၂၀၁၈ ခုနှစ် မတ်လ အာဆီယံနိုင်ငံများ ထုတ်လုပ်မှု PMI (Manufacturing Purchasing Manager's Index-ဝယ်ယူရေး မန်နေဂျာများ၏အညွှန်းကိန်း) ညွှန်းကိန်းတွင် မြန်မာနိုင်ငံက ထိပ်ဆုံးတွင်ရပ်တည်နေပြီး ၂၀၁၈ ခုနှစ်အတွင်း ဂျီဒီပီတိုးတက်မှုနှုန်း ၇ ဒသမ ၆ ရာခိုင်နှုန်းရှိမည်ဟု Nikkei ၏ ပံ့ပိုးမှုဖြင့်ပြုလုပ်သော IHS Markit ၏ စစ်တမ်းတွင် ဖော်ပြချက်အရ သိရသည်။
၂၀၁၈ ခုနှစ် မတ်လ အာဆီယံထုတ်လုပ်မှု PMI ညွှန်းကိန်းတွင် မြန်မာနိုင်ငံက ၅၃ ဒသမ ၇၊ ဗီယက်နမ်နိုင်ငံက ၅၁ ဒသမ ၆၊ ဖိလစ်ပိုင်နိုင်ငံက ၅၁ ဒသမ ၅၊ အင်ဒိုနီးရှားနိုင်ငံက ၅၀ ဒသမ ၇၊ မလေးရှားနိုင်ငံက ၄၉ ဒသမ ၅၊ ထိုင်းနိုင်ငံက ၄၉ ဒသမ ၁၊ စင်ကာပူနိုင်ငံက ၄၇ ဒသမ ၅ ရရှိခဲ့ပြီး စစ်တမ်းကောက်ယူသည့် အာဆီယံနိုင်ငံ ခုနစ်နိုင်ငံတွင် မြန်မာနိုင်ငံက ထိပ်ဆုံး၌ရပ်တည်နိုင်ခဲ့ခြင်းဖြစ်သည်။
မြန်မာနိုင်ငံတွင် ၎င်း၏ထုတ်လုပ်ရေးကဏ္ဍ အခိုင်အမာအရှိန်ရလာခဲ့၍ ထုတ်လုပ်မှုအဆင့်အရ ဗီယက်နမ်ကိုဖယ်ရှားလျက် အာဆီယံထိပ်ဆုံးနိုင်ငံဖြစ်လာခဲ့ကြောင်း IHS Markit က သုံးသပ်ထားသည်။ မတ်လ စစ်တမ်းဒေတာတွင် မြန်မာနိုင်ငံ၏ ထုတ်လုပ်ရေးကဏ္ဍတစ်ဝန်းရှိ အခြေအနေ အခိုင်အမာတိုးတက်လာခြင်းကို အချက်ပြနေပြီး ထုတ်လုပ်မှုနှင့်အော်ဒါသစ်များ တစ်ဟုန်ထိုးတိုးလာလျက် တိုးတက်မှုနှုန်းနှစ်ရပ်စလုံး၏ စစ်တမ်းများ ထိပ်ဆုံးသို့တက်လှမ်းနိုင်ခဲ့မှုက ဦးမော့နိုင်မှုတစ်ရပ်လုံးကို ပံ့ပိုးပေးခဲ့သည်။
မြန်မာနိုင်ငံဆိုင်ရာ ဝယ်ယူရေးမန်နေဂျာများ၏ အညွှန်းကိန်းသည် ၂၀၁၇ ခုနှစ် မတ်တွင် ၅၃ ဒသမ ၁ အထိရှိခဲ့ရာမှ ဧပြီတွင် ၅၂ ဒသမ ၉၊ မေတွင် ၅၂ ဒသမ ၀၀ ရှိခဲ့ကာ ဇွန်တွင် ၄၉ ဒသမ ၄၊ ဇူလိုင်တွင် ၄၉ ဒသမ ၁ အထိ ဆက်တိုက် ပြန်လည်ကျဆင်းခဲ့သည်။ ထို့နောက် သြဂုတ်တွင် ၄၉ ဒသမ ၃၊ စက်တင်ဘာတွင် ၄၉ ဒသမ ၄၊ အောက်တိုဘာတွင် ၅၁ ဒသမ ၁ အထိ၊ နိုဝင်ဘာတွင် ၅၁ ဒသမ ၆ အထိ ပြန်လည်မြင့်တက်ခဲ့သော်လည်း ဒီဇင်ဘာတွင် ၅၁ ဒသမ ၁ အထိ ကျဆင်းခဲ့ကာ ၂၀၁၈ ခုနှစ် ဇန်နဝါရီတွင် ၅၁ ဒသမ ၇၊ ဖေဖော်ဝါရီတွင် ၅၂ ဒသမ ၆ အထိ၊ မတ်လတွင် ၅၃ ဒသမ ၇ (၂၀၁၅ ခုနှစ် ဒီဇင်ဘာတွင်စတင်ခဲ့သည့် စစ်တမ်းကာလအတွင်းအမြင့်ဆုံး) အထိ ပြန်တက်ခဲ့ခြင်းဖြစ်သည်။
မတ်လအတွင်း တိုးတက်မှုအထောက်အထားမှာ လက်ရှိဖောက်သည်များထံမှ ဝယ်လိုအားကြီးထွားလာခြင်းနှင့် ဖောက်သည်အသစ်များကြောင့်ဖြစ်ပြီး ကုန်စည်ထုတ်လုပ်သူတို့ ရရှိခဲ့သည့် အော်ဒါသစ်များမှာ မတ်လတွင် ခုနစ်လဆက်တိုက် တိုးလာခဲ့သည်။ ယင်းကာလအတွင်း အလုပ်ခန့်အပ်မှုတိုးတက်နှုန်းသည် မသိမသာအရှိန်ရလာပြီး ၂၀၁၇ ခုနှစ် မေလမှစ၍ အမြန်ဆုံးဖြစ်ခဲ့ပြီး အလုပ်နေရာသစ် ဖန်တီးမှုမြန်လာခြင်းမှာ အများအားဖြင့် ထုတ်လုပ်ရေးလိုအပ်ချက် ကြီးထွားလာခြင်းကြောင့်ဖြစ်သည်။
IHS Markit မှ စီးပွားရေးပညာရှင် Sian Jones က “မတ်လစစ်တမ်းဒေတာမှာ မြန်မာနိုင်ငံရဲ့ ထုတ်လုပ်မှုကဏ္ဍလုပ်ငန်းလည် ပတ်မှုအခြေအနေတွေ ပိုမိုအားကောင်းစွာနဲ့ တိုးတက်လာတာကို အချက်ပြနေပါတယ်။ ထုတ်လုပ်မှုနဲ့ အော်ဒါသစ်တွေ တိုးတက်လာမှုက စစ်တမ်းမှတ်တမ်းမှာ ထိပ်ဆုံးနေရာတွေကို ထူးထူးခြားခြား တက်လှမ်းနိုင်ခဲ့ပါတယ်။ လောလောဆယ်မှာ မြန်မာနိုင်ငံရဲ့ နှစ်စဉ် ဂျီဒီပီတိုးတက်နှုန်းကို ၂၀၁၈ ခုနှစ်မှာ ၇ ဒသမ ၆ ရာခိုင်နှုန်းရှိမယ်လို့ ခန့်မှန်းပါတယ်” ဟု သုံးသပ်သည်။