ဒေါ်လာဈေးထိန်းကျောင်းရန် ဗဟိုဘဏ် လုပ်ဆောင်နေသည် ဆိုသော်လည်း မှောင်ခိုဈေးကွက် ထိန်းကျောင်းနိုင်မှု မရှိခြင်း၊ နိုင်ငံခြားအရန်ငွေနည်းပါးခြင်းနှင့် ပြည်ပကြွေးမြီ များပြားမှုကြောင့် ထိရောက်စွာ ထိန်းကျောင်းနိုင်ဖွယ် မရှိကြောင်း သုံးသပ်

ဒေါ်လာဈေးထိန်းကျောင်းရန် ဗဟိုဘဏ် လုပ်ဆောင်နေသည် ဆိုသော်လည်း မှောင်ခိုဈေးကွက် ထိန်းကျောင်းနိုင်မှု မရှိခြင်း၊ နိုင်ငံခြားအရန်ငွေနည်းပါးခြင်းနှင့် ပြည်ပကြွေးမြီ များပြားမှုကြောင့် ထိရောက်စွာ ထိန်းကျောင်းနိုင်ဖွယ် မရှိကြောင်း သုံးသပ်
Published 14 August 2018

ပြည်တွင်းငွေလဲကောင်တာတစ်ခုတွင် နိုင်ငံခြားငွေအရောင်းအဝယ် ပြုလုပ်နေသည်ကို တွေ့ရစဉ် (ဓာတ်ပုံ-အောင်မျိုးသန့်)

ဒေါ်လာဈေးထိန်းကျောင်းရန် မြန်မာနိုင်ငံတော်ဗဟိုဘဏ် အနေဖြင့် လုပ်ဆောင်နေသည်ဆိုသော်လည်း တရားမဝင် မှောင်ခိုဈေးကွက် ထိန်းကျောင်းနိုင်မှု မရှိခြင်း၊ ဗဟိုဘဏ်၏ နိုင်ငံခြားအရန်ငွေနည်းပါးမှု အခြေအနေနှင့် များပြားသည့် ပြည်ပကြွေးမြီများကြောင့် ထိရောက်စွာ ထိန်းကျောင်းနိုင်ဖွယ်မရှိကြောင်း ဘဏ်နှင့် စီးပွားရေးပညာရှင်များက သုံးသပ်ပြောကြားသည်။

မြန်မာကျပ်ငွေတန်ဖိုး စံချိန်တင် ကျဆင်းကာ ဒေါ်လာဈေး ကျပ် ၁၅၀၀ အထိ မြင့်တက်လာမည်ဟု ခန့်မှန်းမှုများ ရှိနေချိန်တွင် ကုန်သွယ်မှုလိုငွေ လျှော့ချနိုင်မှုမရှိခြင်း၊ နိုင်ငံခြားအရန်ငွေနည်းပါးခြင်းနှင့် ပြည်ပကြွေးမြီများ ပေးဆပ်နေရခြင်းတို့ကြောင့် မြန်မာနိုင်ငံတော်ဗဟိုဘဏ် အနေဖြင့် ထိရောက်စွာ ထိန်းကျောင်းနိုင်ဖွယ်မရှိကြောင်း သုံးသပ်မှုများ ရှိနေသည်။

မြန်မာနိုင်ငံ၏ တရားမဝင် ဒေါ်လာဈေးကွက်မှာ တစ်နှစ်ဒေါ်လာ ငါးဘီလျံခန့် စီးဆင်းနေပြီး ထိုသို့ စီးဆင်းနေမှုများမှာလည်း ၂၀၁၇-၂၀၁၈ ဘဏ္ဍာနှစ်တွင် ကုန်သွယ်မှုလိုငွေ ဒေါ်လာ ၄ ဘီလျံခန့် လိုအပ်ခဲ့ခြင်း၊ လက်ရှိဘဏ္ဍာနှစ်တိုတွင် ကုန်သွယ်မှုလိုငွေ ဒေါ်လာတစ်ဘီလျံခန့် ဖြစ်ပေါ်နေခြင်းများကို အဆိုပါ တရားမဝင်ဈေးကွက်မှ ဒေါ်လာများဖြင့် ဖြေရှင်းနေရဖွယ်ရှိကြောင်းနှင့် ပြည်ပကြွေးမြီမှာ တစ်နှစ်တာကာလအတွင်း ဒေါ်လာတစ်ဘီလျံကျော် မြင့်တက်လာမှု၊ ပြည်ပကြွေးမြီ ဒေါ်လာ ၁၀ ဘီလျံကျော်ကို အရစ်ကျ ပြန်ဆပ်နေရမှုများနှင့် နိုင်ငံခြားအရန်ငွေမှာ ပို့ကုန်၏ ၃ ဒသမ ၂ လစာခန့်သာ ရှိနေခြင်းများကြောင့် ဗဟိုဘဏ်အနေဖြင့် ထိရောက်စွာ ထိန်းကျောင်းနိုင်ဖွယ်မရှိကြောင်း သုံးသပ်နေခြင်း ဖြစ်သည်။

“ပြည်ပမှာ ရှိနေတဲ့ Hot Money တွေနဲ့ ဈေးကစားနေတယ်။ ဗဟိုဘဏ်ကလဲ မလုပ်သာဘူး။ ဗဟိုဘဏ်ကိုလည်းသွားပြီး အပြစ်မတင်နဲ့။ သူ့မှာလည်း ရှိတဲ့ပိုက်ဆံလေးတွေနဲ့ ကြပ်ကြပ်မတ်မတ် ထိန်းကျောင်းပြီး လုပ်နေရတာကိုး။ ပြည်ပကြွေးမြီတွေကိုလည်း ဆပ်နေရတယ်။ အရင်တုန်းက ရှိခဲ့တဲ့ အကြွေးတွေကလည်း နည်းတာမဟုတ်ဘူး။ ဟိုတုန်းက ယူခဲ့တဲ့အကြွေးတွေ ဆပ်နေရတော့ သူ့လည်း အပြစ်တင်လို့ မရဘူး။ ဈေးကွက်မှာ ပြောနေတာကတော့ ဗဟိုဘဏ်က ထိန်းလို့ရတာပဲ။ ဒေါ်လာတွေ ထုတ်ရောင်းလိုက်ရင် ဈေးကျလာမှာပဲ။ ဒါက ပြောရင်လွယ်တယ်။ တကယ်တမ်း လက်တွေ့က မလွယ်ဘူး” ဟု မြန်မာနိုင်ငံတော် ဗဟိုဘဏ်တွင် ဒုတိယဥက္ကဌအဖြစ် လုပ်ကိုင်ခဲ့သူ ဦးသန်းလွင်က ပြောကြားသည်။

၂၀၁၈ ခုနှစ် မေလတွင် တစ်ဒေါ်လာ ၁၃၅၁ ကျပ်သာ အမြင့်ဆုံးဖြစ်ခဲ့သည့် နိုင်ငံခြားငွေလဲနှုန်းသည် လက်ရှိကာလတွင် တစ်ဒေါ်လာ ၁၄၄၂ ကျပ်အထိ ဗဟိုဘဏ်က ဆွဲတင်သတ်မှတ်မှုများ ရှိနေပြီး သြဂုတ် ၇ ရက်တွင် တစ်ဒေါ်လာ ၁၄၇၅ ကျပ်အထိ အမြင့်ဆုံးတက်ခဲ့ပြီးနောက် ပြန်ကျခဲ့သော်လည်း သြဂုတ် ၁၃ ရက်တွင် ၁၄၇၅ ကျပ်အထိ ပြန်လည်မြင့်တက်လာသည်။

တရုတ်-အမေရိကန် ကုန်သွယ်ရေးစစ်ပွဲ၏ အကျိုးဆက်ဟု သုံးသပ်မှုများ ရှိနေသော်လည်း မြန်မာကျပ်ငွေတန်ဖိုးကျဆင်းမှုမှာ အခြားသော နိုင်ငံများထက် ပိုမိုနေကြောင်းနှင့် ပုဂ္ဂလိကဘဏ်များမှာ ဗဟိုဘဏ်သတ်မှတ်သည့် ရည်ညွှန်းငွေလဲနှုန်းအထက်တွင် ရောင်းဝယ်နေမှုများကြောင့် ဗဟိုဘဏ်အနေဖြင့် ပြည်တွင်းဘဏ်များကို ထိန်းကျောင်းရာတွင် သတ်မှတ်စည်းမျဉ်းများ လိုက်နာမှုမရှိဘဲ ငွေဈေးကစားသည့်ဘဏ်များရှိနေပါက အရေးယူရန်ပါ လိုအပ်မည်ဖြစ်ကြောင်း သုံးသပ်မှုများ ရှိသည်။ လက်ရှိတွင် ဗဟိုဘဏ်က ဒေါ်လာထုတ်ရောင်းပေးနေသည် ဆိုသော်လည်း ဈေးကွက်အတွင်းသို့ ထုတ်ရောင်းပေးနေသည့် ပမာဏအတိုင်း ရောက်ရန်မှာ ပုဂ္ဂလိကဘဏ်များ၏ လုပ်ဆောင်မှုကြောင့် ခက်ခဲမည်ဖြစ်ကြောင်း သုံးသပ်ကြသည်။

“မြန်မာကျပ်ငွေတန်ဖိုးက ကျဦးမှာပါ။ ဆက်ကျဦးမယ့် အကြောင်းရင်းတွေကလည်း အများကြီးပဲ။ နိုင်ငံခြားအရန်ငွေကလည်း နည်းနေတယ်။၂၀၁၅ လောက်တုန်းက သိရသလောက် နိုင်ငံခြားအရန်ငွေက ရှစ်ဘီလျံလောက်ရှိတယ်။ အခုလက်ရှိ ဘယ်လောက်ရှိလဲမသိပေမဲ့ ဒီ့ထက်ပဲနည်းဖို့ရှိတယ်။ ပြီးတော့ ပို့ကုန်ကလည်း ကျွန်တော်တို့မှာ များများစားစား တင်ပို့နိုင်မှု မရှိဘူး။ နောက်ပြီးတော့ ရေကြီးရေလျှံကလည်း ဖြစ်နေတယ်။ နံပါတ်လေးကတော့ မသမာတဲ့ဈေးကစားမှုတွေကို ထိန်းကွပ်နိုင်မှုမရှိဘူး။ နောက်ပြီးတော့ ဗဟိုဘဏ်က ထုတ်ရောင်းလည်း ထုတ်ရောင်းတဲ့ပမာဏအတိုင်း ဈေးကွက်ကို မရောက်လောက်ဘူးလို့ ကျွန်တော်ယူဆတယ်။ တစ်နေ့ ဒေါ်လာတစ်သိန်း ထုတ်ရောင်းတယ်ဆိုလည်း တစ်သိန်းမရောက်နိုင်ဘူး။ အမြတ်ရတယ်ဆိုပေမဲ့လည်း ဈေးကွက်ပေါက်ဈေးကိုထိန်းပြီး ရောင်းနေတဲ့သဘောပဲ။ ဈေးကွက်ကို Mainpulate လုပ်တာ ရှိနေတယ်။ ငွေလဲကောင်တာတွေကို ကြည့်ရင်လည်း ဝယ်ချင်သလောက်ဝယ်မရဘူး။ ရောင်းချင် ရောင်းချင်ရင်တော့ ကြိုက်သလောက်ရောင်း။ ဘဏ်တွေမှာလည်း အဲဒီလိုသဘောမျိုး ရှိနေတယ်။ ဆိုတော့ သူတို့ဘာကဗန်းပြလည်းဆိုတော့ အဝယ်ရှိသလောက်ပဲ ရောင်းမယ်ပေါ့။ သူတို့ လက်ထဲမှာ ရှိသလောက် ထုတ်မရောင်းနိုင်ဘူးဆိုတဲ့သဘောပေါ့။ အဲဒါတွေကြောင့်မို့လို့ ဒီဈေးကွက်က တည်ငြိမ်တဲ့ဈေးကွက်ဖြစ်လာဖို့ဆိုတာ တော်တော်ကို ခက်ခဲဦးမှာ။ ဗဟိုဘဏ်ကလည်း သူရောင်းနေရုံနဲ့တော့ သူ့ရှိတာပဲ ကုန်သွားလိမ့်မယ်။ ပြတ်ပြတ်သားသား ဥပဒေနဲ့ နောက်ကလိုက်မှပဲ ရလိမ့်မယ်” ဟု မူဝါဒဆိုင်ရာ စီးပွားရေးပညာရှင် ဒေါက်တာအောင်ကိုကိုက ဆိုသည်။

Most Read

Most Recent