အမျိုးသားရေးနှင့် တိုင်းရင်းသားလူမျိုးစုများအရေးတွင် စစ်အင်အားဖြင့် သြဇာသက်ရောက်အောင် ဆောင်ရွက်နေခြင်းကို အဆုံးသတ်ရမည်ဖြစ်ကြောင်း အမျိုးသားဒီမိုကရေစီအဖွဲ့ချုပ် (NLD) ပါတီက မတ် ၂၇ ရက်တွင်ပြုလုပ်သည့် (၇၃) နှစ်မြောက် ဖက်ဆစ်တော်လှန်ရေးနေ့ (တပ်မတော်နေ့) အခမ်းအနားတွင် ကြေညာချက်ထုတ်ပြန်သည်။
အမျိုးသားဒီမိုကရေစီအဖွဲ့ချုပ်သည် ပြည်သူများ၏ ဇွဲလုံ့လဝီရိယနှင့် မျှော်လင့်ချက်များကြောင့် ရရှိခဲ့သော ဒီမိုကရေစီအောင်ပွဲကို မည်သည့်နည်းနှင့်မျှ ဆုံးရှုံးမခံနိုင်ကြောင်း၊ အယူအဆကွဲလွဲမှုများကြောင့် ဆိုးဆိုးရွားရွား နာကျင်ခံစားရမှုမျိုးကိုလည်း မည်သည့်အခါမျှ အဖြစ်ခံမည်မဟုတ်ကြောင်း၊ အမျိုးသားရေးနှင့် တိုင်းရင်းသားလူမျိုးစုများအရေးတွင် စစ်အင်အားဖြင့် ဆောင်ရွက်နေခြင်းမျိုးကိုလည်း အဆုံးသတ်ကြရမည်ဖြစ်ကြောင်း၊ တိုင်းရင်းသားများအကြား၊ အမျိုးသားများအကြား မယုံသင်္ကာဖြစ်မှုနှင့် ရန်ငြှိုးထားသိုမှုများကို အခြေခံသည့် လက်နက်ကိုင်ပဋိပက္ခအဖြစ် အဖြေရှာရွေးချယ်မှုများကိုလည်း နိဂုံးချုပ်ရမည်ဖြစ်ကြောင်း အဆိုပါကြေညာချက်တွင် ပါရှိသည်။
ထို့အတူ ပွင့်လင်းသည့်နှလုံးသားနှင့် စာနာစိတ်ကိုအရင်းတည်ပြီး လူသား၏ဖြစ်တည်မှုအပေါ်၊ နှုန်းစံတန်ဖိုးများအပေါ် လေးစားနားလည်ကြရန် အမြော်အမြင်ရှိရှိ အပြန်အလှန်နားလည်မှုရှိရှိဖြင့် ဒီမိုကရေစီပြည်ထောင်စုသစ်ကို ကြိုးပမ်းပုံဖော်ကြရမည်ဖြစ်ကြောင်း ကြေညာချက်တွင် ဖော်ပြထားသည်။
“အမျိုးသားဒီမိုကရေစီအဖွဲ့ချုပ်က တိုင်းပြည်တာဝန်ကို စတင်ရယူထားတဲ့အချိန်ကစပြီး အဖွဲ့ချုပ်ဥက္ကဋ္ဌ ဒေါ်အောင်ဆန်းစုကြည်က ငြိမ်းချမ်းရေးကိစ္စကို ရှေ့ဆုံးမှာ ဦးစားပေးဆောင်ရွက်နေပါတယ်။ ရည်ရွယ်ချက်ကတော့ ဒီမိုကရေစီနဲ့ ဖက်ဒရယ်စနစ် နှစ်မျိုးစလုံးကိုအခြေခံတဲ့ ပြည်ထောင်စုကြီးကို တိုင်းရင်းသားပြည်သူလူထုနဲ့အတူ ထူထောင်ဖို့ဖြစ်ပါတယ်။ ဒီလိုထူထောင်ဖို့ ကျွန်တော်တို့အချင်းချင်းကြားမှာရှိတဲ့ ပြဿနာတွေကို လက်နက်ကိုင်တဲ့နည်းလမ်းနဲ့ ဖြေရှင်းမယ့်အစား စကားဝိုင်းမှာတွေ့ဆုံကြ၊ ဖြေရှင်းကြဖို့ တိုက်တွန်းနေရခြင်း ဖြစ်ပါတယ်” ဟု အခမ်းအနားသဘာပတိမိန့်ခွန်းတွင် NLD ပါတီဗဟိုအလုပ်အမှုဆောင်အဖွဲ့၊ အတွင်းရေးမှူးအဖွဲ့ဝင် ဦးဟံသာမြင့်က ထည့်သွင်းပြောကြားသည်။
ဖက်ဒရယ်စနစ်နှင့် ဒီမိုကရေစီကိုအခြေခံသည့် ပြည်ထောင်စုကြီးကို တည်ထောင်ရသည့် ရည်ရွယ်ချက်သည် တိုင်းရင်းသားအားလုံးအတွက် မိမိတို့ကိုယ်စွမ်း၊ ဉာဏ်စွမ်းရှိသမျှ မိမိတို့ဘဝကို ကောင်းမွန်အောင် မိမိတို့ကသာ ပြဋ္ဌာန်းဖန်တီးနိုင်မည့် အခင်းအကျင်းမျိုးကို ရရှိရန်ဖြစ်ကြောင်း ဦးဟံသာမြင့်က ဆက်လက်ပြောကြားသည်။
ထို့ပြင် ရှေ့ဆက်မည့်ခရီးတွင် အမျိုးသားဒီမိုကရေစီအဖွဲ့ချုပ်က မြန်မာနိုင်ငံသူ၊ နိုင်ငံသားများ၏အကျိုးကို ယခုထက်ပိုမိုကြိုးစားရန်အတွက် တိုင်းရင်းသား၊ နိုင်ငံရေးပါတီများအပါအဝင် မြန်မာပြည်သူလူထု၏အကျိုးကို လိုလားသည့် မည်သူနှင့်မဆို ပိုမိုရင်းနှီးစွာ ပူးပေါင်းဆောင်ရွက်သွားမည်ဖြစ်ပြီး ပြည်သူလူထု၏အကျိုးကို ထိခိုက်နစ်နာရန် တစ်စုံတစ်ရာ လုပ်ဆောင်နေပြီဆိုပါက အဖွဲ့ချုပ်၏ပါတီဝင်များအပြင် မည်သူကိုမဆို လက်တွဲဖြုတ်သွားရန် ဝန်လေးမည်မဟုတ်ကြောင်း ဦးဟံသာမြင့်က ပြောကြားသည်။
၂၀၁၈ ခုနှစ် မတ် ၂၇ ရက်သည် (၇၃) နှစ်မြောက် ဖက်ဆစ်တော်လှန်ရေးနေ့ဖြစ်ကြောင်း၊ မြန်မာနိုင်ငံတစ်နံတစ်လျား၊ တောင်ပေါ်မြေပြန့်၊ မြို့ပြနှင့် ကျေးလက်ဒေသများမှ အလုပ်သမား၊ လယ်သမား၊ တိုင်းရင်းသားလူမျိုးပေါင်းစုံ၊ ဘာသာသာသနာပေါင်းစုံ၊ လူတန်းစားပေါင်းစုံ၊ အလွှာပေါင်းစုံ သွေးစည်းညီညွတ်လျက် ဖက်ဆစ်ဝါဒီများအား ပြည်သူ့စစ်ပွဲအဖြစ် တော်လှန်တိုက်ပွဲဝင်ခဲ့ကြကြောင်း၊ ကွန်မြူနစ်ပါတီ၊ ဆိုရှယ်လစ်ပါတီနှင့် အခြားနိုင်ငံရေးပါတီများက အဓိကဦးဆောင်လျက် တိုင်းရင်းသားမျိုးနွယ်စုများနှင့် တပ်မတော်သာများအပါအဝင် အမျိုသားအင်အားစုများ အားလုံးအတူတကွ သွေးစည်းညီညွတ်ကြမှသာ အောင်မြင်နိုင်မည်ဖြစ်ကြောင်းကို ဤအမျိုးသားလွတ်လပ်ရေးနှင့် ဒီမိုကရေစီရေး ရုန်းကန်မှုဖြစ်စဉ်များက သက်သေပြခဲ့ကြောင်း၊ အထူးသဖြင့် ဖက်ဆစ်တော်လှန်ရေးကြီး အချိန်ကာလတိုအတွင်း အောင်မြင်စွာ ဆင်နွှဲနိုင်ခဲ့ခြင်းကြောင့်သာလျှင် တစ်နိုင်ငံလုံး မွတ်သိပ်တောင့်တခဲ့ကြသော အမျိုးသားလွတ်လပ်ရေးကို ဂုဏ်ယူဝံ့ကြွားစွာ အရယူနိုင်ခဲ့ခြင်းဖြစ်ကြောင်း NLD ၏ ကြေညာချက်တွင် ပါရှိသည်။
မြန်မာ့တပ်မတော်သည် ဗိုလ်ချုပ်အောင်ဆန်းအမှူးပြုသော နယ်ချဲ့ဆန့်ကျင်ရေးနှင့် ဖက်ဆစ်တော်လှန်ရေး တိုက်ပွဲများအတွင်းမှ မွေးဖွားရှင်သန်ခဲ့သော သမိုင်းဝင် အမျိုးသားအင်အားစုကြီးဖြစ်ကြောင်း၊ တစ်နည်းအားဖြင့် အမျိုသားလက္ခဏာနှင့် လူထုလက္ခဏာများနှင့်လည်း ပြည့်စုံကြောင်း၊ အမျိုးသားခေါင်းဆောင်ကြီး ဗိုလ်ချုပ်အောင်ဆန်းသည် မိမိတည်ထောင်ခဲ့သော တပ်မတော်အား ပြည်သူချစ်သောတပ်မတော်၊ ပြည်သူကို အလုပ်အကျွေးပြုသော တပ်မတော်၊ ဒီမိုကရေစီနှင့် လူ့အခွင့်အရေးကို အရယူပေးသော တပ်မတော်၊ တိုင်းပြည်၏ အန္တရာယ်အသွယ်သွယ်ကို စွန့်လွှတ်စွန့်စား အကာအကွယ်ပေးသော တပ်မတော်အဖြစ် ပုံဖော်ခဲ့ကြောင်း အမျိုးသားဒီမိုကရေစီအဖွဲ့ချုပ်၏ (၇၃) နှစ်မြောက် ဖက်ဆစ်တော်လှန်ရေးနေ့ (တပ်မတော်နေ့) ကြေညာချက်တွင် ရေးသားထားသည်။
