းသားလို ပုဂ္ဂိုလ်တစ်ယောက်က အဲဒီနိုင်ငံကို သွားမယ်ဆိုတာ ဆုလာဘ်တစ်ခုလို့ ရှုမြင်ခံရပါလိမ့်မယ်။ အစိုးရနဲ့ စစ်တပ်က အပြည်ပြည်ဆိုင်ရာ ဥပဒေကို ချိုးဖောက်နေတာကို တရားဝင် အသိအမှတ်ပြုပေးသလို ဖြစ်ပါလိမ့်မယ်” ဟု Burma Campaign UK မှ ဒါရိုက်တာ မက်ဖာမာနာက ပြောကြားခဲ့သည်။
ချားလ်မင်းသားနှင့် ကမီလာတို့သည် အောက်တိုဘာ ၃၁ ရက်တွင် စင်ကာပူ၌ ခရီး စဉ်စတင်မည်ဖြစ်ပြီး ထို့နောက် မလေးရှားသို့ ဆက်လက်ထွက်ခွာမည်ဖြစ်သည်။
မလေးရှားတွင် ဗြိတိန်နှင့် မလေးရှားတို့ ၏ သံတမန်ဆက်ဆံရေး နှစ် ၆၀ ပြည့်အထိမ်း အမှတ်ကို ဆင်နွှဲကြမည်ဖြစ်သည်။
ထို့နောက် ချားလ်မင်းသားသည် သူ၏ ၁၁ ရက်ကြာ အာရှခရီးစဉ်ကို အိန္ဒိယတွင် အဆုံးသတ်မည်ဖြစ်သည်။
