မဒေးကျွန်းရှိ ဆီသိုလှောင်ကန်များကို တွေ့ရစဉ်

ကျောက်ဖြူ-ကူမင်း ရေနံပိုက်လိုင်း ဖြတ်သန်းခအဖြစ် ရေနံစိမ်း တစ်မက်ထရစ်တန်လျှင် အမေရိကန်ဒေါ်လာ တစ်ဒေါ်လာနှုန်းဖြင့် စာချုပ်ချုပ်ဆိုထားကြောင်း ဒုတိယဝန်ကြီး ဦးအောင်ထူးက ပြောကြားသည်။

နိုဝင်ဘာ ၉ ရက်က ပြုလုပ်သည့် ပြည်ထောင်စုလွှတ်တော် အစည်းအဝေးတွင် စီးပွားရေးနှင့် ကူးသန်းရောင်းဝယ်ရေးဝန်ကြီးဌာန ဒုတိယဝန်ကြီး ဦးအောင်ထူးက ၂၀၁၇-၂၀၁၈ ပြည်ထောင်စု၏ နောက်ထပ်ဘဏ္ဍာငွေ ခွဲဝေသုံးစွဲရေး ဥပဒေကြမ်းနှင့် စပ်လျဉ်းပြီး ပူးပေါင်းကော်မတီများ၏ သုံးသပ်ချက် အစီရင်ခံစာပါမူနှင့် အခြေခံသဘော အကြောင်းအရာများ၊ လွှတ်တော်ကိုယ်စားလှယ်များ၏ ဆွေးနွေးချက်များအပေါ် ရှင်းလင်းစဉ် ပြောကြားခဲ့ခြင်းဖြစ်သည်။

ဒုတိယဝန်ကြီး ဦးအောင်ထူးက လွှတ်တော်ကိုယ်စားလှယ် ဒေါ်ဝင့်ဝါထွန်း ဆွေးနွေးခဲ့သည့် ကျောက်ဖြူ-ကူမင်း ရေနံပိုက်လိုင်း ဖြတ်သန်းခကောက်ခံရာတွင် ဆက်စပ်သည့် ဝန်ကြီးဌာနများ ပိုမိုပူးပေါင်းဆောင်ရွက်ရန် ကိစ္စနှင့် စပ်လျဉ်းပြီး ပြန်လည်ရှင်းလင်းရာ၌ မြန်မာ့ရေနံနှင့် သဘာဝဓာတ်ငွေ့လုပ်ငန်းနှင့် အကျိုးတူပူးပေါင်းစနစ်ဖြင့် ဖွဲ့စည်းထားသော SEAOP ကုမ္ပဏီမှ ပိုက်လိုင်းဖြင့် ရေနံစိမ်းသယ်ပို့ရန် ဖြတ်သန်းကုန်သွယ်ခြင်း Transit Trade ဆောင်ရွက်ရာတွင် Pipeline Right Agreement စာချုပ်တွင် သဘောတူထားသော ရေနံစိမ်း တစ်မက်ထရစ်တန်လျှင် အမေရိကန် တစ်ဒေါ်လာနှုန်းဖြင့် ပေးချေဆောင်ရွက် ခွင့်ပြုထားကြောင်း ပြည်ထောင်စုလွှတ်တော်တွင် ပြောကြားသည်။

SEAOP ကုမ္ပဏီမှ ပိုက်လိုင်းဖြင့် ရေနံစိမ်း သယ်ပို့ခြင်းကို ၂၀၁၇ ခုနှစ် ဧပြီ ၁၀ ရက်မှစပြီး ပို့လွှတ်ခဲ့ကြောင်း၊ Pipeline Right Agreement စာချုပ်တွင် Transit Free တစ်တန်လျှင် တစ်ဒေါ်လာနှုန်းဖြင့် နမ့်ခမ်းကို ဖြတ်ကျော်သည့်အချိန်တွင် ပေးဆောင်ရမည်ဟု ချုပ်ဆိုခဲ့သော်လည်း အကောက်ခွန်နှင့် MOGE တို့ ညှိနှိုင်းချက်အရ နမ့်ခမ်း Metering Station တွင် မီတာများ ပြီးစီးအောင် တပ်ဆင်ထားခြင်း မရှိသေးသည့်အတွက် စတင်ပို့လွှတ်သည့် အချိန်မှစကာ Transit Quantity ကို မဒေးကျွန်းတွင် တိုင်းတာချက်အရသာ ပေးချေရန် သဘောတူခဲ့ကြောင်း၊ SEAOP မှ ၁၄ ကြိမ် ပို့လွှတ်ခဲ့ပြီး မက်ထရစ် တန် ၂၃၇၀၅၁၉ ဒသမ ၁၈၉ တန်ရှိကြောင်း ဒုတိယဝန်ကြီးက ပြောကြားသည်။

လက်ရှိ၌ နမ့်ခမ်းတွင် မီတာများ တပ်ဆင်ပြီးဖြစ်သည့်အတွက် Metering Station တိုင်းတာချက်မှာ ၁၄ ကြိမ်မြောက်အထိ မက်ထရစ်တန် ၂၉၁၃၈၂၆ ဒသမ ၅၆၁တန်ရှိပြီး SEAOP နှင့် ကွာခြားချက်မှာ မက်ထရစ်တန် ၅၄၃၃၀၇ ဒသမ ၃၇၂ ဖြစ်သည့်အတွက် ယင်းကွာခြားမှုအတွက် လိုအပ်သည့် အမေရိကန်ဒေါ်လာ ၅၄၃၃၀၇ ဒသမ ၃၇၂ အား ပေးချေရန် MOGE က SEAOP သို့ အကြောင်းကြားထားပြီးဖြစ်ကြောင်း ၎င်းက ဆက်လက်ပြောကြားသည်။

မြန်မာ့ရေနံနှင့် သဘာဝဓာတ်ငွေ့လုပ်ငန်းနှင့် အကျိုးတူ ပူးပေါင်းစနစ်ဖြင့် ဖွဲ့စည်းထားသည့် SEAOP ကုမ္ပဏီမှ ပိုက်လိုင်းဖြင့် ရေနံစိမ်းသယ်ပို့ရန် ဖြတ်သန်းကုန်သွယ်ခြင်း ဆောင်ရွက်ရာတွင် မီတာများတပ်ဆင်ထားပြီးဖြစ်သည့်အတွက် မဒေးကျွန်းနှင့် နမ့်ခမ်း Station များအကြား ပို့လွှတ်သည့် ပမာဏ ကွာခြားမှုလျော့နည်းသွားပြီး ကွာခြားမှုကိုလည်း သက်ဆိုင်ရာဌာနများ ညှိနှိုင်းလျက်ရှိကြောင်း၊ စတင်ပို့လွှတ်ပြီး ကိုးလအကြာတွင် Contractual Transportation Date ကို စတင်မည် ဖြစ်သည့်အတွက် ယင်းကာလနောက်ပိုင်းတွင် Transportation Plan အတိုင်း ပေးပို့နိုင်မည်ဖြစ်သည့်အတွက် စာရင်းကွာဟမှုများကို လျှော့ချနိုင်မည်ဖြစ်ကြောင်း ဒုတိယဝန်ကြီး ဦးအောင်ထူးက ပြောကြားသည်။