<

ပြုပြင်ပြောင်းလဲမှု နှောင့်နှေးနေသည့် ဌာနဆိုင်ရာ အဖွဲ့အစည်းများကို ကြပ်မတ်ရမည်ဖြစ်ပြီး ပြည်သူများ၏ နားမျက်စိများဖြစ်သည့် သတင်းမီဒီယာများ၏ အခန်းကဏ္ဍကို အလေးအနက်ထားရန် လိုကြောင်းနှင့် ပြည်သူများ မြင်ချင်တွေ့ချင်သည့် အပြောင်းအလဲများကို မျက်ဝါးထင်ထင် တွေ့မြင်နိုင်ရန် ကြိုးပမ်းမည် ဖြစ်ကြောင်း နိုင်ငံတော်သမ္မတဦးဝင်းမြင့် ကတိပြု

Photo : Poll

ပြုပြင်ပြောင်းလဲမှု နှောင့်နှေးနေသည့် ဌာနဆိုင်ရာ အဖွဲ့အစည်းများကို ကြပ်မတ်ရမည်ဖြစ်ပြီး ပြည်သူများ၏ နားမျက်စိများဖြစ်သည့် သတင်းမီဒီယာများ၏ အခန်းကဏ္ဍကို အလေးအနက်ထားရန် လိုကြောင်းနှင့် ပြည်သူများ မြင်ချင်တွေ့ချင်သည့် အပြောင်းအလဲများကို မျက်ဝါးထင်ထင် တွေ့မြင်နိုင်ရန် ကြိုးပမ်းဆောင်ရွက်မည် ဖြစ်ကြောင်း နိုင်ငံတော်သမ္မတ ဦးဝင်းမြင့်က ကတိပြု ပြောကြားသည်။

မတ် ၃၀ ရက်တွင် ပြုလုပ်သည့် ပြည်ထောင်စုလွှတ်တော် အစည်းအဝေးတွင် နိုင်ငံတော်သမ္မတအဖြစ် ရွေးချယ်ခံထားရသည့် ဦးဝင်းမြင့်သည် ပြည်ထောင်စုလွှတ်တော် နာယက ရှေ့မှောက်တွင် ကတိသစ္စာပြုပြီးနောက် ပထမဆုံးမိန့်ခွန်း ပြောကြားရာတွင် ထည့်သွင်းပြောကြား ခဲ့ခြင်းဖြစ်သည်။

သမ္မတနှင့် ဒုတိယသမ္မတများ ကတိသစ္စာပြုခြင်း အခမ်းအနားမြင်ကွင်း (ဓာတ်ပုံ – နိုင်ငံတော်သမ္မတရုံး)

နိုင်ငံအနေဖြင့် အဘက်ဘက်တွင် လိုအပ်ချက်များနှင့် ဆင်းရဲနွမ်းပါးနေဆဲ ဖြစ်သောကြောင့် နေရာ ကဏ္ဍအသီးသီးတွင် အများကြီး ဆက်လက်ရုန်းကန် ကြိုးပမ်းကြရဦးမည် ဖြစ်ကြောင်း၊ နိုင်ငံတကာ စာမျက်နှာတွင်လည်း ဖိအားပေးမှုများ၊ ဝေဖန်မှုများနှင့် အထင်အမြင် လွဲမှားနေသည်ကို ရင်ဆိုင်နေရကြောင်း၊ ပြည်သူများ တွေ့ကြုံရင်ဆိုင်နေရသည့် စိန်ခေါ်မှုများ၊ အခက်အခဲများမှာ မနည်းလှကြောင်း၊ အရာရာတိုင်းကို လွယ်လင့်တကူ ဖြေရှင်းနိုင်မည် မဟုတ်သော်လည်း အစွမ်းကုန် ကြိုးစားအားထုတ်ပြီး ဦးစားပေးကဏ္ဍအလိုက် ဖြေရှင်းဆောင်ရွက် သွားရမည်ဖြစ်ကြောင်း နိုင်ငံတော်သမ္မတက ပြောကြားသည်။

“ကျွန်တော့်အနေနဲ့ ပြည်ထောင်စုအ စိုးရအဖွဲ့ရဲ့ ဦးစားပေး ရည်မှန်းချက်ပန်းတိုင်တွေဖြစ်တဲ့ (၁) တရားဥပဒေ စိုးမိုးရေးနဲ့ပြည်သူများရဲ့ လူမှုစီးပွားဘ၀ တိုးတက်မြင့်မားရေး၊ (၂) အမျိုးသား ပြန်လည်သင့်မြတ်ရေးနဲ့ ပြည်တွင်းငြိမ်းချမ်းရေး၊ (၃) ဒီမိုကရေစီ ဖက်ဒရယ် ပြည်ထောင်စုကြီး တည်ဆောက်ရေးအတွက် အခြေခံအုတ်မြစ်ဖြစ်တဲ့ ဖွဲ့စည်းပုံအခြေခံဥပဒေ ပြင်ဆင်ရေးတို့ကို ဦးတည်ကြိုးပမ်း ဆောင်ရွက်သွားမှာ ဖြစ်ပါတယ်” ဟု နိုင်ငံတော်သမ္မတက ပြောကြားသည်။

သမ္မတနှင့် ဒုတိယသမ္မတများ ကတိသစ္စာပြုခြင်း အခမ်းအနားမြင်ကွင်း (ဓာတ်ပုံ – ပြည်ထောင်စုလွှတ်တော်)

နိုင်ငံတော်သမ္မတ ဦးဝင်းမြင့်က “ဒီနေ့ ဒီအချိန်အခါဟာ ဒီမိုကရေစီကျင့်စဉ်နဲ့အညီ ခေတ်ပြောင်း စနစ်ပြောင်းကာလ ဖြစ်ပါတယ်။ ဒီမိုကရေစီ အသွင်ကူးပြောင်းရေး ကာလရဲ့ အစပဲ ရှိပါသေးတယ်။ ဒီပြောင်းလဲမှု ဖြစ်စဉ်ကြီး အောင်မြင်ချောမွေ့စေဖို့  ပြည်သူ ပြည်သားတွေနဲ့ နိုင်ငံ့ဝန်ထမ်းများ၊ ပြည်သူ့ဝန်ထမ်းများ အားလုံးရဲ့ ပုံစံကျနေတဲ့ အတွေးအမြင်တွေ၊ ပုံသေကားချပ် အလေ့အထအားလုံးကို ပြုပြင်ပြောင်းလဲပေးကြဖို့ အထူးလိုအပ်လှပါတယ်။ ပြုပြင်ပြောင်းလဲမှု နှောင့်နှေးနေတဲ့ ဌာနဆိုင်ရာ အဖွဲ့အစည်းတွေကို ကြပ်မတ်ရပါလိမ့်မယ်။ ယိမ်းယိုင်နေတဲ့ တရားစီရင်ရေးကို တည့်မတ်ရပါလိမ့်မယ်။ အဂတိလိုက်စားမှုကို ပိုမိုတိုက်ဖျက်ရပါလိမ့်မယ်။ လူ့အခွင့်အရေး ချိုးဖောက်ခံရခြင်းတွေကို မြှင့်တင်ကာကွယ် ရပါလိမ့်မယ်။ မူးယစ်ဆေးဝါးကို ပိုမိုနှိမ်နင်းရပါလိမ့်မယ်။ ပြည်သူ့ဘဏ္ဍာငွေများ အလေအလွင့် ဆုံးရှုံးမှုမရှိစေဖို့ စီမံခန့်ခွဲရပါလိမ့်မယ်။ ဥပဒေမဲ့ သိမ်းဆည်းခံခဲ့ရတဲ့ လယ်ယာမြေတွေ ပြန်လည်ရရှိရေး၊ လျော်ကြေး နစ်နာကြေး ရရှိရေးကို ဥပဒေနဲ့အညီ ဆောင်ရွက်ရပါလိမ့်မယ်။ တောင်သူလယ်သမားတွေရဲ့ လူမှုဘ၀ မြင့်မားတိုးတက်ရေး၊ အလုပ်သမားတွေရဲ့ဘ၀ သာယာစိုပြည်ရေး၊ ကျောင်းသား လူငယ်များ အဆင့်မြင့် ပညာရပ်များ ဆည်းပူးခွင့်ရရှိရေး စတာတွေကို ဖော်ဆောင်ရပါလိမ့်မယ်” ဟု ပြောကြားသည်။

နိုင်ငံတော်သမ္မတ ဦးဝင်းမြင့်အား သမ္မတအိမ်တော်တွင် ကြိုဆိုပွဲအခမ်းအနား မြင်ကွင်း (ဓာတ်ပုံ – စည်သူ)

ထို့ပြင် ဖွဲ့စည်းပုံ အခြေခံဥပဒေအရ အပ်နှင်းထားသည့် အခွင့်အာဏာကို တတ်နိုင်သမျှ ပိုင်းခြားကျင့်သုံး နေကြသည့် မဏ္ဍိုင်ကြီး သုံးရပ်အကြား အပြန်အလှန်လေးစားမှု၊ အပြန်အလှန်နားလည်မှု၊ အပြန်အလှန် ယုံကြည်မှုများဖြင့် ပြည်သူများ အကျိုးအတွက် ပူးပေါင်းဆောင်ရွက်သွားကြရန် တိုက်တွန်းလိုကြောင်း နိုင်ငံတော်သမ္မတက ပြောကြားသည်။

“ဒါ့အပြင် ပြည်သူတွေရဲ့ နားတွေ၊ မျက်စိတွေဖြစ်တဲ့ သတင်းမီဒီယာတွေရဲ့ အခန်းကဏ္ဍကို အလေးအနက်ထားကြဖို့၊ ကျွန်တော်တို့ အလုပ်အကျွေးပြုရမယ့် နိုင်ငံသူ နိုင်ငံသားတွေရဲ့ ပြည်သူ့မဏ္ဍိုင်ကို အလေးအမြတ်ပြုကြဖို့ တစ်ဆက်တည်းမှာပဲ တိုက်တွန်းပြောကြား လိုပါတယ်” ဟု နိုင်ငံတော်သမ္မတက ပြောကြားသည်။

ထို့အတူ နိုင်ငံသူ၊ နိုင်ငံသားများ မျှော်လင့်တောင့်တနေသည့် လိုအင်ဆန္ဒများကို အတတ်နိုင်ဆုံး ဖြည့်ဆည်းပေးနိုင်ရန် မဏ္ဍိုင်ကြီးများအလိုက် မိမိတို့အားလုံး ဆထက်ထမ်းပိုး ကြိုးပမ်းကြရဦးမည်ဖြစ်ကြောင်း၊ နိုင်ငံတကာ အသိုင်းအ၀ိုင်း၏ အလယ်တွင် မိမိတို့နိုင်ငံ၏ပုံရိပ် ပြန်လည်တောက်ပ မြင့်မားလာအောင်၊ မိမိတို့ နိုင်ငံသူ နိုင်ငံသားများ၏ ဂုဏ်သိက္ခာ ပို၍ ပို၍ မြင့်တက်လာအောင် မိမိတို့အားလုံး ဆက်လက် ကြိုးစားကြရဦးမည် ဖြစ်ကြောင်း နိုင်ငံတော်သမ္မတ ဦးဝင်းမြင့်က ပြောကြားသည်။

ပြည်ထောင်စု လွှတ်တော်တွင် မတ် ၃၀ ရက်က မိန့်ခွန်းပြောကြားနေသည့် နိုင်ငံတော်သမ္မတ ဦးဝင်းမြင့်အား တွေ့ရစဉ် (ဓာတ်ပုံ-နိုင်ငံတော်သမ္မတရုံး)

“ပြည်သူတွေအတွက် ၀န်ထုပ်ဝန်ပိုးဖြစ်စေတဲ့ ကြိုးနီစနစ်တွေ၊ ကျွန်တော်တို့ လူ့အဖွဲ့အစည်းအတွင်း လှိုက်စားနေတဲ့ အဂတိလိုက်စားမှုတွေကို စနစ်တကျ တိုက်ဖျက်သွားပြီး နိုင်ငံသူ၊ နိုင်ငံသားတွေရဲ့ စာရိတ္တမဏ္ဍိုင်ကို ခိုင်မာအောင် ကြိုးပမ်းဆောင်ရွက်သွားကြရမှာ ဖြစ်ပါတယ်။ ကျွန်တော်တို့ ပြည်ထောင်စု အစိုးရအဖွဲ့ အနေနဲ့ ကျွန်တော်တို့ တွေ့ကြုံခဲ့ရတဲ့ အတိတ်က အဖြစ်အပျက်တွေ၊ ကျော်လွှားဖြတ်သန်းခဲ့ရတဲ့ အကျပ်အတည်းတွေ၊ ရင်ဆိုင်ခဲ့ရတဲ့ အခက်အခဲတွေကို သင်ခန်းစာယူပြီး ပစ္စုပ္ပန်နဲ့ အနာဂတ်အတွက် မိဘပြည်သူများ လိုလားတောင့်တနေတဲ့ ဒီမိုကရေစီနဲ့ လူ့အခွင့်အရေးကို မျက်ခြည်ပြတ်မခံဘဲ အဂတိတရား ကင်းရှင်းစွာဖြင့် ကိုယ်စွမ်းဥာဏ်စွမ်းရှိသရွေ့ ကြိုးပမ်းဆောင်ရွက်မှာ ဖြစ်ပါတယ်” ဟု သမ္မတဦးဝင်းမြင့်က ပြောကြားသည်။

အဆိုပါ ကတိသစ္စာပြုခြင်း အခမ်းအနားတွင် နိုင်ငံတော်သမ္မတ ဦးဝင်းမြင့်နှင့်အတူ ဒုတိယသမ္မတများဖြစ်သည့် ဦးမြင့်ဆွေ၊ ဦးဟင်နရီဗန်ထီးယူတို့လည်း ကတိသစ္စာ ပြုခဲ့သည်။

 

March 30, 2018














Copy Protected by Chetan's WP-Copyprotect.