ဘားအံမြို့ မြေနိမ့်ရပ်ကွက်အတွင်း သံလွင်မြစ်ရေ ဒုတိယအကြိမ် ပြန်လည်မြင့်တက် လာသည်ကို သြဂုတ် ၁၃ ရက် နံနက်ပိုင်းက တွေ့ရစဉ်
သံလွင်မြစ်ရေသည် သြဂုတ် ၁၃ ရက် နံနက် ၁၀ နာရီ တိုင်းထွာချက်အရ ၎င်း၏စိုးရိမ်ရေမှတ်အထက် ၈၇၅ စင်တီမီတာသို့ ရောက်ရှိနေပြီး မိုးအားကောင်းမွန်ပါက ဆက်လက်မြင့်တက်ဖွယ်ရှိကာ သံလွင်မြစ် သက်ရောက်ရာ ဘားအံမြို့တွင် ဒုတိယအကြိမ် မြစ်ရေလွှမ်းမိုးမှု ဖြစ်ပေါ်နေကြောင်း သိရသည်။
သံလွင်မြစ်သက်ရောက်ရာ ဘားအံမြို့တွင် ဇူလိုင်၂၁ ရက်မှ စတင်၍ သံလွင်မြစ်ရေသည် ၎င်း၏ စိုးရိမ်ရေမှတ် ၇၅၀ စင်တီမီတာကို ကျော်လွန်ရောက်ရှိပြီး မြေနိမ့်ရပ်ကွက်များအတွင်း မြစ်ရေလွှမ်းမိုးမှု ဖြစ်ပေါ်ခဲ့ကာ နှစ်ပေါင်း ၅၃ နှစ်အတွင်း အမြင့်ဆုံးစံချိန် ၉၃၈ စင်တီမီတာသို့ ရောက်ရှိခဲ့ကြောင်း သိရသည်။
“မိုးအားကောင်းနေမယ်ဆိုရင် နောက်ထပ် သုံးလေးရက်လောက် ထပ်တက်မယ့် အနေအထားရှိတယ်။ ရေလွှမ်းမိုးမှုက တစ်လဝန်းကျင် ကြာလာပြီဆိုတော့ လူပင်ပန်း စိတ်ပင်ပန်းဒဏ်ကို ခံစားရတယ်။ စားရေးသောက်ရေးက ကယ်ဆယ်ရေးစခန်းကိုပဲ အားထားနေရတယ်။ ရေပြန်လည်ကျဆင်းရင် ဝမ်းရေးအခက်အခဲထက် လောလောဆယ် ပျက်စီးသွားတဲ့ နေအိမ်ပြုပြင်ဖို့က အရေးကြီးနေတယ်။ ငွေကြေးကို ဘယ်လိုရှာမလဲ စဉ်းစားရင်းက ညညအိပ်မပျော်ဘူး” ဟု ဘားအံမြို့ အမှတ်(၁)ရပ်ကွက်မှ ဦးဟန်မော်က ပြောကြားသည်။
ကရင်ပြည်နယ်အတွင်း မိုးသည်းထန်စွာ ရွာသွန်းမှုကြောင့် သံလွင်မြစ်ရေသည် ယခင် ၂၀၀၂ ခုနှစ်က စံချိန်ရှိခဲ့သည့် ၉၃၆ စင်တီမီတာကို ကျော်လွန်ကာ ၉၃၈ စင်တီမီတာကို ကျော်လွန်ရောက်ရှိခဲ့ကြောင်း သိရသည်။
မြန်မာနိုင်ငံ မြစ်ရေကြီးမှု ဒုတိယကာလအတွင်း သံလွင်မြစ်ရေချိန်မှာ၂၀၀၂ ခုနှစ်တွင် စံချိန်တင်မြစ်ရေလွှမ်းမိုးမှု ၉၃၆ စင်တီမီတာကို ရောက်ရှိခဲ့ပြီး၂၀၁၁ ခုနှစ်တွင် ၉၂၅ စင်တီမီတာသို့ ရောက်ရှိခဲ့ကာ ယင်းနှစ် မြစ်ရေလွှမ်းမိုးမှု ကာလအတွင်း ရေကြီးလွှမ်းမိုးမှု လေးကြိမ်ဖြစ်ပေါ်ခဲ့ကာ၂၀၁၄ ခုနှစ်အထိ ပုံမှန်ရေကြီး ရေလွှမ်းမိုးမှု ဖြစ်ပေါ်ရာမှ သုံးနှစ်ဆက်တိုက် မြစ်ရေလွှမ်းမိုးမှု မဖြစ်ပေါ်ခဲ့ဘဲ ယခုနှစ်တွင် စံချိန်တင် မြစ်ရေချိန် ၉၃၆ စင်တီမီတာကို ချိုးကာ ၉၃၈ စင်တီမီတာသို့ စံချိန်ချိုးရေလွှမ်းမိုးမှု ဖြစ်ပေါ်ခြင်းဖြစ်ကြောင်း သိရသည်။
ကရင်ပြည်နယ်အတွင်း မိုးဆက်တိုက် ရွာသွန်းခြင်းကြောင့် သံလွင်မြစ်ရေသည် သြဂုတ် ၈ ရက် နံနက်ပိုင်းက စိုးရိမ်ရေမှတ် အထက် ၈၃၁ စင်တီမီတာသို့ အနည်းငယ် ကျဆင်းခဲ့ပြီး ရေဘေးသင့်သူအချို့ နေအိမ်များသို့ ပြန်လည်နေထိုင်ရာမှ ယင်းနေ့ ည ၁၂ နာရီခန့်တွင် ခုနစ်စင်တီမီတာသို့ ပြန်လည် မြင့်တက်လာရာ ဒေသခံပြည်သူများ ကယ်ဆယ်ရေး စခန်းများအတွင်း ပြန်လည်ခိုလှုံခဲ့ရပြီး သြဂုတ် ၁၃ ရက် နံနက် ၁၀ နာရီ တိုင်းထွာချက်အရ ၈၇၅ စင်တီမီတာသို့ ရောက်ရှိနေသဖြင့် ကယ်ဆယ်ရေးစခန်းများကို ရုပ်သိမ်းနိုင်ခြင်း မရှိသေးကြောင်း သိရသည်။
