ဧရာဝတီတိုင်းဒေသကြီးအစိုးရအဖွဲ့ စိုက်ပျိုးရေး၊ မွေးမြူရေး၊ သယံဇာတနှင့် ပတ်ဝန်းကျင်ထိန်းသိမ်းရေးဝန်ကြီး ကျန်းမာရေးကြောင့် ရာထူးမှအနားယူခွင့်ပြုပါရန် နုတ်ထွက်စာတင်

ဧရာဝတီတိုင်းဒေသကြီးအစိုးရအဖွဲ့ စိုက်ပျိုးရေး၊ မွေးမြူရေး၊ သယံဇာတနှင့် ပတ်ဝန်းကျင်ထိန်းသိမ်းရေးဝန်ကြီး ကျန်းမာရေးကြောင့် ရာထူးမှအနားယူခွင့်ပြုပါရန် နုတ်ထွက်စာတင်
Published 3 January 2018

ဧရာဝတီတိုင်းဒေသကြီးအစိုးရအဖွဲ့ဝင် စိုက်ပျိုးရေး၊ မွေးမြူရေး၊ သယံဇာတနှင့် ပတ်ဝန်းကျင်ထိန်းသိမ်းရေးဝန်ကြီး ဦးဘဟိန်းက ဝန်ကြီးရာထူးမှ နုတ်ထွက်အနားယူခွင့်ပြုပါရန် တိုင်းဒေသကြီးဝန်ကြီးချုပ်နှင့် နိုင်ငံတော်သမ္မတထံသို့ ဇန်နဝါရီ ၂ ရက်က စာဖြင့်တင်ပြခဲ့ကြောင်း သတင်းရရှိသည်။

စိုက်ပျိုးရေးပညာရှင် ဝန်ကြီးဦးဘဟိန်းမှာ အသက်အရွယ်ကြီးမြင့်မှုနှင့် ကျန်းမာရေးအခြေအနေများကြောင့် အလုပ်တာဝန်များကို ကျေပွန်စွာမထမ်းဆောင်နိုင်မည်စိုးသဖြင့် နုတ်ထွက်ရခြင်းဖြစ်ကြောင်း၊ လက်ရှိတွင် ဝန်ကြီးရာထူးတာဝန်များကို ထမ်းဆောင်လျက်ရှိပြီး နုတ်ထွက်စာအား အတည်ပြုပြီးချိန်မှ အနားယူသွားမည်ဖြစ်ကြောင်း၊ ရာထူးမှ နုတ်ထွက်ရခြင်းမှာ မည်သည့်ဖိအားများကြောင့်မှမဟုတ်ကြောင်း ဝန်ကြီးက ပြောကြားသည်။

“ဟုတ်တယ်။ လျှောက်လွှာတောင်တင်လိုက်ပြီ။ ကျန်းမာရေးမကောင်းလို့ တစ်စုံတစ်ရာရဲ့ ဖိအားပေးမှုမရှိပါဘူး။ ဘာမှမရှိပါဘူး။ ပျော်ပျော်ကြီးလုပ်ပါတယ်။ ဒီနေ့ပဲတင်လိုက်တာပါ။ ဒါကတော့မပြောတတ်ဘူး။ ကျန်းမာရေးအခြေအနေပေါ့” ဟု ဝန်ကြီးဦးဘဟိန်းက ပြောကြားသည်။

ဝန်ကြီးဦးဘဟိန်းရာထူးမှ နုတ်ထွက်မည့်အကြောင်းကို ဧရာဝတီတိုင်းဒေသကြီးအစိုးရအဖွဲ့နှင့် တိုင်းဒေသကြီးလွှတ်တော် ကိုယ်စားလှယ်များမှ ကြိုတင်သိရှိခြင်းမရှိကြောင်း၊ ကျန်းမာရေးမှာလည်း အနားယူရန်လိုအပ်သည့် အခြေအနေသို့ ရောက်ရှိနေသူမဟုတ်ကြောင်း၊ စိုက်ပျိုးရေးပညာရှင်တစ်ဦးဖြစ်ပြီး ဧရာဝတီတိုင်းဒေသကြီးအတွင်း မကြာခဏဖြစ်ပွားလေ့ရှိသည့် စပါး၊ ငါးပြဿနာနှင့် အင်းပြဿနာများကို အောင်မြင်စွာ ကိုင်တွယ်ဖြေရှင်းနေသူဖြစ်သောကြောင့် တိုင်းဒေသကြီးအတွက် ဆုံးရှုံးနစ်နာမှုဖြစ်ကြောင်း သုံးသပ်ပြောကြားမှုများလည်း ရှိနေသည်။

စိုက်ပျိုးရေး၊ မွေးမြူရေး၊ သယံဇာတနှင့် ပတ်ဝန်းကျင်ထိန်းသိမ်းရေးဝန်ကြီး ဦးဘဟိန်းမှာ ၁၉၄၅ ခုနှစ် မတ် ၁၅ ရက်တွင် မွေးဖွားခဲ့ပြီး ကျောင်းကုန်းမြို့နယ်တွင် နေထိုင်သူဖြစ်ကာ M.Sc (Ag. Extension Education) The Ohio State University, Columbus, USA၊ B.Ag (General Agriculture) Institute of Agriculture, Mandalay၊ Matriculation, Monywa District, Sagaing Division ဘွဲ့များရရှိခဲ့ပြီး စိုက်ပျိုးရေးနှင့်ပက်သက်သည့် စာအုပ်စာတမ်းများစွာကို ပြုစုခဲ့သူဖြစ်သည်။ ၂၀၁၅ ရွေးကောက်ပွဲတွင် ကျောင်းကုန်းမြို့နယ် ပြည်သူ့လွှတ်တော်ကိုယ်စားလှယ်အဖြစ် ဝင်ရောက်ယှဉ်ပြိုင်ခဲ့သော်လည်း ရှုံးနိမ့်ခဲ့ပြီးနောက် နိုင်ငံတော်သမ္မတ ဦးထင်ကျော်က တိုင်းဒေသကြီးဝန်ကြီးအဖြစ် တင်မြှောက်ခဲ့သူဖြစ်သည်။

ဧရာဝတီတိုင်းဒေသကြီးအတွင်း အငြင်းပွားမှုများဖြစ်နေသည့် ရေချိုငါးဖမ်းဥပဒေအား ပြင်ဆင်ရေးဆွဲနိုင်ရန် ညှိနှိုင်းနေဆဲကာလမှာပင် ဝန်ကြီးမှ နုတ်ထွက်ခဲ့ခြင်းဖြစ်ပြီး အစုအဖွဲ့ ရေလုပ်သားငယ်များအား အင်းလေလံများချထားပေးရေးအတွက် ဆောင်ရွက်ခဲ့မှုကြောင့် ပုသိမ်မြို့တွင် အင်းလုပ်သားကြီးများက ဝန်ကြီးအား ရာထူးမှနုတ်ထွက်ပေးရေး ဆန္ဒထုတ်ဖော်မှုများ ပြုလုပ်ခဲ့ကြောင်း၊ တိုင်းဒေသကြီးအတွင်းရှိ မြို့နယ်အသီးသီးမှ ရေလုပ်သားငယ်များကလည်း ဝန်ကြီးအား ထောက်ခံကြောင်း ဆန္ဒထုတ်ဖော်ပွဲများ တန်ပြန်ပြုလုပ်ခြင်းကို ကြုံတွေ့ခဲ့ရသူတစ်ဦးဖြစ်ကြောင်း သိရသည်။

Most Read

Most Recent