အောက်တိုဘာ ၂၄ ရက်က ဘင်္ဂလားဒေ့ရှ်ရှိ ကူတူပါလောင် ဒုက္ခသည်စခန်း၌ တွေ့ရသော ဘင်္ဂါလီ မွတ်စလင်များ (Photo : AFP)
ကုလသမဂ္ဂလုံခြုံရေးကောင်စီ အနေဖြင့် မြန်မာနိုင်ငံ၏ ဘင်္ဂါလီမွတ်စလင်အရေးကို တုံ့ပြန်ရန် နှောင့်နှေးမှု မရှိသော၊ ပူးပေါင်းဆောင်ရွက်မှုရှိသော၊ ထိရောက်သော နိုင်ငံတကာ ဆောင်ရွက်မှု ပြုလုပ်သင့်ကြောင်း လူ့အခွင့်အရေးဆိုင်ရာ စောင့်ကြည့်ရေးအဖွဲ့ (HRW) နှင့် အခြားအစိုးရ မဟုတ်သော အဖွဲ့အစည်းပေါင်း ၈၀ တို့က ဒီဇင်ဘာ ၁၂ ရက်တွင် ပူးတွဲမေတ္တာရပ်ခံချက်တစ်ရပ် ထုတ်ပြန်ကာ လုံခြုံရေးကောင်စီသို့ ပေးပို့ခဲ့သည်။
ကုလသမဂ္ဂ အတွင်းရေးမှူးချုပ်၏ နိုင်ငံရေးဆိုင်ရာ လက်ထောက်ဂျက်ဖရီဖယ်တမန်နှင့် အတွင်းရေးမှူးချုပ်၏ ပဋိပက္ခအတွင်း လိင်အကြမ်းဖက်မှုဆိုင်ရာ အထူးကိုယ်စားလှယ် ပရာမီလာပက်တင်တို့က ဒီဇင်ဘာ ၁၂ ရက်၌ ၁၅ နိုင်ငံပါဝင်သော လုံခြုံရေးကောင်စီ အစည်းအဝေးတွင် စကားပြောကြားရန် စီစဉ်ထားသည်။ သို့သော် လုံခြုံရေးကောင်စီ၌ ဆွေးနွေးမှုမှနေ၍ ရလဒ်ထွက်ပေါ်လိမ့်မည်ဟု မျှော်လင့်မထားပေ။
လူသားချင်း စာနာထောက်ထားမှုဆိုင်ရာ၊ ယုံကြည်ချက်အခြေပြုနှင့် လူ့အခွင့်အရေးဆိုင်ရာ အဖွဲ့အစည်းပေါင်း ၈၁ ခုက “ပြစ်တင်ရှုတ်ချခြင်းတွေက မြန်မာအစိုးရအနေနဲ့ ဒီမတရားမှုတွေကို အဆုံးသတ်ဖို့ ဒါမှမဟုတ် ဒီတာဝန်ယူရမယ့် ဟာတွေကို တာဝန်ခံဖို့ဆိုတဲ့ ရလဒ်ကို ထွက်ပေါ်စေမှာ မဟုတ်ပါဘူး” ၎င်းတို့၏ ပူးတွဲမေတ္တာရပ်ခံချက် တစ်စောင်၌ ဖော်ပြထားသည်။
မြန်မာလုံခြုံရေးတပ်များ၏ ဘင်္ဂါလီမွတ်စလင်များ (မူရင်းတွင် တိုင်းရင်းသား ရိုဟင်ဂျာလူအုပ်စုဟုဖော်ပြ) အပေါ် ရက်စက်ကြမ်းကြုတ်မှုများကို ဖော်ပြရန် လူသားဆန်မှုအပေါ် ချိုးဖောက်သော ရာဇဝတ်မှုများအဖြစ် သတ်မှတ်လျက် ညွန့်ပေါင်းအုပ်စုက လုံခြုံရေးကောင်စီအား အပြည်ပြည်ဆိုင်ရာ တရားရုံးများမှတစ်ဆင့် အပါအဝင် တရားမျှတမှုနှင့် တာဝန်ခံမှုအတွက် နေရာအားလုံး၌ စုံစမ်းစစ်ဆေး လုပ်ဆောင်သင့်ကြောင်း လုံခြုံရေးကောင်စီကို တောင်းဆိုခဲ့သည်။
ယင်းညွန့်ပေါင်းအုပ်စုသည် မြန်မာတပ်မတော်ကို လက်နက်တင်သွင်းခြင်း ပိတ်ပင်ရန်နှင့် လူသားဆန်မှုကို ချိုးဖောက်သော ရာဇဝတ်မှုများနှင့် အခြားပြင်းထန်သည့် လူ့အခွင့်အရေး ချိုးဖောက်မှုများအတွက် တာဝန်ရှိသော မြန်မာစစ်ဘက်အရာရှိများကို ပစ်မှတ်ထားပိတ်ဆို့မှုများ ပြုလုပ်ရန်လည်း လုံခြုံရေးကောင်စီအား တောင်းဆိုခဲ့သည်။
“နောက်မဖြစ်စေရပါဘူးဆိုတဲ့ ကတိက ရက်စက်ကြမ်းကြုတ်မှုတွေကို ခွင့်ပြုတာမျိုးက ဘာမှအဓိပ္ပာယ် မရှိဘူးဆိုရင် လုံခြုံရေးကောင်စီအနေနဲ့ အရေးတယူ ဆောင်ရွက်ဖို့ကို နောက်ထပ်ကြန့်ကြာနိုင်တော့မှာ မဟုတ်ပါဘူး” ဟုလည်း ညွန့်ပေါင်းအုပ်စုက ပြောကြားခဲ့သည်။
Ref : AFP
