မြန်မာပြည်သူများ စိုးရိမ်နေသည့် ငွေမည်းများကို မဖြစ်မနေ ခဝါချခွင့် ပြုတော့မည်ဆိုပါက ဈေးကစားမှုများကို ကာကွယ်နိုင်ရန် MIC (မြန်မာနိုင်ငံ ရင်းနှီးမြှုပ်နှံမှုကော်မရှင်) သို့ ဖြတ်သန်းစေခြင်းနှင့် ငွေမည်းများ အလွန်အကျွံ စီးဝင်မသွားစေရန် MEB (မြန်မာ့ စီးပွားရေးဘဏ်) တွင် အပ်နှံ ဖြတ်သန်းစေခြင်းများဖြင့် ခဝါချခွင့် ပြုသင့်ကြောင်း မူဝါဒဆိုင်ရာ စီးပွားရေးပညာရှင် ဒေါက်တာအောင်ကိုကိုက ပြောကြားသည်။
ယခင်အစိုးရ လက်ထက်၌ အခြေပစ္စည်းများ ဝယ်ယူရာတွင် စည်းကြပ်မှုမှ လွတ်ကင်းနေသော ဝင်ငွေခေါင်းစဉ်ဖြင့် ဝင်ငွေရလမ်း မပြနိုင်သော ငွေများကို အခွန်ရာခိုင်နှုန်း ၃၀ အထိ ကောက်ခံရာမှ လက်ရှိအစိုးရ လက်ထက်တွင် အခြေပစ္စည်းများအပြင် စည်းကြပ်မှုမှ လွတ်ကင်းနေသော ငွေကြေးများကိုပါ အခွန်နှုန်း သုံးရာခိုင်နှုန်း ပေးဆောင်ရုံဖြင့် ငွေဖြူအဖြစ် သတ်မှတ်နိုင်ရန် ကြိုးပမ်းနေသည်။ အဆိုပါကြိုးပမ်းမှုမှာ ငွေမည်းများကို ခဝါချခြင်း ဖြစ်ကြောင်း ဝေဖန်မှုများနှင့် စိုးရိမ်မှုများ ရှိနေသကဲ့သို့ မတ် ၈ ရက်က ပြည်ထောင်စုလွှတ်တော်တွင် ယင်းအချက်အပေါ် ကန့်ကွက် ဆွေးနွေးမှုများနှင့် ဥပဒေတစ်ခု သီးခြားပြဋ္ဌာန်းရန် ဆွေးနွေးမှုများ ရှိနေသော်လည်း NLD အစိုးရက ဦးဆောင် တင်သွင်းခဲ့ခြင်း ဖြစ်သည့်အတွက် NLD လွှတ်တော်က အတည်ပြုပေးနိုင်ဖွယ် ရှိနေကြောင်း သုံးသပ်မှုများ ရှိနေသည်။
မြန်မာနိုင်ငံ အနေဖြင့် လက်ရှိ အခြေအနေတွင် Foreign Savings ၊ Government Savings နှင့် Public Savings များအနက် အစိုးရ စုဆောင်းငွေဖြစ်သော Government Savings မှာ ဘတ်ဂျက်လိုငွေ မြင့်မားနေခြင်းနှင့် မြန်မာနိုင်ငံသားများ၏ Public Savings မှာလည်း နိုင်ငံခြား ရင်းနှီးမြှုပ်နှံမှုဖြစ်သည့် Foreign Savings ဖြင့် နှိုင်းယှဉ်ပါက လွန်စွာ နည်းပါးသည့် အခြေအနေ ဖြစ်ပေါ်နေသည်။
“ Savings ကနေ Investment လုပ်ရတာဆိုတော့ ဒီ Savings သုံးခုထဲမှာ နိုင်ငံသားတွေရဲ့ Savings က တက်လာအောင် ဘယ်လိုလုပ်ရမလဲ ဆိုတော့ အခုနကပြောတဲ့ ငွေမည်းကို ခဝါချတယ်ပဲ ပြောပြောပေါ့။ အဲဒီဥပဒေကို ဘယ်လို ကန့်သတ်ချက်အနေနဲ့ ထည့်နိုင်မလဲ ဆိုတော့ ဥပမာ အခွန်ရှောင်ခဲ့တဲ့ ငွေတွေပဲ ဆိုပါတော့။ အဲဒီငွေတွေကို MIC (မြန်မာနိုင်ငံ ရင်းနှီးမြှုပ်နှံမှုကော်မရှင်) ကနေတစ်ဆင့် ဝင်လာရင်၊ နောက်တစ်ချက်အနေနဲ့ MEB (မြန်မာ့စီးပွားရေးဘဏ်) ထဲကို ဝင်လာရင်သော် လည်းကောင်း နိုင်ငံသားတွေရဲ့ ငွေကြေးအရင်းအနှီး တက်လာနိုင်တယ်။ အဲဒီလို ယူဆနိုင်တယ်။ ဒီလိုလုပ်လိုက်မယ် ဆိုရင် ဘာပဲပြောပြော အခုကျွန်တော်တို့ စိုးရိမ်နေတဲ့ အိမ်ခြံမြေ ဈေးနှုန်းတွေ တက်တာတို့ တခြားသော လုပ်ငန်းတွေမှာ မလိုအပ်ဘဲ ဈေးကစားတာတို့ကို အတိုင်းအတာ တစ်ခုအထိ ထိန်းချုပ်လာနိုင်မယ်”ဟု ဒေါက်တာအောင်ကိုကိုက ဆက်လက် ပြောကြားသည်။
ထိုသို့ စုဆောင်းငွေ (Savings) သုံးမျိုးတွင် အစိုးရနှင့် ပြည်သူတို့၏ စုဆောင်းငွေမှာ နည်းပါးနေသဖြင့် ထို Savings များ မြင့်တက်ရန် ငွေမည်းများကို တရားဝင်လမ်းကြောင်း ဖော်ဆောင်ရာတွင် အခွန်ဆောင်ရုံဖြင့် တရားဝင် ငွေဖြူဖြစ်စေသည့် အခြေအနေထက် MIC ၊ MEB များမှ ဖြတ်သန်းစေမည်ဆိုပါက ပြည်တွင်း ငွေကြေးလည်ပတ်မှု ဈေးကွက်အတွင်း ဝင်ရောက်ကာ Public Savings များ မြင့်တက်လာနိုင်မည်ဖြစ်ကြောင်း မူဝါဒဆိုင်ရာ စီးပွားရေးပညာရှင် ဒေါက်တာအောင်ကိုကိုက ပြောကြားသည်။
“တိုင်းပြည်ရဲ့ လိုအပ်ချက်အရ လုပ်ဆောင်တာ မှန်ပေမယ့် ပုံမှန်တာဝန်ကျေစွာ ထမ်းဆောင်နေသော အခွန်ထမ်းများ၊ ပုံမှန် အခွန်ထမ်းဆောင်လိုစိတ် ပျက်ပြားစေသည့် ကွာဟသော အခွန်နှုန်းထား မဖြစ်စေဖို့ သတိပြုသင့်ပါတယ်။ သုံးရာခိုင်နှုန်း၊ ငါးရာခိုင်နှုန်း၊ ခုနစ်ရာခိုင်နှုန်း စသည့် သတ်မှတ်ချက်များအနေနဲ့ ငွေကြေးပမာဏ အနည်းအများပေါ် မူတည်ပြီး အခွန်နှုန်း ခွဲခြားပေးပါက အခွန်ပိုမို ရရှိနိုင်မှာ ဖြစ်ပါတယ်။ ဆေးမြီးတို သို့မဟုတ် ဆေးခါးကြီး တိုက်ကျွေးခြင်း အားဖြင့်လည်း သေချာသော နည်းလမ်း ဟုတ်မဟုတ် ပြောရန် ခက်ပါတယ်။ လွှတ်တော်နှစ်ရပ်မှ သက်ဆိုင်သည့် ကော်မတီအားလုံး၊ ဘဏ်များနှင့် ငွေကြေးဆိုင်ရာ ဖွံ့ဖြိုးတိုးတက်ရေးကော်မတီ၊ မြန်မာနိုင်ငံတော် ဗဟိုဘဏ်၊ ငွေကြေးဆိုင်ရာ စုံစမ်းထောက်လှမ်းရေးတပ်ဖွဲ့၊ ပြည်ထဲရေးဝန်ကြီးဌာန အားလုံး သုံးသပ်ပါဝင် ညှိနှိုင်းသင့်တယ်လို့ တင်ပြအပ်ပါတယ်။ အင်ဒိုနီးရှားနိုင်ငံကို အားကိုးပြီး လုပ်ဆောင်မယ် ဆိုရင်လည်း မိမိနိုင်ငံ အခြေအနေကို သတိပြုသင့်ပါတယ်။ နံပါတ် (၁) မှာဆိုရင် ဗဟိုဘဏ်က ထုတ်ဝေထားတဲ့ငွေထက် ပြည်တွင်းမှာ လှည့်ပတ်သုံးစွဲနေတဲ့ငွေက ပိုမိုများနေတာ၊ အချို့သော ဆောက်လုပ်ရေး လုပ်ငန်းရှင်များက တိုင်းရင်းသား အမည်ခံပြီး ပြည်ပနိုင်ငံတွေက ငွေမည်းတွေကို ငွေဖြူများအသွင် လာရောက် လုပ်ကိုင်နေခြင်း၊ ဆော်ဒီအာရေးဗီးယားနိုင်ငံက Oil Money တွေနဲ့ ထောက်ပံ့နေခြင်း၊ မူးယစ်ဆေးဝါး ရောင်းဝယ် ဖောက်ကားသည့်ငွေများ ရှိနေခြင်း၊ နိုင်ငံတကာ ငွေကြေးခဝါချမှု ရှုထောင့်မှ စဉ်းစားရန်လိုခြင်း၊ ရင်းနှီးမြှုပ်နှံမှု ဥပဒေအရ ဆောက်လုပ်ရေး လုပ်ငန်းတွေအပေါ် အခွန်သက်သာခွင့် လက်ရှိရရှိနေခြင်းတွေ ဖြစ်ပါတယ်။ ဒါကြောင့်မို့လို့ အဘက်ဘက်က အချိန်ယူပြီးတော့ ကြောင်းကျိုးသုံးသပ်ပြီး အသင့်တော်ဆုံး နည်းလမ်းကို ချမှတ်ဆောင်ရွက်ဖို့ လိုအပ်ပါတယ်”ဟု လွှတ်တော်ကိုယ်စားလှယ် ဦးစိုးသိန်းက ပြောကြားသည်။
လက်ရှိ အဆိုပြုထားသည့် ဥပဒေကြမ်းမှာ အားနည်းချက်များစွာ ရှိနေသဖြင့် MIC ၊ MEB မှ ဖြတ်သန်းစေခြင်းအားဖြင့် ထိန်းချုပ်ရ လွယ်ကူလာမည်ဖြစ်ပြီး ထိုသို့ ထိန်းချုပ်နိုင်ခြင်းအားဖြင့် မြန်မာပြည်သူများ စိုးရိမ်နေသကဲ့သို့ ငွေမည်းများ ငွေဖြူ မဖြစ်စေခြင်း၊ တစ်ဖက်တွင်လည်း Public Savings မှာလည်း မြင့်တက်လာခြင်း ဖြစ်လာနိုင်မည်ဖြစ်ကြောင်း ဒေါက်တာအောင်ကိုကိုက ပြောကြားသည်။
