Photo : Bangkok Post

ချွတ်ယွင်းချက်ရှိသော ဒေါ်လာ ၁၀ သန်းတန်ဖိုးရှိ လေသင်္ဘောသည် ဝယ်ယူပြီး ရှစ်နှစ်အကြာတွင် တစ်စုံတစ်ရာ အကျိုးမရှိဘဲ ပျက်စီးခဲ့မှုအတွက် ထိုင်းစစ်တပ်သည် စက်တင်ဘာ ၁၈ ရက်တွင် ဝေဖန်မှုအောက် ရောက်ရှိခဲ့သည်။ ယင်းသည် စစ်တပ်အုပ်ချုပ်သော နိုင်ငံတွင် စစ်ရေးအသုံးစရိတ်နှင့် ပတ်သက်၍ နောက်ဆုံးအရှုပ်တော်ပုံ ဖြစ်လာခဲ့သည်။ ထိုင်းတွင် စစ်ဘက်အာဏာသိမ်းမှု နှစ်ကြိမ်ဖြစ်ပွားခဲ့သည့် ပြီးခဲ့သော ဆယ်စုနှစ်အတွင်း ကာကွယ်ရေး အသုံးစရိတ်အား သုံးဆနီးပါး တိုးမြှင့်သုံးစွဲခဲ့သည်။

ဒေါ်လာ တစ်ဘီလျံတန်ဖိုးရှိ တရုတ်ရေငုပ်သင်္ဘောများ ဝယ်ယူခြင်းကဲ့သို့ ဈေးနှုန်းကြီးမြင့်သည့် ဝယ်ယူမှုများသည် ယိုင်နဲ့နေသော စီးပွားရေးကြောင့် ကျပ်တည်းနေသော ပြည်သူများ၏ ဝေဖန်မှုများနှင့် အမြဲလိုလို ကြုံတွေ့ခဲ့ရသည်။ ယခုနောက်ဆုံး ဝေဖန်ခံရမှုမှာ ထိုင်းတောင်ဘက်စွန်းတွင် ဖြစ်ပွားနေသော သောင်းကျန်းမှုများအား စောင့်ကြည့်ရန် ရည်ရွယ်ချက်ဖြင့် ၂၀၀၉ ခုနှစ်တွင် Aeros 40D “Sky Dragon” လေသင်္ဘောကို ဝယ်ယူမှု ဖြစ်သည်။

သို့သော် ၄၆ ဒသမ ၆ မီတာ (၁၅၃ ပေ) ရှိသော ယင်းလေသင်္ဘောသည် ပြီးခဲ့သော ရှစ်နှစ်အတွင်း အချိန်အများစုတွင် ရပ်နားထားခဲ့ရပြီး ချွတ်ယွင်းချက်များ၊ ယိုစိမ့်မှုများနှင့် ကုန်ကျစရိတ် ကြီးမားသော ဟီလီယမ်ဓာတ်ငွေ့ ဖြည့်တင်းမှု စသည့် ပြဿနာမျိုးစုံ ကြုံတွေ့ခဲ့ရသည်။ ၂၀၁၂ ခုနှစ်တွင်မူ ယင်းလေသင်္ဘောသည် ကင်းလှည့်ပျံသန်းစဉ် လေယာဉ်မှူးက ထိန်းချုပ်မှုလွတ်ပြီး စပါးခင်း တစ်ခုထဲသို့ ပျက်ကျခဲ့ကြောင်း ထိုင်းမီဒီယာများက ဖော်ပြခဲ့သည်။

ယင်းလေသင်္ဘောအား ပြီးခဲ့သော သီတင်းပတ်တွင် အနားပေးလိုက်ပြီဖြစ်ကြောင်း သတင်းပေါက်ကြား ခဲ့ပြီးနောက် တက်ကြွလှုပ်ရှားသူ ဆရီဆူဝမ်ဂျန်ယာက ယင်းအခွန်ထမ်း ပိုက်ဆံများအား အဆိုပါ လေသင်္ဘော အတွက် မည်သည့်အတွက်ကြောင့် ဖြုန်းတီးခဲ့မှုကို စုံစမ်းစစ်ဆေးရန် ထိုင်းစာရင်းစစ်ချုပ်ရုံး (OAG) ထံ တိုက်တွန်းသည့် စာတစ်စောင်ပို့ခဲ့သည်။ ယင်းအငြင်းပွားဖွယ် ဝယ်ယူမှုတွင် ပါဝင်သော စစ်ဦးစီးချုပ်ဟောင်း၊ အစိုးရအဖွဲ့နှင့် အခြားတာဝန်ရှိသူများအား စုံစမ်းစစ်ဆေးရန် တောင်းဆိုကြောင်း ဂျန်ယာက ပြောကြားခဲ့သည်။

စိတ်ဆိုးဒေါသ ထွက်နေမှုများအား ပြေလျော့စေရန် ကြည်းတပ်ဦးစီးချုပ် ချာလမ်ချိုင်းဆစ်တီဆတ်က ယင်းလေသင်္ဘော၏ ဈေးကြီးသော ကင်မရာများအား အသုံးပြုသွားမည်ဟု ကတိပြုခဲ့သည်။ ယင်းလေသင်္ဘော၏ တာပေါ်လင်စ အပြင်လွှာသည် အပူပိုင်းရာသီဥတုကို ရှစ်နှစ်ကြာ ကြုံခဲ့ရအပြီးတွင် သက်တမ်းကုန်သွားပြီ ဖြစ်ကြောင်း တာဝန်ရှိသူများက ပြောကြားခဲ့သည်။

အခြားစစ်ရေးအသုံးစရိတ် အချည်းနှီးဖြစ်ခဲ့မှုအား ထိုင်းပြည်သူများက ဒေါသထွက်နေချိန်တွင် ယင်းကဲ့သို့ ဝယ်ယူမှုများ၊ အလွန်အမင်း ထိရောက်မှုမရှိသော ပြုပြင်ထိန်းသိမ်းရေးအတွက် ထပ်တိုးသုံးစွဲမှုများအား ဝေဖန်မှုများသည် အွန်လိုင်းတွင် ကျယ်ကျယ်ပြန့်ပြန့် ထွက်ပေါ်ခဲ့သည်။

Ref : AFP