စစ်ကိုင်းမြို့ သာစည်ရပ်ကွက်ရှိ ကနောင်မင်းသားကြီး၏ သံချပ်ဖိုအား တွေ့ရစဉ်
စစ်ကိုင်းမြို့သာစည်ရပ်ကွက်ရှိ ကနောင်မင်းသားကြီး၏ သံချပ်ဖိုအား ကျပ်သိန်း ၆၀၀ ကျော် အကုန်ခံ၍ ပြန်လည်ပြုပြင်သွားရန် တိုင်းဒေသကြီး အစိုးရထံသို့ တင်ပြထားကြောင်း စစ်ကိုင်းမြို့နယ် စည်ပင်သာယာရေးကော်မတီမှ သိရသည်။
“တိုင်းဒေသကြီးအစိုးရ ထောက်ပံ့ငွေနဲ့ လုပ်သွားမှာပါ။ သံချပ်ဖိုပတ်လည် အုတ်တံတိုင်းခတ်ခြင်း၊ ရေလိုင်းမီးလိုင်းတပ်ဆင်ခြင်းတွေအတွက် ကျပ်သိန်း ၆၀၀ ကျော် အသုံးပြုသွားဖို့ ကျွန်တော်တို့ စည်ပင်သာယာရေးကော်မတီက တွက်ချက်ပြီး တိုင်းဒေသကြီး အစိုးရဆီကိုတင်ပြပြီးပါပြီ။ စစ်ကိုင်းမြို့ကိုလာတဲ့ ပြည်တွင်းပြည်ပခရီးသွားတွေ အလွယ်တကူ ဝင်ရောက်လေ့လာနိုင်ဖို့ ရှေးဟောင်းပုံစံအတိုင်း ပြန်လည်ပြုပြင်သွားမှာပါ။ တိုင်းဒေသကြီး အစိုးရဆီက ခွင့်ပြုတာနဲ့လုပ် ဆောင်သွားမှာပါ” ဟု စစ်ကိုင်းမြို့နယ် စည်ပင်သာယာရေးကော်မတီဥက္ကဋ္ဌ ဦးဝင်းနိုင်က ပြောကြားသည်။
စစ်ကိုင်းမြို့သို့ လာရောက်လည်ပတ်သော ပြည်တွင်း ပြည်ပခရီးသွားများသည် စစ်ကိုင်းတောင်ရိုး၊ မင်းကွန်းယဉ်ကျေးမှုဒေသ၊ ကောင်းမှုတော်စေတီနေရာများသို့ အများအပြားလာရောက်လေ့ရှိပြီး ကုန်းဘောင်ခေတ်လက်ရာ အစေခံခံတပ်နှင့် ကနောင်မင်းသားကြီး သံချပ်ဖိုနေရာများသို့ လာရောက်လေ့လာမှု နည်းပါးသောကြောင့် လမ်းညွှန်ဆိုင်းဘုတ်များ တပ်ဆင်သွားမည် ဖြစ်ကြောင်း သိရသည်။
စစ်ကိုင်းတိုင်းဒေသကြီးအတွင်း ခရီးသွားကဏ္ဍ ဖွံ့ဖြိုးတိုးတက်ရေးအတွက် တိုင်းဒေသကြီး အစိုးရဘတ်ဂျက်ဖြင့် မင်းကွန်း ကြက်ထောင့်ကန်၊ စစ်ကိုင်းမြို့ ဧမြဝတီရပ်ကွက်ရှိ အစေခံခံတပ်၊ သာစည်ရပ်ကွက်ရှိ ကနောင်မင်းသားကြီး၏ သံချပ်ဖိုတို့အား ပြန်လည်ပြုပြင်ခြင်း လုပ်ငန်းများလုပ်ဆောင်သွားမည်ဖြစ်ကြောင်း သိရသည်။
စစ်ကိုင်းမြို့ သာစည်ရပ်ကွက် ရွှေတောင်ဦးမော်ဘုရားအနီးရှိ ကနောင်မင်းသားကြီး သံချပ်ဖိုအား ၁၈၅၈ ခုနှစ်က အုတ်မြစ်ချ တည်ဆောက်ခဲ့ကြောင်း၊ အင်္ဂလန်နိုင်ငံမှ စက်ပစ္စည်းများမှာယူခဲ့ပြီး တည်ဆောက်နေစဉ် ၁၈၆၆ ခုနှစ် မြင်ကွန်း-မြင်းခုန်တိုင် အရေးအခင်းတွင် ကနောင်မင်းသားကြီး လုပ်ကြံခံလိုက်ရသည့် နောက်ပိုင်း ဆက်လက်မတည်ဆောက်နိုင်ခဲ့ကြောင်း သမိုင်းမှတ်တမ်းအရ သိရသည်။
