ကချင်ပြည်နယ်တွင် ယခင်နှစ်ထက် ဘိန်းစိုက်ခင်းဧရိယာ တိုးလာ

ကချင်ပြည်နယ်တွင် ယခင်နှစ်ထက် ဘိန်းစိုက်ခင်းဧရိယာ တိုးလာ
Published 18 October 2017

ကချင်ပြည်နယ်ရှိ ဘိန်းစိုက်ခင်း အချို့ကို တွေ့ရစဉ်

ကချင်ပြည်နယ်တွင်  တရုတ်နယ်စပ်ဒေသများ၊ တနိုင်းဒေသများတွင် ယခင်နှစ်ထက် ဘိန်းစိုက်ခင်းဧရိယာ တိုးလာကြောင်း ဒေသခံများ၊ ဘိန်းတိုက်ဖျက်ရေး လုပ်ငန်းများ လုပ်ကိုင်နေသည့် ဓမ္မဆရာများနှင့် ပြည်နယ်ရဲတပ်ဖွဲ့ဝင်များက ပြောကြားသည်။

ကချင်ပြည်နယ် ရဲတပ်ဖွဲ့ ရဲမှူးကြီးထွန်းဦးက “မနှစ်ကတော့ ကချင်ပြည်နယ် တစ်ခုလုံးမှာ လုံခြုံရေး အခြေအနေကြောင့် ဆဒုံး၊ ကန် ပိုင်တည်ဒေသဝန်းကျင်မှာ ဘိန်းခင်းဖျက်ဆီး တာ ၆၉ ဧကပဲရှိပါတယ်။ စိုက်တာအနည်းဆုံး နှစ်ပေါ့။ တခြားဒေသမှာလည်း စိုက်တာတွေ ရှိတယ်။ UNODC ကုလမူးယစ်တိုက်ဖျက်ရေး အဖွဲ့ကလည်း နှစ်တိုင်း မြေပုံကြမ်းတွေ ခန့်မှန်းဧရိယာတွေပို့တယ်။ အခုမပို့တာ မနှစ်ကရယ် ဒီနှစ်ရယ် နှစ်နှစ်ရှိပြီ။ အခုမြေပြင်ကပို့တဲ့ သတင်းတွေအရတော့ တရုတ်နယ်စပ်မှာ စိုက်ဧရိယာ မနှစ်ကထက် တိုးလာတာ သေချာတယ်။ ဘိန်းခင်းနဲ့ တခြားစိုက်ခင်းကတော့ မကွဲသေးဘူး” ဟု ပြောကြားသည်။

မြန်မာ-တရုတ် နယ်စပ်အနီးရှိ ဘိန်းခင်းများမှာ တရုတ်နိုင်ငံဘက်မှ အရင်းအနှီးဖြင့် မြန်မာနိုင်ငံအတွင်းရှိ ဒေသခံများကို တစ်ဆင့်ခံ ဘိန်းစိုက်ခိုင်းမှုများ ရှိနေပြီး ဘိန်းခင်းများ အကြောင်းအမျိုးမျိုးကြောင့် မအောင်မြင်သည့် ကာလများတွင် တရုတ်နိုင်ငံရှိ ငွေရှင်ထံ လုပ်အားအကြွေး ဆပ်ရမှုများ ရှိနေသည်က ိုသတင်းစကားများ ကြားနေရကြောင်း ပြည်နယ်ရဲမှူးကြီးက ဆက်လက်ပြောကြားသည်။

ဘိန်းစိုက်သူများ၏ ပြောပြချက်အရ ဘိန်းခင်းစိုက် ကုန်ကျစရိတ်မှာ တစ်နှစ်ထက် တစ်နှစ် ပိုများလာပြီး ဘိန်းခင်းတစ်ဧကလျှင် ကျပ် ၂၅ သိန်းအထက် ကုန်ကျမည်ဖြစ်ကြောင်း၊ လက်ရှိတွင် ဘိန်းတစ်ဟောင် (နှစ်ကျပ်ခွဲသား) တရုတ်ယွမ်ငွေ ၂၅၀ ဝန်းကျင် ဈေးပေါက်နေကြောင်း၊ ဘိန်းခင်းအလုပ်သမား ရှားပါးကာ အလုပ်သမားခအဖြစ် တစ်ရက်လျှင် ယွမ်ငွေ ၅၀ (မြန်မာငွေကျပ် ၁၀၀၀) အထိ မြင့်မားနေကြောင်း ၂၀၁၇ ခုနှစ် စက်တင်ဘာလ အတွင်းက သတင်းအချက်အလက်များအရ သိရသည်။

မူးယစ်ဆေးဝါး တိုက်ဖျက်ရာတွင် ပါဝင်နေသည့် ဘာသာရေး ဓမ္မဆရာတစ်ဦးက “ဆဒုံး အထက်ပေါ့ တိုးလာတာက။ မနှစ်ကထက် အများကြီးများတယ်။ ဧရိယာတော့ မခန့်မှန်း တတ်ဘူး။ နောက်တစ်ခုက တနိုင်းဘက်ရယ်။နာဂနဲ့စပ်တဲ့ဧရိယာရယ် ဒီနှစ်က ပိုများမှာသေချာတယ်။ ကျွန်တော်တို့အဖွဲ့တွေလည်း ကွင်းမဆင်းနိုင်သေးဘူး။ အစိုးရပြောင်းလဲနေတဲ့ အချိန်မှာ ဘိန်းခင်းစိုက်ဧက တိုးတာက လုံး၀ မဖြစ်သင့်တော့ဘူးလေ။ ပြည်သူတွေ၊ အဖွဲ့အစည်းတွေ၊ အစိုးရတွေက ဝိုင်းပြီးဖြေရှင်းကြရမှာပေါ့။ ဆဒုံးဒေသဆိုတာက ပြည်သူ့စစ်၊ နယ်ခြားစောင့်ပဲရှိတယ်။ ဒါတောင် အစိုးရက ထပ်မတိုးအောင် မကိုင်တွယ်နိုင်ဘူးဆိုတော့ မစဉ်းစားတတ်တော့ဘူး” ဟု ပြောကြားသည်။

တရုတ်နိုင်ငံနယ်စပ်မှ ဘိန်းခင်းကိစ္စများအား ကချင်ပြည်နယ် လွတ်တော်တွင် ဖေဖော်ဝါရီ ၂၉ ရက်က ကျင်းပသည့် ဒုတိယအကြိမ် ကချင်ပြည်နယ်လွတ်တော် ပထမပုံမှန် အစည်းအဝေးတွင် အရေးကြီးအဆို တင်သွင်းခဲ့သည်။

ယင်းအဆိုကို ဝိုင်းမော်မြို့နယ် မဲဆန္ဒနယ် အမှတ် (၂) မှ ဦးနော်လီက တင်သွင်းခဲ့ခြင်းဖြစ်ပြီး မူးယစ်ဆေးဝါး တိုက်ဖျက်ဖို့ အစိုးရနှင့် လူထုပေါင်းစည်းရေး၊ အကြမ်းဖက်မှုများ ထပ်မဖြစ်ရေးနှင့် ဘိန်းစိုက်သူများအား ရေတို၊ ရေရှည် ထောက်ပံ့နိုင်ရေးအတွက် အရေးကြီး အဆိုကို ဖေဖော်ဝါရီ ၂၉ ရက်က ချင်ပြည်နယ် လွှတ်တော် ဒုတိယအကြိမ် ပထမပုံမှန်အစည်းတွင် တင်းသွင်းခဲ့ခြင်းဖြစ်သည်။

ဝိုင်းမော်မြို့နယ် မဲဆန္ဒနယ်အမှတ် (၂)မှ ပြည်နယ်လွှတ်တော် ကိုယ်စားလှယ် ဦးနော်လီက “ဆဒုံး၊ ကန်ပိုင်တည် ဒေသတွေက ကျွန်တော့်ရဲ့ မဲဆန္ဒနယ်ထဲပါပါတယ်။ ဒါပေမဲ့ မဲရုံက ဆဒုံးမြို့နဲ့ ကန်ပိုင်တည်မြို့ပေါ်မှာပဲ လုပ်နိုင်တယ်။ အရင်က ဘိန်းစိုက်ခင်း ကိစ္စတွေကို အဆိုတင်ခဲ့တာလည်း ဟုတ်ပါတယ်။ အောင်လည်းအောင်ပါတယ်။ ဒီနှစ်ဘိန်းစိုက်ခင်းတွေ တိုးလာတယ် ဆိုတာတော့ ကျွန်တော် မကြားမိသေးဘူး။ ကျွန်တော်သိသလောက်တော့ ဘိန်းခင်းလုပ်တဲ့ ဒေသခံတွေကို ကူညီတာ မတွေ့ရဘူး။ မူးယစ်ဆေးဝါး ကိစ္စရပ်က တစ်နိုင်ငံလုံးကို ဒုက္ခပေးနေတာ။ အထူးသဖြင့် ဒေသခံတွေကိုပေါ့။ ဒီလိုအခြေအနေမျိုးမှာ အားလုံးပါဝင်ကြဖို့ လိုတာပေါ့” ဟု ပြောကြားသည်။

မူးယစ်ဆေးဝါး တိုက်ဖျက်နှိမ်နှင်းရာတွင် ပြည်သူလူထု ပါဝင်မှုအပေါ် ကြိုဆိုထောက်ခံရန်၊ အန္တရာယ်မှ ကာကွယ်ပေးရန်အပြင် ထိရောက်သော ကူညီပံ့ပိုးမှုများ အမြန်ဆုံးဆောင်ရွက်ရန် အစိုးရအား တိုက်တွန်းကြောင်း အရေးကြီးအဆိုကို ဖေဖော်ဝါရီ ၂၄ ရက်က ပြည်သူ့လွှတ်တော် ကိုယ်စားလှယ် ကချင်ပြည်နယ် ဝိုင်းမော်မြို့နယ် မဲဆန္ဒနယ်မှ ဦးလဂန်ဇယ်ဂျုံးက တင်သွင်းသည်။

ကချင်ပြည်နယ် မြစ်ကြီးနားခရိုင်အတွင်းရှိ ကန်ပိုင်တည်၊ ဆဒုံး၊ ချီဖွေဒေသများတွင် ကျေးရွာပေါင်း ၃၃ ရွာ၊ အိမ်ထောင်စုပေါင်း ၁၃၇၉ စု၊ လူဦးရေ ၅၉၅၄ ဦးမှာဘိန်းခင်း စိုက်ပျိုးသည့် ကျေးရွာများဖြစ်ကြောင်း ကချင်ပြည်နယ် အစိုးရအဖွဲ့၏ ၂၀၁၆ ခုနှစ် စာရင်းအရ သိရသည်။

မြန်မာနိုင်ငံသည် ကမ္ဘာပေါ်တွင် ဒုတိယ အများဆုံး စိုက်ပျိုးသော နိုင်ငံအဖြစ် ရပ်တည်နေ ပြီး ၁၉၉၉ ခုနှစ်မှစ၍ မူးယစ်ဆေးဝါး ပပျောက်မှုစီမံကိန်း ၁၅ နှစ်ကို ချမှတ်ခဲ့သော်လည်း မအောင်မြင်သဖြင့် နောက်ငါးနှစ် ထပ်တိုးကာ ၂၀၂၀ ပြည့်နှစ်အထိ တိုးမြှင့်ထားကြောင်း သိရသည်။

ကချင်ပြည်နယ်တွင် ၂၀၁၁ ခုနှစ်နောက် ပိုင်း တပ်မတော်နှင့် ကေအိုင်အေတို့ တိုက်ပွဲများ ပြန်လည်ဖြစ်ပွားလာပြီး နောက်ပိုင်း ဘိန်းစိုက်ပျိုးမှု ရုတ်တရက် မြင့်တက်ခဲ့ကြောင်း မှတ်တမ်းများအရ သိရသည်။ ဘိန်းဖျက်ဆီးသည့် ဧကများလည်း နှစ်စဉ်တက်လာကြောင်း သိရပြီး ၂၀၁၂-၂၀၁၃ ခုနှစ် ဘိန်းစိုက်ရာသီတွင် ၆၁၈ ဧက၊ ၂၀၁၃-၂၀၁၄ ခုနှစ်တွင် ၄၉၂ ဧက၊ ၂၀၁၄-၂၀၁၅ ခုနှစ်တွင် ၁၃၂၂   ဧက၊ ၂၀၁၅-၂၀၁၆ ခုနှစ်တွင် ၃၇၃၆ ဧက၊ ၂၀၁၆-၂၀၁၇ ခုနှစ်တွင် စိုက်ဧက ၆၉ ဧက ဖျက်ဆီးနိုင်ခဲ့ကြောင်း သိရသည်။

မြန်မာနိုင်ငံတွင် ရှမ်းပြည်နယ်ပြီးနောက် ကချင်ပြည်နယ်သည် ဒုတိယဘိန်းစိုက်ပျိုးမှု အများဆုံးဖြစ်ပြီး  မြို့နယ်ကိုးမြို့နယ်တွင် ဘိန်းစိုက်ပျိုးမှုများရှိနေရာ ကန်ပိုက်တည် ဒေသ၊ ဆဒုံးဒေသနှင့် တနိုင်းဒေသမှာ အများဆုံးစိုက်ပျိုးကြပြီး ဖားကန့်ဒေသ၊ ပန်ဝါဒေသ၊ ချီဖွေဒေသ၊ ဆွမ်ပရာဘွမ်ဒေသ၊ ဗန်းမော်ခရိုင်နှင့် ပူတာအိုခရိုင် တို့တွင်လည်း စိုက်ပျိုးကြသည်။

Most Read

Most Recent