w အမေရိကန်ရွေးကောက်ပွဲတွင် ရုရှားကစွက်ဖက်ရန် ထရန့်၏အဖွဲ့ကကူညီခဲ့မှုသည် ဖြစ်ကောင်းဖြစ်နိုင်ဟု ကလင်တန် ပြောကြား - Eleven Media Group <

အမေရိကန်ရွေးကောက်ပွဲတွင် ရုရှားကစွက်ဖက်ရန် ထရန့်၏အဖွဲ့ကကူညီခဲ့မှုသည် ဖြစ်ကောင်းဖြစ်နိုင်ဟု ကလင်တန် ပြောကြား

စက်တင်ဘာ ၁၂ ရက်က စာအုပ်လက်မှတ်ရေးထိုးပွဲတစ်ခု၌ စာအုပ်အသစ်
What Happened နှင့်အတူတွေ့ရသော ဟီလာရီကလင်တန်

ဟီလာရီကလင်တန်သည် စက်တင်ဘာ ၁၂ ရက်တွင် ၂၀၁၆ ခုနှစ် သမ္မတရွေးကောက်ပွဲ မဲဆွယ်မှုနှင့်ပတ်သက်၍ အလုံးစုံဖွင့်ချထားသော ၎င်း၏ ကိုယ်တွေ့မှတ်တမ်းကို ထုတ်ပြန်ခဲ့ပြီး အမေရိကန်သမ္မတ ရွေးကောက်ပွဲတွင် ရုရှားက ၀င်ရောက်စွက်ဖက်နိုင်ရန် ယင်းအချိန်က သမ္မတကိုယ်စားလှယ်လောင်း ဒေါ်နယ်ထရန့်၏ လုပ်ဖော်ကိုင်ဖက်များက ကူညီပေးခဲ့မှုသည် ဖြစ်ကောင်းဖြစ်နိုင်ဟု ၎င်းက ပြောကြားခဲ့သည်။ ထရန့်၏ မဲဆွယ်အဖွဲ့ တာဝန်ရှိသူများ သို့မဟုတ် လုပ်ဖော်ကိုင်ဖက်များနှင့် ရုရှားတို့အကြား နားလည်မှုတချို့နှင့် တိုက်ရိုက်ဆက်သွယ်မှုတို့ ရှိနေကြောင်း သေချာနေသည်ဟု ပြီးခဲ့သောနှစ် သမ္မတရွေးကောက်ပွဲတွင် ထရန့်အား ရှုံးနိမ့်ခဲ့သည့် ဒီမိုကရက်တစ်သမ္မတ ကိုယ်စားလှယ်လောင်း ကလင်တန်က USA Today သတင်းစာသို့ ပြောကြားခဲ့သည်။

ထရန့်နှင့် သူ၏အဖွဲ့နှင့် ရုရှား၏ငွေကြေးတို့အကြား ငွေကြေးဆိုင်ရာအရှုပ်တော် ပုံရှိနေကြောင်းကို သံသယမ၀င်မိဟု ကလင်တန်က ၎င်း၏ ကိုယ်တွေ့မှတ်တမ်း What Happened ကို မဖြန့်ချိမီ နာရီပိုင်းအလိုတွင် ဖော်ပြခဲ့သော ယင်းအင်တာဗျူး၌ ပြောကြားခဲ့သည်။

ယင်းစာအုပ်ဖြန့်ချိမှုနှင့်အတူ အင်တာဗျူးအများအပြား၌ ကလင်တန်က ယင်းကဲ့သို့ အခိုင်အမာ ပြောကြားမှုများသည် ပြင်ပမှ အင်အားစုများက ၎င်းအား အမေရိကန်၏ ပထမဆုံး အမျိုးသမီးသမ္မတဖြစ်လာမှုမှ ကြိုတင်ဟန့်တားရန် လျှို့ဝှက်ပူးပေါင်းကြံစည်ခဲ့ကြကြောင်း ရွေးကောက်ပွဲမဲဆွယ်မှုဆိုင်ရာ  အဓိကကျသောသတင်းစကားကို အားကောင်းစေရန် ချဲ့ထွင်ခြင်းဖြစ်သည်။ ၎င်းအား ခါးသီးသော အဆုံးသတ်ဆီသို့ တွန်းပို့ခဲ့သည့် ယင်းပြင်ပအင်အားစု အများအပြားရှိကြောင်း ကလင်တန်က National Public Radio သို့ ပြောကြားခဲ့သည်။

၎င်းတို့ထဲတွင် နိုင်ငံခြားရေးဝန်ကြီးအဖြစ် ထမ်းဆောင်စဉ်က သုံးစွဲခဲ့သည့် ၎င်း၏ ကိုယ်ရေးကိုယ်တာသုံး အီးမေးလ်များနှင့် ဆာဗာအား စုံစမ်းစစ်ဆေးမှုကို အက်ဖ်ဘီအိုင်က ပြန်လည်ပြုလုပ်မည်ဖြစ်ကြောင်း ယင်းအချိန်က အက်ဖ်ဘီအိုင်ညွှန်ကြားရေးမှူး ဂျိမ်းကိုမေက ရွေးကောက်ပွဲမတိုင်မီ ၁၁ ရက်သာအလို၌ ကြေညာခဲ့မှုလည်း ပါဝင်သည်။ ကိုမေ၏ ယင်းကြေညာမှုအပြီး ၎င်း၏ မဲဆွယ်မှုအရှိန်သည် ရပ်သွားခဲ့ကြောင်း၊ ထောက်ခံမှုများသည် ကျဆင်းသွားခဲ့ပြီး အပြင်းအထန် ကြိုးစားခဲ့သော်လည်း အချိန်နှောင်းသွားခဲ့ကြောင်း ကလင်တန်က NPR သို့ ပြောကြားခဲ့သည်။

ထို့ပြင် ရွေးကောက်ပွဲတွင် ပါတီတွင်းပြိုင်ဘက် ဘာနေးဆန်ဒါးနှင့် ၎င်းအား ထောက်ခံသူများထံမှ အပြည့်အ၀ထောက်ခံမှု မရခဲ့ကြောင်း ကလင်တန်က Pod Save America သို့ ပြောကြားခဲ့သည်။ အသက် ၆၉နှစ်ရှိ ကလင်တန်သည် ၎င်း၏ စာအုပ် အရောင်းမြှင့်တင်ရန်အတွက်သာမက ၎င်းသည် အမေရိကန်နိုင်ငံရေးလောကတွင် အရေးပါသူတစ်ဦးအဖြစ် ရပ်တည်မှုကို အရောင်တင်နိုင်ရန်အတွက်ပါ နေရာ ၁၅ နေရာသို့ စာအုပ်မိတ်ဆက်ခရီးစဉ် သွားရောက်ရန် စီစဉ်ထားကြောင်း သိရသည်။

Refး AFP

September 13, 2017














Copy Protected by Chetan's WP-Copyprotect.