စက်တင်ဘာ ၁၂ ရက်က ပြင်သစ်အနောက်ပိုင်းတွင် ဆန္ဒပြသူတစ်ဦးအား ရဲများက ထိန်းသိမ်းနေစဉ် (Photo - AFP)

ပြင်သစ်သမ္မတ အီမန်နျူရယ်မက်ခရွန်၏ စီးပွားရေး ပြုပြင်ပြောင်းလဲမှုများကို လူ ၂၂၀,၀၀၀ ကျော်က စက်တင်ဘာ ၁၂ ရက်တွင် ကန့်ကွက်ဆန္ဒပြခဲ့ကြပြီး မက်ခရွန်၏ စီးပွားရေးလုပ်ငန်းများအကြိုက် ပြုပြင်ပြောင်းလဲမှုကို ပထမဆုံးဆန္ဒပြမှုကြီး ဖြစ်ခဲ့သည်။ မက်ခရွန်သည် တုံ့နှေးနေသော ပြင်သစ်စီးပွားရေးကို အလုံးစုံပြုပြင်ပြောင်းလဲရန် ကတိပြုထားပြီး အလုပ်အကိုင်ရေးရာ ပြုပြင်ပြောင်းလဲမှုများက ၎င်းအတွက် အဓိကစမ်းသပ်မှုတစ်ခု ဖြစ်သည်။

ပြင်သစ်၏ အကြီးဆုံးအလုပ်သမား သမဂ္ဂဖြစ်သော CGT က ပြင်သစ်၏ တင်းကျပ်သော အလုပ်သမားဥပဒေများကို ပြောင်းလဲမှုများအား ကန့်ကွက်ဆန္ဒပြရန် ရထားအလုပ်သမားများ၊ ကျောင်းသားများနှင့် ပြည်သူ့ဝန်ထမ်းများကို တောင်းဆိုထားသည်။ ပြင်သစ်ပြည်ထဲရေးဝန်ကြီးဌာနက နိုင်ငံလုံးအနှံ့ ကန့်ကွက်ဆန္ဒပြမှုများတွင် လူ ၂၂၃,၀၀၀ ခန့် ပူးပေါင်းခဲ့သည်ဟု ပြောကြားခဲ့ပြီး ၁၃ ဦးကို ဖမ်းဆီးခဲ့ကြောင်း သိရသည်။

ကွန်မြူနစ် ကျောထောက်နောက်ခံရှိသော CGT က ဆန္ဒပြသူစုစုပေါင်းသည် ၄၀၀,၀၀၀ အထိရှိသည်ဟု ပြောကြားခဲ့သည်။ ဆန္ဒပြမှုအများစုသည် ငြိမ်းချမ်းသော ဆန္ဒပြမှုဖြစ်ခဲ့ပြီး ပါရီတွင်ရဲများနှင့် ဥပဒေမဲ့  ဆန္ဒပြသူများကြား ပဋိပက္ခအနည်းငယ်သာ ရှိခဲ့သည်။

CGT ဥက္ကဋ္ဌ ဖီးလစ်မာတီနစ်က ဆန္ဒပြမှုများသည် အောင်မြင်ခဲ့ဖွယ်ရှိသည်ဟု ပါရီတွင် ပြောကြားခဲ့သည်။ သို့သော်လည်း ရထားကွန်ရက်များ၊ လေကြောင်း ထိန်းချုပ်မှုများနှင့် ပြည်သူ့ဝန်ဆောင်မှုလုပ်ငန်းများတွင် ကမောက်ကမဖြစ်မှုသည် အကန့်အသတ်ဖြင့်သာ ဖြစ်ပွားခဲ့သည်။

စစ်တမ်းလုပ်ငန်း Polling Vox မှ နိုင်ငံရေးလေ့လာသုံးသပ်သူ ဂျရန်မီစိန့်မာရီက ဆန္ဒပြသူ အလွန်မြင့်မားခဲ့ခြင်း မရှိဟု အေအက်ဖ်ပီကို ပြောကြားခဲ့သည်။ မက်ခရွန်၏ ပြုပြင်ပြောင်းလဲမှုများသည် ရွေးကောက်ပွဲ ကတိကဝတ် တစ်စိတ်တစ်ပိုင်းဖြစ်သောကြောင့် မက်ခရွန်သည် အသာစီး၌ရှိခဲ့ကြောင်း ၎င်းက ပြောကြားခဲ့သည်။

Ref း AFP