Indapaper.com တွင် ဖော်ပြထားမှုကို တွေ့ရစဉ်

အောက်တိုဘာ  ၈ ရက်မှာ Indapaper.com ကနေပြီး မြန်မာနိုင်ငံရဲ့ အချမ်းသာဆုံး ၁၀ ဦးစာရင်းဆိုပြီး စစ်တမ်းတစ်ရပ် ထွက်လာခဲ့ပါတယ်။

Indapaper.com ဆိုတာ တိကျခိုင်မာမှုအပိုင်းမှာ ပြောစရာ ရှိနေပြီး မြန်မာနိုင်ငံရေးသမားတွေထဲမှာ အချမ်းသာဆုံး ငါးဦးစာရင်းကို တင်ထားရာမှာလည်း လွဲမှားမှုတွေ ရှိနေတာကို တွေ့ရပါတယ်။ မြန်မာနိုင်ငံကို နှစ်ပေါင်း ၂၀ ကျော် အုပ်ချုပ်ခဲ့တဲ့ ဗိုလ်ချုပ်မှူးကြီး (ငြိမ်း) ဦးသန်းရွှေကို မြန်မာ့နိုင်ငံရေးလောကမှာ အချမ်းသာဆုံး နံပါတ် (၅) အဖြစ် ဒေါ်လာ ၂၃ သန်းသာ ကြွယ်ဝကြောင်း ဖော်ပြခဲ့ပြီး သမ္မတဟောင်း ဦးသိန်းစိန်ကို ဒေါ်လာ ၉၂ သန်းနဲ့ ဒုတိယ အချမ်းသာဆုံးအဖြစ် ဖော်ပြခဲ့လို့ဖြစ်ပြီး လက်ရှိသမ္မတ ဦးထင်ကျော်ကို ဒေါ်လာ ၈၄ သန်းနဲ့ အဆင့်သုံး၊ သူရဦးရွှေမန်းကို ဒေါ်လာ ၆၅ သန်းနဲ့ အဆင့် (၄)၊ လက်ရှိနိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကို ဒေါ်လာ ၂၁၅ သန်းနဲ့ မြန်မာ့နိုင်ငံရေးလောကမှာ အချမ်းသာဆုံး နံပါတ် (၁) အဖြစ် ဖော်ပြခဲ့တာကြောင့် မဖြစ်နိုင်တဲ့စစ်တမ်းတစ်ရပ် ဆိုပြီး အဝေဖန် ခံခဲ့ရပါတယ်။

ဒါပေမဲ့ Indapaper.com ကို လေ့လာရာမှာ ဒီဝက်ဘ်ဆိုက်ဟာ မြန်မာနိုင်ငံတင်မကဘဲ တခြားနိုင်ငံတွေက အချမ်းသာဆုံး ပုဂ္ဂိုလ်တွေကိုပါ ဖော်ပြထားတာဖြစ်လို့  မှားယွင်းနိုင်တဲ့ မြန်မာ့နိုင်ငံရေးသမား ငါးဦးရဲ့ ကြွယ်ဝမှုကို ဘေးဖယ်ပြီးတော့ Indapaper.com ကဖော်ပြခဲ့တဲ့ မြန်မာ့အချမ်းသာဆုံး ပုဂ္ဂိုလ် ၁၀ ဦး စာရင်းကို မြန်မာနိုင်ငံအနေနဲ့ ပြန်လည်သုံးသပ်ဖို့ လိုအပ်မှာပါ။

Indapaper.com က ဖော်ပြခဲ့တဲ့ မြန်မာ့အချမ်းသာဆုံးပုဂ္ဂိုလ် ၁၀ ဦးစာရင်းမှာဆိုရင် ထူးကုမ္ပဏီလုပ်ငန်းစုက ဦးတေဇကို အမေရိကန်ဒေါ်လာ ၆ ဒသမ ၇ ဘီလျံနဲ့ နံပါတ် (၁) အဖြစ်ဖော်ပြခဲ့ပြီး Asia World က ဦးထွန်းမြင့်နိုင်ကိုတော့ ဒေါ်လာ ၅ ဒသမ ၃ ဘီလျံနဲ့ ဒုတိယအဖြစ် ဖော်ပြခဲ့ပါတယ်။

Max Myanmar ဦးဇော်ဇော်ကိုတော့ ဒေါ်လာ (၅) ဘီလျံနဲ့ တတိယအဖြစ် ဖော်ပြထားပြီး ကွယ်လွန်သွားပြီဖြစ်တဲ့ ဦးအောင်သောင်းရဲ့ သားနှစ်ယောက်ဖြစ်တဲ့ ဦးပြည်အောင်နဲ့ ဦးနေအောင်ကိုတော့ ဒေါ်လာ ၄ ဒသမ ၇ ဘီလျံနဲ့ မြန်မာ့နံပါတ် (၄)  ကြွယ်ဝသူတွေအဖြစ် ဖော်ပြထားပြီး လက်ရှိအစိုးရကို အကြံဉာဏ် ပေးနေခဲ့တယ်ဆိုတဲ့ ပြည်ထောင်စုလွှတ်တော် ဥပဒေရေးရာနှင့် အထူးကိစ္စရပ်များ လေ့လာဆန်းစစ်သုံးသပ်ရေး ကော်မရှင်ဥက္ကဋ္ဌ သူရဦးရွှေမန်းရဲ့ သားကြီးဖြစ်တဲ့ ဦးအောင်သက်မန်းကို ဒေါ်လာ ၄ ဒသမ ၂ ဘီလျံနဲ့ ကြွယ်ဝမှု အဆင့် နံပါတ် (၅) အဖြစ် ပုံဖော်ထားတာ တွေ့ရပါတယ်။

Myint & Associate က ဦးမိုးမြင့်ကိုတော့ ဒေါ်လာ ၃ ဒသမ ၇ ဘီလျံနဲ့ မြန်မာ့အချမ်းသာဆုံး နံပါတ် (၆) အဖြစ် ဖော်ပြထားပြီး ပတ္တမြားနဂါးက ဦးနေဝင်းထွန်းကတော့ ဒေါ်လာ သုံးဘီလျံနဲ့ အဆင့် (၇) မှာ ရပ်တည်နေပါတယ်။

ဇေကမ္ဘာဦးခင်ရွှေက ဒေါ်လာ ၂ ဒသ မ ၆ ဘီလျံနဲ့ အဆင့် (၈) မှာ ရပ်တည်နေပြီး ယုဇန ဦးဌေးမြင့်ကတော့ ဒေါ်လာ ၂ ဒသမ ၂ ဘီလျံနဲ့ အဆင့် (၉) ပါ။ ရွှေတောင်လုပ်ငန်းစုက ဦးအိုက်ထွန်းကိုတော့ ဒေါ်လာ ၁ ဒသမ ၂ ဘီလျံနဲ့ မြန်မာအချမ်းသာဆုံးအဆင့် (၁၀) လို့ ဖော်ပြထားပါတယ်။

ဒီစစ်တမ်းကို လေ့လာမယ်ဆိုရင် စိတ်ဝင်စားစရာကောင်းတာက မြန်မာနိုင်ငံမှာ ဘယ်သူက လက်ရှိမှာ အချမ်းသာဆုံးဖြစ်နေပြီး ဘယ်သူက လက်ရှိမှာ အခွန်ထမ်းဆောင်မှု အမြင့်ဆုံးလဲဆိုတာဖြစ်ပြီး Indapaper.com ကဖော်ပြခဲ့တဲ့ ၁၀ ဦးဟာလည်း အငြင်းပွားဖွယ်ရာဖြစ်လို့ ဒီပုဂ္ဂိုလ် ၁၀ ဦးဟာ အခွန် ထမ်းဆောင်မှုအပိုင်းမှာ မေးခွန်းထုတ်စရာတွေ ရှိလာပါတယ်။

မြန်မာနိုင်ငံမှာ အနီးစပ်ဆုံးထုတ်ပြန်ထားတဲ့ အခွန်ထမ်းစာရင်းကို ကြည့်မယ်ဆိုရင် ၂၀၁၅-၂၀၁၆ စည်းကြပ်နှစ် ဝင်ငွေခွန်မှာ ကျပ်သန်းပေါင်း နှစ်သောင်းအထက် ပေးဆောင်ခဲ့တဲ့ ဦးအောင်ကိုဝင်းရဲ့ကမ္ဘောဇ ဘဏ်က ကျပ် ၂၃ ဘီလျံကျော်နဲ့ ထိပ်တန်းနေရာက ရပ်တည်နေပြီး ကျပ်သန်းပေါင်း နှစ်သောင်းအောက် အခွန်ပေးဆောင်မှုမှာ တပ်မတော်ပိုင် စီးပွားရေးလုပ်ငန်းစုတွေဖြစ်တဲ့ မြဝတီဘဏ်က  ကျပ်သန်းပေါင်း ၈၅၀၁ ကျော်နဲ့ အဆင့် (၂) နေရာမှာ ရပ်တည်ခဲ့ပြီး  Myanmar Economic Holdings Limited က ကျပ်သန်းပေါင်း ၅၇၆၅ ကျော်နဲ့ အဆင့်  (၃) နေရာမှာ ရပ်တည်ခဲ့တဲ့အပြင်  Myawady Trading ကလည်း ကျပ်သန်းပေါင်း ၅၅၁၀ ကျော်နဲ့ အဆင့် (၄) နေရာမှာ ရပ်တည်နိုင်ခဲ့ပါတယ်။

ဝင်ငွေခွန် အများဆုံးပေးဆောင်တဲ့ အဆင့် (၅) နေရာမှာ Shwe Byain Phyu ကုမ္ပဏီက ကျပ်သန်းပေါင်း ၄၇၅၃ ကျော်နဲ့  ရပ်တည်နေပြီး အဆင့် (၆) နေရာမှာတော့ Global Treasure ဘဏ်က ကျပ်သန်းပေါင်း ၄၅၆၀ ကျော်၊ အဆင့် (၇) နေရာမှာ Regency Material Trading ကုမ္ပဏီက ကျပ်သန်းပေါင်း ၄၄၂၃ ကျော်နဲ့  ရပ်တည်နေပါတယ်။

ဝင်ငွေခွန်ကို ကျပ်သန်းလေးထောင်အောက် ပေးဆောင်ပြီး ထိပ်တန်းအခွန်ထမ်း ၁၀၀၀ စာရင်းမှာ ရပ်တည်နေသူတွေထဲက အဆင့် (၈) မှာ Dagon Beverages ကုမ္ပဏီက ကျပ်သန်းပေါင်း ၃၃၃၈ ကျော်နဲ့ ရပ်တည်နေပြီး Asia Energy Trading ကုမ္ပဏီက ကျပ်သန်းပေါင်း ၃၀၄၉ ကျော်နဲ့ အဆင့် (၉) နေရာမှာ ရပ်တည်နေပါတယ်။ အဆင့်  (၁၀)  နေရာမှာ Benhur Trading ကုမ္ပဏီက ကျပ်သန်းပေါင်း ၃၀၀၀ ကျော်နဲ့ ရပ်တည်နေပါတယ်။

Indapaper.com က ထုတ်ပြန်တဲ့ စာရင်းနဲ့ လက်ရှိမှာ ပြည်တွင်းအခွန်များဦးစီးဌာနက ထုတ်ပြန်ထားမှုကို ယှဉ်ကြည့်မယ်ဆိုရင် Indapaper.com က ဖော်ပြရာမှာ ဒဂုန်အင်တာနေရှင်နယ်က ဦးဝင်းအောင်၊ သမဝါယမဘဏ်နဲ့ SMIDB ဘဏ်ကြီးနှစ်ခုကို ပိုင်ဆိုင်ထားတဲ့ ဦးခင်မောင်အေး၊ မြန်မာ နိုင်ငံမှာ လက်ရှိအချမ်းသာဆုံးလို့ ဆိုနိုင်တဲ့ ကမ္ဘောဇ ဦးအောင်ကိုဝင်း၊ ရွှေသံလွင် ဦးကျော်ဝင်း၊  ဧဒင်ဦးချစ်ခိုင်၊ FMI ဦးသိမ်းေ၀ တို့ မပါဝင်တာနဲ့ ဒီပုဂ္ဂိုလ်တွေဟာ အခွန်ထမ်း ထိပ်တန်းစာရင်းမှာ ပါဝင်နေတာကြောင့် အခွန်ထမ်းစာရင်းမှာ ထိပ်ဆုံးကမရှိဘဲ Indapaper.com က ဖော်ပြခဲ့တဲ့ အချမ်းသာဆုံး ပုဂ္ဂိုလ်တွေရဲ့ အခွန်ထမ်းဆောင်မှုအပေါ် မေးခွန်းထုတ်စရာဖြစ်ပါတယ်။ ဒီစာရင်းထဲမှာပါတဲ့ ဦးဇော်ဇော်ဆိုရင်လည်း သူ့ ရဲ့ ဧရာဝတီဘဏ်အနေနဲ့ မြန်မာနိုင်ငံရဲ့ နှစ်စဉ်ထိပ်တန်း ကုန်သွယ်ခွန်၊ ဝင်ငွေခွန်၊ ပေးဆောင်သူ စာရင်းမှာ ၂၀၁၄-၂၀၁၅ စည်းကြပ်နှစ်အတွက် ထိပ်တန်း ဝင်ငွေခွန်ပေးဆောင်တဲ့ စာရင်းမှာ ပါဝင်သလို ၂၀၁၅-၂၀၁၆ စည်းကြပ်နှစ်အတွက် ထိပ်တန်း ဝင်ငွေခွန်စာရင်း ထုတ်ပြန်ရာမှာလည်း အများဆုံး ပေးဆောင်သူများစာရင်းမှာ ပါဝင်သူဖြစ်ပါတယ်။ ဒါကြောင့် Indapaper က ဖော်ပြခဲ့တဲ့ မြန်မာနိုင်ငံရဲ့ အချမ်းသာဆုံးစာရင်းနဲ့ သူ တို့ရဲ့ အခွန်ဆောင်မှု အခြေအနေတွေကို ချိန်ထိုးကြည့်ရင် ဘယ်လောက်ထိ ယုံကြည်မှု ရှိနိုင်မလဲ၊ မှန်ကန်နိုင်မလဲ ဆိုတာကတော့ ပြောဖို့ခက်ပါတယ်။ ဒါပေမဲ့ မြန်မာနိုင်ငံမှာ အချမ်းသာဆုံး ပုဂ္ဂိုလ်တွေရဲ့ လက်ရှိအခြေအနေနဲ့ သူတို့ရဲ့အခွန်ထမ်းမှု အခြေအနေတွေကိုတော့ တာဝန်ရှိသူတွေအနေနဲ့ မှန်ကန်စွာ စိစစ်ထုတ်ပြန်ပေးဖို့ လိုအပ်မှာဖြစ်ပါတယ်။

မြန်မာနိုင်ငံမှာ အချမ်းသာဆုံးဆိုပြီး Indapaper.com က ဖော်ပြခဲ့တဲ့ ၁၀ ဦး စာရင်းမှာ အငြင်းပွားမှုတွေလည်း ရှိနေပြီး ဒီအပေါ်မှာ ဧရာဝတီမဂ္ဂဇင်းက တွက်ချက် ဖော်ပြခဲ့ဖူးတဲ့ Tracking The Tycoons မှာ ဖော်ပြခဲ့တဲ့ အချမ်းသာဆုံး ၁၈ ဦးကို ပြန်ရေရမယ်ဆိုရင် ဦးတေဇ၊ ဦးထွန်းမြင့်နိုင်၊ ဦးဇော်ဇော်၊ ဦးပြည်အောင်နှင့် ဦးနေအောင်၊ ဦးအောင်သက်မန်း၊ ဦးမိုးမြင့်၊ ဦးနေဝင်းထွန်း၊ ဦးခင်ရွှေ၊ ဦးဌေးမြင့်၊ ဦးအိုက်ထွန်း၊ ဦးချစ်ခိုင်၊ ဦးအောင်ကိုဝင်း၊ ဦးသိမ်းဝေ၊ ဦးကျော်ဝင်း၊ ဦးဝင်းအောင်၊ ဦးအောင်မြတ်၊ ဦးတင်ဝင်းနဲ့ ဦးမောင်ဝိတ်တို့ ဖြစ်ပြီး ဒီဆောင်းပါးဟာ ဆယ်စုနှစ်တစ်စု ကြာမြင့်ခဲ့ပြီဆိုတော့ အပြောင်းအလဲတွေ ရှိနိုင်ပါတယ်။ ဒါပေမယ့် ဒီအချမ်းသာဆုံး ၁၈ ဦးသာ ၂၀၀၈ ခုနှစ် လောက်ကစပြီး အခွန်မှန်မှန်ဆောင်တယ်ဆိုတဲ့ ဂုဏ်ပုဒ်ကို ကိုင်စွဲနိုင်မယ်ဆိုရင် မြန်မာနိုင်ငံဟာ ဂျီဒီပီမှာ အခွန်ပါဝင်မှု အနိမ့်ဆုံး နိုင်ငံ ဖြစ်လာစရာ အကြောင်း မရှိပါဘူး။

တကယ်တော့ ဂျီဒီပီမှာ အခွန်ပါဝင်မှု အနိမ့်ဆုံးမြန်မာနိုင်ငံဟာ လက်ရှိအစိုးရလက်ထက်မှာ မျှတတဲ့ အခွန်ကောက်ခံမှု ဖြစ်စေရမယ် ကြုံးဝါးထားပေမယ့် တကယ့်တကယ်တမ်းမှာက အခွန် Base ချဲ့မယ်ဆိုပြီး ဆင်းရဲသားပြည်သူတွေအပေါ် အဓိက သက်ရောက်စေမယ့် အခွန်တိုးကောက်သလို ဖြစ်စေတာတွေ့ခဲ့ရပြီး အခွန်ရှောင်နေတဲ့ လုပ်ငန်းရှင်တွေဆီကတော့ အခွန်တိမ်းရှောင်မှု စိစစ်ဖို့ ပြင်ဆင်တာ မတွေ့ရတဲ့အပြင် ရန်ကုန်စတော့ အိတ်ချိန်းဝင်မယ့် အများပိုင်ကုမ္ပဏီတွေကို အရင်က အခွန်ရှောင်ခဲ့တာတွေ အတွက်တောင်မှ အရေးမယူဘူးလို့ ထုတ်ပြန်မှုမျိုးတွေ တွေ့ခဲ့ရပါတယ်။

နောက်ပြီး လက်ရှိအစိုးရလက်ထက်မှာ နာမည်ကြီးခဲ့တာက ကမ္ဘာ့နိုင်ငံတွေက အခွန်ရှောင်တဲ့ ကုမ္ပဏီတွေ၊ အခွန်ရှောင်တဲ့ နိုင်ငံရေးသမားတွေကို ဖွင့်ချခဲ့တဲ့ ပနားမားပေပါနဲ့ ပတ်သက်တာပါ။ ပနားမားပေပါစာတန်း  အခွန်ရှောင်မှုတွေ ဖော်ပြခဲ့တာကြောင့် တခြား နိုင်ငံတွေမှာ ပနားမားပေပါမှာ ဖော်ပြခံရသူတွေကို စစ်တမ်းကောက်ခဲ့ပေမယ့် မြန်မာနိုင်ငံမှာတော့ အစိုးရက လျစ်လျူရှုတာကိုပဲ တွေ့ခဲ့ရပါတယ်။

၂၀၁၆ ခုနှစ်အတွင်း ထုတ်ပြန်ခဲ့တဲ့ ပနားမားပေပါမှာဆိုရင် အခွန်တိမ်းရှောင်မှု၊ ပြည်ပမှာ လျှို့ဝှက်စွာပြုလုပ်ထားတဲ့ စီးပွားရေးဆက်ဆံမှုတွေနဲ့ ငွေကြေးခဝါချမှု အရှုပ်တော်ပုံကို ဖွင့်ချခဲ့တဲ့ ပနားမား စာရွက်စာတန်းများ (Panama Papers) ကို ထုတ်ပြန်ခဲ့တဲ့ နိုင်ငံတကာ စုံစမ်းထောက်လှမ်းရေး ဂျာနယ်လစ်များအဖွဲ့ (ICIJ) ရဲ့ ဧပြီ ၃ ရက်က ဖွင့်ချခဲ့တဲ့ ပနာမား စာရွက်စာတမ်းများမှာ နိုင်ငံ ၅၀ ကျော်က နိုင်ငံရေးသမား ၁၄၀ ဦး (ဒီအထဲမှာ လက်ရှိနဲ့ ယခင်နိုင်ငံ အကြီးအကဲ ၁၂ ဦးပါဝင်ပါတယ်)၊ သူတို့နဲ့ပတ်သက် ဆက်နွှယ်သူတွေရဲ့ အခွန်တိမ်းရှောင်မှု၊ ပြည်ပမှာ လျှို့ဝှက်စွာပြုလုပ်ထားတဲ့ စီးပွားရေးလုပ်ငန်းတွေ၊ ငွေကြေးခဝါချမှုပြုလုပ်ခြင်းတွေ ပါဝင်တဲ့ စာရွက်စာတန်း ပေါင်း ၁၁ ဒသမ ၅ သန်းကျော်ကို ဖော်ပြခဲ့ပါတယ်။ ပနားမား အရှုပ်တော်ပုံဖွင့်ချမှု မတိုင်မီ ရှိခဲ့တဲ့ ICIJ ရဲ့သီးခြားမှတ်တမ်းမှာ Burma ခေါင်းစဉ်အောက်က အရာရှိကြီးတွေနဲ့ ပင်မ ဖောက်သည် (Officer and Master Clients) စာရင်းမှာ မြန်မာနိုင်ငံက လူတွေနဲ့ ကုမ္ပဏီ တွေရဲ့ အမည်စာရင်း ၁၇ ခု ပါဝင်ခဲ့ပါတယ်။ ဒီ ၁၇ ခုထဲမှာဆိုရင် ဦးအောင်ကျော်မြင့်၊ ဦးအေးဇော်ဝင်း၊ ဒေါက်တာဥမ္မာမိုးမြင့်၊ ဦးကျော်ဝင်း၊ ဦးမောင်မောင်ဆွေတင်၊ ဒေါ်မြသီတာဆွေတင်၊ ဒေါ်မြမြစိုး၊ ဦးသုတ၊ ဦးဋ္ဌေးမြင့်၊ ဦးမိုးမြင့် (မိုက်ကယ်မိုးမြင့်)၊ ဦးမြင့်ဆွေနဲ့ ဦးမျိုးတင်စတဲ့ မြန်မာအမည်တွေ ပါဝင်ခဲ့ပါတယ်။ ဒီခေါင်းစဉ်အောက်မှာပဲ အင်္ဂလိပ်အမည်နဲ့ ဖော်ပြခဲ့တဲ့စာရင်းထဲမှာ Jonathan W.smith၊ Earnest Howard Bolton II၊  Quamruddin Ahmed၊ William Mark Hilsma နှင့် Financecorp Limited လုပ်ငန်းစုတွေ၊ သူတို့ရဲ့ဆက်နွှယ်မှုတွေနဲ့ မြန်မာနိုင်ငံက တရားဝင်လိပ်စာ အချက်အလက်တွေကို ဖော်ပြခဲ့ပါတယ်။ ဒါ့အပြင် Myanmar ခေါင်းစဉ်အောက်မှာ ဖော်ပြခဲ့တဲ့ ကုမ္ပဏီတွေစာရင်းမှာဆို Poscelin Myanmar Limited၊ Myanmar - Search Company Limited၊ CNOOC Myanmar Ltd နှင့် CNOOC Myanmar Holding Ltdတို့ ပါဝင်ခဲ့ပါတယ်။

ပနားမားပေပါစာရင်းတွေနဲ့ ပတ်သက်ပြီး တခြားနိုင်ငံတွေမှာ စုံစမ်းဖော်ထုတ်ခဲ့ပေမယ့် မြန်မာနိုင်ငံမှာတော့ တစ်စုံတစ်ရာ ထုတ်ပြန်မှု၊ ဖော်ထုတ်မှုတွေ မရှိခဲ့ပါဘူး။

လက်ရှိအစိုးရ လက်ထက်မှာ အခွန်တိုးမြှင့် ကောက်ခံမှုတွေကို ပြန်ကြည့်မယ်ဆိုရင် ဖုန်းဘီလ် အခွန်ဟာ ဒီအစိုးရလက်ထက်မှ စတင်ကောက်ခံတာဖြစ်ပြီး မကြာမီမှာလည်း အခြေခံပြည်သူတွေ အထိနာနိုင်တဲ့ လျှပ်စစ်မီတာခ တိုးမြှင့်ကောက်ခံမှု ဖြစ်လာမယ့်သဘော ရှိနေပါတယ်။ ဒါ့အပြင် အကောက်ခွန်နှုန်း တိုးမြှင့်မှုတွေအရ အောက်တိုဘာ ၁ ရက်ကစပြီး သတင်းစာ ထုတ်ဝေသူတွေ ပြည်သူတွေအထိနာစေမယ့် အခွန်နှုန်း တိုးမြှင့်ထားမှုတွေလည်း ရှိနေပါတယ်။

အရင်တုန်းက သွင်းကုန်တွေအပေါ် အကောက်ခွန်ကောက်ခံရာမှာ မြန်မာ့အကောက်ခွန်နှုန်းစာရင်း ၂၀၁၂ နဲ့ ကောက်ခံခဲ့ရာက ကမ္ဘာ့အကောက်ခွန်အဖွဲ့ရဲ့ အမျိုးတူ ကုန်ပစ္စည်း ခွဲခြားဖော်ပြတဲ့ သတ်မှတ်စနစ်အရ ပြင်ဆင်ခဲ့တဲ့ မြန်မာ့အကောက်ခွန်နှုန်း စာရင်း ၂၀၁၇ ကို အောက်တိုဘာ ၁ ရက်ကစပြီး တိုးမြှင့်ကောက်ခံတော့မှာ ဖြစ်ပါတယ်။

ပြင်ဆင်တိုးမြှင့်လိုက်တဲ့ အကောက်ခွန်နှုန်းမှာ ဘိလပ်မြေကို တစ်ရာခိုင်နှုန်းကနေ သုံးရာခိုင်နှုန်း၊ အိမ်သုံးဆားကို အရင် ၁၀ ရာခိုင်နှုန်းကနေ ရာခိုင်နှုန်း ၂၀၊ အသင့်သောက်သုံးနိုင်တဲ့ကော်ဖီ ( Instant Coffee)ကို  ၁၅ ရာခိုင်နှုန်းကနေ ရာခိုင်နှုန်း ၂၀၊ ပြည်တွင်းမှာ စိုက်ပျိုးထွက်ရှိတဲ့ အသီးအနှံတွေကို ၁၅ ရာခိုင်နှုန်းကနေ ရာခိုင်နှုန်း ၃၀၊ ကြက်သွန်နီ/ကြက်သွန်ဖြူကို အရင် ၀ ဒသမ ၅/၁ ရာခိုင်နှုန်းကနေ ၁၀  ရာခိုင်နှုန်း ၊ ပန်းမျိုးစုံကို အရင် ၅ ရာခိုင်နှုန်းကနေ ၁၅ ရာခိုင်နှုန်း၊ ပရိဘောဂတွေကို ယခင် ၁၅ ရာခိုင်နှုန်းကနေ ရာခိုင်နှုန်း ၂၀ တိုးမြှင့်ကောက်ခံတော့မှာ ဖြစ်ပါတယ်။ လွယ်လွယ်ပြောရရင် အရင် ၁၀၀ တန် ကော် ဖီမစ်ဟာ ၁၂၀ ဖြစ်လာမှာဖြစ်ပြီး သတ်မှတ်ရာခိုင်နှုန်းတိုးမြှင့်မှုအလိုက် ကုန်ဈေးနှုန်းမြင့်တက်မယ့်ဒဏ်ကို ပြည်သူတွေ ခံရဦးမှာပါ။

အကောက်ခွန်နှုန်း ပြင်ဆင်မှုမှာ မော်တော်ယာဉ်တွေလည်း မလွတ်ခဲ့ပါဘူး။ ဘတ်စ်ကားနဲ့ ကုန်တင်ယာဉ်တွေကို အရင် သုံးရာခိုင်နှုန်း ကောက်ခံနေရာက ၁၀ ရာခိုင်နှုန်း၊ CKD စနစ်နဲ့တင်သွင်းထုတ်လုပ်မယ့် ဘတ်စ်ကားနဲ့ကုန်တင်ယာဉ်တွေကို အရင်သုံးရာခိုင်နှုန်း ကောက်ခံနေရာက ၇ ဒသမ ၅ ရာခိုင်နှုန်း တိုးကောက်မှာပါ။

အိမ်သုံးလူစီးမော်တော်ယာဉ်တွေကိုတော့ အရင်အတိုင်းမပြောင်းလဲဘဲ အင်ဂျင်ပါဝါ ၂၀၀၀ စီစီနဲ့ အောက်မော်တော်ယာဉ်တွေကို ရာခိုင်နှုန်း ၃၀ အင်ဂျင်ပါဝါ ၂၀၀၀ စီစီအထက် မော်တော်ယာဉ်တွေကို အရင် အတိုင်း ရာခိုင်နှုန်း ၄၀ နဲ့ပဲ ဆက်လက်ကောက်ခံမှာပါ။

ဒါပေမယ့် CKD(Complete Knocked Down) စနစ်နဲ့ တင်သွင်းတပ်ဆင်ထုတ်လုပ် ရောင်းချမယ့် လူစီးအိမ်သုံးကားတွေကို အရင်ကထက် အကောက်ခွန်နှုန်းလျှော့ချကောက်ခံမှာပါ။ အရင်က CKD စနစ်နဲ့ တင်သွင်းတဲ့ လူစီးအိမ်သုံးကားတွေကို ကောက်ခံတဲ့အ ကောက်ခွန်နှုန်းက လက်ရှိ လူစီးကားတင်သွင်းနေတဲ့နှုန်းဖြစ်တဲ့၂၀၀၀ စီစီအထက်ဆိုရင် ရာခိုင်နှုန်း ၄၀၊ ၂၀၀၀ စီစီအောက်ဆို  ရာခိုင်နှုန်း ၃၀ နဲ့ ကောက်ခံခဲ့ရာက CKD စနစ်နဲ့ တင်သွင်းမယ့် လူစီးကားတွေကိုတော့ ၂၀၀၀ စီစီအောက်ဆို ၁၀ ရာခိုင်နှုန်း၊ ၂၀၀၀ စီစီ အထက်ဆို ရာခိုင်နှုန်း၂၀ နဲ့လျှော့ချကောက်ခံမှာပါ။ ဒီလိုတိုးမြှင့်လာတဲ့အခွန်နှုန်းတွေနဲ့ အမျိုးသားရင်ကြားစေ့တယ်ဆိုပြီး ဖွံ့ဖြိုးမှု မိတ်ဖက်ကြီးတွေရဲ့ အခွန်ရှောင်နေမှုတွေကို လျစ်လျူရှုထားမှုတွေဟာ လက်ရှိအချိန်မှာ မှန်ကန်နေရဲ့လားဆိုတာ အမြန်ဆုံး သုံးသပ်ဖို့ လိုအပ်လာပါပြီ။

လက်ရှိအချိန်မှာ NLD အစိုးရလက်ထက် အခွန်ရှောင်နေတဲ့ လုပ်ငန်းရှင်ကြီးတွေ၊ အခွန်မဆောင်တဲ့ လုပ်ငန်းရှင်ကြီးတွေကို စုံစမ်းဖော်ထုတ်ပြီး မှန်ကန်မျှတတဲ့ အခွန်ကောက်ခံနိုင်အောင် လုပ်ဆောင်တာမျိုးတွေကို ပြည်သူတွေက လိုလားနေတာ ဖြစ်ပါတယ်။ အခွန်ရှောင်နေသူတွေကို ဖော်ထုတ်အရေးယူမှု မပြုဘဲ မှန်ကန်စွာ ဆောင်နေသူတွေအပေါ် အခွန်ပိုကောက်တာတွေဟာ မမျှတတဲ့ အခွန်စနစ်ကို ဖြစ်ပွားစေရုံသာမက မမျှတတဲ့ ဈေးပိုင်ကွက်ပြိုင်ဆိုင်မှုကိုပါ ဖြစ်စေပြီး ပြည်သူတွေရဲ့အထင်မြင်လွဲမှုကိုပါ ခံရနိုင်ပါတယ်။

မြန်မာနိုင်ငံရဲ့ အချမ်းသာဆုံးပုဂ္ဂိုလ်တွေ စာရင်းကို ဖော်ပြထားတဲ့ Indapaper.com ကို သုံးသပ်ကြည့်ရင် သူတို့ရဲ့ဖော်ပြမှုဟာ ဘယ်လောက်အထိ ယုံကြည်စိတ်ချရမှု ရှိသလဲဆိုတာကိုတော့ အကဲဖြတ်နိုင်ဖို့ခက်ပါ တယ်။ ဒါပေမဲ့ Indapaper ဟာ အခြားနိုင်ငံတကာက ၂၀၁၇ ထိပ်တန်းအချမ်းသာဆုံး ပုဂ္ဂိုလ်တွေရဲ့စာရင်းကို ဖော်ပြထားမှုတွေ၊ အားကစားကဏ္ဍမှာရှိတဲ့ နာမည်ကျော်ပုဂ္ဂိုလ်တွေရဲ့ ချမ်းသာကြွယ်ဝမှုတွေကိုပါ ရေးသား ဖော်ပြထားတာကိုလည်း တွေ့ရပြန်ပါတယ်။

ဇင်ဘာဘွေ၊ တန်ဇန်းနီးယား စတဲ့နိုင်ငံတွေက ချမ်းသာကြွယ်ဝတဲ့ ထိပ်တန်းပုဂ္ဂိုလ်များ စာရင်းကိုပါ ဖော်ပြထားမှုများရှိနေတဲ့အပြင် မြန်မာနိုင်ငံအတွင်းမှာရှိတဲ့ ကမ္ဘာလှည့်ခရီးသည်တွေ စိတ်ဝင်စားဆုံးနေရာတွေကိုလည်း ရွေးချယ်ဖော်ပြထားတာ တွေ့ရပါတယ်။

ဒါကြောင့် လတ်တလော လူမှုကွန်ရက် စာမျက်နှာမှာ ပျံ့နှံ့လာတဲ့ Indapaper ရဲ့ မြန်မာနိုင်ငံမှာရှိတဲ့ အချမ်းသာဆုံးပုဂ္ဂိုလ် ၁၀ ဦးစာရင်းဖော်ပြမှုဟာ စိတ်ဝင်စားစရာ ဖြစ်စေပြီး ဖော်ပြထားတဲ့ အချက်အလက်တွေရဲ့ မှန်ကန်နိုင်မှု အပေါ်လည်း အငြင်းပွားဝေဖန်စရာတွေ ဖြစ်စေခဲ့ပါတယ်။ ဒါပေမဲ့ ဒီလိုထွက်ပေါ်လာမှုတွေအရ မြန်မာနိုင်ငံမှာ ရှိနေတဲ့ အချမ်းသာဆုံး ပုဂ္ဂိုလ်တွေရဲ့ ပိုင်ဆိုင်မှု အခြေအနေ၊ သူတို့ရဲ့လုပ်ငန်းတွေနဲ့အတူ အခွန်ထမ်းဆောင်မှုတွေအပေါ် စိတ်ဝင်စားမှုမြင့် တက်စေခဲ့ပါတယ်။ ဒါ့အပြင် အစိုးရရဲ့အခွန် ပေါ်လစီနဲ့အတူ မြန်မာ့ထိပ်တန်းချမ်းသာကြွယ်၀ သူတွေရဲ့အခြေအနေ၊ ပိုင်ဆိုင်မှုနဲ့ တိုင်းပြည်အတွက် အရေးကြီးတဲ့ အခွန်ထမ်းဆောင်မှုတွေအပေါ် စနစ်တကျ စိစစ် ဆောင်ရွက်မှုတွေကိုလည်း ပွင့်လင်းမြင်သာစွာ ချပြနိုင်ဖို့ လိုအပ်မှာ အမှန်ပဲဖြစ်ပါတယ်။