သြဂုတ် ၂၄ ရက်က ပြုလုပ်သည့် ပြည်ထောင်စုလွှတ်တော် အစည်းအဝေးအား တွေ့ရစဉ်
ပြည်ထောင်စုအစိုးရအဖွဲ့ကိုယ်စား စီမံကိန်းနှင့် ဘဏ္ဍာရေးဝန်ကြီးဌာနက တင်သွင်းသော ၂၀၁၈-၂၀၁၉ ခုနှစ် ပြည်ထောင်စု၏ အခွန်အကောက်ဥပဒေကြမ်းတွင် စီးကရက်၊ ဆေးပေါ့လိပ်နှင့် အရက်အမျိုးမျိုးတို့ အတွက် အခွန်နှုန်းထားများ တိုးမြှင့်ကောက်ခံထားကြောင်း သိရသည်။
နေပြည်တော်၌ သြဂုတ် ၂၄ ရက်က ပြုလုပ်သော ဒုတိယအကြိမ် ပြည်ထောင်စု လွှတ်တော် နဝမပုံမှန်အစည်းအဝေး ၁၂ ရက် မြောက်နေ့တွင် ၂၀၁၈-၂၀၁၉ ခုနှစ် ပြည်ထောင်စု၏ အခွန်အကောက်ဥပဒေကြမ်းနှင့် စပ်လျဉ်း၍ စီမံကိန်းနှင့် ဘဏ္ဍာရေးဝန်ကြီးဌာန ဒုတိယဝန်ကြီး ဦးမောင်မောင်ဝင်းက လွှတ်တော်သို့ တင်သွင်းခဲ့ခြင်းဖြစ်သည်။
“၂၀၁၈-၂၀၁၉ ခုနှစ် ပြည်ထောင်စုရဲ့ အခွန်အကောက် ဥပဒေမူကြမ်းနဲ့ ပတ်သက် ပြီး အဓိကအားဖြင့် ထူးခြားချက်နှစ်ချက်ရှိပါ တယ်။ ပထမအချက်မှာ အထူးကုန်စည်ခွန်နှုန်းထားတွေကို တိုးမြှင့်သတ်မှတ်ခြင်းဖြစ်ပြီး ဒုတိယအချက်မှာ ယခင်က ဝင်ငွေခွန်ကင်းလွတ်ခွင့် ပြုပေးထားသော ဝင်ငွေပမာဏကို ပြောင်းလဲသတ်မှတ်ခြင်းဖြစ်ပါတယ်။ ပြည်ထောင်စုအစိုးရအဖွဲ့သည် နိုင်ငံတော်က ချ မှတ်ထားတဲ့ စီးပွာရေးမူဝါဒနဲ့ ဘဏ္ဍာရေးမူဝါဒကို ပိုမိုထိရောက်စွာ ဖော်ဆောင်နိုင်စေရန်အလို့ငှာ အချို့သော အထူးကုန်စည်ခွန် နှုန်းထားတွေကို လက်ရှိကောက်ခံလျက်ရှိတဲ့ နှုန်းထားတွေအစား ဂျီဒီပီတိုးတက်မှုနဲ့ ငွေ ကြေးဖောင်းပွမှုတိုးနှုန်းတို့ကိုအခြေခံပြီး နှုန်းထားအသစ်နဲ့ အနည်းငယ်တိုးမြှင့်ပြီး ပြောင်းလဲ သတ်မှတ်ဆောင်ရွက်မည်ဖြစ်ပါတယ်” ဟု ဦးမောင်မောင်ဝင်းက ပြောကြားသည်။
၂၀၁၈- ၂၀၁၉ အခွန်အကောက်ဥပဒေကြမ်းတွင် တိုးမြှင့်သတ်မှတ်ထားသည့် အထူးကုန်စည်ခွန်များမှာ စီးကရက်အမျိုးမျိုးတွင် အလိပ် ၂၀ ပါ တစ်ဘူးရောင်းဈေးသည် ကျပ် ၆၀၀ အဆင့်ဖြစ်လျှင် တစ်လိပ်လျှင် အခွန် ခြောက်ကျပ်နှုန်း၊ အလိပ် ၂၀ ပါ တစ်ဘူး ရောင်းဈေးသည် ၆၀၁ ကျပ်မှ ကျပ် ၈၀၀ အဆင့်ဖြစ်လျှင် အခွန် ၁၄ ကျပ် ၊ အလိပ် ၂၀ ပါ တစ်ဘူးရောင်းဈေးသည် ၈၀၁ ကျပ်မှ ကျပ် ၁၀၀၀ အဆင့်ဖြစ်လျှင် အခွန် ၁၉ ကျပ်၊ အလိပ် ၂၀ ပါ တစ်ဘူးရောင်းဈေးသည် ၁၀၀၁ ကျပ်နှင့်အထက်ဖြစ်လျှင် အခွန် ၂၁ ကျပ်နှင့် ဆေးပေ့ါလိပ်တစ်လိပ်လျှင် အခွန်တစ်ကျပ်အဖြစ်တင်ပြထားပြီး ၂၀၁၈ ခုနှစ် အခွန်အကောက်ဥပဒေတွင် စီးကရက်အမျိုး မျိုးတွင် အလိပ် ၂၀ ပါ တစ်ဘူးရောင်းဈေးသည် ကျပ် ၅၀၀ အဆင့်ဖြစ်လျှင် တစ်လိပ်လျှင် အခွန် လေးကျပ်နှုန်း၊ အလိပ် ၂၀ ပါ တစ်ဘူး ရောင်းဈေးသည် ကျပ် ၅၀၁ ကျပ်မှ ကျပ် ၇၀၀ အဆင့်ဖြစ်လျှင် အခွန် ကိုးကျပ် ၊ အလိပ် ၂၀ ပါ တစ်ဘူးရောင်းဈေးသည် ၇၀၁ ကျပ်မှ ကျပ် ၉၀၀ အဆင့်ဖြစ်လျှင် အခွန် ၁၃ ကျပ်၊ အလိပ် ၂၀ ပါတစ်ဘူးရောင်းဈေးသည် ၉၀၁ ကျပ်နှင့် အထက်ဖြစ်လျှင် အခွန် ၁၆ ကျပ် နှင့် ဆေးပေ့ါလိပ်တစ်လိပ်လျှင် အခွန် ၂၅ ပြားအဖြစ် သတ်မှတ်ထားသည်။
ထို့ပြင် အရက်အမျိုးမျိုးကိုလည်း ၂၀၁၈ -၂၀၁၉ အခွန်အကောက် ဥပဒေကြမ်းတွင် တစ်လီတာတန်းဖိုးကျပ် ၁၀၀၀ အထိဖြစ်လျှင် အခွန် ၁၂၂ ကျပ်မှ တစ်လီတာတန်ဖိုးတိုးမြှင့်လာသည်နှင့်အမျှ အခွန်နှုန်းထားများကို တိုးမြှင့်ထားကာ တစ်လီတာတန်ဖိုး ကျပ် ၂၉၀၀၁ နှင့် အထက်ဖြစ်လျှင် အခွန်နှုန်းသည် တစ်လီတာတန်ဖိုး၏ ရာခိုင်နှုန်း ၆၀ အဖြစ် တင်ပြထားကာ ၂၀၁၈ ခုနှစ် အခွန်အကောက်ဥပဒေတွင် တစ်လီတာတန်ဖိုး ကျပ် ၇၅၀ အထိ အဆင့်ဖြစ်လျှင် အခွန် ၉၁ ကျပ်အဖြစ် သတ်မှတ်ထားကာ တစ်လီတာတန်ဖိုး ကျပ် ၂၆၀၀၁ နှင့်အထက်ဖြစ်ပါက အခွန်သည် တစ်လီတာတန်ဖိုး၏ ရာခိုင်နှုန်း ၆၀ အဖြစ် သတ်မှတ်ထားသည်။
