www.en.natunsomoy.com တွင် သတင်းဖော်ပြထားသည်အား တွေ့ရစဉ်

ရခိုင်ပြည်နယ်တွင် ဘင်္ဂါလီ (မူရင်းတွင် ရိုဟင်ဂျာဟု သုံးနှုန်းထား) များကို နှိပ်စက်ညှဉ်းပန်းသည်ဟုဆိုကာ မြန်မာနိုင်ငံသို့ပေးမည့် ဖွံ့ဖြိုးရေးဆိုင်ရာမူဝါဒချေးငွေ ဒေါ်လာသန်း ၂၀၀ ကိုဆိုင်းငံ့လိုက်ကြောင်း www.en.natunsomoy.com ဝက်ဘ်ဆိုက်တွင် အောက်တိုဘာ ၁၆ ရက်က ဖော်ပြထားချက်အရ သိရသည်။

ဘင်္ဂါလီ (မူရင်းတွင် ရိုဟင်ဂျာဟု သုံးနှုန်းထား) များအား အတင်းအကျပ်ဖယ်ရှားခြင်း၊ ဖျက်ဆီးခြင်းနှင့် အကြမ်းဖက်ခြင်းကြောင့် မိမိတို့အနေဖြင့် အလွန်အမင်းစိုးရိမ်မိပါကြောင်း ကမ္ဘာ့ဘဏ်က အောက်တိုဘာ ၁၂ ရက်က ထုတ်ပြန်သော ကြေညာချက်တွင် ပြောကြားခဲ့သည်။

အကျပ်အတည်းကာလအခြေအနေတွင် မိမိတို့အနေဖြင့် အကျိုးသက်ရောက်မှုကြီးမားသည့် စီမံကိန်းများအပေါ် အာရုံစိုက်မှုကို အားကောင်းစေရန် နိုင်ငံတွင်းထိတွေ့ဆက်ဆံမှုကို ပြန်လည်သုံးသပ်ခဲ့ကြောင်း၊ အဆိုပါစီမံကိန်းများသည် အထူးသဖြင့် ရခိုင်ပြည်နယ်တွင် ဘာသာရေးနှင့် တိုင်းရင်းသားလူမျိုးစုအားလုံး ပါဝင်ရေး၊ ကျေးလက်လမ်းများ၊ လျှပ်စစ်၊ ကျန်းမာရေးဝန်ဆောင်မှုနှင့် ပညာရေးကို ထောက်ပံ့သည့် စီမံကိန်းများဖြစ်ကြောင်း ထုတ်ပြန်ခဲ့သည်။

မိမိတို့အနေဖြင့် မကြာသေးမီက အတည်ပြုခဲ့သည့် ဖွံ့ဖြိုးရေးဆိုင်ရာမူဝါဒချေးငွေ အခြေအနေများကိုလည်း အကဲဖြတ်ခဲ့ကြောင်း၊ ထိရောက်မှုရှိစေရန် ချေးငွေအတွက် နောက်ထပ်တိုးတက်မှုလိုအပ်ကြောင်းကို ဆုံးဖြတ်ချက်ချခဲ့ကြောင်း ထုတ်ပြန်ချက်တွင် ဖော်ပြထားသည်။

မိမိတို့အနေဖြင့် ကုလသမဂ္ဂနှင့် ပိုမိုကျယ်ပြန့်သော နိုင်ငံတကာအသိုင်းအဝိုင်းနှင့် အနီးကပ်ညှိနှိုင်းဆောင်ရွက်နေကြောင်း၊ အစိုးရအား အခြေအနေအရှိန်လျှော့စေရန် အရေးတကြီးဆောင်ရွက်ရမည့် ခြေလှမ်းများလှမ်းရန်နှင့် ပြည်တွင်း နေရပ်စွန့်ခွာရသည့် လူဦးရေနှင့် ဒုက္ခသည်များ နေရပ်ပြန်ရေးအတွက် လမ်းဖွင့်ပေးရေး အပါအဝင် အားလုံးပါဝင်ပြီး ကျယ်ပြန့်သော လူသားချင်းစာနာထောက်ထားမှုဆိုင်ရာ တုံ့ပြန်မှုကို ထောက်ခံအားပေးရန် အတူတကွ တိုက်တွန်းနေကြောင်း ထုတ်ပြန်ချက်တွင် ဖောြ်ပထားသည်။

ARSA ဘင်္ဂါလီအစွန်းရောက် အကြမ်းဖက်သမားများ၏ တိုက်ခိုက်ဖျက်ဆီးမှုကို တုံ့ပြန်သည့် မြန်မာတပ်မတော်၏ နယ်မြေရှင်းလင်းရေး ဆောင်ရွက်မှုကြောင့် သြဂုတ် ၂၅ ရက်နောက်ပိုင်း ဘင်္ဂလားဒေ့ရှ်နိုင်ငံဘက်သို့ ထွက်ပြေးသွားသည့် ဘင်္ဂါလီဒုက္ခသည်ဦးရေသည် ငါးသိန်းကျော်ရှိသွားပြီဖြစ်ကြောင်း ကုလသမဂ္ဂက ပြောကြားထားသည်။

ထွက်ပြေးသွားသည့် ဘင်္ဂါလီများသည် ဘင်္ဂလားဒေ့ရှ်နယ်စပ် ကော့ဘဇားမြို့တစ်ဝိုက်ရှိ ဒုက္ခသည်စခန်းများတွင် နေထိုင်နေကြသည်။

မြန်မာနိုင်ငံအခြေစိုက်သံရုံးများမှ သံတမန်များနှင့် ကုလသမဂ္ဂအဖွဲ့အစည်းများမှ အကြီးအကဲများသည် ရခိုင်ပြည်နယ် မောင်တောဒေသသို့ အောက်တိုဘာ ၂ ရက်က သွားရောက်လေ့လာခဲ့ကြသည်။

ခရီးစဉ်တွင်ပါလာသည့် ကုလသမဂ္ဂတာဝန်ရှိများက ခရီးစဉ်နှင့်ပတ်သက်သည့် ၎င်းတို့၏သဘောထားကို ထုတ်ပြန်ခဲ့ရာ ထုတ်ပြန်ချက်တွင် ရခိုင်ပြည်နယ်တွင် ဖြစ်ပွားခဲ့သည့် ထိခိုက်ခံစားရမှုများသည် မတွေးနိုင်လောက်အောင် အလွန်ကြီးမားကြောင်း၊ ယခုလေ့လာရေးခရီးစဉ်သည် အပြုသဘောဆောင်သည့် ခြေလှမ်းတစ်ရပ်ဖြစ်ပြီး လူသားချင်းစာနာထောက်ထားမှု အကူအညီများပေးနိုင်ရေးအတွက် ပိုမိုကျယ်ပြန့်စွာခွင့်ပြုပေးရန် လိုအပ်ကြောင်း ပြောကြားခဲ့သည်။ ထို့ပြင်ဒုက္ခသည်များ ၎င်းတို့၏မူလနေရာများသို့ ဘေးကင်းစွာ၊ ဆန္ဒအလျောက်၊ ဂုဏ်သိက္ခာရှိရှိနှင့် စဉ်ဆက်မပြတ် ပြန်လာနိုင်ရန်အတွက် လုပ်ဆောင်ရန်လည်း တိုက်တွန်းခဲ့သည်။ ရခိုင်ပြည်နယ်တွင် ထိခိုက်ခံစားခဲ့ရသူများအားလုံးအတွက် အလွန်အမင်းဝမ်းနည်းမိကြောင်း ပြောကြားခဲ့ပြီး အကြမ်းဖက်မှုသံသရာ အဆုံးသတ်ရန်လည်း တိုက်တွန်းခဲ့သည်။

ခရီးစဉ်တွင်ပါဝင်သည့် သံအမတ်ကြီး အယောက် ၂၀ ကလည်း ကြေညာချက် ထုတ်ပြန်ခဲ့ရာ ကြေညာချက်တွင် “ကျွနု်ပ်တို့ခရီးစဉ်အတွင်း လူသားချင်းစာနာထောက်ထားရေးဆိုင်ရာ အကူအညီများ အလွန်အမင်းလိုအပ်လျက်ရှိကြောင်း တွေ့ရှိခဲ့ရပါသည်။ ရခိုင်ပြည်နယ်မြောက်ပိုင်းသို့ လူသားချင်းစာနာထောက်ထားမှုဆိုင်ရာ အကူအညီများ အတားအဆီးမရှိ ဝင်ရောက်နိုင်ရေးနှင့် ရခိုင်ပြည်နယ်တစ်ဝန်း အသက်ကယ်ဝန်ဆောင်မှုများ ခွဲခြားမှုမရှိ ပြန်လည်စတင်နိုင်ရေးအတွက် ကျွနု်ပ်တို့ ထပ်မံတောင်းဆိုအပ်ပါသည်” ဟု ထည့်သွင်းဖော်ပြခဲ့သည်။

ကုလသမဂ္ဂ အရေးပေါ်ကယ်ဆယ်ရေး ညှိနှိုင်းရေးမှူး မက်လိုကော့က မြန်မာနိုင်ငံမှ ဘင်္ဂလားဒေ့ရှ်နိုင်ငံသို့ ပြီးခဲ့သည့် သီတင်းပတ်များအတွင်း ရောက်ရှိလာသည့် လူငါးသိန်းကျော်သည် နိုင်ငံတကာအသိုင်းအဝိုင်း၏ အကူအညီကို လိုအပ်နေကြောင်း ဂျီနီဗာမြို့တွင် သတင်းထောက်များအား အောက်တိုဘာ ၆ ရက်က ပြောကြားခဲ့သည်။

ကုလသမဂ္ဂ လူသားချင်းစာနာထောက်ထားမှုဆိုင်ရာ ရုံးအကြီးအကဲလည်းဖြစ်သူ မက်လိုကော့က လာမည့်လများအတွက် ဒေါ်လာ ၄၃၄ သန်း လိုအပ်မည်ဖြစ်ကြောင်း ပြောကြားခဲ့သည်။