ရန်ကုန်မြို့ရှိ နိုင်ငံခြားငွေလဲလှယ် ရောင်းဝယ်ရေးစင်တာတစ်ခုကို တွေ့ရစဉ် (ဓာတ်ပုံ-ကျော်ဇင်ဖြိုး)
ကမ္ဘာ့ဈေးကွက်တွင် ဒေါ်လာဈေး အားကောင်းနေသောကြောင့် ပြည်တွင်းဈေးကွက်တွင် နိုင်ငံခြားငွေလဲနှုန်း နှစ်ပတ်အတွင်း ၃၇ ကျပ်မြင့်တက်ခဲ့ပြီး ကျပ်ငွေတန်ဖိုး ၂ ဒသမ ၇ ရာခိုင်နှုန်းကျဆင်းခဲ့ကာ တစ်ဒေါ်လာ ၁၃၈၁ ကျပ်အထိ ရောက်ရှိလာကြောင်း ဈေးကွက်အတွင်း နိုင်ငံခြားငွေကြေးရောင်းဝယ်နေသူများထံမှ သိရသည်။
အမေရိကန်သည် တရုတ်နိုင်ငံသာမက အဓိကမဟာမိတ်ဖြစ်သော ဥရောပနိုင်ငံများကိုပါ သွင်းကုန်ခွန်မြှင့်တင်မှုနှင့် ယင်းနိုင်ငံများ၏ ပြန်လည်တုံ့ပြန်မှုများကြောင့် အခြေအနေများတင်းမာလာခဲ့ပြီး ကမ္ဘာလုံးဆိုင်ရာ ကုန်သွယ်ရေးစစ်ပွဲအသွင် ဖြစ်ပေါ်နေကြောင်း သိရသည်။ ယင်းအတောအတွင်း အမေရိကန် နိုင်ငံအတွင်း စီးပွားရေးအခြေအနေကောင်း မွန်မှုကြောင့် ဇွန် ၁၃ ရက်တွင် အတိုးနှုန်း ၀ ဒသမ ၂၅ ရာခိုင်နှုန်းတိုးမြှင့်ခဲ့ပြီး ဘဏ်တိုးနှုန်းသည် နှစ်ရာခိုင်နှုန်းအထိ ရှိလာပြီဖြစ်သည်။ ထို့ပြင် ၂၀၁၈ ခုနှစ်အတွင်း နောက်ထပ်အတိုးနှုန်း နှစ်ကြိမ်တိုးမြှင့်ဦးမည်ဟု အမေရိကန်ဗဟိုဘဏ်ဥက္ကဋ္ဌက ပြောကြားထားပြီး ကုန်သွယ်ရေးစစ်ပွဲအရှိန်နှင့် အမေရိကန် အတိုးနှုန်းကိစ္စက ဒေါ်လာကို ဆက်လက်အား ကောင်းစေသည့် အဓိကအချက်များ ဖြစ်သည်။
အမေရိကန်နိုင်ငံ ရွေးကောက်ပွဲပြုလုပ်ခဲ့သည့် ၂၀၁၆ ခုနှစ် နိုဝင်ဘာလနောက်ပိုင်း ၂၀၁၇ ဇန်နဝါရီ ၃ ရက်တွင် ၁၀၃ ဒသ မ ၈၂ ပွိုင့်အထိမြင့်တက်ခဲ့ပြီး ၂၀၁၈ ခုနှစ် ဇန်နဝါရီ ၂၅ ရက်တွင် ၈၈ ဒသမ ၆၃ ပွိုင့် အထိကျဆင်းခဲ့သည်။ ပြီးခဲ့သည့် ငါးလအတွင်း အမြင့်ဆုံးဖြစ်ပေါ်ခဲ့သော ကမ္ဘာ့ဒေါ်လာဈေးညွှန်းကိန်းများမှာ ဒီဇင်ဘာလတွင် ၉၄ ဒသမ ၁၈ ပွိုင့်၊ ဇန်နဝါရီလတွင် ၉၂ ဒသမ ၃၆ ပွိုင့်၊ ဖေဖော်ဝါရီလတွင် ၉၀ ဒသမ ၄၃ ပွိုင့်၊ မတ်လတွင် ၉၀ ဒသမ ၃၇ ပွိုင့်၊ ဧပြီလတွင် ၉၁ ဒသမ ၇၁ ပွိုင့်၊ မေလတွင် ၉၄ ဒသမ ၈၃ ပွိုင့်ဖြစ်ပြီး ဇွန် ၂၁ ရက်တွင် ၉၅ ဒသမ ၁၆ ပွိုင့် ဝန်းကျင်သို့ ရောက်ရှိခဲ့ခြင်း ဖြစ်သည်။
၂၀၁၈ ခုနှစ် မေလမှစတင်ကာ ကမ္ဘာ့ဒေါ်လာဈေးအညွှန်းကိန်း သိသိသာသာ ပြန်လည်မြင့်တက်ခဲ့ခြင်းဖြစ်ပြီး ပြည်တွင်းဈေးကွက်၌ ငါးလအတွင်း လအလိုက်ဖြစ်ပေါ်သော နိုင်ငံခြားငွေလဲနှုန်းအနိမ့်ဆုံးနှင့် အမြင့်ဆုံးနှုန်းများမှာ ဇန်နဝါရီတွင် ၁၃၂၃-၁၃၅၄ ကျပ်၊ ဖေဖော်ဝါရီလတွင် ၁၃၂၃-၁၃၃၁ ကျပ်၊ မတ်လတွင် ၁၃၂၆-၁၃၃၄ ကျပ်၊ ဧပြီလတွင် ၁၃၂၄-၁၃၃၂ ကျပ်၊ မေလတွင် ၁၃၃၂-၁၃၅၁ တို့ဖြစ်ပြီး ဇန်နဝါရီတွင် ကွာဟချက်အများဆုံး ဖြစ်ပေါ်ခဲ့သည်။
ပြီးခဲ့သည့် မတ်လအတွင်း အမြင့်ဆုံး ဈေးနှုန်းအဖြစ် မတ် ၂၁ ရက်တွင် ၁၃၃၄ ကျပ်ဖြစ်ပေါ်ခဲ့သော ဒေါ်လာဈေးသည် မတ် ၂၉ ရက်တွင် ၁၃၂၈ ကျပ်အထိ ၊ ဧပြီလဆန်းတွင် ၁၃၂၄ ဝန်းကျင်အထိ ကျဆင်းခဲ့သည်။ ထို့နောက် ဧပြီလကုန်ပိုင်း ၂၈ ရက်တွင် ၁၃၃၁ ကျပ်၊ မေ ၂၁ ရက်တွင် ၁၃၅၁ ကျပ်အထိမြင့် တက်ခဲ့ပြီး ဇွန် ၉ ရက်တွင် ၁၃၄၆ ကျပ်၊ ဇွန် ၁၅ ရက်တွင် ၁၃၅၅ ကျပ်၊ ဇွန် ၁၆ ရက်တွင် ၁၃၆၅ ကျပ်၊ ဇွန် ၂၀ ရက်တွင် ၁၃၆၈ ကျပ်၊ ဇွန် ၂၁ ရက်တွင် ၁၃၇၅ ကျပ်၊ ဇွန် ၂၆ ရက်တွင် ၁၃၈၃ ကျပ်ဝန်းကျင် ဖြစ်ပေါ်ခဲ့သည်။ ဇွန် ၂၆ ရက်တွင် သတ်မှတ်ထားသော ဗဟိုဘဏ်ရည်ညွှန်း ငွေလဲနှုန်းမှာ ၁၃၈၀ ကျပ်ဖြစ်ကြောင်း သိရသည်။
၂၀၁၆ ခုနှစ် ဒီဇင်ဘာ ၁၆ ရက်တွင် သမိုင်းတစ်လျှောက် အမြင့်ဆုံးငွေလဲနှုန်းထား အဖြစ် ၁၄၃၈ ကျပ်အထိ ရောက်ရှိခဲ့ပြီး ၂၀၁၈ ခုနှစ် ဇွန် ၂၆ ရက်တွင် ဖြစ်ပေါ်သော တစ်ဒေါ်လာ ၁၃၈၃ ကျပ် ဈေးနှုန်းသည် ၂၀၁၆ ခုနှစ် ဒီဇင်ဘာ ၂၃ ရက်နောက်ပိုင်း အမြင့်ဆုံးဈေးနှုန်းဖြစ်သည်။
ပြည်တွင်းဈေးကွက်အတွင်း ဇွန် ၂၆ ရက်တွင်ဖြစ်ပေါ်သော အခြားနိုင်ငံခြားငွေကြေးများ၏ လဲလှယ်မှုနှုန်းထားများမှာ ယူရို ကျပ် ၁၆၀၀၊ စင်ကာပူဒေါ်လာ ၁၀၁၃ ကျပ်၊ မလေးရှားရင်းဂစ် ၃၄၁ ကျပ်၊ ထိုင်းဘတ် ၄၂ ဒသမ ၂၅ ကျပ်၊ တရုတ်ယွမ် ၂၁၀ ကျပ်၊ ဂျပန်ယန်း ၁၂ ဒသမ ၄၅ ကျပ်၊ တောင် ကိုရီးယားဝမ် ၁ ဒသမ ၂၇ ကျပ် ဖြစ်သည်။
