အစ္စလာမ္မစ် ပူးပေါင်းဆောင်ရွက်ရေးအဖွဲ့ (OIC) က မြန်မာနိုင်ငံအပေါ် ကမ္ဘာက ဖိအားပေးစေရေးအတွက် စည်းရုံးလှုပ်ရှားရန် ကော်မတီသစ်တစ်ရပ် ဖွဲ့စည်း

အစ္စလာမ္မစ် ပူးပေါင်းဆောင်ရွက်ရေးအဖွဲ့ (OIC) က မြန်မာနိုင်ငံအပေါ် ကမ္ဘာက ဖိအားပေးစေရေးအတွက် စည်းရုံးလှုပ်ရှားရန် ကော်မတီသစ်တစ်ရပ် ဖွဲ့စည်း
Published 8 May 2018

မေ ၆ ရက်က ဒါကာမြို့ OIC ညီလာခံသို့ တက်ရောက်နေသည့် အဖွဲ့ဝင်နိုင်ငံပေါင်း ၅၃ နိုင်ငံမှ နိုင်ငံခြားရေးဝန်ကြီးများနှင့် သံတမန်များကို တွေ့ရစဉ် (Photo – AFP)

ဘင်္ဂါလီမွတ်စလင်ဒုက္ခသည် အကျပ်အတည်းနှင့်ပတ်သက်၍ မြန်မာနိုင်ငံအပေါ် အရေးယူမှုများ ပြုလုပ်ရေးအတွက် နိုင်ငံတကာ ထောက်ခံမှုများအတွက် လှုပ်ရှားရန် စည်းရုံးလှုံ့ဆော်မှုတစ်ရပ်ကို မေ ၆ ရက်တွင် အစ္စလာမ္မစ် နိုင်ငံခြားရေးဝန်ကြီးများက စတင်လိုက်ကြောင်း သက်ဆိုင်ရာပုဂ္ဂိုလ်များက ပြောကြားခဲ့သည်။

အစ္စလာမ္မစ် ပူးပေါင်းဆောင်ရွက်ရေးအဖွဲ့ (OIC ) ၏ အဖွဲ့ဝင် ၅၃ နိုင်ငံမှ နိုင်ငံခြားရေးဝန်ကြီးများနှင့် သံတမန်များသည် ဘင်္ဂလားဒေ့ရှ်နိုင်ငံ၏မြို့တော် ဒါကာ၌ပြုလုပ်သော နှစ်ရက်ကြာ ဆွေးနွေးမှုများအတွင်း စည်းရုံးလှုပ်ရှားရေးကော်မတီတစ်ရပ်ကို ထူထောင်ခဲ့သည်။

OIC အတွင်းရေးမှူးချုပ် ယူဆက်ဘင် အာမက်အယ်အော်သမင်းက ဘင်္ဂါလီမွတ် စလင် ၇၀၀,၀၀၀ မြန်မာနိုင်ငံမှ ဘင်္ဂလားဒေ့ရှ်နိုင်ငံရှိ ဒုက္ခသည်စခန်းများသို့ ထွက်ပြေးခဲ့ခြင်းကြောင့် ဖြစ်ပေါ်ခဲ့သော အကျပ်အတည်းတစ်ရပ် အဆုံးသတ်သွားစေရေးကို ရှေးရှုသည့် အဓိကခြေလှမ်းတစ်ရပ်ပြုလုပ်ရန် တောင်းဆိုခဲ့သည်။

အယ်အော်သမင်းက ကော်မတီအသစ်သည် ဘင်္ဂါလီမွတ်စလင်များအပေါ် လူ့အခွင့်အရေး ချိုးဖောက်မှုများအတွက် တာဝန်ခံမှုရှိရန် အပြည်ပြည်ဆိုင်ရာ နိုင်ငံရေးထောက်ခံမှုများကို စည်းရုံးလှုပ်ရှားရန်နှင့် အချိုးညီညီ ပူးပေါင်းဆောင်ရွက်ရန် ပြုလုပ်လိမ့်မည်ဟု ပြောကြားခဲ့သည်။

“ဒါက သိပ်ကိုအရေးကြီးပါတယ်။ ကျွန်တော်တို့ရဲ့ ညီအစ်ကိုတော်တွေ၊ နှမတော်တွေအတွက် ပြဿနာတွေ ပြေလျော့သွားစေရေးအတွက် ဆောင်ရွက်ခဲ့တဲ့ ခိုင်မာတဲ့ ခြေလှမ်းတွေထဲက တစ်ခုပါပဲ” ဟု အယ်အော်သမင်းက ပြောကြားခဲ့သည်။

လွန်ခဲ့သည့်နှစ် သြဂုတ်လက မြန်မာနိုင်ငံ ရခိုင်ပြည်နယ်တွင် ဆောင်ရွက်ခဲ့သည့် တပ်မတော်စစ်ဆင်ရေးတစ်ရပ်ကြောင့် ဘင်္ဂါလီမွတ်စလင်များ အလုံးအရင်းဖြင့် ဘင်္ဂလားဒေ့ရှ်နိုင်ငံအတွင်းသို့ ဝင်ရောက်ခဲ့ပြီး ယခင် အကြမ်းဖက်မှုကြောင့် ခနော်ခနဲ့ဒုက္ခသည် စခန်းများ၌ ရောက်ရှိနှင့်ပြီးဖြစ်သော ဒုက္ခသည်ပေါင်း ၃၀၀,၀၀၀ နှင့် ပူးပေါင်းသွားခဲ့သည်။

ကုလသမဂ္ဂနှင့် အမေရိကန်ပြည်ထောင်စုတို့က အဆိုပါစစ်ဆင်ရေးသည် လူမျိုးစုလိုက် သုတ်သင်မှု မြောက်နိုင်သည်ဟု ပြောကြားခဲ့သည်။ သို့သော် မြန်မာတပ်မတော်က ၎င်းတို့သည် အကြမ်းဖက်သမားများကိုသာ ပစ်မှတ်ထားခဲ့ခြင်းဖြစ်သည်ဟု ပြောကြားခဲ့သည်။

ထွက်ပြေးသွားခဲ့ကြသည့် ဘင်္ဂါလီမွတ်စလင်များက သတ်ဖြတ်ခံရမှုများနှင့် မုဒိမ်းကျင့်ခံရမှုများအကြောင်း ပြောပြခဲ့ကြသည်။ ၎င်းတို့က မြန်မာတပ်မတော်သည် ရာနှင့်ချီသော ဘင်္ဂါလီရွာများကို လုံးဝပျက်စီးသွားသည်အထိ မီးရှို့ခဲ့ကြသည်ဟုလည်း ပြောကြားခဲ့ကြသည်။

အယ်အော်သမင်းက မွတ်စလင်နိုင်ငံများအနေဖြင့် နိုင်ငံတကာအသိုင်းအဝိုင်းကို ဖိအားပေးရမည်ဟု ဆိုသည်။

“ဒါဟာ ဘာသာရေးမဟုတ်ပါဘူး။ လွန်ခဲ့တဲ့ နှစ်ပေါင်း ၅၀ အတွင်း ကျွန်တော်တို့ ညီအစ်ကိုတော်တွေ၊ နှမတော်တွေရဲ့ အခြေခံလူ့အခွင့်အရေးကိစ္စပါ” ဟု အယ်အော်သမင်းက ပြောကြားခဲ့သည်။

အပြည်ပြည်ဆိုင်ရာ ရာဇဝတ်ခုံရုံး (ICC) မှ တရားစွဲဆိုရေးရှေ့နေက ICC အနေဖြင့် အစုလိုက်အပြုံလိုက် သတ်ဖြတ်မှုများ၊ မုဒိမ်းကျင့်မှုများနှင့်ပတ်သက်၍ စုံစမ်းစစ်ဆေးခွင့် ရနိုင်မလားဟူသည့်ကိစ္စကို ဆုံးဖြတ်ရန် ခုံရုံးအဖွဲ့သို့ တောင်းဆိုထားပြီး ဖြစ်သည်။

မြန်မာနိုင်ငံအနေဖြင့် ဒုက္ခသည်များအား ဘေးကင်းလုံခြုံစွာ ပြန်လည်လက်ခံရေးအတွက် ဖိအားပေးရန် ဘင်္ဂလားဒေ့ရှ်နိုင်ငံက သံတမန်ရေးရာအရ ကြိုးပမ်းအားထုတ်မှုများ အကြီးအကျယ်ပြုလုပ်ခဲ့သည်။

မြန်မာနှင့် ဘင်္ဂလားဒေ့ရှ် နှစ်နိုင်ငံသည် ဒုက္ခသည်များ ပြန်လည်လက်ခံရေး သဘောတူညီချက်တစ်ရပ်ကို နိုဝင်ဘာလအတွင်းက လက်မှတ်ရေးထိုးခဲ့ကြသော်လည်း မည်သူမျှ မြန်မာနိုင်ငံသို့ ပြန်လည်ဝင်ရောက်ခြင်း မရှိသေးပေ။

လွန်ခဲ့သည့်လက ကုလသမဂ္ဂလုံခြုံရေးကောင်စီမှ ကိုယ်စားလှယ်အဖွဲ့တစ်ဖွဲ့သည် ဒုက္ခသည်စခန်းများသို့ သွားရောက်ခဲ့ပြီး ဒုက္ခသည်များ ဘေးကင်းလုံခြုံစွာ ပြန်နိုင်ရေးနှင့် ၎င်းတို့အပေါ် ခွဲခြားဆက်ဆံမှုများကို အဆုံးသတ်ရေးအတွက် တောင်းဆိုခဲ့သည်။

ကနေဒါနိုင်ငံခြားရေးဝန်ကြီး ခရိုင်စတီယာဖရီးလန်းကလည်း ယခုသီတင်းပတ်အတွင်း ဒုက္ခသည်စခန်းများသို့ သွားရောက်ခဲ့ရာ၌ တာဝန်ခံမှုရှိရန် တောင်းဆိုခဲ့သည်။

OIC အစည်းအဝေးက ဘင်္ဂါလီမွတ်စလင်အကျပ်အတည်းနှင့်ပတ်သက်၍ မြန်မာအစိုးရအပေါ် ပြင်းထန်သော အရေးယူမှုများပြုလုပ်ရန် တောင်းဆိုခဲ့ကြောင်း ဘင်္ဂလားဒေ့ရှ် နိုင်ငံခြားရေးဝန်ကြီး အေအိတ်ချ်မာမွတ် အလီက ပြောကြားခဲ့သည်။

OIC က ယခုကဲ့သို့ ကော်မတီသစ်ဖွဲ့စည်းကာ ဖိအားပေးလာခြင်းနှင့်ပတ်သက်၍ နိုင်ငံတော်အတိုင်ပင်ခံရုံး ညွှန်ကြားရေးမှူးချုပ် ဦးဇော်ဌေးအား The Daily Eleven သတင်းစာက ဆက်သွယ်မေးမြန်းရာတွင် ဦးဇော်ဌေးက “OIC ကတော့ အရင်ကတည်းက ဖိအားပေးနေတာပဲ။ အဓိက,ကတော့ ထွက်သွားတဲ့ သူတွေကို ပြန်လက်ခံဖို့ပဲ။ အဲဒီအတွက်လည်း တစ်ဖက်နိုင်ငံကို ထွက်ခွာသွားတဲ့သူတွေကို ပြန်လည်လက်ခံဖို့ ကျွန်တော်တို့ကအားလုံး ပြင်ဆင်ထားတယ်။ စိစစ်မယ်။ လက်ခံမယ်။ အဲဒီအပေါ်မှာတော့ ဟိုဘက်က ပြန်ပို့မှပဲ၊ ပြန်လာမှပဲ ကျွန်တော်တို့က စိစစ်လက်ခံလို့ရမှာ။ ကိုယ်က ဘယ်လောက်ပဲ စိစစ်ချင်တယ်၊ လက်ခံချင်တယ် ပြောလည်း ဟိုဘက်က ပြန်မပို့မချင်း အခုပြဿနာတက်နေတာ။ ဒီလူတွေ ပြန်မပို့ဘဲနဲ့ ဟိုဘက်ဒီဘက် အဲဒီလိုမျိုး ပြောနေတဲ့ဟာက အခုဆိုရင် ကျွန်တော်တို့ကို တော်တော်များများ ဖိအားတွေပေးတယ်။ ပြန်လက်ခံဖို့လုပ်ပါဆိုပြီးတော့ပေါ့။ ကျွန်တော်တို့က ပြန်လက်ခံဖို့ လုပ်ထားပြီးပြီ။ အဲဒီ ပြန်လက်ခံရမယ့်လူတွေ နာမည်စာရင်းကအစ ကျွန်တော်တို့ ပြည့်ပြည့်စုံစုံမရတာက ကျွန်တော်တို့ ပြဿနာ ဖြစ်နေတယ်။ ပြန်လက်ခံရေးလုပ်ငန်းစဉ် မစတင်နိုင်သေးဘူး။ ပြန်လက်ခံရေးလုပ်ငန်း စဉ်စတင်နိုင်ပြီဆိုရင် ဘင်္ဂလားဒေ့ရှ်ဘက်မှာလည်း သူတို့ ဝန်ထုပ်ဝန်ပိုး လျော့သွားမယ်။ ဒီမှာလည်း သူတို့ကို မူလနေရာ ဒါမှမဟုတ် မူလနေရာနဲ့ အနီးဆုံးနေရာတွေမှာ ပြန်ရောက်ရင် သူ့ဘာသာသူ အဆင်ပြေသွားမယ်ပေါ့။ ဖိအားပေးနေတဲ့ အဓိကပြဿနာက ဘာလဲဆိုတော့ အဲဒီလူတွေ ပြန်လက်ခံဖို့။ အဲဒီအတွက် တစ်ဖက်နိုင်ငံကို ထွက်သွားတဲ့ သူတွေကို ပြန်လက်ခံဖို့ကတော့ နှစ်နိုင်ငံ သဘောတူထားတဲ့ သဘောတူညီချက်အတိုင်း နှစ်ဦးနှစ်ဖက် နားလည်မှုရှိရှိနဲ့ ပူးပေါင်းဆောင်ရွက်ဖို့အပေါ်မှာပဲ မူတည်နေပါတယ်” ဟု ပြောကြားခဲ့သည်။

Most Read

Most Recent