မြန်မာနိုင်ငံက ဘင်္ဂါလီမွတ်စလင်များကို ပထမဆုံးအဖြစ် ပြန်လည်လက်ခံခဲ့သည်ဟု အခိုင်အမာ ပြောကြားချက်နှင့်ပတ်သက်၍ ဘင်္ဂလားဒေ့ရှ်၊ UEHCR တို့နှင့် အငြင်းပွားနေ

မြန်မာနိုင်ငံက ဘင်္ဂါလီမွတ်စလင်များကို ပထမဆုံးအဖြစ် ပြန်လည်လက်ခံခဲ့သည်ဟု အခိုင်အမာ ပြောကြားချက်နှင့်ပတ်သက်၍ ဘင်္ဂလားဒေ့ရှ်၊ UEHCR တို့နှင့် အငြင်းပွားနေ
Published 17 April 2018

မြန်မာလူဝင်မှုကြီးကြပ်ရေး အရာရှိများက ကြိုဆိုလက်ခံရေးဌာနတစ်ခု၌ ဘင်္ဂါလီမွတ်စလင် မိသားစုဝင်ငါးဦးကို အထောက်အထား စာရွက်စာတမ်းများ၊ ဓာတ်ပုံများနှင့်အတူ စစ်ဆေးနေစဉ် (Photo: AP)

ဘင်္ဂါလီမွတ်စလင် မိသားစုတစ်စုမှ မိသားစုဝင်ငါးဦးကို မြန်မာနိုင်ငံက ပြန်လည်လက်ခံခဲ့သည်ဟူသော အခိုင်အမာ ပြောကြားချက်နှင့်ပတ်သက်၍ ဧပြီ ၁၅ ရက်တွင် ဘင်္ဂလားဒေ့ရှ်အစိုးရနှင့် ကုလသမဂ္ဂဒုက္ခသည်များဆိုင်ရာ မဟာမင်းကြီးရုံး (UNHCR) တို့က ငြင်းချက်ထုတ်ခဲ့ကြောင်း သိရသည်။

၎င်းတို့က ဘင်္ဂလားဒေ့ရှ်အစိုးရသာမက UNHCR ပါ ယင်းကဲ့သို့သော ပြန်လည်လက်ခံခဲ့ခြင်းလုပ်ငန်းစဉ်၌ တစ်စုံတစ်ရာ ပါဝင်ပတ်သက်ခဲ့ခြင်းမရှိကြောင်း ပြောကြားခဲ့သည်။

ဘင်္ဂလားဒေ့ရှ်အစိုးရ၏ ဒုက္ခသည်များ သက်သာချောင်ချိရေးနှင့် ပြန်လည်လွှဲပြောင်းပေးရေး မဟာမင်းကြီး အဘူကာလမ်က နှစ်နိုင်ငံအကြား လူသူနေထိုင်ခြင်းမရှိသည့် နေရာဖြစ်သော ကိုနာပါရာဒေသတွင် ရှိခဲ့သည့် မိသားစုဝင်ငါးဦးသည် မြန်မာနိုင်ငံသို့ ပြန်လည်ဝင်ရောက်ခဲ့ပြီး မြန်မာနိုင်ငံက ထူထောင်ထားသည့် ဧည့်ခံကြိုဆိုရေးဌာနသို့ ခေါ်ဆောင်သွားခြင်းခံရကြောင်း ပြောကြားခဲ့သည်။

သူက “ဝါဒဖြန့်ချိမှုကလွဲလို့ ပြန်လည် လက်ခံတယ်ဆိုတဲ့ ပုံစံမျိုး မဟုတ်ပါဘူး” ဟု ရိုက်တာသတင်းဌာနသို့ ပြောကြားခဲ့သည်။

UNHCR ကလည်း ဧပြီ ၁၅ ရက်က ကြေညာချက်တစ်ရပ် ထုတ်ပြန်ရာတွင် ၎င်းတို့အနေဖြင့် ယင်းကိစ္စကို တိုက်ရိုက်သိရှိရခြင်း မရှိကြောင်း၊ ယင်းကဲ့သို့ဖော်ပြသည့် ပြန်လည်လက်ခံမှု၌ အကြံပေးခြင်း သို့မဟုတ် ပါဝင်ပတ်သက်ခြင်းလည်း မရှိကြောင်း ပြောကြားထားသည်။

နိုင်ငံတော်အတိုင်ပင်ခံရုံး ညွှန်ကြားရေးမှူးချုပ် ဦးဇော်ဌေးကမူ “ဒါဟာ ဝါဒဖြန့်ချိရေး မဟုတ်ပါဘူး။ ဒီမိသားစုက သူတို့ သဘောဆန္ဒအလျောက် ပြန်လာဖို့ ဆုံးဖြတ်ခဲ့တာပါ။ သူတို့ကို ကျွန်တော်တို့ စောင့်ရှောက်နေပါတယ်” ဟု ပြောကြားခဲ့သည်။

အဆိုပါ မိသားစုကို မေးမြန်းရန် လက်လှမ်းမီခြင်း သို့မဟုတ် ၎င်းတို့ပြန်သွားခဲ့သည့် နေရာအတိအကျကို အတည်ပြုနိုင်ခြင်း မရှိကြောင်း ရိုက်တာသတင်းဌာနက ဖော်ပြခဲ့သည်။

ဧပြီ ၁၄ ရက်နှောင်းပိုင်းတွင် ထုတ်ပြန်သည့် ဖော်ပြချက်တွင် မြန်မာနိုင်ငံက ၎င်းတို့သည် ဘင်္ဂလားဒေ့ရှ်နိုင်ငံသို့ ထွက်ပြေးသွားခဲ့သည့် ဘင်္ဂါလီမွတ်စလင်မိသားစုကို ပြန်လည်လက်ခံခဲ့သည်ဟု ပြောကြားခဲ့သည်။

လူတစ်ဦးကို အက်ဖတာအာလွမ်ဟု ဖော်ပြခြင်းနှင့်အတူ မိသားစုဝင်ငါးဦးသည် ရခိုင်ပြည်နယ်ရှိ ကြိုဆိုဧည့်ခံရေးဌာနတစ်ခုသို့ ပြန်လာခဲ့သည်ဟု မြန်မာနိုင်ငံက ဖော်ပြခဲ့သည်။

မြန်မာနိုင်ငံနှင့် ဘင်္ဂလားဒေ့ရှ်နိုင်ငံတို့သည် မိမိသဘောဆန္ဒအလျောက် ပြန်လာသည့် ဒုက္ခသည်များကို နှစ်နှစ်အတွင်း အပြီးပြန်လည်လက်ခံရန် ဇန်နဝါရီလက သဘောတူခဲ့ကြသည်။ မြန်မာနိုင်ငံသည် ကြိုဆိုဧည့်ခံရေးဌာနနှစ်ခုကို ထူထောင်ခဲ့ပြီး ပထမဆုံး ရောက်ရှိလာသူများကို လက်ခံရန် ရခိုင်ပြည်နယ်ရှိ နယ်စပ်အနီး ယာယီစခန်းတစ်ခုဖြစ်ကြောင်းလည်း ပြောကြားခဲ့သည်။

ကုလသမဂ္ဂမှ တာဝန်ရှိသူများ၏ ပြောကြားချက်အရ ဘင်္ဂါလီမွတ်စလင် ၇၀၀,၀၀၀ ခန့်သည် တပ်မတော်စစ်ဆင်ရေးတစ်ခုကြောင့် သြဂုတ်လမှစ၍ ရခိုင်ပြည်နယ်မှ ဘင်္ဂလားဒေ့ရှ်နိုင်ငံသို့ ထွက်ပြေးသွားခဲ့ကြောင်း သိရသည်။ မြန်မာတပ်မတော်သားများနှင့် အခြားစေတနာ့ဝန်ထမ်းအဖွဲ့ဝင်များက သတ်ဖြတ်မှု၊ မုဒိမ်းမှု၊ မီးရှို့မှုများ ပြုလုပ်ခဲ့သည်ဟု သတင်းများ ထွက်ပေါ်ခဲ့ပြီး ကုလသမဂ္ဂက ယင်းတို့သည် လူမျိုးစုလိုက် သုတ်သင်မှုမြောက်နိုင်ကြောင်း ပြောကြားခဲ့သည်။

မြန်မာနိုင်ငံက စွပ်စွဲမှုအားလုံးနီးပါးကို ငြင်းဆိုခဲ့ပြီး ၎င်းတို့သည် ဥပဒေနှင့်အညီ အကြမ်းဖက်မှုတန်ပြန်ခြင်း စစ်ဆင်ရေးကိုသာ ဆင်နွှဲခဲ့ခြင်းဖြစ်ကြောင်း ပြောကြားခဲ့သည်။

လွန်ခဲ့သည့် သြဂုတ်လက တပ်မတော် အခြေစိုက်စခန်းတစ်ခုနှင့် ရဲစခန်း နှစ်ဒါဇင်ကျော်အား ဘင်္ဂါလီမွတ်စလင် အကြမ်းဖက်သမားများက တိုက်ခိုက်ခဲ့မှုကို တုံ့ပြန်ခြင်းဖြစ်ကြောင်းလည်း မြန်မာတပ်မတော်က ပြောကြားခဲ့သည်။

UNHCR က မြန်မာနိုင်ငံမှ အခြေအနေရပ်များသည် ဒုက္ခသည်များပြန်လာရေးအတွက် အထောက်အကူပြုနိုင်သည့် အနေအထား၌ မရှိကြောင်း ပြောကြားခဲ့ပြီးနောက် ရက်အနည်းငယ်အကြာတွင် မြန်မာနိုင်ငံက ဒုက္ခသည်များကို ပထမဆုံးအဖြစ် ပြန်လည် လက်ခံမှုပြုလုပ်ခဲ့ကြောင်း အခိုင်အမာ ပြောကြားခဲ့ခြင်းဖြစ်သည်။

ဧပြီ ၁၅ ရက်တွင် ထုတ်ပြန်သော ကြေညာချက်၌ ပြန်လာမှုအားလုံးသည် မိမိသဘော ဆန္ဒအလျောက်၊ ဘေးကင်းလုံခြုံစွာနှင့် ဂုဏ်သိက္ခာရှိစွာ ဖြစ်ရမည်ဟု UNHCR က မြန်မာနိုင်ငံအား တောင်းဆိုခဲ့သည်။

ပြန်လာသည့် ဒုက္ခသည်များအားလုံးသည် ရေရှည်ခံစွာ လူ့အသိုင်းအဝိုင်းထဲသို့ ပြန်လည်ပေါင်းစည်းသွားစေရမည်ဟုလည်း UNHCR က တောင်းဆိုခဲ့သည်။

ဧပြီ ၁၄ ရက်က ထုတ်ပြန်သော ကြေညာချက်တွင် မြန်မာနိုင်ငံက ဘင်္ဂလီမွတ်စလင် မိသားစုဝင်ငါးဦးကို လူဝင်မှုကြီးကြပ်ရေးနှင့် ကျန်းမာရေးအရာရှိများက စစ်ဆေးခဲ့ပြီး လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာနက ၎င်းတို့အား ဆန်၊ ခြင်ထောင်၊ စောင်နှင့် မီးဖိုချောင်သုံး ပစ္စည်းများကဲ့သို့သော ပစ္စည်းများကို ထောက်ပံ့ခဲ့ကြောင်း ပြောကြားထားသည်။

၎င်းမိသားစုဝင်များသည် စည်းမျဉ်း စည်းကမ်းများနှင့် ကိုက်ညီပြီး ၎င်းတို့ကို မြန်မာနိုင်ငံသို့ ပြန်လာရန် NVC ကတ်များ ထုတ်ပေးထားပြီးဖြစ်ကြောင်းလည်း ကြေညာချက်၌ ပြောကြားထားသည်။

NVC ကတ်များသည် နိုင်ငံသားဖြစ်ခွင့်ပေးရန် မပြည့်မီသည့် ဘင်္ဂါလီမွတ်စလင်များကို မှတ်ပုံတင်ရေးအတွက် မြန်မာအစိုးရ၏ ဆောင်ရွက်နေဆဲ အားထုတ်မှု တစ်စိတ်တစ်ပိုင်းဖြစ်သည်။

ယင်းကို ဘင်္ဂါလီမွတ်စလင် အသိုင်းအဝိုင်း ဦးဆောင်သူအများစုက ငြင်းပယ်ခဲ့ကြပြီး မြန်မာနိုင်ငံသည် ရေရှည်နေထိုင်ခဲ့သူများကို အသစ်ရောက်ရှိလာသည့် ရွှေ့ပြောင်းအခြေချသူများကဲ့သို့ ဆက်ဆံခြင်းဖြစ်သည်ဟု ပြောကြားခဲ့ကြသည်။

Ref: Reuters

Most Read

Most Recent