ဂျပန်အစိုးရ၏ ဒေါ်လာ ၁ ဒသမ ၁ ဘီလျံခန့်ထောက်ပံ့မှု ချေးငွေသဘောတူစာချုပ် လက်မှတ်ရေးထိုး လဲလှယ်နေစဉ် (ဓာတ်ပုံ-JICA)
မြန်မာနိုင်ငံအနေဖြင့် ပြည်ပချေးငွေ ဒေါ်လာ ၉ ဒသမ ၅ ဘီလျံဝန်းကျင် ရယူထားပြီး ဂျီဒီပီ (ပြည်တွင်း အသားတင်ကုန်ထုတ်လုပ်မှုတန်ဖိုး) ၏ ၁၅ ရာခိုင်နှုန်းဝန်းကျင် ရှိနေသော်လည်း ကြွေးမြီများအတွက် ပူပန်ရမည့်အခြေအနေ မဟုတ်ကြောင်း အပြည်ပြည်ဆိုင်ရာ ငွေကြေးရန်ပုံငွေအဖွဲ့ (IMF) က မတ်လကုန်ပိုင်းတွင် ထုတ်ပြန်သည့် IMF Article IV Consultation ဆိုင်ရာအစီရင်ခံစာတွင် သုံးသပ်ထားသည်။
မြန်မာနိုင်ငံ၏ ပြည်ပကြွေးမြီအခြေအနေသည် သတ်မှတ်ထားသော အခြေခံပမာဏအောက်တွင်သာ ဆက်ရှိနေပြီး အန္တရာယ်များသည့် ဖိအားသက်ရောက်မှု မရှိသေးကြောင်း၊ ပြည်ပကြွေးမြီနှင့် ပြည်တွင်းကြွေးမြီတို့ပါဝင်သော ပြည်သူ့ကြွေးမြီပမာဏမှာလည်း နိုင်ငံ့စီးပွားရေးအတွက် အန္တရာယ်မရှိသေးဘဲ အဆိုပါအခြေအနေကို ထိန်းသိမ်းနိုင်ရေးအတွက် ဘဏ္ဍာရေးမူဝါဒ၊ ပြည်သူ့ရေးရာ ဘဏ္ဍာငွေထောက်ပံ့မှုနှင့် ချေးငွေစီမံခန့်ခွဲမှုတို့ကို ဆက်လက်ကောင်းမွန်စွာ ဆောင်ရွက်သင့်ကြောင်းနှင့် အနာဂတ်ကာလတွင်လည်း နိုင်ငံနှင့် ပြည်သူလူထုကို အမှန်တကယ်အကျိုးပြုမည့် စီမံကိန်းများအတွက်သာ စိစစ်၍ ချေးငွေရယူရန် အကြံပြုထားသည်။
မြန်မာနိုင်ငံတွင် ၂၀၁၆ ခုနှစ်၌ ပြည်သူ့ကြွေးမြီစီမံခန့်ခွဲမှုဥပဒေကို ပြဋ္ဌာန်းနိုင်ခဲ့ပြီးနောက် အစိုးရ၊ ဌာန၊ အဖွဲ့အစည်းများအနေဖြင့် ယခင်ကကဲ့သို့ တိုက်ရိုက်ငွေချေးယူခြင်း၊ စာချုပ်လက်မှတ်ရေးထိုးခြင်းများ ဆောင်ရွက်၍မရတော့ဘဲ စီမံကိန်းနှင့် ဘဏ္ဍာရေးဝန်ကြီးဌာနမှသာ ပြည်ထောင်စုလွှတ်တော်၏ အတည်ပြုချက်ဖြင့် နိုင်ငံတော်ကိုယ်စားတာဝန်ယူကာ ငွေချေးယူခြင်း၊ စာချုပ်လက်မှတ်ရေးထိုးခြင်းများကို ဆောင်ရွက်လျက်ရှိကြောင်း၊ အစိုးရမဟုတ်သော အဖွဲ့အစည်းများသို့ အာမခံချက်ထုတ်ပေးခြင်းမရှိကြောင်း စီမံကိန်းနှင့် ဘဏ္ဍာရေးဝန်ကြီးဌာန ဒုတိယဝန်ကြီး ဦးမောင်မောင်ဝင်းက ၂၀၁၈ ခုနှစ် ဇန်နဝါရီ ၃၁ ရက်တွင် ပြည်ထောင်စုလွှတ်တော်၌ ပြောကြားသည်။
ပြည်ပချေးငွေရယူရာတွင် နိုင်ငံတော်၏မူဝါဒများ၊ အမျိုးသားစီမံကိန်းများ၊ ဦးစားပေးလုပ်ငန်းအစီအစဉ်များနှင့် လိုအပ်ချက်များကို အခြေခံစဉ်းစားရသည့်အပြင် သက်ဆိုင်ရာချေးငွေပေးအပ်မည့် ပြည်ပနိုင်ငံ၊ အဖွဲ့အစည်းများမှ ကူညီပံ့ပိုးပေးလိုသည့် နယ်ပယ်၊ ကူညီလိုသည့် ပမာဏစသည်တို့နှင့်လည်း ပေါင်းစပ်ညှိနှိုင်းဆောင်ရွက်ရခြင်းဖြစ်ကြောင်း၊ အခြေခံအဆောက်အအုံများဖြစ်သည့် လမ်းပန်းဆက်သွယ်ရေး၊ သယ်ယူပို့ဆောင်ရေး၊ လျှပ်စစ်မီး စသည့်ကဏ္ဍများ တိုးတက်လာမှုသည် ကုန်ထုတ်လုပ်မှုနှင့် လယ်ယာကဏ္ဍဖွံ့ဖြိုးရေးကို အထောက်အကူဖြစ်စေမည်ဖြစ်ကြောင်း ၎င်းကဆိုသည်။
၂၀၁၇ ခုနှစ် စက်တင်ဘာ ၃၀ ရက်အထိ ဌာန၊ အဖွဲ့အစည်းအလိုက် ပေးရန်ရှိသည့် ပြည်ပကြွေးမြီအခြေအနေမှာ စုစုပေါင်းဒေါ်လာ ၉၅၇၁၇၁၃၄၀၄ ဒသမ ၂၈ ဖြစ်ကြောင်း ပြည်ထောင်စုဝန်ကြီး ဦးကျော်ဝင်းက ပြည်ထောင်စုလွှတ်တော်ကို ပြောကြားထားသည်။
၂၀၁၁-၂၀၁၂ ဘဏ္ဍာနှစ်မှ ၂၀၁၇-၂၀၁၈ ဘဏ္ဍာနှစ်အထိ နှစ်အလိုက် နိုင်ငံတော်၏ ပြည်တွင်းပြည်ပ ကြွေးမြီအခြေအနေမှာ သမ္မတဦးသိန်းစိန် လက်ထက်ဖြစ်သည့် ၂၀၁၁-၂၀၁၂ ခုနှစ်တွင် ပြည်တွင်းကြွေးမြီ ကျပ် ၉၉၃၈ ဘီလျံ၊ ပြည်ပကြွေးမြီ ကျပ် ၆၃၃၅ ဘီလျံ၊ ၂၀၁၂-၂၀၁၃ ခုနှစ်တွင် ပြည်တွင်းကြွေးမြီ ကျပ် ၁၀၈၂၄ ဘီလျံ၊ ပြည်ပကြွေးမြီကျပ် ၇၃၀၁ ဘီလျံ၊ ၂၀၁၃-၂၀၁၄ ခုနှစ်တွင် ပြည်တွင်းကြွေးမြီ ကျပ် ၁၂၀၁၄ ဘီလျံ၊ ပြည်ပကြွေးမြီကျပ် ၉၅၆၁ ဘီလျံ၊ ၂၀၁၄-၂၀၁၅ ခုနှစ်တွင် ပြည်တွင်းကြွေးမြီ ကျပ် ၁၂၄၈၇ ဘီလျံ၊ ပြည်ပကြွေးမြီ ကျပ် ၉၅၄၅ ဘီလျံ၊ ၂၀၁၅-၂၀၁၆ ခုနှစ်တွင် ပြည်တွင်းကြွေးမြီ ကျပ် ၁၅၇၂၄ ဘီလျံ၊ ပြည်ပကြွေးမြီ ကျပ် ၁၂၂၄၆ ဘီလျံဖြစ်သည်။
အမျိုးသားဒီမိုကရေစီအဖွဲ့ချုပ် ဦးဆောင်သည့် အစိုးရသစ်လက်ထက်ဖြစ်သည့် ၂၀၁၆-၂၀၁၇ ခုနှစ်တွင် ပြည်တွင်းကြွေးမြီ ကျပ် ၁၈၀၂၀ ဘီလျံ၊ ပြည်ပကြွေးမြီ ကျပ် ၁၀၈၄၁ ဘီလျံ၊ ၂၀၁၇-၂၀၁၈ ခုနှစ် စက်တင်ဘာ ၃၀ ရက်အထိ ပြည်တွင်းကြွေးမြီ ကျပ် ၁၉၃၆၀ ဘီလျံ၊ ပြည်ပကြွေးမြီ ကျပ် ၁၃၁၁၃ ဘီလျံဖြစ်ကြောင်း သိရသည်။
