၂၀၁၇-၂၀၁၈ ဘဏ္ဍာနှစ် သြဂုတ်၇ ရက်အထိ နိုင်ငံခြားရင်းနှီးမြှုပ်နှံမှုပမာဏ ဒေါ်လာ ၃ ဒသမ ၆ဘီလျံကျော်ရရှိထားပြီး ယခင်နှစ်ထက် နိုင်ငံခြားရင်းနှီးမြှုပ်နှံမှုများ အားကောင်းကောင်းဖြင့် ဝင်ရောက်လျက်ရှိကြောင်း ရင်းနှီးမြှုပ်နှံမှုနှင့် ကုမ္ပဏီများညွှန်ကြားမှု ဦးစီးဌာန (DICA) မှ ညွှန်ကြားရေးမှူးချုပ် ဦးအောင်နိုင်ဦးက သြဂုတ် ၈ ရက်က DICA ရုံးတွင် ပြုလုပ်သည့် သတင်းစာရှင်းလင်းပွဲတွင်ပြောကြားသည်။
၂၀၁၇-၂၀၁၈ ဘဏ္ဍာနှစ်အတွင်း နိုင်ငံခြား ရင်းနှီးမြှုပ်နှံမှုပမာဏ ဒေါ်လာ ခြောက်ဘီလျံရရှိရန် မျှော်မှန်းထားပြီး လေးလကျော်ကာလအတွင်း ယခုနှစ်လျာထားချက်၏ ထက်ဝက်ကျော် ဝင်ရောက်မြှုပ်နှံထားကြသည်။
၂၀၁၇-၂၀၁၈ ဘဏ္ဍာနှစ်အတွက် နိုင်ငံခြား ရင်းနှီးမြှုပ်နှံမှုခွင့်ပြုပေးခဲ့မှုမှာ ၂၀၁၇ ခုနှစ် သြဂုတ်လဆန်းအထိ နိုင်ငံခြားရင်းနှီးမြှုပ်နှံလုပ်ငန်း ၁၁၂ ခု၊ ရင်းနှီးမြှုပ်နှံမှုပမာဏ ဒေါ်လာ၂၉၅၂ ဒသမ ၇၉၇ သန်းဖြစ်ကြောင်း၊ ရင်းနှီးမြှုပ်နှံမှုတိုးမြှင့်ခြင်းအပါ အဝင် စုစုပေါင်းရင်းနှီးမြှုပ်နှံမှုပမာဏ ဒေါ်လာ ၃၄၈၇ ဒသမ ၇၃၂ သန်း စီးဝင်ခြင်းဖြစ်ကြောင်း မြန်မာနိုင်ငံရင်းနှီးမြှုပ်နှံမှုကော်မရှင် သတင်းထုတ်ပြန်ချက် အမှတ်စဉ်(၉/၂၀၁၇) အရ သိရသည်။
၂၀၁၇-၂၀၁၈ဘဏ္ဍာနှစ်အတွင်း အထူးစီးပွားရေးဇုန် ဥပဒေအရ သီလဝါအထူးစီးပွားရေးဇုန်တွင် ရင်းနှီးမြှုပ်နှံမှုပမာဏ ဒေါ်လာ ၁၈၉ ဒသမ ၆၀၀ သန်းခွင့်ပြုခဲ့ပြီးစုစု ပေါင်းရင်းနှီးမြှုပ်နှံမှုပမာဏ ဒေါ်လာ ၃ ဒသမ ၆ ဘီလျံကျော် (၃၆၇၇ ဒသမ ၃၃၂ သန်း)စီး ဝင်ခဲ့ခြင်းဖြစ်ကြောင်း၊ ၂၀၁၇-၂၀၁၈ ဘဏ္ဍာ နှစ်အတွင်း နိုင်ငံခြားရင်းနှီးမြှုပ်နှံမှုဥပဒေ (၂၀၁၂)အရ ခွင့်ပြုမိန့်ထုတ်ပေးခဲ့သည့် လုပ်ငန်း ၅၄ ခုဖြစ်ပြီး မြန်မာနိုင်ငံရင်းနှီးမြှုပ်နှံမှုဥပဒေ (၂၀၁၆) အရ ခွင့်ပြုမိန့်ထုတ်ပေးသည့် လုပ်ငန်း ၁၆ ခုနှင့် အတည်ပြုမိန့်ထုတ်ပေးခဲ့သည့် လုပ်ငန်း ၄၂ ခုဖြစ်ကြောင်း သိရသည်။
မြန်မာနိုင်ငံရင်းနှီးမြှုပ်နှံမှုကော်မရှင်၏ အစည်းအဝေးအမှတ်စဉ် (၁၁/၂၀၁၇) ကို သြဂုတ် ၇ ရက်က ကျင်းပခဲ့ရာ အဆိုပါအစည်းအဝေးတွင် နိုင်ငံခြားရင်းနှီးမြှုပ်နှံမှုလုပ်ငန်း ၁၉ ခုခွင့်ပြုခဲ့ပြီး ရင်းနှီးမြှုပ်နှံမှုပမာဏ ဒေါ်လာ ၁၈၄ ဒသမ၂၇၂ သန်းနှင့် ပြည်တွင်းလုပ်သားများအတွက် အလုပ်အကိုင် အခွင့်အလမ်းပေါင်း ၁၁၁၉၇ ခုကိုဖန်တီးပေးနိုင်ခဲ့ကြောင်း၊ ခွင့်ပြုလုပ်ငန်း ၁၉ ခုမှာ စက်မှုကဏ္ဍလုပ်ငန်း ၁၂ခု၊ မွေးမြူရေးနှင့်ရေ လုပ်ငန်းတစ်ခု၊ အခြားဝန်ဆောင်မှုကဏ္ဍ လုပ်ငန်းသုံးခု၊ အိမ်ရာအဆောက်အအုံတည် ဆောက်မှုဖွံ့ဖြိုးမှုကဏ္ဍတစ်ခု၊လျှပ်စစ်ဓာတ်အား ကဏ္ဍလုပ်ငန်းတစ်ခုနှင့် ဟိုတယ်နှင့် ခရီးသွားကဏ္ဍလုပ်ငန်းတစ်ခုတို့ကို ခွင့်ပြုပေးခဲ့သည်။
အဆိုပါနိုင်ငံခြား ရင်းနှီးမြှုပ်နှံမှုလုပ်ငန်း ၁၉ ခုအနက် မြန်မာနိုင်ငံရင်းနှီးမြှုပ်နှံမှု ဥပဒေ (၂၀၁၆) အရ ခွင့်ပြုမိန့်ထုတ်ပေးခဲ့သည့် လုပ်ငန်းသုံးခုနှင့် အတည်ပြုမိန့်ထုတ်ပေးခဲ့သည့် လုပ်ငန်း ၁၆ ခုဖြစ်ကြောင်း မြန်မာ နိုင်ငံ ရင်းနှီးမြှုပ်နှံမှုကော်မရှင် သတင်းထုတ်ပြန်ချက်အရ သိရသည်။
မြန်မာနိုင်ငံ ရင်းနှီးမြှုပ်နှံမှုကော်မရှင်အနေဖြင့် ရင်းနှီးမြှုပ်နှံမှုလုပ်ငန်းများကို ခွင့်ပြုပေးရာတွင် လုပ်ငန်း၏ စီးပွားရေးတွက်ခြေကိုက်မှု၊ အလုပ်အကိုင်သစ်များ ဖန်တီးပေးနိုင်မှု၊ အမျိုးသားဝင်ငွေနှင့် အခွန်တိုးတက် ရရှိနိုင်မှု၊ ပြည်တွင်းပြည်ပဈေးကွက်အ ခြေအနေ၊ ပြည်တွင်းစားသုံးရန် လိုအပ်ချက်၊ နည်းပညာဆီလျော်မှု၊ တီထွင်ဆန်းသစ်မှု၊ နည်းပညာလွှဲပြောင်းရရှိမှု၊ ပတ်ဝန်းကျင် ထိခိုက်မှုနှင့် လူမှုရေး ထိခိုက်မှုထိန်းသိမ်းကာကွယ်ရေး ဆောင်ရွက်မှု အစီအမံများ၊ တာဝန်ယူမှုရှိသော ရင်းနှီးမြှုပ်နှံမှုဖြစ်ခြင်းနှင့် တည်ဆဲဥပဒေများကို လိုက်နာခြင်း စသည့်အချက်များကို အခြေခံ၍ စိစစ်ခြင်းဖြစ်ကြောင်း သိရသည်။