ရှမ်းလူမျိုးအလိုက် အမျိုးသားအဆင့်နိုင်ငံရေးဆွေးနွေးပွဲကို လင်းခေးမြို့၌ ဇန်နဝါရီ ၁၂ ရက်တွင် စတင်ကျင်းပရန်လျာထား

ရှမ်းလူမျိုးအလိုက် အမျိုးသားအဆင့်နိုင်ငံရေးဆွေးနွေးပွဲကို လင်းခေးမြို့၌ ဇန်နဝါရီ ၁၂ ရက်တွင် စတင်ကျင်းပရန်လျာထား
Published 23 December 2017

တာချီလိတ်မြို့တွင်ပြုလုပ်သော လူထုတွေ့ဆုံပွဲကို တွေ့ရစဉ် (Photo: Sai Laeng Facebook)

ရှမ်းပြည်နယ် လင်းခေးမြို့၌ ရှမ်းလူမျိုးအလိုက် အမျိုးသားအဆင့် နိုင်ငံရေးဆွေးနွေးပွဲကို ၂၀၁၈ ခုနှစ် ဇန်နဝါရီ ၁၂ ရက်တွင် စတင်ကျင်းပရန် သတ်မှတ်လျာထားကြောင်း ရှမ်းပြည်ပြန်လည်ထူထောင်ရေးကောင်စီ (RCSS/SSA) ၏ တောင်ကြီးဆက်ဆံရေးရုံးတာဝန်ခံ ဒုတိယဗိုလ်မှူးကြီးစိုင်းဦးက ပြောကြားသည်။

အဆိုပါဆွေးနွေးပွဲကို ဇန်နဝါရီ ၁၂ ရက်မှ ၁၄ ရက်ထိ သုံးရက်ကြာပြုလုပ်ရန် စီစဉ်ထားကြောင်း သိရသည်။

NCA ရေးထိုးထားသည့် ရှမ်းပြည်ပြန်လည်ထူထောင်ရေးကောင်စီ (RCSS/SSA)၊ ရှမ်းနိုင်ငံရေးပါတီများနှင့် ရှမ်းအရပ်ဘက်အဖွဲ့အစည်းများမှ ကိုယ်စားလှယ်များပါဝင်သည့် အဖွဲ့ငါးဖွဲ့သည် ရှမ်းပြည်နယ်နှင့် ရှမ်းပြည်နယ်ပြင်ပရှိ ရှမ်းတိုင်းရင်းသားများ နေထိုင်ရာဒေသများတွင် ရှမ်းလူမျိုးအလိုက် အမျိုးသားအဆင့်နိုင်ငံရေးဆွေးနွေးပွဲအတွက် ပြည်သူလူထု၏ သဘောထားများရယူသော လူထုတွေ့ဆုံပွဲများအား လိုက်လံပြုလုပ်လျက်ရှိပြီး အချို့ဒေသများတွင် တပ်မတော်က လူထုတွေ့ဆုံပွဲများမပြုလုပ်ရန် တားဆီးခဲ့မှုများလည်းရှိသည်။

ထိုသို့ လူထုတွေ့ဆုံပွဲပြုလုပ်ပြီးနောက် ပြည်သူလူထုထံမှရရှိလာမည့် သဘောထားများကို ပြန်လည်စုစည်းကာ ရှမ်းလူမျိုးအလိုက် အမျိုးသားအဆင့် နိုင်ငံရေးဆွေးနွေးပွဲသို့ တင်သွင်းဆွေးနွေးနိုင်ရန် အကြိုဆွေးနွေးပွဲကို ရှမ်းပြည်နယ်၊ တောင်ကြီးမြို့တွင်ကျင်းပရန် စီစဉ်ထားသော်လည်း တောင်ကြီးမြို့တွင် အဆိုပါအကြိုဆွေးနွေးပွဲကို ကျင်းပခွင့်မရကြောင်း သိရသည်။

“အမှန် အကြိုက တောင်ကြီးမှာ ကျွန်တော်တို့စီစဉ်ထားတာ။ အဲဒါကျွန်တော်တို့ သေချာထပ်ညှိဖို့လိုတယ်ပေါ့နော်” ဟု ဒုတိယဗိုလ်မှူးကြီး စိုင်းဦးက ပြောကြားသည်။

ရှမ်းလူမျိုးအလိုက် အမျိုးသားအဆင့် နိုင်ငံရေးဆွေးနွေးပွဲအား ခွင့်ပြုထားသည့် သတ်မှတ်နေရာတွင်သာပြုလုပ်ရန် ဒုတိယဗိုလ်မှူးကြီး စိုင်းဦးထံ အရှေ့ပိုင်းတိုင်းစစ်ဌာနချုပ်က ဒီဇင်ဘာ ၁၉ ရက်တွင် အကြောင်းကြားစာပေးပို့ထားသည်။

လက်ရှိတွင် အဖွဲ့ငါးဖွဲ့ခွဲ၍ ရှမ်းပြည်နယ်အတွင်း လိုက်လံပြုလုပ်လျက်ရှိသည့် လူထုတွေ့ဆုံပွဲများကို တပ်မတော်ဘက်က ဟန့်တားမှုများရှိခဲ့သော်လည်း တွေ့ဆုံပွဲများအား ပြီးမြောက်အောင်ကျင်းပလျက်ရှိသည်။

သို့ရာတွင် ပင်လုံမြို့၌ကျင်းပသည့် လူထုတွေ့ဆုံပွဲမှာမူ နှစ်ကြိမ်တိုင်တိုင် တားမြစ်ခံရသဖြင့် ကျင်းပနိုင်ခဲ့ခြင်းမရှိပေ။

ရှမ်းပြည်နယ်အစိုးရက ပြည်နယ်အထွေထွေအုပ်ချုပ်ရေးဦးစီးဌာနမှတစ်ဆင့် လူထုတွေ့ဆုံပွဲပြုလုပ်မည့် သက်ဆိုင်ရာမြို့အမည်များရေးသားကာ သက်ဆိုင်ရာ အထွေထွေအုပ်ချုပ်ရေးဦးစီးဌာနများသို့ လူထုတွေ့ဆုံပွဲများပြုလုပ်ခြင်းအား ကူညီဆောင်ရွက်ပေးရန် စာဖြင့်ညွှန်ကြားထားသော်လည်း တပ်မတော်ဘက်မှ ဟန့်တားမှုများရှိနေခြင်းဖြစ်သည်။

ယင်းလူထုတွေ့ဆုံပွဲများကို ဒီဇင်ဘာ ၂၅ ရက်တွင် နောက်ဆုံးအပြီးသတ်ကျင်းပမည်ဖြစ်ကြောင်း ဒုတိယဗိုလ်မှူးကြီးစိုင်းဦးက ပြောကြားသည်။

ရှမ်းပြည်နယ်တွင် NCA လက်မှတ်ရေးထိုးထားခြင်းမရှိသော ရှမ်းတိုင်းရင်းသားလက်နက်ကိုင်အဖွဲ့ဖြစ်သည့် ရှမ်းပြည်တိုးတက်ရေးပါတီ (RCSS/SSA) အဖွဲ့လည်းရှိနေသေးသောကြောင့် နိုင်ငံရေးဆွေးနွေးပွဲများအား ကန့်သတ်နေသည့်သဘောရှိကြောင်း တိုင်းရင်းသားအရေးလေ့လာသူအချို့က သုံးသပ်ကြသည်။

တပ်မတော်နှင့် NCA ရေးထိုးထားသည့် ရှမ်းပြည်ပြန်လည်ထူထောင်ရေးကောင်စီ (RCSS/SSA) အကြား လူမျိုးအလိုက် အမျိုးသားအဆင့်နိုင်ငံရေးဆွေးနွေးပွဲ (ရှမ်း) ကျင်းပမည့်နေရာ အငြင်းပွားနေမှုအပေါ် နိုဝင်ဘာ ၂၇ ရက်ကပြုလုပ်သည့် တစ်နိုင်ငံလုံး ပစ်ခတ်မှုရပ်စဲရေးသဘောတူစာချုပ် အကောင်အထည်ဖော်မှုဆိုင်ရာ ညှိနှိုင်းအစည်းအဝေး (JICM) တွင် နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က ကြားဝင်စေ့စပ်ညှိနှိုင်းပေးမှုအရ ရှမ်းပြည်နယ် လင်းခေးမြို့၌ပြုလုပ်ရန် သဘောတူဆုံးဖြတ်ထားခြင်းဖြစ်သည်။

လူမျိုးအလိုက် အမျိုးသားအဆင့်နိုင်ငံရေးဆွေးနွေးပွဲ (ရှမ်း) ကျင်းပခွင့်အား ပြည်ထောင်စုငြိမ်းချမ်းရေးညီလာခံ-၂၁ ရာစုပင်လုံ ဒုတိယအစည်းအဝေးမတိုင်မီကပင် ခွင့်ပြုထားသော်လည်း ဆွေးနွေးပွဲကျင်းပမည့်နေရာအား တပ်မတော်ဘက်မှ မိုင်းပန်မြို့၊ မုံးထော်၊ မုံးထမြို့၊ နမ့်ပန်ခွန်မြို့တို့တွင်သာကျင်းပရန် ထောက်ခံခဲ့ပြီး RCSS/SSA က တောင်ကြီးမြို့ (သို့မဟုတ်) ပင်လုံမြို့တွင် ကျင်းပခွင့်ပေးရန် တောင်းဆိုခဲ့သဖြင့် အငြင်းပွားခဲ့သည်။

လူမျိုးအလိုက် အမျိုးသားအဆင့်နိုင်ငံရေးဆွေးနွေးပွဲအား NCA ရေးထိုးထားသည့် တိုင်းရင်းသားလက်နက်ကိုင်အဖွဲ့ဦးဆောင်၍ တရားဝင်နိုင်ငံရေးပါတီပူးပေါင်းကာ ကျင်းပခွင့်ရှိပြီး လူမျိုးအလိုက်အမျိုးသားအဆင့် နိုင်ငံရေးဆွေးနွေးပွဲ (ရှမ်း) ကျင်းပရန် RCSS/SSA၊ ရှမ်းနိုင်ငံရေးပါတီများ၊ အရပ်ဘက်အဖွဲ့အစည်းများက အကြိုဆွေးနွေးပွဲကျင်းပပြီး မူဝါဒမူကြမ်းများရရှိထားကာ နိုင်ငံရေးသိက္ခာအရ တောင်ကြီး (သို့မဟုတ်) ပင်လုံတွင်သာကျင်းပခွင့်ပေးရန် RCSS/SSA က အစဉ်တစိုက်တောင်းဆိုသော်လည်း နောက်ဆုံးတွင် လင်းခေးမြို့တွင်ကျင်းပရန်သာ RCSS/SSA ဘက်က သဘောတူခဲ့ရသည်။

ပြည်ထောင်စုငြိမ်းချမ်းရေးညီလာခံ -၂၁ ရာစုပင်လုံ ဒုတိယအစည်းအဝေးမတိုင်မီက အမျိုးသားအဆင့်နိုင်ငံရေးဆွေးနွေးပွဲများ ကျင်းပရာတွင် လူမျိုးအလိုက် အမျိုးသားအဆင့်နိုင်ငံရေးဆွေးနွေးပွဲအား (ချင်း)၊ (ပအိုဝ်း)၊ (ကရင်) သုံးပွဲ၊ ဒေသအလိုက် အမျိုးသားအဆင့်နိုင်ငံရေးဆွေးနွေးပွဲအား (ပဲခူး)၊ (တနင်္သာရီ)၊ (ရှမ်း)သုံးပွဲကျင်းပခဲ့ပြီး အဆိုပါခြောက်ပွဲမှရရှိထားသည့် သဘောထားစာတမ်းများကိုစုစည်းကာ ပြည်ထောင်စုငြိမ်းချမ်းရေးညီလာခံ-၂၁ ရာစုပင်လုံ ဒုတိယအစည်းအဝေးတွင် တင်သွင်းဆုံးဖြတ်မှုများ ပြုလုပ်ခဲ့သည်။

Most Read

Most Recent