ရန်ကုန်မြို့ရှိ ဆိပ်ကမ်းတစ်ခုကို တွေ့ရစဉ် (ဓာတ်ပုံ-ကြည်နိုင်)
မြန်မာ့စီးပွားရေး တိုးတက်မှုနှုန်း ကြီးကြီးမားမား လျော့နည်းသွားမည်ဆိုပါက မက်ခရို စီးပွားရေး မတည်ငြိမ်မှု ကြီးထွားလာနိုင်ကာ နိုင်ငံ၏ အထွေထွေ မတည်ငြိမ်မှုကို ဖြစ်နိုင်ကြောင်း ကမ္ဘာ့ဘဏ်မှ ထုတ်ပြန်သည့် မြန်မာ့စီးပွားရေး စောင့်ကြည့်အစီရင်ခံစာတွင် ဖော်ပြထားသည်။
၂၀၁၈-၂၀၁၉ဘဏ္ဍာနှစ်တွင် စီးပွားရေး တိုးတက်မှုသည် ၆ ဒသမ ၈ ရာခိုင်နှုန်းသို့ မြင့်တက်မည့် အလားအလာရှိကြောင်း၊ မြန်မာနိုင်ငံ၏ ယေဘုယျစီးပွားရေး အခြေအနေ မျှော်မှန်းချက်မှာမူ အကောင်းဘက်တွင် ရှိနေဆဲဖြစ်သည်ဟု အစီရင်ခံစာတွင် ဖော်ပြထားသည်။
သို့သော်လည်း ယေဘုယျစီးပွားရေး အခြေအနေ မျှော်မှန်းချက်ကို နှောင့်ယှက်မည့် အကြောင်းများလည်း ကြီးထွားလာနေကြောင်း၊ ရခိုင်ပြည်နယ် အရေးအခင်းများနှင့် ဆက်စပ်ပြီး မရေရာမှုများ ဆက်လက်ပေါ်ပေါက် နေခြင်းကြောင့် မြန်မာနိုင်ငံ၏ စီးပွားရေး ဖွံ့ဖြိုးတိုးတက်မှုကို နှောင့်နှေးတိုးတက် စေနိုင်သည် ဟုဆိုသည်။ ဖြစ်နိုင်ခြေနည်းသည် ဆိုသော်လည်း စီးပွားရေး တိုးတက်မှုနှုန်း ကြီးကြီးမားမား လျော့နည်းသွားမည်ဆိုပါက မက်ခရိုစီးပွားရေး မတည်ငြိမ်မှု ကြီးထွားလာနိုင်ကာ နိုင်ငံ၏ အထွေထွေ မတည်ငြိမ်မှုကို ဖြစ်စေနိုင်သည်ဟု ကမ္ဘာ့ဘဏ်က ခန့်မှန်းထားသည်။
ထို့ပြင် နိုင်ငံခြား တိုက်ရိုက်ရင်းနှီးမြှုပ်နှံမှု (FDI) မြန်မာနိုင်ငံအတွင်း စီးဝင်မှု အလျင်အမြန် ကျဆင်းသွားခြင်းနှင့် နိုင်ငံတကာ ခရီးသွားလုပ်ငန်းများ အရှိန်နှေးကွေးသွားခြင်းများကလည်း (External Balance) နှင့် ငွေလဲလှယ်နှုန်းများကို ထိခိုက်စေနိုင်သည် ဟုဆိုသည်။
ဘဏ်လုပ်ငန်းကဏ္ဍ အနေဖြင့်ဆိုလျှင် ၂၀၁၇ ခုနှစ် ဇူလိုင်လက ထုတ်ပြန်ခဲ့သည့် စည်းမျဉ်းများကို လိုက်နာနိုင်အောင် ခက်ခက်ခဲခဲကြိုးပမ်း အသွင်ပြောင်းနေရကြောင်း၊ ကမ္ဘာလုံး အတိုင်းအတာဖြင့် စီးပွားရေး မျှော်မှန်းချက်အမြင်ကို အနှောင့်အယှက်ပေးမည့် အရာများ သိသိသာသာ လျော့နည်းသွားသော်လည်း အရေးတကြီး ကိုင်တွယ်ရမည့် စီးပွားရေး အန္တရာယ်များ ရှိနေဆဲဖြစ်သည်ဟု ဖော်ပြထားသည်။
ကမ္ဘာ့ကုန်သွယ်ရေးမူဝါဒပိုင်း မငြိမ်သက်မှု မြင့်မားလာနေခြင်းကြောင့် ကမ္ဘာလုံး အတိုင်းအတာ ကုန်သွယ်ရေး ပြန်လည်ဦးမော့နိုင်မှုကို ထိခိုက်နိုင်သကဲ့သို့ မြန်မာနိုင်ငံအပေါ်တွင်လည်း ၎င်း၏ဆိုးကျိုးများက အတန်အသင့် အကျိုးသက်ရောက်နိုင်သည်ဟု ကမ္ဘာ့ဘဏ်က ခန့်မှန်းထားသည်။
အန္တရာယ် စိန်ခေါ်မှုများအကြား အကောင်းဘက် ဦးတည်သည့် စီးပွားရေးဖွံ့ဖြိုးမှု အရှိန်အား ဆက်လက် ထိန်းသိမ်းထားနိုင်ရန်မှာ ဦးစားပေး ဆောင်ရွက်သင့်သည့် အစိုးရကဏ္ဍ သုံးစွဲမှုများနှင့် ပုဂ္ဂလိကကဏ္ဍ စီးပွားရေး လုပ်ငန်းများအား တည်ငြိမ်သည့် မက်ခရိုစီးပွားရေး အခြေအနေ၊ အားကောင်းခိုင်မာသော မူဝါဒများဖြင့် အားပေးထောက်ကူရန် လိုအပ်မည်ဖြစ်ကြောင်း၊ လျှပ်စစ်ဓာတ်အားခ နှုန်းထားများအား သင့်လျော်စွာ ပြင်ဆင်သတ်မှတ်ခြင်း၊ ကုမ္ပဏီများ ဥပဒေအား အကောင်အထည်ဖော် ဆောင်ရွက်ခြင်း၊ အခွန်ထမ်းများအတွက် ပြည်သူ့ရေးရာ ဝန်ဆောင်မှုများ တိုးတက်အောင် ဆောင်ရွက်ပေးခြင်း၊ ငွေရေးကြေးရေး လုပ်ငန်းများအတွက် လုံခြုံစိတ်ချရသည့် ဝန်းကျင်ကောင်းတစ်ခု ဖန်တီးပေးခြင်းတို့က အထောက်အကူ ပြုနိုင်မည်ဖြစ်ကြောင်း မြန်မာနိုင်ငံဆိုင်ရာ ကမ္ဘာ့ဘဏ်ရုံး၏ ဦးဆောင်ဘောဂဗေဒပညာရှင် ဟန်စ်အာနန်ဘက်ခ်က ပြောကြားသည်။
