Weekly Eleven ဂျာနယ်မှ အယ်ဒီတာချုပ် အပါအ၀င် သုံးဦးအား တရားစွဲဆိုထားမှုနှင့် ပတ်သက်၍ နိုင်ငံတော်သမ္မတ လမ်းညွှန်မှုဖြင့် ရန်ကုန်တိုင်းဒေသကြီး အစိုးရအဖွဲ့က သတင်းမီဒီယာကောင်စီသို့ လာရောက်တိုင်ကြား

Weekly Eleven ဂျာနယ်မှ အယ်ဒီတာချုပ် အပါအ၀င် သုံးဦးအား အောက်တိုဘာ ၁၇ ရက်က ရုံးထုတ်ခဲ့စဉ်နှင့် လူမှုကွန်ရက်တွင် အောက်တိုဘာ ၁၈ ရက်က ပျံ့နှံ့လာသည့် ပြည်ထောင်စုအစိုးရအဖွဲ့၏ စာအား တွေ့ရစဉ်

Weekly Eleven ဂျာနယ်မှ အယ်ဒီတာချုပ် အပါအ၀င် သုံးဦးအား တရားစွဲဆိုထားမှုနှင့် ပတ်သက်၍ နိုင်ငံတော်သမ္မတ လမ်းညွှန်မှုဖြင့် ရန်ကုန်တိုင်းဒေသကြီး အစိုးရအဖွဲ့က သတင်းမီဒီယာကောင်စီသို့ လာရောက် တိုင်ကြားခဲ့ကြောင်း မြန်မာနိုင်ငံ စာနယ်ဇင်းကောင်စီမှ ဦးမြင့်ကျော်က ပြောကြားသည်။

အောက်တိုဘာ ၁၇ ရက် ရက်စွဲဖြင့် ပြည်ထောင်စု အစိုးရအဖွဲ့ရုံးက Weekly Eleven ဂျာနယ်ပါ ဆောင်းပါးနှင့် ပတ်သက်ပြီး ဆောင်ရွက်ထားရှိမှု အခြေအနေ တင်ပြသည့်ကိစ္စအား ရန်ကုန်တိုင်း အစိုးရအဖွဲ့ရုံးသို့ ညွှန်ကြားချက် တစ်စောင် ထုတ်ပြန်ခဲ့သည်။

ယင်းညွှန်ကြားချက်တွင် ရှေးဦးစွာ မြန်မာနိုင်ငံ သတင်းမီဒီယာကောင်စီသို့ တိုင်ကြားရန်၊ မြန်မာနိုင်ငံ သတင်းမီဒီယာကောင်စီသည် နှစ်ဖက်တွေ့ဆုံညှိနှိုင်း ဖြေရှင်းပေးရန်၊ ညှိနှိုင်းရာတွင် ပြေလည်မှုမရှိပါက တိုင်ကြားသူ (သို့မဟုတ်) ကျေနပ်မှု မရှိသူသည် သက်ဆိုင်ရာ တရားရုံးတွင် ဥပဒေနှင့်အညီ တရားစွဲဆိုရန် နိုင်ငံတော်သမ္မတက လမ်းညွှန်မှုပြုထားကြောင်း ဖော်ပြထားသည်။

ယင်းညွှန်ကြားစာမှာ မှန်ကန်ကြောင်း နိုင်ငံတော်သမ္မတရုံး ညွှန်ကြားရေးမှူးချုပ် ဦးဇော်ဌေးက အတည်ပြုခဲ့သည်။

“ တိုင်းဒေသကြီး အစိုးရအဖွဲ့က ပြည်ထောင်စုအစိုးရအဖွဲ့ကို တင်ပြတယ်။ တင်ပြတဲ့အပေါ်မှာ ပြည်ထောင်စု အစိုးရအဖွဲ့က နိုင်ငံတော်သမ္မတဆီက လမ်းညွှန်မှု ခံယူတယ်။ နိုင်ငံတော်သမ္မတရဲ့ လမ်းညွှန်မှုကို ပြည်ထောင်စု အစိုးရအဖွဲ့က ပြန်ပြီး လမ်းညွှန်ထားတယ်။ အသေးစိတ်ကတော့ တိုင်းအစိုးရအဖွဲ့ကို မေးလိုက်ပေါ့နော်။ အဓိက ကတော့ တရားစွဲတာနဲ့ ပတ်သက်လို့ ဘယ်လို ဘယ်လို လုပ်ရမယ်ဆိုတာကို လမ်းညွှန်ထားတာပေါ့။ ရန်ကုန်တိုင်း တစ်ခုတည်းကို” ဟု ဦးဇော်ဌေးက ပြောကြားသည်။

ယင်းသို့ ညွှန်ကြားအပြီး နောက်တစ်ရက် (အောက်တိုဘာ ၁၈ ရက်) တွင် ရန်ကုန်တိုင်းဒေသကြီး အစိုးရအဖွဲ့က သတင်းမီဒီယာကောင်စီသို့ လာရောက် တိုင်ကြားခဲ့ရာ အမှုရုပ်သိမ်းပြီးမှသာ ကောင်စီအနေဖြင့် ဖြေရှင်းပေးနိုင်မည်ဟု အကြောင်းပြန်ကြားခဲ့ကြောင်း မြန်မာနိုင်ငံ သတင်းမီဒီယာကောင်စီမှ ဦးမြင့်ကျော် ကပြောကြားသည်။

မြန်မာနိုင်ငံ သတင်းမီဒီယာကောင်စီသို့ လာရောက် တိုင်ကြားသူသည် ရန်ကုန်တိုင်းဒေသကြီး အစိုးရအဖွဲ့မှ ညွှန်ကြားရေးမှူး ဦးအောင်ကျော်ခိုင် ဖြစ်ကြောင်း၊ ကောင်စီ၏ တိုင်ကြားစာပုံစံ အပြည့်အစုံ ဖြည့်စွက်ခဲ့ခြင်း မရှိသဖြင့် ကောင်စီ၏ တိုင်ကြားစာပုံစံအား ပေးလိုက်ကြောင်း၊ ယင်းတိုင်ကြားစာအား သတင်းမီဒီယာကောင်စီရုံး မပိတ်မီ လာရောက် ပေးအပ်ခဲ့ကြောင်း ဦးမြင့်ကျော်က ပြောကြားသည်။

“ တိုင်ကြားစာကို ရုံးမပိတ်မီ လာပေးသွားတယ်။ ဦးအောင်ကျော်ခိုင် ကိုယ်တိုင် လာပေးသွားတာပါ” ဟု ဦးမြင့်ကျော်က ပြောကြားသည်။

မြန်မာနိုင်ငံ သတင်းမီဒီယာကောင်စီ နည်းဥပဒေအရ တရားရုံးတွင် တိုင်ကြားထားသည့် ဖြစ်စဉ်များကို ရုပ်သိမ်းပြီးမှသာ ကောင်စီအနေဖြင့် ကြားဝင် ဆောင်ရွက်ရမည်ဟု ပြဋ္ဌာန်းထားသဖြင့် အမှုများကို ရုပ်သိမ်းပေးရမည် ဖြစ်ကြောင်း ဦးမြင့်ကျော်က ဆက်လက် ပြောကြားသည်။

“မရုပ်သိမ်းရသေးဘဲနဲ့ ဘယ်လို ဖြေရှင်းပေးရမလဲ ဆိုတာကတော့ အခက်အခဲ ရှိသေးတယ်” ဟု မြန်မာနိုင်ငံ သတင်းမီဒီယာကောင်စီမှ ဦးမြင့်ကျော်က ပြောကြားသည်။

Eleven Media Group အနေဖြင့် အယ်ဒီတာချုပ် အပါအ၀င် သုံးဦး တရားစွဲဆို ဖမ်းဆီးခံရသည့် အောက်တိုဘာ ၁၀ ရက်တွင် မြန်မာနိုင်ငံ သတင်းမီဒီယာကောင်စီသို့ “ မီဒီယာသမားများအား ပုဒ်မ ၅၀၅ (ခ) ဖြင့် တရားစွဲဆိုခြင်းအား ကြားဝင် ဆောင်ရွက်ပေးနိုင်ပါရန် တင်ပြခြင်း” ဟု အကြောင်းကြားစာ ပေးပို့ခဲ့သည်။

ယင်းသို့ ပေးပို့ထားမှုနှင့် ပတ်သက်ပြီး မြန်မာနိုင်ငံ သတင်းမီဒီယာကောင်စီရုံးမှ အောက်တိုဘာ ၁၉ ရက် (ယနေ့) တွင် ဖိတ်ကြားထားပြီး ယင်းသို့ တင်ပြထားခြင်းနှင့် ပတ်သက်ပြီး ဆွေးနွေးမည် ဖြစ်ကြောင်း သိရသည်။

အောက်တိုဘာ ၁၇ ရက်တွင် Weekly Eleven မှ အယ်ဒီတာချုပ် ဦးကျော်ဇောလင်း၊ တာဝန်ခံ အယ်ဒီတာ ဒေါက်တာမင်းလွင်(ခ)နရီမင်း၊ သတင်းထောက်ချုပ် ကိုဖြိုးဝေ(ခ)ဖြိုးေ၀၀င်းတို့အား တရားရုံး၌ ပုဒ်မ ၅၀၅ (ခ) ဖြင့် တရားစွဲဆိုခဲ့သည့် တရားလိုဖြစ်သူ ရန်ကုန်တိုင်းဒေသကြီး အစိုးရအဖွဲ့ ညွှန်ကြားရေးမှူး ဦးအောင်ကျော်ခိုင်အား စတင်စစ်ဆေးခဲ့သည်။

ထိုသို့စစ်ဆေးရာ အောက်တိုဘာ ၈ ရက်ထုတ် Weekly Eleven ဂျာနယ်၏ ဆောင်းပါးတွင် ရေးသား ဖော်ပြထားသည့်အတိုင်း Yangon Metropolitan Development အများပိုင်ကုမ္ပဏီတွင် ဦးမြင့်သောင်း အမည်ဖြင့် ထည့်ဝင်ထားသည်ဟု ရေးသားထားမှုမှာ မဟုတ်မှန်ကြောင်း၊ ဦးမြင့်သောင်းမှာ ရန်ကုန်တိုင်းဒေသကြီး အစိုးရအဖွဲ့ကိုယ်စား ယင်းကုမ္ပဏီတွင် ရှယ်ယာဝင်ထားခြင်း ဖြစ်ကြောင်း၊ ပြည်သူ့ဘဏ္ဍာ ရှယ်ယာများကို ဦးမြင့်သောင်း၏ လူနာမည်ပေါက်ဖြင့် ရှယ်ယာဝင်ထားခြင်း မဟုတ်ကြောင်း ဦးအောင်ကျော်ခိုင်က ထွက်ဆိုခဲ့သည်။

တရားစွဲဆိုရခြင်းမှာ အောက်တိုဘာ ၈ ရက်ထုတ် ဂျာနယ်တွင် ရေးသားဖော်ပြခဲ့သော ဆောင်းပါးကြောင့် Yangon Metropolitan Development အများပိုင် ကုမ္ပဏီတွင် အစုရှယ်ယာ ထည့်ဝင်ထားသည့် မြန်မာ့ဆောက်လုပ်ရေးဖွံ့ ဖြိုးရေးနှင့် အများနှင့် သက်ဆိုင်သော ကုမ္ပဏီမှ တာဝန်ရှိသူများ၊ အစုရှယ်ယာရှင်များ၏ စိတ်တွင် ထိတ်လန့်ခြင်း၊ ကြောက်ခြင်းများ ဖြစ်ပေါ်စေပြီး ထူထောင်ထားသော အများပိုင်ကုမ္ပဏီကို အများပြည်သူ အယုံအကြည်မဲ့စေခြင်းတို့အပြင် တိုင်းအစိုးရအဖွဲ့ကို အကြည်ညိုပျက်စေပြီး အယုံအကြည်မဲ့ကာ အများပြည်သူက အစိုးရကို ပြစ်မှုကျူးလွန်ခြင်း လာအောင် ပြုလုပ်သည့်အတွက် ယခုကဲ့သို့ တရားစွဲဆိုရခြင်း ဖြစ်ကြောင်း ထွက်ဆိုခဲ့သည်။

အောက်တိုဘာ ၁၇ ရက် ရုံးချိန်းတွင် စွပ်စွဲခံရသူများဘက်မှ အာမခံ လျှောက်ထားခဲ့သည်။

စွပ်စွဲခံရသူများမှာ ပုဒ်မ ၅၀၅ (ခ) ဖြင့် တရားစွဲခံထားရပြီး ယင်းပုဒ်မမှာ အာမခံပေးခွင့် မရသည့် အမှုဖြစ်သော်လည်း ရာဇ၀တ် ကျင့်ထုံးဥပဒေ ပုဒ်မ ၄၉၇ (၁) တွင် “ တရားခံအပေါ် စွပ်စွဲထားသော ပြစ်မှုသည် သေဒဏ် (သို့မဟုတ်) တစ်သက်တစ်ကျွန်း ကျခံထိုက်သော ပြစ်မှုမျိုး မဟုတ်ပါက အာမခံပေးခွင့်ရှိဟု ပြဋ္ဌာန်းထားကြောင်း၊ စွပ်စွဲခံရသူများဖြစ် သည့် ဦးကျော်ဇောလင်းနှင့် ဦးနရီမင်းတို့မှာ Eleven Media Group ၏ တာဝန်အရှိဆုံး ပုဂ္ဂိုလ်များထဲတွင် အပါအ၀င်ဖြစ်ပြီး ဦးဖြိုးဝေ သည်လည်း သတင်းထောက်ချုပ်အဖြစ် တာဝန်ယူထားသူ ဖြစ်ကြောင်း၊ အချုပ်လွတ် ထုချေခွင့်ပြုမှသာ အများပြည်သူအကျိုးအတွက် သတင်းနှင့် ပတ်သက်သည့် ကိစ္စရပ်များကို ဆက်လက် ဆောင်ရွက်နိုင်မည်ဖြစ်ကြောင်း လျှောက်ထားခဲ့သည်။

ယင်းအပြင် စွပ်စွဲခံရသူများမှာ ထွက်ပြေးတိမ်းရှောင်မည့်သူများ မဟုတ်သည့်အပြင် ရုံးတော်မှ ချိန်းဆိုသော နေ့များတွင်လည်း ရုံးချိန်းမှန်ကန်စွာ လာရောက်မည့်သူများဖြစ်ပြီး ရုံးတော်မှ တောင်းဆိုသည့် ခံဝန်များကိုလည်း ပေးသွင်းနိုင်သူများ ဖြစ်ကြောင်း၊ ထို့ပြင် အမှုကိစ္စတွင်လည်း သက်သေများကို မလျော်သြဇာသုံးပြီး ဖျက်ဆီးမည့် သူများလည်း မဟုတ်ကြောင်း လျှောက်ထားခဲ့သည်။

စွပ်စွဲခံရသူများမှာ တရားစွဲဆို ခံရသည့် အမှုကိစ္စတွင်လည်း လိုအပ်သည့် သတင်းအချက်အလက်များ ရရှိရန်အတွက် အာမခံရရှိမှသာ ကောင်းစွာရှာဖွေ စီစဉ်ထုချေနိုင်မည် ဖြစ်ရာ အမှန်တရားဆုံးဖြတ်ရာ၌ အထောက်အကူပြုမည် ဖြစ်ကြောင်း၊ အချုပ်လွတ် ထုချေခွင့်မပြုဘဲ အချိန်ကြာမြင့်စွာ ချုပ်နှောင်ထားမည်ဆိုပါက ကြိုတင် အပြစ်ပေးရာလည်း ရောက်ကြောင်း စွပ်စွဲခံရသူများဘက်မှတရား လွှတ်တော်ရှေ့နေ ဦးကြီးမြင့်က လျှောက်ထားခဲ့သည်။

ပုဒ်မ ၅၀၅ (ခ) ဖြင့် တရားစွဲဆို ခံရသော်လည်း အာမခံပေးခဲ့သည့် အမှုများမှာ လွိုင်ကော်မြို့နယ် တရားရုံး ရာဇ၀တ်ကြီးမှုအမှတ် ၁၄၆/ ၂၀၁၈ အမှုတွင် စွပ်စွဲခံရသူ ခုနစ်ဦးအား လည်းကောင်း၊ ယခင် ရန်ကုန်တိုင်းဝန်ကြီးချုပ် ဦးမြင့်ဆွေ လက်ထက်တွင် လျှပ်တစ်ပြက်ဂျာနယ် အယ်ဒီတာချုပ် ဦးမြတ်ခိုင်ကို လည်းကောင်း အချုပ်လွတ် ထုချေခွင့်ပြုခဲ့သည့် သာဓကများကို လျှောက်ထား တင်သွင်းခဲ့သည်။

လာမည့် ရုံးချိန်းကို အောက်တိုဘာ ၂၆ ရက်သို့ ထပ်မံ ချိန်းဆိုခဲ့ပြီး ယင်းရုံးချိန်းတွင် တရားလိုဖြစ်သည့် ရန်ကုန်တိုင်းဒေသကြီးအစိုးရအဖွဲ့ ညွှန်ကြားရေးမှူး ဦးအောင်ကျော်ခိုင် အား ဆက်လက် စစ်ဆေးမည်ဖြစ်ကာ တရားစွဲဆို ခံရသူသုံးဦးအား အချုပ်ထုချေခွင့် ပေး၊ မပေး အမိန့်ချမှတ်မည် ဖြစ်ကြောင်း သိရသည်။

သတင်းမီဒီယာ ဥပဒေပုဒ်မ ၂၁ တွင် နစ်နာသောဌာန၊ အဖွဲ့အစည်း သို့မဟုတ် ပုဂ္ဂိုလ်သည် သတင်းမီဒီယာတစ်ဦးက ပုဒ်မ ၉ တွင် ပြဌာန်းထားသည့် တာဝန်နှင့် ကျင့်ဝတ်သိက္ခာ တစ်ရပ်ရပ်ကို ချိုးဖောက်ကြောင်း ယူဆလျှင် ရှေးဦးစွာ ကောင်စီသို့ တိုင်ကြားနိုင်ကြောင်း ဖော်ပြထားသည်။

အမြန်လမ်းတွင် ယာဉ်မတော်တဆဖြစ်ပွားမှုကြောင့် ယာဉ်ပေါ်လိုက်ပါလာသော ကျောက်ဂူဆရာတော် ပျံလွန်တော်မူပြီး အမျိုးသားတစ်ဦး အခင်းဖြစ်နေရာတွင် သေဆုံး

အမြန်လမ်းမကြီးရဲတပ်ဖွဲ့မှူးရုံး Facebook

အောက်တိုဘာ ၁၈ ရက်နေ့၊ မနက် ၉ နာရီကျော်က ရန်ကုန်-မန္တလေး အမြန်လမ်းမကြီး မိုင်တိုင် (၃၁၀) မိုင်၊ သုံးဖာလုံကျော်တွင် ယာဉ်မတော်တဆမှု ဖြစ်ပွားခဲ့ပြီး ကားတစ်စီး တိမ်းမှောက်ခဲ့ရာ ယာဉ်ပေါ်လိုက်ပါလာသော ကျောက်ဂူဆရာတော်မှာ အခင်းဖြစ်နေရာတွင် ပျံလွန်တော်မှုခဲ့ပြီး အမျိုးသားတစ်ဦး နေရာတွင် သေဆုံးခဲ့ကြောင်း သိရှိရသည်။

ဖြစ်စဉ်မှာ အောက်တိုဘာ ၁၈ ရက်နေ့ မနက် ၉ နာရီကျော်က ဂန့်ဂေါမြို့နယ်၊ လက်ပံကျေးရွာ ယာဉ်မောင်း ညိုထူး အသက် ၃၉ နှစ်နေသူ မောင်းနှင်သော 1P/—- T0Y0TA LEXUS အနက်ရောင်ယာဉ်သည် ရန်ကုန်-မန္တလေးလမ်းမ အမြန်လမ်းမကြီးအတိုင်း ရန်ကုန်ဘက်မှ မန္တလေးဘက်သို့ မောင်းနှင်နေစဉ် အမြန်လမ်းမ မိုင်တိုင်အမှတ် (၃၁၀) မိုင် သုံးဖာလုံ ကျော်အရောက်တွင် အရှိန်းမထိန်းနိုင်ပဲ လမ်းလက်ယာဘက်ခြမ်း တောင်စောင်းအား တိုက်မိသွားခဲ့ခြင်းဖြစ်ကြောင်း သိရသည်။

အဆိုပါ ယာဉ်မတော်တဆမှုကြောင့် ယာဉ်ပေါ်လိုက်ပါလာသော ဆရာ​တော် ​ဥူးကဣန္ဒာစရိယ ကျောက်ဂူဆရာတော်မှာ အခင်းဖြစ်နေရာတွင် ပျံလွန်တော်မူပြီး ယာဉ်ပေါ်လိုက်ပါလာသော ပုလဲမြို့နယ်၊ ဇိပ်ထောက်ကျေးရွာနေ ဦးစန်းကို အသက် ၄၂ နှစ်မှာ ဒဏ်ရာများရရှိပြီး အခင်းဖြစ်နေရာတွင် သေဆုံးသွားခဲ့ကြောင်း ကနဦး သတင်းသိရသည်။

ပြင်စည်မီးသတ်

“ကျွန်တော်တို့ ပြင်စည်မီးသတ်စခန်းက တပ်ဖွဲ့ဝင် ငါးယောက် ကားတစ်စီးနဲ့ သွားကူညီခဲ့တယ်၊ ကားက ရန်ကုန်ဘက်ကနေ မန္တလေးဘက်ကို အသွားမှာ လမ်းညာဘက်က တောင်စောင်းကို သွားတိုက်မိသွားတယ်၊ ကျွန်တော်တို့ ရောက်တော့ ဆရာတော်က ပျံလွန်တော်မူသွားပြီ၊ နေရာတင် ပျံလွန်တော်မူတယ်၊ အမျိုးသား တစ်ဦးလည်း နေရာတင် သေဆုံးသွားတယ်၊ ကားပေါ်မှာ ဆရာတော် တစ်ပါးနဲ့ အမျိုးသား သုံးယောက် ပါလာတယ်၊ အသေးစိတ်တွေကတော့ ကျွန်တော်တို့ မေးတုံးပဲ ရှိသေးတယ်၊ လုပ်ငန်းက မပြီးပြတ်သေးဘူး၊ အခုလည်း အခင်းဖြစ်နေရာမှာ ရောက်နေတယ်၊ အကူအညီတွေ အရင်လုပ်နေရတယ်” ဟု ပြင်စည်မီးသတ်စခန်း တာဝန်ရှိသူ တစ်ဦးမှ အောက်တိုဘာ ၁၈ ရက်နေ့ မွန်းလွဲပိုင်းက ပြောကြားသည်။

အဆိုပါ ယာဉ်မတော်တဆမှုအား ပြင်စည် အမြန်လမ်း ရဲတပ်ဖွဲ့စခန်းမှ (ပ) ၁၅ /၂၀၁၈ ရာဇသတ်ကြီးပုဒ်မ ၃၀၄(က)ဖြင့် အမှု့ဖွင့် စစ်ဆေးဆောင်ရွက် လျက်ရှိကြောင်း သိရသည်။

Weekly Eleven ဂျာနယ် အယ်ဒီတာချုပ် အပါအ၀င် သုံးဦးအား ရန်ကုန်တိုင်းဒေသကြီး အစိုးရအဖွဲ့က ပုဒ်မ ၅၀၅ (ခ) ဖြင့် တရားစွဲထားသည့် အမှုတွင် တရားလိုအား စတင်စစ်ဆေးပြီး အာမခံလျှောက်ထားမှုကို လာမည့်ရုံးချိန်း၌ အမိန့်ချမည်

Weekly Eleven ဂျာနယ် အယ်ဒီတာချုပ် အပါအ၀င် သုံးဦးအား အောက်တိုဘာ ၁၇ ရက် ရုံးထုတ်တွင် တွေ့ရစဉ် (ဓာတ်ပုံ-နေ၀န်းထက်)

Weekly Eleven ဂျာနယ် အယ်ဒီတာချုပ် အပါအ၀င် သုံးဦးအား ရန်ကုန်တိုင်းဒေသကြီး အစိုးရအဖွဲ့မှ ပုဒ်မ ၅၀၅(ခ) ဖြင့် တရားစွဲထားသည့် အမှုတွင် တရားလိုအား စတင်စစ်ဆေးခဲ့ပြီး အာမခံလျှောက်ထားမှုလာမည့် ရုံးချိန်းတွင် အမိန့်ချမှတ်မည် ဖြစ်ကြောင်း တာမွေမြို့နယ် တရားရုံးမှ သိရသည်။

အောက်တိုဘာ ၁၇ ရက် ရုံးချိန်းတွင်မှ Weekly Eleven ဂျာနယ် အယ်ဒီတာချုပ် ဦးကျော်ဇောလင်း၊ တာဝန်ခံ အယ်ဒီတာ ဒေါက်တာ မင်းလွင်(ခ)နရီမင်း၊ သတင်းထောက်ချုပ် ကိုဖြိုးဝေ(ခ) ဖြိုးေ၀၀င်းတို့အား ပုဒ်မ ၅၀၅(ခ) ဖြင့် တရားစွဲဆိုခဲ့သည့် တရားလိုဖြစ်သူ ရန်ကုန်တိုင်းဒေသကြီး အစိုးရအဖွဲ့ ညွှန်ကြားရေးမှူး ဦးအောင်ကျော်ခိုင်အား စတင်စစ်ဆေးခဲ့ပြီး စွပ်စွဲခံရသူများဘက်မှ အချုပ်လွတ် ထုချေခွင့်ပြုရန် အာမခံ လျှောက်ထားခဲ့သည်။

စွပ်စွဲခံရသူများမှာ ပုဒ်မ ၅၀၅ (ခ) ဖြင့် တရားစွဲခံထားရပြီး ယင်းပုဒ်မမှာ အာမခံပေးခွင့် မရသည့် အမှုဖြစ်သော်လည်း ရာဇ၀တ်ကျင့်ထုံး ဥပဒေပုဒ်မ ၄၉၇ (၁) တွင် “ တရားခံအပေါ် စွပ်စွဲထားသော ပြစ်မှုသည် သေဒဏ် (သို့မဟုတ်) တစ်သက်တစ်ကျွန်း ကျခံထိုက်သော ပြစ်မှုမျိုး မဟုတ်ပါက အာမခံပေးခွင့်ရှိဟု ပြဋ္ဌာန်းထားကြောင်း၊ စွပ်စွဲခံရသူများဖြစ်သည့် ဦးကျော်ဇောလင်းနှင့် ဦးနရီမင်းတို့မှာ Eleven Media Group ၏ တာဝန်အရှိဆုံး ပုဂ္ဂိုလ်များထဲတွင် အပါအ၀င်ဖြစ်ပြီး ဦးဖြိုးဝေ သည်လည်း သတင်းထောက်ချုပ်အဖြစ် တာဝန်ယူထားသူ ဖြစ်ကြောင်း၊ အချုပ်လွတ်ထု ချေခွင့်ပြုမှသာ အများပြည်သူအကျိုးအတွက် သတင်းနှင့် ပတ်သက်သည့် ကိစ္စရပ်များကို ဆက်လက် ဆောင်ရွက်နိုင်မည်ဖြစ်ကြောင်း လျှောက်ထားခဲ့သည်။

ယင်းအပြင် စွပ်စွဲခံရသူများမှာ ထွက်ပြေး တိမ်းရှောင်မည့်သူများ မဟုတ်သည့်အပြင် ရုံးတော်မှ ချိန်းဆိုသော နေ့များတွင်လည်း ရုံးချိန်းမှန်ကန်စွာ လာရောက်မည့်သူများဖြစ်ပြီး ရုံးတော်မှ တောင်းဆိုသည့် ခံဝန်များကိုလည်း ပေးသွင်းနိုင်သူများ ဖြစ်ကြောင်း၊ ထို့ပြင် အမှုကိစ္စတွင်လည်း သက်သေများကို မလျော်သြဇာသုံးပြီး ဖျက်ဆီးမည့်သူများလည်း မဟုတ်ကြောင်း လျှောက်ထားခဲ့သည်။

စွပ်စွဲခံရသူများမှာ တရားစွဲဆိုခံရသည့် အမှုကိစ္စတွင်လည်း လိုအပ်သည့် သတင်းအချက်အလက်များ ရရှိရန်အတွက် အာမခံရရှိမှသာ ကောင်းစွာရှာဖွေ စီစဉ်ထုချေနိုင်မည်ဖြစ်ရာ အမှန်တရား ဆုံးဖြတ်ရာ၌ အထောက်အကူပြုမည် ဖြစ်ကြောင်း၊ အချုပ်လွတ် ထုချေခွင့်မပြုဘဲ အချိန်ကြာမြင့်စွာ ချုပ်နှောင်ထားမည်ဆိုပါက ကြိုတင်အပြစ်ပေးရာလည်း ရောက်ကြောင်း စွပ်စွဲခံရသူများဘက်မှ တရားလွှတ်တော်ရှေ့နေ ဦးကြီးမြင့်က လျှောက်ထားခဲ့သည်။

ထိုသို့ လျှောက်ထားရာတွင် ပုဒ်မ ၅၀၅ (ခ) ဖြင့် တရားစွဲခံရသည့် အမှုများတွင် အာမခံပေးခဲ့သည့် အမှုများကိုလည်း သက်သေ သာဓကများဖြင့် ရုံးတော်သို့ တင်ပြခဲ့သည်။

ပုဒ်မ ၅၀၅ (ခ) ဖြင့် တရားစွဲဆို ခံရသော်လည်း အာမခံပေးခဲ့သည့်အမှုများမှာ လွိုင်ကော်မြို့နယ်တရားရုံး ရာဇ၀တ်ကြီးမှုအမှတ် ၁၄၆/၂၀၁၈ အမှုတွင် စွပ်စွဲခံရသူ ခုနစ်ဦးအား လည်းကောင်း၊ ယခင် ရန်ကုန်တိုင်းဝန်ကြီးချုပ် ဦးမြင့်ဆွေ လက်ထက်တွင် လျှပ်တပြက်ဂျာနယ် အယ်ဒီတာချုပ် ဦးမြတ်ခိုင်ကို လည်းကောင်း အချုပ်လွတ် ထုချေခွင့်ပြုခဲ့သည့် သာဓကများကို လျှောက်ထား တင်သွင်းခဲ့သည်။

ယင်းနောက် တရားလို ဦးအောင်ကျော်ခိုင်အား စစ်ဆေးရာ အောက်တိုဘာ ၈ ရက်ထုတ် Weekly Eleven ဂျာနယ်တွင် ဖော်ပြထားသော ဆောင်းပါးတွင် Yangon Metropolitan Development Public အများပိုင်ကုမ္ပဏီတွင် ဦးမြင့်သောင်း အမည်ဖြင့် ထည့်ဝင်ထားသည်ဟု ရေးသားမှုမှာ မဟုတ်မှန်ကြောင်း၊ ဦးမြင့်သောင်းမှာ ရန်ကုန်တိုင်းဒေသကြီး အစိုးရအဖွဲ့ကိုယ်စား ယင်းကုမ္ပဏီတွင် ရှယ်ယာဝင်ထားခြင်း ဖြစ်ကြောင်း၊ ပြည်သူ့ဘဏ္ဍာ ရှယ်ယာများကို ဦးမြင့်သောင်း၏ အမည်ပေါက်ဖြင့် ရှယ်ယာဝင်ထားခြင်း မဟုတ်ကြောင်း တရားခွင်တွင် ဦးအောင်ကျော်ခိုင်က ထွက်ဆိုခဲ့သည်။

ယင်းဆောင်းပါးကြောင့် Yangon Metropolitan Development Public အများပိုင်ကုမ္ပဏီတွင် အစုရှယ်ယာ ထည့်ဝင်ထားသည့် မြန်မာ့ဆောက်လုပ်ရေးဖွံ့ဖြိုးရေး နှင့် အများနှင့်သက်ဆိုင်သောကုမ္ပဏီမှ တာဝန်ရှိသူများ၊ အစုရှယ်ယာရှင်များ၏ စိတ်တွင် ထိတ်လန့်ခြင်း၊ ကြောက်ခြင်းများ ဖြစ်ပေါ်စေပြီး ထူထောင်ထားသော အများပိုင်ကုမ္ပဏီကို အများပြည်သူ အယုံအကြည်မဲ့စေခြင်းတို့အပြင် တိုင်းအစိုးရအဖွဲ့ကို အကြည်ညိုပျက်စေပြီး အယုံအကြည်မဲ့ကာ အများပြည်သူက အစိုးရကို ပြစ်မှုကျူးလွန်ချင်လာအောင် ဖြစ်သည့်အတွက် တရားရုံးတွင် ဦးတိုက်လျှောက်ထားရခြင်း ဖြစ်ကြောင်း ဦးအောင်ကျော်ခိုင်က ထွက်ဆိုခဲ့သည်။

ယင်းသို့ ညွှန်ကြားရေးမှူး ဦးအောင်ကျော်ခိုင် ထွက်ဆိုနေစဉ် တရားခွင်ရှိ ဥပဒေအရာရှိက ထွက်ဆိုချက်အချို့အား ကြိုတင်ဖတ်ပြနေမှုကို စွပ်စွဲခံရသူများ၏ ရှေ့နေ ဦးကြီးမြင့်က တရားခွင်၌ ကန့်ကွက်ခဲ့သဖြင့် တရားသူကြီးက တရားလိုတစ်ဦးသာ တိုက်ရိုက် ထွက်ဆိုပေးရန် ပြောကြားခဲ့သည်။

ယင်းနောက် တရားလို ဦးအောင်ကျော်ခိုင်က စာရွက်စာတမ်းကို တာမွေတရားရုံးသို့ တင်ပြခဲ့သည်။

တရားလို ဦးအောင်ကျော်ခိုင် တင်ပြထားသော စာရွက်စာတမ်းများအား ဥပဒေအရာရှိမှ တရားရုံးသို့ သက်သေခံအဖြစ် တင်သွင်းခဲ့သည်ကို တွေ့ရသည်။

တရားရုံးသို့ တင်သွင်းသော သက်သေခံများမှာ Weekly Eleven ဂျာနယ်တွင် ရေးသားဖော်ပြခဲ့သော ဆောင်းပါး၊ အများပိုင်ကုမ္ပဏီမှအား ရင်းနှီးမြှုပ်နှံမှုကော်မရှင်က ခွင့်ပြုပေးထားသည့် စာရွက်စာတမ်းများ အစရှိသည် စာရွက်စာတမ်း ၃၁ ခုကို မိတ္တူများအဖြစ် တင်သွင်းခဲ့သည်။

ယင်းသို့ သက်သေခံအဖြစ် တင်သွင်းသည့် စာရွက်စာတမ်းများမှာ မူရင်း မဟုတ်သည့်အတွက် စွပ်စွဲခံရသူများ၏ ရှေ့နေ ဦးကြီးမြင့်က ကန့်ကွက်ခဲ့သည်။

“ တရားရုံးကို တင်သွင်းတဲ့ စာရွက်စာတမ်းတွေက မိတ္တူအဖြစ် တင်သွင်းတာကို လက်မခံပါဘူး။ တရားစွဲတဲ့သူက ညွှန်ကြားရေးမှူး တစ်ယောက်ဖြစ်တဲ့အတွက် ပေါ့လျော့လို့ မရပါဘူး။ တရားစွဲတဲ့သူဆိုတာ စာရွက်စာတမ်းကို ပြည့်ပြည့်စုံစုံ တင်သွင်းဖို့ လိုအပ်ပါတယ်။ အခု အမှုရင်ဆိုင်နေရတဲ့ သူတွေက အချုပ်ကျခံပြီး ရင်ဆိုင်နေရတာပါ” ဟု တရားလွှတ်တော်ရှေ့နေ ဦးကြီးမြင့်က တရားခွင်တွင် ကန့်ကွက်ပြောကြားသည်။

တရားစွဲဆို ခံရသူများမှာ အချုပ်ဖြင့် လာရောက် တရားရင်ဆိုင်ရသူများ ဖြစ်သဖြင့် တရားလိုက ရုံးချိန်းတွင် စာရွက် စာတမ်းမူရင်းများ မတင်ပြနိုင်ခြင်းအား တရားရုံး က မူရင်းများအား မတင်ပြဟု မှတ်ယူ သတ်မှတ်ပေးရန် လျှောက်ထားခဲ့သည်။
ယင်းသို့ လျှောက်ထားမှုနှင့် ပတ်သက်ပြီး တာမွေမြို့နယ် တရားသူကြီးက အမှုနှင့် ပတ်သက်သည့် တရားလိုဘက်မှ စာရွက်စာတမ်းများကို လာမည့် ရုံးချိန်း၌ မူရင်းများ တင်ပြရမည်ဟု ပြောကြားခဲ့သည်ကို တွေ့ရသည်။

ထို့နောက် လာမည့် ရုံးချိန်းကို အောက်တိုဘာ ၂၆ ရက်အဖြစ် သတ်မှတ်ပေးခဲ့ပြီး တရားလို ဦးအောင်ကျော်ခိုင်ကို ဆက်လက် စစ်ဆေးမည်ဖြစ်ကာ အချုပ်လွတ်ထုချေခွင့် ပေး၊ မပေးကို အမိန့်ချမှတ်မည်ဟု တရားသူကြီးက တရားခွင်၌ ပြောကြားခဲ့သည်။

သတင်းသမားတစ်ဦး သတင်းရေးသားခြင်းမှာ ဆန်းကြယ်သည့်ကိစ္စ မဟုတ်ဘဲ ၎င်းတို့အား ဖြေရှင်းခွင့်ပေးရမည် ဖြစ်ကြောင်း၊ အာမခံပေး မပေးဆိုသည်မှာ တရားသူကြီး၏ ဆင်ခြင်တုံတရားပေါ်တွင် မူတည်ကြောင်း တရားလွှတ်တော်ရှေ့နေ ဦးကြီးမြင့်က ပြောကြားသည်။

“ သူတို့ရဲ့ လုပ်ပိုင်ခွင့် သူတို့ရဲ့ ဆင်ခြင်တုံတရားကို ဘယ်လောက်ထိ သုံးမလဲဆိုတာကို စောင့်ကြည့်ရမှာပေါ့။ သို့သော်လည်း ဒီအမှုဟာ အာမခံပေးမယ်ဆိုရင် ပေးသင့်တဲ့အမှုပဲ။ သတင်းသမား တစ်ယောက် သတင်းရေးတာ ဘာဆန်းလဲ။ သူ့ကို ဖြေရှင်းခွင့်ပေးရမယ်။ အဲဒီကြားထဲမှာ အချုပ်လွတ်ဖြေရှင်းခွင့် ပေးရမှာပေါ့။ ပြီးတော့ အဆင့်ကလည်းပဲ အယ်ဒီတာချုပ် အဆင့်တွေလေ။ အဲဒါကြောင့်မို့လို့ တရားရုံးအနေနဲ့ မှန်မှန်ကန်ကန် ဆင်ခြင်တုံတရားကို သုံးမယ်။ အကြောက်တရား၊ ဘယဘေး မရှိဘူးဆိုရင်တော့ ဒီအမှုက အာမခံပေးသင့်တဲ့ အမှုပါပဲ” ဟု ဦးကြီးမြင့်က ပြောကြားသည်။

အောက်တိုဘာ ၁၇ ရက် ရုံးချိန်းတွင် မီဒီယာအချို့ကလည်း တိုက်ရိုက် သတင်းတင်ဆက်မှုများ ပြုလုပ်ခဲ့သည်ကို တွေ့ရပြီး တရားရုံးရှေ့တွင်လည်း လူပုဂ္ဂိုလ်အချို့က “ ကြည်ညိုပါသည်” ဟု ရေးသားထားသော ဗီနိုင်းကို အင်္ကျီများတွင် ချိတ်ဆွဲကာ ဆန္ဒထုတ်ဖော်မှုများ ပြုလုပ်ခဲ့သည်ကို တွေ့ရသည်။

အောက်တိုဘာ ၈ ရက်ထုတ် Weekly Eleven ဂျာနယ်တွင် ဖော်ပြထားသည့် “အမြဲရှုံးနေသည့် စက်သုံးဆီဆိုင်တွေ ပိတ်ရေး၊ ငွေချေးသူ ဘယ်သူမှန်း မသိသည့် ကျောင်းကား နှင့် လူအမည်ပေါက် ပြည်သူ့ရှယ်ယာ”သုံးသပ်ချက် ဆောင်းပါးနှင့် ပတ်သက်ပြီး ရန်ကုန်တိုင်းဒေသကြီး အစိုးရအဖွဲ့ကို အများပြည်သူက အစိုးရကို ပြစ်မှုကျူးလွန်ချင်လာအောင် ပြုလုပ်ခြင်းဖြစ်သည်ဟု ဆိုကာ ရန်ကုန်တိုင်းဒေသကြီး အစိုးရအဖွဲ့ ညွှန်ကြားရေးမှူး ဦးအောင်ကျော်ခိုင်က ပုဒ် ၅၀၅ (ခ)ဖြင့် တာမွေမြို့နယ် တရားရုံးတွင် တရားစွဲဆိုခဲ့သည်။

Eleven Media Group ၏ ဂျာနယ်လစ်များအား ဖမ်းဆီးမှုကို ရှုတ်ချကြောင်းနှင့် ချက်ချင်းပြန်လွှတ်ပေးရန် တောင်းဆိုကြောင်း ကမ္ဘာ့သတင်းစာနှင့် ထုတ်ဝေသူများအဖွဲ့ (WAN-IFRA) က ကြေညာချက်ထုတ်ပြန်

ကမ္ဘာ့သတင်းစာနှင့် ထုတ်ဝေသူများအဖွဲ့ (WAN-IFRA) က ထုတ်ပြန်ထားသည့် ကြေညာချက်ကို တွေ့ရစဉ်

Eleven Media Group မှ ဂျာနယ်လစ်သုံးဦးအား နိုင်ငံတော်အကြည်ညိုပျက်စေမှု ပုဒ်မ ၅၀၅(ခ) ဖြင့် ဖမ်းဆီးထိန်းသိမ်းထားမှုကို ရှုတ်ချကြောင်းနှင့် ၎င်းတို့အား ချက်ချင်းပြန်လွှတ်ပေးရန် တောင်းဆိုကြောင်း ကမ္ဘာ့သတင်းစာနှင့် ထုတ်ဝေသူများအဖွဲ့ (WAN-IFRA) က အောက်တိုဘာ ၁၆ ရက်တွင် ကြေညာချက်ထုတ်ပြန်ခဲ့သည်။

အောက်တိုဘာ ၈ ရက်ထုတ် Weekly Eleven ဂျာနယ်စာမျက်နှာ၂၆ တွင်ဖော်ပြ ထားသည့် “အမြဲရှုံးနေတဲ့ စက်သုံးဆီဆိုင်တွေ ပိတ်ရေး၊ ငွေချေးသူဘယ်သူမှန်းမသိတဲ့ ကျောင်းကားနဲ့ လူအမည်ပေါက် ပြည်သူ့ရှယ်ယာ” ဆောင်းပါးတွင် ရန်ကုန်တိုင်းဒေသကြီးအစိုးရ၏ အငြင်းပွားစီးပွားရေးလုပ်ငန်း အကြောင်း သတင်းဖော်ပြခဲ့မှုအတွက်  အယ်ဒီတာချုပ် ဦးကျော်ဇောလင်း၊ တာဝန်ခံအယ်ဒီတာ ဦးနရီမင်းနှင့် သတင်းထောက်ချုပ် ကိုဖြိုးေ၀၀င်းတို့အား ရန်ကုန်တိုင်းဒေသကြီး အစိုးရအဖွဲ့ညွှန်ကြားရေးမှူး ဦးအောင်ကျော်ခိုင်က အောက်တိုဘာ ၁၀ ရက်တွင် တရားစွဲဆိုခဲ့ခြင်း ဖြစ်သည်။

အာမခံမရနိုင်ဘဲ အမြင့်ဆုံးပြစ်ဒဏ် ထောင်ဒဏ်နှစ်နှစ်အထိကျခံနိုင်သော ပုဒ်မဖြင့် တရားစွဲဆိုခဲ့မှုကြောင့် မြန်မာနိုင်ငံအတွင်းတွင် ပြင်းထန်သောဝေဖန်မှုများ ပေါ်ပေါက်ခဲ့ပြီး ဒီမိုကရက်တစ်အစိုးရအဖွဲ့က မလျော်မကန်ပြင်းထန်စွာ လုပ်ဆောင်မှုအတွက်လည်း ရှုတ်ချခံနေရကြောင်း ကြေညာချက်က ဖော်ပြခဲ့သည်။

ရန်ကုန်တိုင်းဒေသကြီး စာရင်းစစ်ချုပ်၏ ၂၀၁၆-၂၀၁၇ ဘဏ္ဍာနှစ် စစ်ဆေးတွေ့ရှိချက် အစီရင်ခံစာကို ပြည်သူ့ငွေစာရင်း ကော်မတီ၏ လေ့လာတွေ့ရှိချက်နှင့် သဘောထားမှတ်ချက် အစီရင်ခံစာဆိုင်ရာ ဆွေးနွေးမှုတွင် ဘဏ္ဍာရေး တာဝန်ရှိမှုများဆိုင်ရာ ကိုင်တွယ်ဖြေရှင်းမှုများအတွက် ရန်ကုန်တိုင်းဒေသကြီး လွှတ်တော်ကိုယ်စားလှယ်များက ဆွေးနွေးခဲ့ကြကြောင်း၊ ပါလီမန်၏ ခွင့်ပြုချက်မပါဘဲ ပုဂ္ဂလိကဘဏ်နှစ်ခုမှ ချေးငွေရယူထားမှုများအကြောင်းကို ဆွေးနွေးခဲ့ကြောင်း ကြေညာချက်က ဖော်ပြခဲ့သည်။

မြန်မာနိုင်ငံတွင် လွတ်လပ်သောမီဒီယာကို ဖိနှိပ်ရန် ကြိုးပမ်းမှုအား (WAN-IFRA) က ရှုတ်ချကြောင်းနှင့် ထိန်းသိမ်းခံထားရသော ဂျာနယ်လစ်သုံးဦးအား ပြန်လွှတ်ပေးရန် တောင်းဆိုကြောင်း ကြေညာချက်က ဖော်ပြခဲ့သည်။ ထို့အပြင် သတင်းဖော်ပြမှုတွင် ပါဝင်သောအကြောင်းအရာများအတွက် စုံစမ်းစစ်ဆေးပေးရန် တောင်းဆိုကြောင်း ကြေညာချက်က ဆိုခဲ့သည်။ အများပြည်သူအကျိုးစီးပွားကို စောင့်ရှောက်ရန် ရည်ရွယ်သော ရေးသားမှုကို အပြစ်ပေးခြင်းထက် ဒီမိုကရက်တစ်အဖွဲ့အစည်းများကို  ထောက်ပံ့ရန်အတွက် လွတ်လပ်သော မီဒီယာ၏ အခန်းကဏ္ဍကို မြန်မာတာဝန်ရှိသူများက အသိအမှတ်ပြုရန် လိုအပ်ကြောင်း ကြေညာချက်က ဆိုသည်။

စုံစမ်းဖော်ထုတ်ရေးသားမှုကို အသံတိတ်စေရန် ပြင်းထန်သော ဥပဒေများနှင့် အပြစ်ပေးမှုများ အသုံးပြုခြင်းက မြန်မာနိုင်ငံသည် လွတ်လပ်စွာဖော်ထုတ်မှုကို လေးစားမှု နှင့် လွတ်လပ်သောမီဒီယာ ပေါ်ထွန်းရေးတို့ကို အလေးဂရုပြုရန် ခရီးဝေးနေသေးကြောင်း ဖော်ပြခြင်းဖြစ်သည်ဟု ကြေညာချက်က ဝေဖန်ခဲ့သည်။

(WAN-IFRA) သည် နိုင်ငံပေါင်း ၁၂၀ မှ သတင်းစာ ၁၈၀၀၀ ကို ကိုယ်စားပြုသော သတင်းစာနှင့် ထုတ်ဝေသူများအဖွဲ့ဖြစ်သည်။ ကုလသမဂ္ဂ၊ ယူနက်စကိုနှင့် ဥရောပကောင်စီတို့တွင် ကိုယ်စားလှယ်များရှိသော (WAN-IFRA) သည် နိုင်ငံ ၈၀ မှ ကိုယ်စားပြု အသင်းဝင်များနှင့်အတူ ထိပ်တန်းသတင်းစာ ကုမ္ပဏီကြီးများ၊ နည်းပညာစွန့်ဦးတီထွင်သူများ ချိတ်ဆက်ဖွဲ့စည်းထားသည့်အသင်း ဖြစ်သည်။

မီဒီယာကို ဖိနှိပ်ထိန်းချုပ်ရန်အတွက် ခေတ်မမီတော့သည့် ဖိနှိပ်မှုဥပဒေကို ဆက်လက်အသုံးပြုနေခြင်းက မြန်မာ့ဒီမိုကရေစီ နှင့် စာနယ်ဇင်းလွတ်လပ်ခွင့်ကို ထိခိုက်နစ်နာကြောင်း၊ နိုင်ငံတော်အကြည်ညိုပျက်စေမှုပုဒ်မ ၅၀၅ (ခ)ဖြင့် ဖမ်းဆီးထိန်းသိမ်းထားမှုကို ရှုတ်ချကြောင်းနှင့် ဖမ်းဆီးထားသူများအား ချက်ချင်းလွှတ်ပေးရန် ပြည်တွင်းမီဒီယာအဖွဲ့အစည်းများနှင့် ပြည်ပမီဒီယာအဖွဲ့အစည်းများဖြစ်သော ကမ္ဘာ့သတင်းစာနှင့်ထုတ်ဝေသူများအဖွဲ့ WAN-IFRA အဖွဲ့၊ အာရှသတင်းကွန်ရက် (Asia News Network ၊ နယ်စည်းမခြားသတင်းထောက်များအဖွဲ့ (RSF) ၊ အပြည်ပြည်ဆိုင်ရာဂျာနယ်လစ်များအဖွဲ့၊ PEN America စသည့်နိုင်ငံတကာ မီဒီယာအဖွဲ့အစည်းများက ကြေညာချက်များ ထုတ်ပြန်ထားကြောင်း သိရသည်။

လွှတ်တော်တွင် ဆွေးနွေးသည့် အစီရင်ခံစာများ၊ စာရွက်စာတမ်းများ၊ မှတ်တမ်းများ စသည်တို့နှင့်စပ်လျဉ်းပြီး တရားစွဲပိုင်ခွင့်မရှိစေရဟု ဖော်ပြထားသည့် ဖွဲ့စည်းပုံအခြေခံဥပဒေပုဒ်မ ၁၈၇ နှင့်ပတ်သက်၍ အခြေခံဥပဒေခုံရုံးသို့ တိုင်းဒေသကြီးလွှတ်တော် ဘဏ္ဍာရေး၊ စီမံကိန်းနှင့် စီးပွားရေးကော်မတီက မေးမြန်းမည်

စာရင်းစစ်ချုပ် အစီရင်ခံစာနှင့်ပတ်သက်၍ ဘဏ္ဍာရေး၊ စီမံကိန်းနှင့် စီးပွားရေးကော်မတီက ဆွေးနွေးမှု ပြုလုပ်နေစဉ် (Photo ; Kyaw Zay Ya Facebook)

လွှတ်တော်တွင် ဆွေးနွေးသည့် အစီရင်ခံစာများ၊ စာရွက်စာတမ်းများ စသည်တို့နှင့် စပ်လျဉ်းပြီး တရားစွဲပိုင်ခွင့်မရှိစေရဟု ဖော်ပြထားသည့် ဖွဲ့စည်းပုံအခြေခံဥပဒေ ပုဒ်မ ၁၈၇ နှင့် ပတ်သက်၍ အခြေခံဥပဒေခုံရုံးသို့ တိုင်းဒေသကြီးလွှတ်တော် ဘဏ္ဍာရေး၊ စီမံကိန်းနှင့် စီးပွားရေးကော်မတီက မေးမြန်းမည်ဖြစ်ကြောင်း ယင်းကော်မတီအတွင်းရေးမှူး ဒဂုံမြို့နယ် မဲဆန္ဒနယ်အမှတ် (၂) တိုင်းဒေသကြီးလွှတ်တော်ကိုယ်စားလှယ် ဦးကျော်ဇေယျက ပြောကြားသည်။

ရန်ကုန်တိုင်းဒေသကြီး အစိုးရအဖွဲ့ ၂၀၁၆-၂၀၁၇ အစိုးရအဖွဲ့ စာရင်းစစ်ချုပ် အစီရင်ခံစာနှင့် ပတ်သက်၍ တိုင်းဒေသကြီး လွှတ်တော်သတ္တမပုံမှန်အစည်းအဝေးပြီး မြောက်ခဲ့သော်လည်း အစိုးရအဖွဲ့က တုံ့ပြန်မှုမရှိခဲ့ကြောင်း၊ တုံ့ပြန်မှုမရှိသဖြင့် တိုင်းဒေသကြီးလွှတ်တော် ဘဏ္ဍာရေး၊ စီမံကိန်းနှင့် စီးပွားရေးကော်မတီအနေဖြင့် ဆက်လက်ဆောင်ရွက်သင့်သည့် ကိစ္စများနှင့် ပတ်သက်ပြီး အောက်တိုဘာ ၁၆ရက်တွင် ဆွေးနွေးခဲ့ကြောင်း သိရသည်။

“ အစည်းအဝေးပွဲမှာ ဆွေးနွေးတဲ့အထဲ မှာ ၂၀၀၈ အခြေခံဥပဒေမှာ ပုဒ်မ ၁၈၇ မှာ အငြင်းပွားဖွယ်ရာပေါ့။ လွှတ်တော်ဥက္ကဋ္ဌကနေတစ်ဆင့် အခြေခံဥပဒေဆိုင်ရာ ခုံရုံးကိုတင်မယ်။ ဥပမာ လွှတ်တော်ကနေ ဖြန့်ချိထုတ်ဝေတဲ့ အစီရင်ခံစာများ၊ လွှတ်တော်မှတ်တမ်းများနဲ့ စပ်လျဉ်းပြီး တရားစွဲဆိုပိုင် ခွင့်မရှိစေရဘူးဆိုပြီး ရေးထားတယ်။ အဲဒီစာသားက ဘယ်လိုအဓိပ္ပာယ်လဲ။ တိကျမှု မရှိတဲ့အတွက် အခြေခံဥပဒေခုံရုံး နေပြည်တော်ပေါ့။ ရန်ကုန်တိုင်းဒေသကြီးလွှတ်တော် ဥက္ကဋ္ဌကနေတစ်ဆင့် ဦးတို့ရေးရာ ကော်မတီကမေးဖို့ ဆုံးဖြတ်တယ်” ဟု ဦးကျော်ဇေယျက ပြောကြားသည်။

ထို့ပြင် အစီရင်ခံစာနှင့် ပတ်သက်ပြီး အပြင်တွင် တရားစွဲဆိုသည်များကို တွေ့မြင်နေရသဖြင့် ၂၀၀၈ အခြေခံဥပဒေ၊ ပုဒ်မ ၁၈၇ အဓိပ္ပာယ်ရှင်းလင်းရန်အတွက် အခြေခံ ဥပဒေခုံရုံးသို့ အကြံဥာဏ်တောင်းခံထားကြောင်း ဦးကျော်ဇေယျကပြောကြားသည်။

“ဒီနေ့အစည်းအဝေးရလဒ်ကတော့ ဒါပါပဲ။ အစိုးရက လုံးဝတုံ့ပြန်ခြင်းမရှိတဲ့အပေါ် ဘယ်လိုအရေးယူဆောင်ရွက်မလဲဆိုတာကို ဦးတို့ကော်မတီအနေနဲ့ လွှတ်တော်ဥက္ကဋ္ဌကနေတစ်ဆင့် ပြောမယ်။ အခြေခံ ဥပဒေခုံရုံးကို တင်ပြမယ်။ ဒါကမှားသည် မှန်သည်လေးပေါ့။ ပုဒ်မ ၁၈၇ မှာ တရားစွဲဆိုပိုင်ခွင့် မရှိစေရဆိုတာက လွှတ်တော်ကိုယ်စားလှယ်ပဲလား။ အဲဒါနဲ့ဆက်စပ်ပြီးတော့ ပြည်သူရော၊ မီဒီယာရော ခံစားခွင့်ရှိမှာလား။ အခြားသူတစ်ဦးတစ်ယောက်နဲ့ရော ဒီပုဒ်မကခံစား ခွင့်ရှိသလားဆိုတဲ့ သဘောထားကို မေးတာဖြစ်တယ်” ဟု ဦးကျော်ဇေယျက ဆိုသည်။

၂၀၀၈ ဖွဲ့စည်းပုံ အခြေခံ ဥပဒေပုဒ်မ ၁၈၇ တွင် တိုင်းဒေသကြီး သို့မဟုတ် ပြည်နယ်လွှတ်တော်ကသော်လည်းကောင်း၊  ယင်းလွှတ်တော်၏ အခွင့်အာဏာရသော်လည်းကောင်း၊ ဖြန့်ချိထုတ်ဝေသည့် အစီရင်ခံစာများ၊ စာရွက်စာတမ်းများ၊ လွှတ်တော် မှတ်တမ်းများနှင့် စပ်လျဉ်း၍ တရားစွဲဆိုပိုင်ခွင့်မရှိစေရဟု ဖော်ပြထားသည်။

 

တိုက်လေယာဉ်နှစ်စင်း မင်းဘူးမြို့နယ်အတွင်း ပျက်ကျခဲ့ပြီး လေယာဉ်မှူးနှစ်ဦး သေဆုံးကာ မင်းဘူးမြို့ နေအိမ်တစ်လုံးရှေ့တွင် စာရေးနေသည့် ပဉ္စမတန်းကျောင်းသူတစ်ဦး လေယာဉ်အပိုင်းအစ ထိမှန်သေဆုံး

အောက်တိုဘာ ၁၆ ရက် နံနက်ပိုင်းက မင်းဘူးမြို့နယ်အတွင်း ပျက်ကျခဲ့သည့် တိုက်လေယာဉ်နှစ်စင်းမှ အပိုင်းအစအချို့ကို တွေ့ရစဉ် (ဓာတ်ပုံ-အောင်သူငြိမ်း)

မကွေးတိုင်းဒေသကြီး မကွေးမြို့ လေတပ်စခန်းမှ တိုက်လေယာဉ်နှစ်စင်း အောက် တိုဘာ ၁၆ ရက် နံနက် ၇ နာရီ ၄၅ မိနစ်ခန့်က မင်းဘူးမြို့နယ်အတွင်း တစ်ချိန်တည်းနီးပါး ပျက်ကျခဲ့ပြီး လေယာဉ်မှူးနှစ်ဦး သေဆုံးကာ မင်းဘူးမြို့ အမှတ် (၁) ရပ်ကွက် နေအိမ်တစ်လုံးရှေ့တွင် စာရေးနေသည့် ပဉ္စမတန်းကျောင်းသူ တစ်ဦးလည်း လေယာဉ်အပိုင်းအစတစ်ခု ထိမှန်စိုက်ဝင်၍ သေဆုံးခဲ့ကြောင်း ဒေသခံများနှင့် မင်းဘူး (စကု) မြို့နယ် အမျိုးသား လွှတ်တော်ကိုယ်စားလှယ် ဦးတင်အောင်ထွန်း၏ ပြောကြားချက်အရ သိရသည်။

မင်းဘူးမြို့ စက္ကတဲဘုရားအနောက်ဘက် ဆားပွက်ချောင်း၏ ၀ဲဘက်ရှိ သောင်ခုံနှင့် ကိုင်းကွက်များပေါ်သို့ တိုက်လေယာဉ်တစ်စင်း ပျက်ကျခဲ့ပြီး လေယာဉ်ပေါ်ပါ ဗိုလ်ကြီးအဆင့်ရှိသူ တစ်ဦးကို လေထီးနှင့်အတူ လေယာဉ်အပျက်အစီးများအကြား ခန္ဓာကိုယ်အပိုင်းပိုင်းဖြစ်၍ တွေ့ရှိခဲ့ရကြောင်း သိရသည်။

ထိုလေယာဉ်သည် အဆိုပါကွင်းအတွင်းသို့ ပျက်မကျမီ မင်းဘူးမြို့ စင်္ကြံတောင်ပေါ်ရှိ ဆက်သွယ်ရေး တာဝါတိုင် အဖျားပိုင်းကို ၀င်တိုက်မိခဲ့ကြောင်း၊ တိုက်မိသည့် ဆက်သွယ်ရေးတာဝါတိုင်၏ သံထည်အပိုင်းအစများနှင့် လေယာဉ်အစိတ်အပိုင်းများသည် မင်းဘူးမြို့ အမှတ် (၁) ရပ်ကွက်ရှိ စက္ကတဲဘုရားလမ်းမပေါ် နေအိမ်တစ်လုံးနှင့် ကလေးငယ်များ စာသင်နေသည့် စာကျက်ဝိုင်းပေါ်များသို့ ကျရောက်ခဲ့ကြောင်း သိရသည်။ လေယာဉ်အပိုင်းအစများ ထိမှန်မှုကြောင့် နေအိမ်တစ်လုံး၏ ပြတင်းပေါက်နှင့် ကပန်းပျဉ်တစ်ချောင်း ကျိုးပျက်ခဲ့ကြောင်း၊ ထို့ပြင် လေယာဉ်အပိုင်းအစ တစ်ခုသည် မင်းဘူးမြို့ အမှတ် (၁) ရပ်ကွက်အတွင်း နေအိမ်တစ်လုံးရှေ့ရှိ စာကျက်ဝိုင်းမှ စားပွဲခုံပုတွင်ထိုင်၍ စာရေးနေသည့် အသက် ၁၀ နှစ်အရွယ် ပဉ္စမတန်းကျောင်းသူ တစ်ဦး၏ ကျောပြင်သို့ ထိမှန်စိုက်ဝင်ခဲ့ကြောင်း၊ ထိုကလေးငယ်အား မင်းဘူးခရိုင် ဆေးရုံကြီးသို့ တင်ပို့ခဲ့သော်လည်း ဆုံးပါးခဲ့ကြောင်း သိရသည်။

မင်းဘူးမြို့နယ်အတွင်း အောက်တိုဘာ ၁၆ ရက်က ပျက်ကျခဲ့သည့် တိုက်လေယာဉ် အစိတ်အပိုင်းများကို တွေ့ရစဉ် (ဓာတ်ပုံ-အောင်သူငြိမ်း)

“တီဗွီတိုင်ကနေ တိုက်ပြီးတော့ အိမ်ထဲကိုဝင်လာပြီး ကပန်းတွေ စုတ်ပြတ်ကုန်တာပါ။ အိမ်မှာ ကလေးသုံးယောက် ရှိပါတယ်။ ၁၀ တန်းကလေးက စာလုပ်နေရင်း အပိုင်းအစတစ်ခု လာထိပေမယ့် စာအုပ်ပုံးကိုထိလို့ မထိခိုက်မိပါဘူး။ ဟိုဘက်အိမ်က ကလေးက အဲဒီအပိုင်းအစတစ်ခု ကျောမှာစိုက်တာပါ။ စာကုန်းလုပ်နေတုန်းမှာ အပိုင်းအစကြီး ကျောမှာစိုက်ပြီးတော့ ဆုံးသွားတာပါ” ဟု မင်းဘူးမြို့ အမှတ် (၁) ရပ်ကွက်မှ နေအိမ်ကပန်း ပျက်စီးခဲ့သူလည်းဖြစ်ပြီး သေဆုံးခဲ့သည့် ကျောင်းသူ၏ စာသင်ဝိုင်းနှင့် အိမ်နီးချင်းဖြစ်သည့် မပိုက ပြောကြားသည်။

မင်းဘူးမြို့ ရွှေတစ်ပင်ကွက်သစ်မှ လေယာဉ်ပျက်ကျသည်ကို မြင်တွေ့ခဲ့ရသည့် ဒေသခံတစ်ဦးက “ပျက်ကျကျချင်း နောက်ကနေ လိုက်ကြည့်တော့ ယာထဲမှာ ပျက်ကျတာပါ။ လိုက်ကြည့်တော့ လူကဘာမှပြစရာ မရှိတော့ဘူး။ အပိုင်းပိုင်း ဖြစ်သွားတာပါ။ လေယာဉ်အပိုင်းပိုင်းတွေနဲ့ ကျည်ဆန်တွေကို လိုက်ကြည့်နေခဲ့ကြတာပါ” ဟု ပြောကြားသည်။

အဆိုပါ လေယာဉ်ပျက်ကျမှုနှင့် တစ်ဆက်တည်း အချိန်နီးပါးတွင် မင်းဘူးမြို့၏မြောက်ဘက် ခြောက်မိုင်ခန့် အကွာရှိ သနပ်ပင်စုကျေးရွာအနီး လယ်နှင့် ကိုင်းမြေများ ပေါ်တွင်လည်း တိုက်လေယာဉ်တစ်စင်း ပျက်ကျခဲ့ကြောင်း၊ ထိုလေယာဉ်၏ အပျက်အစီးများ အကြားတွင် ဗိုလ်ကြီးအဆင့်ရှိသူ တစ်ဦးကို လေထီးနှင့်အတူ သေဆုံးလျက် တွေ့ရှိခဲ့ကြောင်း သိရသည်။

“ကျွန်တော်တို့မြင်ရတဲ့ အမြင်အရကတော့ တစ်ယောက်မောင်းတဲ့ တပ်မတော်လေယာဉ်ဆိုတာ သိရပါတယ်။ သနပ်ပင်စု ကျေးရွာအနီးက လယ်ကွင်းထဲမှာကျတဲ့ လေယာဉ်မှာလည်း အဲဒီလိုပဲ လေထီးနဲ့အတူ အမျိုးသား တစ်ဦးရဲ့ ရုပ်အလောင်း၊ ခန္ဓာကိုယ် အစိတ်အပိုင်းက ဆားပွက်ချောင်း တံတားနားက ရုပ်အလောင်း လောက်တော့ တစ်စစီမွှန်းနေတာ မဟုတ်ဘဲနဲ့ တွေ့ရပါတယ်” ဟု မင်းဘူး (စကု) မြို့နယ်မှ အမျိုးသား လွှတ်တော်ကိုယ်စားလှယ် ဦးတင်အောင်ထွန်းက ပြောကြားသည်။

ဦးတင်အောင်ထွန်းက ဆက်လက်၍ “ဒါနဲ့ပတ်သက်ပြီး မကွေးလေတပ်က တာဝန်ရှိတဲ့ အရာရှိတွေဆီ လှမ်းပြီးစုံစမ်းကြည့်တော့ မကွေးလေတပ်က တိုက်လေယာဉ်ဖြစ်တယ်ဆိုတာ သိရပါတယ်။ သူတို့က အုပ်စုဖွဲ့ လေ့ကျင့်ပျံသန်းတယ်လို့ ပြောတာကို ကျွန်တော်သိခဲ့ရပြီးတော့ လေယာဉ်ပျက်ကျမှုနဲ့ ပတ်သက်လို့တော့ သူတို့အနေနဲ့ ကျွန်တော်မေးစဉ်က ဆောင်ရွက်ဆဲ၊ စုံစမ်းဆဲဖြစ်လို့ဆို ပြီးတော့ ထပ်ပြီးတော့ မသိရပါဘူး။ နောက်မှ ထပ်ပြီးသိရတာကတော့ တပ်မတော်လေတပ်က ဗိုလ်ကြီးအဆင့်နဲ့ လေယာဉ်မောင်း နှစ်ဦးစလုံး ကွယ်လွန်သွားတယ် ဆိုတာကို စိတ်မကောင်းစွာ သိရပါတယ်” ဟု ပြောကြားသည်။

လေယာဉ်ပျက် အစိတ်အပိုင်းထိမှန်၍ သေဆုံးခဲ့သည့် ကျောင်းသူလေး စာထိုင်ရေးခဲ့သည့်နေရာ

အဆိုပါကဲ့သို့ လေယာဉ်များ ပျက်ကျမှုနှင့် ပတ်သက်၍ ရေနံမြေနှင့် ဓာတ်ငွေ့စက်ရုံများ တည်ရှိသည့် မင်းဘူးမြို့ပေါ်မှ ဒေသခံများက စိုးရိမ်မှုများ ဖြစ်ပေါ်ခဲ့ကြောင်း သိရသည်။

ထိုအခြေအနေနှင့် ပတ်သက်၍ အမျိုးသား လွှတ်တော်ကိုယ်စားလှယ် ဦးတင်အောင်ထွန်းက “စိုးရိမ်စိတ်ကတော့ ဖြစ်ပြီဆိုကတည်းက ကျွန်တော့်မှာလည်း စိုးရိမ်စိတ်တွေတန်းပြီး ၀င်လာပါတယ်။ အကယ်၍သာ ဒီလေယာဉ်ပျက်ကျတာက အခုလိုဖြစ်နေတဲ့ ကွင်းပြင်နေရာမျိုးမှာ မဟုတ်ဘူး။ ဒါတောင်မှ ကွင်းပြင်မဟုတ်ပေမယ့် မင်းဘူးမှာ ဆက်သွယ်ရေး တာဝါတိုင် တစ်ခုကိုလည်း တိုက်မိတာ ဖြစ်ပါတယ်။ ကလေးတစ်ယောက်လည်း လေယာဉ်အပိုင်းအစမှန်ပြီးတော့ အသက်ဆုံးပါးတဲ့ အဖြစ်လည်း ကြုံရပါတယ်” ဟု ပြောကြားသည်။

ဦးတင်အောင်ထွန်းက ဆက်လက်၍ “ကျွန်တော်တို့က ဒီလေယာဉ် စမ်းသပ်မောင်းနှင် ပျံသန်းမှုတွေနဲ့ ပတ်သက်ပြီးတော့ မြို့ဧရိယာရဲ့အပေါ်မှာ အန္တရာယ်နဲ့ မလွတ်ကင်းတဲ့ နေရာမျိုးမှာ ဆောင်ရွက်တာတော့ ပြန်ပြီးတော့ စနစ်တကျ စိစစ်သင့်တယ်လို့ ကျွန်တော့်အနေနဲ့ ယူဆမိပါတယ်။ နောက်တစ်ခုက အကယ်၍သာ ဒီလေယာဉ် ပျက်စီးသွားတာက မင်းဘူးမှာဆိုရင် ဓာတ်ငွေ့ရည်စက်ရုံ ရှိပါတယ်။ မန်းရေနံမြေ ဆိုတာကလည်း ထိလွယ်ရှလွယ်နဲ့ ထိခိုက်မိရင် မီးလောင်လွယ်တဲ့ ကိစ္စမျိုးတွေ၊ စက်ရုံအလုပ်ရုံတွေ ရှိပါတယ်။ နောက်တစ်ခါ မြို့ရဲ့လူနေထူထပ်တဲ့ ရပ်ကွက်တွေထဲက အများစုပေါ်ကျလာရင် ရော၊ ထပ်ပြီး ဖြစ်လာနိုင်တဲ့ ဆိုးကျိုးတွေက မတွေးဝံ့စရာတွေ ရှိပါတယ်။ ဒါကြောင့် ဒီလိုကိစ္စတွေနဲ့ ပတ်သက်ပြီးတော့ နောင်မှာ ကြိုကြိုတင်တင်လေးနဲ့ ဒီလိုအဖြစ်တွေ မဖြစ်အောင် ကျွန်တော်လည်း ကိုယ်စားလှယ် တစ်ယောက်အနေနဲ့ ဆောင်ရွက်သင့်တာတွေ ဆောင်ရွက်ဖို့ တွေးထားပါတယ်” ဟု ပြောကြားသည်။

အဆိုပါ ပျက်ကျခဲ့သည့် လေယာဉ်နှစ်စင်း၏ အစိတ်အပိုင်းများကို သက်ဆိုင်ရာ တာဝန်ရှိသူများက အားချင်း လာရောက်၍ သိမ်းဆည်းခဲ့ကြကြောင်း၊ လေယာဉ် အပျက်အစီးများနှင့်အတူ ဗုံးနှင့် ကျည်ဆန်များကိုလည်း တွေ့ခဲ့ကြရကြောင်း၊ လေယာဉ်ပျက်ကျခဲ့သည့် နေရာများသို့ မကွေးတိုင်းဒေသကြီး အစိုးရအဖွဲ့ဝန်ကြီးချုပ် ဒေါက်တာအောင် မိုးညိုနှင့် တာဝန်ရှိသူများ၊ သက်ဆိုင်ရာမြို့နယ် လွှတ်တော်ကိုယ်စားလှယ်များက ကွင်းဆင်းကြည့်ရှု ခဲ့ကြကြောင်း သိရသည်။

မကွေးလေတပ်စခန်း ဌာနချုပ်မှ အက်ဖ်- ၇ လေယာဉ်နှစ်စင်း လေ့ကျင့်ပျံသန်းစဉ် ပျက်ကျမှုဖြစ်ပွားဟု တပ်မတော် ကာကွယ်ရေး ဦးစီးချုပ်ရုံးမှ သတင်းထုတ်ပြန်ခဲ့သည်။

လေယာဉ်ပျက် အတွင်းမှ တွေ့ရှိရသော ကျည်ဆန်များ

မကွေးလေတပ်စခန်း ဌာနချုပ်မှ လေ့ကျင့်ပျံသန်းမှု ဆောင်ရွက်နေသော အက်ဖ်- ၇ လေယာဉ်နှစ်စင်းသည် အောက်တိုဘာ ၁၆ ရက် နံနက်ပိုင်းတွင် လေ့ကျင့်ပျံသန်းမှုများ ပြုလုပ်ပြီး မကွေးလေတပ်စခန်းဌာနချုပ် လေယာဉ်ကွင်းသို့ ပြန်လာစဉ် ရာသီဥတုဆိုးရွားမှုနှင့် ရုတ်တရက် ကြုံတွေ့ရပြီး နံနက် ၇ နာရီခွဲခန့်တွင် ပျက်ကျမှု ဖြစ်ပွားခဲ့သည်။

ဖြစ်စဉ်အနေဖြင့် မကွေးလေတပ်စခန်း ဌာနချုပ်မှ အက်ဖ်-၇ လေယာဉ်လေးစင်းသည် အောက်တိုဘာ ၁၆ ရက် နံနက် ၆ နာရီမိနစ် ၂၀ တွင် အုပ်စုဖွဲ့ လေ့ကျင့်ပျံသန်းမှုများ စတင်ဆောင်ရွက်ခဲ့ပြီး လေတပ်စခန်းဌာနချုပ်သို့ ပြန်လာစဉ် ရာသီဥတုဆိုးရွားမှုနှင့် ရုတ်တရက် ကြုံတွေ့ခဲ့သဖြင့် လေယာဉ်များအား ကြိုးစားထိန်းချုပ် ဆင်းသက်ခဲ့သည်။

ထိုသို့ဆင်းသက်စဉ် အုပ်စုဖွဲ့ လေ့ကျင့်ပျံသန်းနေသော လေယာဉ်လေးစင်းအနက် နှစ်စင်းမှာ လေယာဉ်ကွင်းသို့ အောင်မြင်စွာ ဆင်းသက်နိုင်ခဲ့ပြီး ကျန်လေယာဉ်နှစ်စင်းမှာ ရာသီဥတုဆိုးရွားမှုကို ဆက်လက်ကြိုးစား ထိန်းသိမ်းမောင်းနှင် ခဲ့သော်လည်း မင်းဘူးမြို့၏ တောင်ဘက် ဆားဗွက်ချောင်းတံတား အနီးတွင် တစ်စင်း၊ မင်းဘူးမြို့၊ သနပ်ပင်စုကျေးရွာ၏ အနောက်ဘက် မီတာ ၁၀၀၀ ခန့်အကွာရှိ လယ်ကွင်းအနီးတွင် တစ်စင်းပျက်ကျခဲ့ပြီး လေယာဉ်မှူးများဖြစ်သော ဗိုလ်ကြီးဟိန်းသူအောင်နှင့် ဗိုလ်ကြီးဖြိုးမောင်မောင်တို့မှာ သေဆုံးခဲ့ကြောင်း သိရသည်။

ဆားဗွက်ချောင်း တံတားအနီး ပျက်ကျခဲ့သော ဖြစ်စဉ်တွင် မင်းဘူးမြို့၊ အမှတ် (၄) ရပ်ကွက်၊ အေးသာယာလမ်းနေ ဦးဖိုးဖြူ၏ သမီးဖြစ်သော ပဉ္စမတန်းကျောင်းသူ မသွယ်ဇင်ငြိမ်းသည် အဆိုပါ ပျက်ကျလေယာဉ်၏ အစိတ်အပိုင်းများ ထိမှန်ဒဏ်ရာ ရရှိခဲ့သဖြင့် မင်းဘူးပြည်သူ့ဆေးရုံသို့ ပို့ဆောင်၍ ဆေးကုသမှု ခံယူစေခဲ့သော်လည်း ၈ နာရီ မိနစ် ၄၀ ခန့်တွင် သေဆုံးခဲ့သဖြင့် နယ်မြေခံတပ်မှ တာဝန်ရှိသူများက ကျန်ရစ်သူမိသားစုများအား သွားရောက်တွေ့ဆုံ၍ လိုအပ်သည့် ကူညီထောက်ပံ့မှုများ ဆောင်ရွက်ပေးလျက်ရှိသည်။

အဆိုပါ လေယာဉ်ပျက်ကျမှု ဖြစ်ပွားရာ နေရာများသို့ သက်ဆိုင်ရာ တာဝန်ရှိသူများ သွားရောက်၍ အသေးစိတ် စစ်ဆေးခြင်းများ ဆောင်ရွက်လျက်ရှိကြောင်း သတင်းရရှိသည်။

 

၂၀၁၈-၂၀၁၉ ဘဏ္ဍာနှစ်အတွင်း ၀င်ငွေခွန် ကျပ် ၂၃၂၄ ဒသမ ၈ ဘီလျံ၊ ကုန်သွယ်လုပ်ငန်းခွန် ကျပ် ၂၁၂၂ ဒသမ ၈ ဘီလျံ၊ အထူးကုန်စည်ခွန် ကျပ် ၁၃၉၁ ဒသမ ၄ ဘီလျံ ကောက်ခံရန်လျာထား

ရန်ကုန်မြို့ ပန်းဆိုးတန်းလမ်းရှိ ပြည်တွင်းအခွန်များ ဦးစီးဌာနရုံးကို တွေ့ရစဉ်

လက်ရှိဘဏ္ဍာနှစ်ဖြစ်သော ၂၀၁၈- ၂၀၁၉ ဘဏ္ဍာနှစ်အတွင်း ၀င်ငွေခွန် ကျပ် ၂၃၂၄ ဒသမ ၈ ဘီလျံ၊ ကုန်သွယ်လုပ်ငန်းခွန် ကျပ် ၂၁၂၂ ဒသမ ၈ ဘီလျံ၊ အထူးကုန်စည် ခွန် ကျပ် ၁၃၉၁ ဒသမ ၄ ဘီလျံကောက်ခံရန် လျာထားကြောင်း ပြည်တွင်းအခွန်များ ဦးစီးဌာနမှ သိရသည်။

၂၀၁၈-၂၀၁၉ ဘဏ္ဍာနှစ်တွင် ကုန်သွယ်လုပ်ငန်းခွန် ပါဝင်သော ပြည်တွင်းထွက်ကုန်နှင့် ပြည်သူပြည်သားများ သုံးစွဲမှုအပေါ် ကောက်ခံသည့် အခွန်အကောက် အမျိုးအစားမှ ကျပ် ၃၈၆၂ ဒသမ ၇၈၆ ဘီလျံ၊ အထူးကုန်စည်ခွန်မှ ကျပ် ၁၃၉၁ ဒသမ ၄၅၉ ဘီလျံ၊ ၀င်ငွေနှင့် ပိုင်ဆိုင်မှုအပေါ်ကောက်ခံသည့် အခွန်အကောက် အမျိုးအစားမှ ကျပ် ၂၃၂၄  ဒသမ ၈၁၆ ဘီလျံ၊ အကောက်ခွန်မှ ကျပ် ၅၃၀ ဘီလျံ၊ နိုင်ငံပိုင် သယံဇာတများ ထုတ်ယူသုံးစွဲမှုအပေါ် ကောက်ခံသည့်အခွန် အကောက်အမျိုးအစားမှ ကျပ် ၈၅၈ ဒသမ ၃၃၁ ဘီလျံ၊ ပြည်ထောင်စု၏ အခွန်အကောက်များ ကောက်ခံရန် မူလလျာထားချက်တွင် စုစုပေါင်း ကျပ် ၇၅၇၅ ဒသမ ၉၃၄ ဘီလျံ ရရှိရန် မျှော်မှန်းထားခြင်းဖြစ်သည်။

ပြီးခဲ့သည့် ၂၀၁၈ ခုနှစ် ဧပြီ-စက်တင်ဘာ ကြားကာလအတွင်း အခွန်အရပ်ရပ် စုစုပေါင်း ကျပ် ၂၇၉၂ ဘီလျံကောက်ခံရန် လျာထားပြီး ပြည်တွင်းအခွန်များ ဦးစီးဌာနမှ ကောက်ခံသည့် ၀င်ငွေခွန် ကျပ် ၈၆၃ ဘီလျံ၊ ကုန်သွယ်လုပ်ငန်းခွန် ကျပ် ၆၉၂ ဘီလျံ၊ အ ထူးကုန်စည်ခွန် ကျပ် ၄၃၁ ဘီလျံ၊ တံဆိပ် ခေါင်းခွန် ၂၇ ဒသမ ၉၈ ဘီလျံ၊ အောင်ဘာ လေသိန်းဆုခွန် ကျပ် ၄၀ ဘီလျံအထိရရှိရန် မျှော်မှန်းထားခြင်းဖြစ်သည်။

မြန်မာနိုင်ငံ၏ နှစ်အလိုက် အခွန်ကောက်ခံရရှိမှု ပမာဏများမှာ ၂၀၁၁-၂၀၁၂ ဘဏ္ဍာနှစ်တွင် ကျပ် ၁၆၉၃ ဘီလျံ၊ ၂၀၁၂ -၂၀၁၃ ဘဏ္ဍာနှစ်တွင် ကျပ် ၃၃၇၂ ဘီလျံ၊ ၂၀၁၃-၂၀၁၄ ဘဏ္ဍာနှစ်တွင် ကျပ် ၄၄၅၁ ဘီလျံ၊ ၂၀၁၄-၂၀၁၅ ဘဏ္ဍာနှစ်တွင် ကျပ် ၆၅၁၈ ဘီလျံ၊ ၂၀၁၅-၂၀၁၆ ဘဏ္ဍာနှစ်တွင် ကျပ် ၆၃၁၄ ဘီလျံ၊ ၂၀၁၆-၂၀၁၇ ဘဏ္ဍာနှစ်တွင် ကျပ် ၇၁၂၂ ဘီလျံ၊ ၂၀၁၇-၂၀၁၈ ဘဏ္ဍာနှစ် ကျပ် ၇၅၄၆ ဘီလျံ (ပြုပြင်ပြီးခန့်မှန်းခြေ) ဖြစ်ပြီး ခြောက်လတာ ကြားကာလဖြစ်သော ၂၀၁၈ ဧပြီ-စက်တင်ဘာ ခြောက်လတာ ကြားကာလတွင် ကျပ် ၂၇၉၂ ဘီလျံကောက်ခံရန် ခန့်မှန်းထားသည်။

အခွန်ကောက်ခံရရှိမှုနှင့် ဂျီဒီပီအချိုး မှာ ၂၀၁၁-၂၀၁၂ ဘဏ္ဍာနှစ်တွင် ၃ ဒသမ ၈ ရာခိုင်နှုန်း၊ ၂၀၁၂-၂၀၁၃ ဘဏ္ဍာနှစ်တွင် ၆ ဒသမ ၅ ရာခိုင်နှုန်း၊ ၂၀၁၃-၂၀၁၄ ဘဏ္ဍာ နှစ်တွင် ၇ ဒသမ ၉ ရာခိုင်နှုန်း၊ ၂၀၁၄-၂၀၁၅ ဘဏ္ဍာနှစ်တွင် ၁၀ ရာခိုင်နှုန်း၊ ၂၀၁၅-၂၀၁၆ ဘဏ္ဍာနှစ်တွင် ၈ ဒသမ ၇ ရာခိုင်နှုန်း၊ ၂၀၁၆-၂၀၁၇ ဘဏ္ဍာနှစ်တွင် ၈ ဒသမ ၅ ရာခိုင်နှုန်း၊ ၂၀၁၇-၂၀၁၈ ဘဏ္ဍာ နှစ်တွင် ၇ ဒသမ ၁ ရာခိုင်နှုန်း (မူလခန့်မှန်းခြေ)၊ ၂၀၁၈ ဧပြီ-စက်တင်ဘာ ကြားကာလတွင် ၈ ဒသမ ၄၉ ရာခိုင်နှုန်း (မူလခန့်မှန်းခြေ) ဖြစ်သည်။

မြန်မာနိုင်ငံ၏ အခွန်ကောက်ခံရရှိမှုသည် ၂၀၁၁-၂၀၁၂ ဘဏ္ဍာနှစ်မှစ၍ လေးနှစ်ဆက်တိုက် မြင့်တက်ခဲ့ပြီး ၂၀၁၅-၂၀၁၆ ဘဏ္ဍာနှစ်တွင် အနည်းငယ်ပြန်ကျကာ ၂၀၁၆-၂၀၁၇ ဘဏ္ဍာနှစ်တွင် ပြန်လည်မြင့်တက်ခဲ့သည်။ ထိုသို့အခွန်ကောက်ခံမှုမြင့် တက်လာသော်လည်း အခွန်ရငွေနှင့် ဂျီဒီပီ အချိုးသည် ၂၀၁၅-၂၀၁၆ ဘဏ္ဍာနှစ်မှ စတင်၍ နှစ်စဉ်ကျဆင်း လျက်ရှိကြောင်း သိရသည်။

 

မကွေးလေတပ်စခန်းဌာနချုပ်မှ အက်ဖ်- ၇ လေယာဉ်နှစ်စီး လေ့ကျင့်ပျံသန်းစဉ် ရာသီဥတုဆိုးရွားမှုနှင့် ရုတ်တရက်ကြုံတွေ့ပြီး ပျက်ကျခြင်းဖြစ်ကြောင်း တပ်မတော်ထုတ်ပြန်

မကွေးလေတပ်စခန်းဌာနချုပ်မှ လေ့ကျင့်ပျံသန်းမှုဆောင်ရွက်နေသော အက်ဖ်- ၇ လေယာဉ် နှစ်စီးသည် အောက်တိုဘာ ၁၆ ရက် နံနက်ပိုင်းတွင် လေ့ကျင့်ပျံသန်းမှုများပြုလုပ်ပြီး မကွေးလေတပ်စခန်းဌာနချုပ် လေယာဉ်ကွင်းသို့ ပြန်လာစဉ် ရာသီဥတုဆိုးရွားမှုနှင့် ရုတ်တရက်ကြုံတွေ့ရပြီး နံနက် ၇ နာရီခွဲအချိန်ခန့်တွင် ပျက်ကျမှု ဖြစ်ပွားခဲ့ကြောင်း တပ်မတော်ကာကွယ်ရေးဦးစီးချုပ်ရုံးကသတင်းထုတ်ပြန်သည်။

အဆိုပါဖြစ်စဉ်မှာ မကွေးလေတပ်စခန်းဌာနချုပ်မှ အက်ဖ်-၇ လေယာဉ် လေးစီးသည် နံနက် ၆ နာရီ ၂၀ မိနစ်တွင် အုပ်စုဖွဲ့လေ့ကျင့်ပျံသန်းမှုများစတင်ဆောင်ရွက်ခဲ့ပြီး လေတပ်စခန်းဌာနချုပ်သို့ပြန်လာစဉ် ရာသီဥတုဆိုးရွားမှုနှင့် ရုတ်တရက်ကြုံတွေ့ခဲ့သဖြင့် လေယာဉ်များအား ကြိုးစားထိန်းချုပ် ဆင်းသက်ခဲ့သည်ဟု သတင်းထုတ်ပြန်ချက်တွင် ပါရှိသည်။

ပျက်ကျသွားခဲ့သည့် F-7 တိုက်လေယာဉ်နှင့် ပုံစံတူ F-7 တိုက်လေယာဉ်တစ်စဉ်းအား တွေ့ရစဉ် (Photo: Airliners.net)

ထိုသို့ဆင်းသက်စဉ် အုပ်စုဖွဲ့လေ့ကျင့်ပျံသန်းနေသော လေယာဉ် လေးစီးအနက် နှစ်စီးမှာ လေယာဉ်ကွင်းသို့ အောင်မြင်စွာဆင်းသက်နိုင်ခဲ့ပြီး ကျန်လေယာဉ် နှစ်စီး မှာ ရာသီဥတုဆိုးရွားမှုကို ဆက်လက်ကြိုးစား ထိန်းသိမ်းမောင်းနှင်ခဲ့သော်လည်း မင်းဘူးမြို့၏ တောင်ဘက်ဆားဗွက်ချောင်းတံတားအနီးတွင် တစ် စီး၊ မင်းဘူးမြို့၊ သနပ်ပင်စုကျေးရွာ၏ အနောက်ဘက် မီတာ ၁၀၀၀ ခန့်အကွာရှိ လယ်ကွင်းအနီးတွင် တစ်စီး ပျက်ကျခဲ့ပြီး လေယာဉ်မှူးများဖြစ်သော ဗိုလ်ကြီးဟိန်းသူအောင်နှင့် ဗိုလ်ကြီးဖြိုးမောင်မောင်တို့မှာ သေဆုံးခဲ့ကြောင်းသိရှိရသည်ဟုလည်း သတင်းထုတ်ပြန်ချက်တွင်ရေးသားထားသည်။ ဆားဗွက်ချောင်းတံတားအနီးပျက်ကျခဲ့သော ဖြစ်စဉ်တွင် မင်းဘူးမြို့၊ အမှတ် (၄) ရပ်ကွက်၊ အေးသာယာလမ်းနေ ဦးဖိုးဖြူ၏ သမီးဖြစ်သော ပဉ္စမတန်းကျောင်းသူ မသွယ်ဇင်ငြိမ်းသည် အဆိုပါ ပျက်ကျလေယာဉ်၏ အစိတ်အပိုင်းများ ထိမှန်ဒါဏ်ရာရရှိခဲ့သဖြင့်

မင်းဘူးပြည်သူ့ဆေးရုံသို့ ပို့ဆောင်၍ ဆေးကုသမှုခံယူစေခဲ့သော်လည်း ၈ နာရီ ၄၀ မိနစ်ခန့်တွင်သေဆုံးသွားခဲ့သဖြင့် နယ်မြေခံတပ်မှ တာဝန်ရှိ သူများက ကျန်ရစ်သူမိသားစုများအား သွားရောက်တွေ့ဆုံ၍ လိုအပ်သည့် ကူညီထောက်ပံ့မှုများ ဆောင်ရွက်ပေးလျက် ရှိကြောင်းလည်း သတင်းထုတ်ပြန်ချက်အရသိရသည်။

လေယာဉ်ပျက်ကျမှု ဖြစ်ပွားရာ နေရာများသို့ သက်ဆိုင်ရာတာဝန်ရှိသူများ သွားရောက်၍ အသေးစိတ်စစ်ဆေးခြင်းများ ဆောင်ရွက်လျက်ရှိကြောင်းလည်း သတင်းထုတ်ပြန်မှုတွင်ပါရှိသည်။

ဘ၀အရေးအတွက် ဆိုက်ကားနင်းဖြေရှင်းနေသူ အနှေးယာဉ်မယ်

ဘ၀အရေးအတွက် ဆိုက်ကားနင်းဖြေရှင်းနေသူ အနှေးယာဉ်မယ် ဒေါ်ခင်မြင့်အား တွေ့ရစဉ်

မိသားစုတစ်စုအတွက် စားဝတ်နေရေး ပြေလည်မှုဟာ အဓိကကျတဲ့အပိုင်းမှာရှိနေတာကြောင့် မောင်တစ်ထမ်း မယ်တစ်ရွက်ဆိုတဲ့အတိုင်း မောင်တစ်စီး မယ်တစ်စီးနဲ့ အနှေးယာဉ်ဆိုက်ကားနင်းတဲ့ အမျိုးသမီးတစ်ဦး ရှိနေပါတယ်။

အဲဒီအမျိုးသမီးဟာ ထွားကျိုင်းသန်မာနေတာ မဟုတ်ပါဘူး။ ခန္ဓာကိုယ်ပိန်ပိန်ပါးပါး အရပ်ကငါးပေအောက်နဲ့ အသက် ၄၃ နှစ်ရှိပြီဖြစ်တဲ့ ကလေးနှစ်ဦးမိခင် ဒေါ်ခင်မြင့်ပဲဖြစ်ပါတယ်။ သူမဟာ သုဝဏ္ဏမြို့နယ် (ဃ) ရပ်ကွက် မှာ နေထိုင်ပြီး ဆိုက်ကားနင်းလာတာက သုံးနှစ်ကျော် လေးနှစ်ဝန်းကျင်ရှိပြီပဲ ဖြစ်ပါတယ်။

သူမရဲ့ အမျိုးသားဟာ ယခင်က အရက်အသောက်များတာကြောင့် ပတ်ဝန်းကျင်နေသူတွေက အရက်ဖြတ်ဆေးတိုက်ဖို့ အကြံပေး လာရာကနေ သူမရဲ့ ခရီးကြမ်းစတင်ခဲ့တယ်လို့ ဆိုရမှာပါ။ ပတ်ဝန်းကျင်မှာလည်း အရက်ဖြတ်ဆေးတွေတိုက်တာကို တွေ့နေရပြီး အရက်ဖြတ်ဆေးတွေ တိုက်မိရာကနေ သူမရဲ့ အမျိုးသားဟာ ကျန်းမာရေး ချူချာလာပြီး ဆေးဖိုးဝါးခတွေနဲ့ အကြွေးတင်လာကာ အခြားအလုပ်တွေလည်း အဆင်မပြေသလို ဈေးရောင်းဖို့ ငွေအရင်းအနှီးလည်း မရှိတာကြောင့် ဆိုက်ကားနင်းဖြစ်လာတာလည်း ဖြစ်ပါတယ်။

“ဘယ်လိုအကြွေးတင်လဲဆိုတော့ အရင်က ကိုယ့်ယောက်ျားက အရမ်းအရက်သောက်တာ။ အဲဒီတော့ သူများတွေက ဆေးတိုက်ဘာတိုက်ဆိုတော့ အရက်ဖြတ်ဆေး တိုက်လိုက်တာ၊ ဘယ်လောက်ကြာလဲဆိုတော့  တစ်နှစ်ကျော်လောက် တိုက်လိုက်တာ အလုပ် သိပ်မလုပ်နိုင်တော့ဘူး။ အိပဲ့အိပဲ့နဲ့ ခြေတွေလက်တွေ မသယ်ချင်တော့ ပြန်ကောင်းလာပြန် ပြန်တိုက်ပြန်ဆိုတော့ ခြေထောက်တွေလက်တွေက မသယ်ချင်ပြန်ဆိုတော့ အကြွေးလေးဘာလေးယူပြီးတော့ သူ့ကိုကုဖြစ်တာ။ အရင်ကတော့ ပန်းရန်တွေဘာတွေ လုပ်တာပေါ့။ ဒါပေမဲ့ လူတွေက သူတို့ ပိုက်ဆံရဖို့အတွက် အသားကုန်ခိုင်းတော့ အဲဒီအလုပ်ကို မလုပ်တော့ဘဲ။ ဒီအလုပ်ကို လုပ်ဖြစ်တာ” လို့ ဒေါ်ခင်မြင့်က ရင်ဖွင့်လာပါတယ်။

လက်ရှိမှာတော့ သူမအနေနဲ့ အနည်းငယ် ထိတ်လန့်မှုရှိနေတယ်လို့ ဆိုမှာပါ။ ပတ်ဝန်းကျင်နေသူတွေက အရက်ဖြတ်ဆေးတွေ တိုက်ဖို့တိုက်တွန်းတာကြောင့် အရက်ဖြတ်ဆေးတွေ တိုက်မိတာကို နောင်တရနေပုံလည်း ရှိပါတယ်။ ဘာကြောင့်လဲဆိုတော့ ဒေါ်ခင်မြင့်ကို အရက်ဖြတ်ဆေးတွေတိုက်ဖို့ အကြံပေးတဲ့ အိမ်နီးနားက အမျိုးသမီးရဲ့ယောက်ျား အရက်ဖြတ်ဆေးကြောင့် သေဆုံးသွားရတာကြောင့်ပဲ ဖြစ်ပါတယ်။

ဆိုက်ကားနင်းဖို့ ဆုံးဖြတ်လိုက်ပုံကလည်း ယောက်ျားဖြစ်သူက အရက်တွေ သောက်တာကို မြင်တွေ့နေရပြီး နင်းဖို့ သင်ရင်းကျင့်ရင်းနဲ့ပဲ အိမ်နီးနားက အစ်မကြီးတစ်ဦးက ဘုရားလမ်းဈေးကို ခေါ်သွားရင်းကနေ ဆိုက်ကားနင်းဖြစ်လာတာလည်း ဖြစ်ပါတယ်။

ဒေါ်ခင်မြင့်အနေနဲ့ ခုလိုဆိုက်ကားနင်းတာကို ယောက်ျားဖြစ်သူက မကြိုက်ပေမဲ့ အခြေအနေအရ ငွေရေးကြေးရေးအရ နင်းရတာဖြစ်ပြီး သူမဆိုက်ကားနင်းတာကြောင့်  ရပ်ကွက်တွင်းကလူတွေက နင့်ယောက်ျား သေပြီဆိုကာ ပြောဆိုကြတာကို ဂရုမစိုက်ဘဲ ခုလိုလုပ်ကိုင်ရတာဖြစ်တယ်လို့လည်း ဆိုက်ကားနင်းရင်း ပြောပြလာပါတယ်။

“သူလည်း ကျန်းမာရေးမကောင်း ကိုယ်လည်းကျန်းမာရေးမကောင်းသူလည်း မနင်းခိုင်းပါဘူး။ ဒါပေမဲ့ သူ့ရဲ့ပိုက်ဆံနဲ့လည်း မဖြစ်လောက်ဘူး။ ကိုယ့်ပိုက်ဆံလည်းပါမှ သူများပိုက်ဆံတွေ ဆပ်လို့ရမှာဆိုပြီး နင်းတာ။ ပြောလည်း ပြောပါစေ။ ကိုယ်က သူများပေးဖို့ ပိုက်ဆံလောက်ပဲ၊ ကိုယ့်ရဲ့ အိမ်ထောင်ရေး အဆင်ပြေဖို့လောက်ပဲဆိုပြီး နင်းတာ။ ပထမတော့ နင်ကဟယ် မနင်းပါနဲ့နင့်ယောက်ျား သေသွားပြီ ပြောကြတယ်။ ပြောလည်းပြောပါစေ။ ကိုယ့်ယောက်ျားကိုပြောတယ်။ နင့်ပိုက်ဆံနဲ့လည်း ဖြစ်မှာမဟုတ်ဘူး။ ငါလည်း လုပ်မယ်ဆိုပြီးလုပ်တာ” လို့ ဆိုပါတယ်။

ဒေါ်ခင်မြင့်ရဲ့အဖြစ်ဟာ တကယ်တော့ ရင်နင့်ဖွယ်လည်း ဖြစ်ပါတယ်။ လက်ရှိရှိတဲ့ သားလေးနှစ်ယောက်ပဲ အသက်ရှင် တင်ရက်နေတာဖြစ်ပြီး ရှေ့ပိုင်းမှာ ကလေးသုံးယောက်လုံး ဆုံးပါးသွားရတဲ့အဖြစ်ကိုလည်း ကြုံခဲ့ရသူ ဖြစ်ပါတယ်။

ဒေါ်ခင်မြင့်ရဲ့ လက်ရှိနေအိမ်လေးဟာ အမွေပုံလို့လည်း သူမရဲ့ပြောကြားချက်အရ သိရပါတယ်။ နှစ်ထပ်အိမ်လေးဖြစ်ပြီး အလျား ၁၀ ပေ အနံ ၂၀ ၀န်းကျင် အိမ်လေးဖြစ်ပြီး အိမ်ရဲ့အပေါ်ထပ်ကို အစ်မဖြစ်သူရဲ့ တူမတို့  မိသားစုနေထိုင်ကြတာလည်းဖြစ်ပါတယ်။ ပတ်ဝန်းကျင်ရဲ့ ပြောကြားချက်အရတော့ ခြံတွေကို ဖဲ့ရောင်းခြမ်းရောင်းရင်းနဲ့ နောက်ဆုံးမှာ ခုလိုသာ ကျန်ခဲ့တာလို့လည်း သိရပါတယ်။

လက်ရှိမှာတော့ ဒေါ်ခင်မြင့်ဟာ အိမ်ထောင်ဦးစီးနေရာကိုရောက်ရှိနေပြီလုိ့ပြော နိုင်သလို ဆေးအရှိန်တွေနဲ့ ကျန်းမာရေး သိပ်မကောင်းတဲ့ ယောက်ျားဖြစ်သူကိုလည်း နင်းချင်ရင်နင်း မနင်းချင်ရင်မနင်းနဲ့ အိမ်မှာပဲ ဆိုက်ကားဂိတ်ထိုးပြီး သက်သောင့်သက်သာ နေခိုင်းနေသူလည်း ဖြစ်ပါတယ်။

“ဆေးတွေတိုက်ဖန်များလို့ပဲ ကျန်းမာရေးမကောင်းတာလားမသိဘူး တအားကျပ်တာ ညဘက်ဆို(ဂွိဂွိ)နဲ့ အသက်ရှူတွေကျပ်တာ အသက်မရှူနိုင်ဘူး။ အဲဒါဆေးခန်းလည်း မသွားနိုင်ဘူး။ အဲဒါလမ်းဘေးကဆေးဆိုင်မှာ ပါရာကဒ်ရယ်၊ အကြောပြေဆေးရယ်၊ ခေါင်းကြည်ဆေးရယ် ၀ယ်တိုက်တယ်။ ချောင်းဆိုး ပျောက်ဆေးဝယ်တိုက်တယ်။ ဒီလိုမျိုးပဲ ၀ယ်တိုက်တာပေါ့နော်။ နည်းနည်းလည်း ရင်ချောင်သွားရင် ပြီးဆိုပြီး ဒီလိုမျိုးပဲလိုက်တာ။ သူ့ကိုလည်း ဆိုက်ကားသွားနင်းလို့လည်း မပြောတော့ဘူး။ ဆိုက်ကားဂိတ်မှာလည်း မထိုးခိုင်းတော့ဘူး။ ဂိတ်မှာက ကျောင်းသားပို့ ဘာညာပြီးရင် ဆိုက်ကားတွေက ပုံနေတော့ သိတယ်မလား ဖဲရိုက်ဘာရိုက်နဲ့ ဆော့မိမှာ ကြောက်လို့။ အိမ်မှာ အိပ်ချင်အိပ် မအိပ်ချင်နေဆိုပြီး ဒီတိုင်းပဲအိမ်မှာ ထားထားတာ”ဆိုပြီး ယောက်ျားသားအပေါ် စိုးရိမ်တကြီးနဲ့ ပြောပြပါတယ်။

ဒေါ်ခင်မြင့်တို့ မိသားစုအတွက် ၀င်ငွေအများရှာနိုင်သူဟာ ဒေါ်ခင်မြင့်လို့ဆိုရမှာပါ။ ကျန်းမာရေးချူရှာနေတဲ့ ယောက်ျားသားကို ပုံမှန်ဖောက်သည် ကျောင်းပို့ကျောင်းကြိုပြီးရင် အိမ်မှာ နေခိုင်းနေသူလို့ဆိုမှာပါ။ ဒေါ်ခင်မြင့်ရဲ့ (ယောက်ျားဖြစ်တဲ့ ရပ်ကွက်အခေါ်) ဂျပန်ကြီးဟာ အနည်းငယ် ထိုင်းမှိုင်းနေသူလို့ ဆိုရမှာဖြစ်ပြီး နေအိမ်မှာလည်း လျှပ်စစ်မီး မရှိတာကြောင့် ပတ်ဝန်းကျင်အိမ်တွေမှာ သွားရောက်ပြီး အားသွင်းထားတဲ့ ဖုန်းလေးနဲ့ သီချင်းနားထောင် ဂိမ်းဆော့နဲ့ နားနေလေ့ရှိသူ ဖြစ်ပါတယ်။

ဒေါ်ခင်မြင့်ရဲ့ အဓိကဖောက်သည်တွေကတော့ ပတ်ဝန်းကျင်က ကျောင်းပို့ကလေးတွေဖြစ်ပြီး အမျိုးသမီးတွေပဲ ဖြစ်ပါတယ်။ နံနက် ၆ နာရီတိုင်းမှာ ဒေါ်ခင်မြင့်ဟာ ပုံမှန်ဖောက်သည်တစ်ဦးအတွက် သင်္ကန်းကျွန်း စံပြဈေးမှာ ဈေးထွက်ပေးရတာဖြစ်ပြီး ကလေးတွေကို ကျောင်းပို့ရတာရယ် ပုံမှန်အမျိုးသမီးဖောက်သည်တွေကို လိုက်ပို့ရတာ ဖြစ်ပါတယ်။ တစ်ခါတလေတွေမှာမှသာ ပတ်ဝန်းကျင်က လိုအပ်ချက်အရ ကြားပေါက်လိုက်လေ့ရှိပြီး အမျိုးသားတွေကတော့ အဓိက ဖောက်သည်မဟုတ်ဘူးလို့လည်း  ဒေါ်ခင်မြင့်ရဲ့ပြောကြားချက်အရ သိရပါတယ်။

ဒေါ်ခင်မြင့်တို့အိမ်ရဲ့ တစ်နေ့ဝင်ငွေဟာ ကျပ်ငွေ ၄၀၀၀ ကနေ ၇၀၀၀ ကျော်ခန့်ထိရှိနိုင်ပြီး အဲဒီထဲကမှ ဆိုက်ကားအုံနာကြေးအဖြစ် နှစ်စီးအတွက် ၂၀၀၀ ထောင်ကျပ်၊ ဆိုက်ကား လျော်ကြေးအဖြစ် ကျပ်ငွေ ၁၀၀၀ အပါအ၀င် တခြားသော အကြွေးလေးတွေ ဆပ်ပြုရတာလည်း ဖြစ်ပါတယ်။

သားလေးနှစ်ယောက်ထဲမှာ ၁၂ နှစ် သားလေးက ခြောက်တန်းကျောင်းသားဖြစ်ပြီးတော့ ၁၀ အရွယ်သားလေးက နှစ်တန်းကျောင်းသားအဖြစ် ဘုန်းတော်ကြီးသင်ပညာရေးကျောင်းမှာ တက်နေကြတာဖြစ်ပြီး အကြွေးလာတောင်းတာတွေကို မြင်တွေ့လေ့ရှိတဲ့ သားတွေက ကျောင်းထွက်ပြီး အလုပ်လုပ်ဖို့ ခွင့်တောင်းလေ့ရှိတာကြောင့် ပေးမလုပ်ခိုင်းဘူးလို့လည်း မိခင်တစ်ဦးရဲ့မေတ္တာနဲ့ ရင်ဖွင့်ပြောဆိုလာပါတယ်။

“အကြီးကောင်ကတော့ ဒီနှစ်ကျောင်းပိတ်လို့ရှိရင် အလုပ်လုပ်ရင်းနဲ့ ပြန်မထွက်တော့ဘူး။ ကျောင်းထွက်မယ်လို့ ပြောတယ်။ ခုကျူရှင်တောင်မထားနိုင်တော့ဘူး။ ကိုယ်က  တစ်လကို ၁၅၀၀၀၊ ၂၀၀၀၀  မရှာနိုင်တော့ဘူး။ ကျူရှင်တောင် အခမဲ့သင်တဲ့ကျူရှင်ကို ည ၆ နာရီလောက်ဆို သွားသွားခိုင်းထားတာ။ အကြွေးရှိတာတော့ မှန်တယ်။ ဒါပေမဲ့ ဘယ်လိုရှိတယ် ဘာညာဆိုတာ ကိုယ့်ကလေးတွေကို မပြောချင်ဘူး။ ဒါပေမဲ့ လူတွေက အကြွေးလာလာတောင်းတော့ ကလေးတွေက ကျောင်းထွက်မယ် အလုပ်လုပ်မယ်နဲ့ ပြောတယ်။ ကိုယ်ကတော့ ပေးမလုပ်ခိုင်ဘူး” ဟု ပြောလာတာ ဖြစ်ပါတယ်။

ဒေါ်ခင်မြင့်ရဲ့ ညီမတွေထဲမှာလည်း ခုလိုပဲ ကျောင်းထွက်ပြီး ကားရေဆေးဆိုင်မှာ လုပ်ကိုင်နေတာကိုသိနေတဲ့ သားလေးက ခုလိုခွင့်တောင်းတာလို့လည်း ဒေါ်ခင်မြင့်ရဲ့ ပြောကြားချက်အရ သိရပါတယ်။ ဒါပေမဲ့ သားတွေကို လက်ရှိဘ၀ထဲကနေ ရုန်းကန်ကယ်တင်ချင်သူလို့ ဆိုရမှာပါ။

အနှေးယာဉ်မယ်ဒေါ်ခင်မြင့်တို့ မိသားစုရဲ့ မိသားစု စုံလင်ချိန်ဟာ ညပိုင်းချိန်လို့ဆို ရမှာပါ။ စနေ၊ တနင်္ဂနွေနေ့မျိုးတွေမှာသာ သားတွေကျောင်းပိတ်တာကြောင့် ကိုယ်တိုင်ချက်ပြုတ်စားသောက်လေ့ရှိတာဖြစ်ပြီး ကျန် တဲ့နေ့မျိုးတွေမှာတော့ဖြစ်သလို ဆိုင်ကပါ ဆယ်လေးတွေဝယ်ပြီး စားလေ့ရှိတာလည်း ဖြစ်ပါတယ်။

ဒေါ်ခင်မြင့်ဟာ လက်ရှိမှာ နေအိမ်ရဲ့ စားဝတ်နေရေးအတွက် ၀င်ငွေရှာဖွေနေသူ တစ်ဦးဖြစ်သလို နေအိမ်ရဲ့ ပဲ့ကိုင်ဆိုလည်း မှားမယ်မထင်ပါဘူး။ မိခင်တစ်ဦးရဲ့ မေတ္တာအပြည့်နဲ့ သားသမီးတွေကို ရုန်းကန်နေသူ တစ်ဦးဖြစ်ပြီး လင်ယောက်ျားအပေါ်မှာလည်း တာဝန်ကျေပွန်သူတစ်ဦးလို့ ဆိုရမှာပါ။ ပတ်ဝန်းကျင်ရဲ့ လှောင်ပြောင်သံတွေကိုပါ ခေါင်းကော့ရင်မော့ရင်း ၀မ်းတစ်ထွာအတွက် ရိုးသားဖြောင့်မတ်စွာ ရုန်းကန်နေသူလို့ ဆိုရမှာပါ။

ဒေါ်ခင်မြင့်ရဲ့အလုပ်နားချိန်ဟာ ညနေ ၆ နာရီကျော် ၇ နာရီဝန်းကျင်မှပဲ ဖြစ်ပါတယ်။ သူမရဲ့ စားဝတ်နေရေးအတွက်ကြောင့်သာ လူအများရဲ့ ပြောဆိုသံတွေကို နားမပါသလို မကြားယောင်ဆောင်ပြီး ယောက်ျားသားတွေနဲ့တန်းတူ ရင်ပေါင်တန်းရင်း ကြမ်းတမ်းလှတဲ့ ဆိုက်ကားနင်းတဲ့ အလုပ်ကိုရွေးချယ်လုပ်ကိုင်ခဲ့တာလည်း ဖြစ်ပါတယ်။

လက်ရှိမှာတော့ သူမကို ရပ်ကွက်တွင်း နေထိုင်သူတွေက ဒေါ်ခင်မြင့်ကို အနှေးယာဉ်မယ်တစ်ဦးအဖြစ် လက်ခံထားကြပြီလည်း ဖြစ်ပါတယ်။ ရပ်ကွက်တွင်းနေထိုင်သူတွေရဲ့ ကလေးမိဘတွေကလည်း ဒေါ်ခင်မြင့်နဲ့ဆို ကျောင်းပို့ကျောင်းကြို စိတ်ချရတာရယ်ကြောင့်လည်း ဖြစ်ပါတယ်။

လူတိုင်းလူတိုင်းမှာတော့ ရည်မှန်းချက်ပန်းတိုင် မျှော်လင့်ချက်ဆိုတာ ရှိတတ်ကြပါတယ်။ အဲဒီလိုပါပဲ အခြေအနေအရ ဆိုက်ကားနင်းတဲ့ အမျိုးသမီးတစ်ဦးဖြစ်ပေမဲ့ လူထဲကလူပဲဖြစ်တာကြောင့် မျှော်လင့်ချက်တွေ မျှော်မှန်းချက်တွေရှိနေမှာပါ။ စားဝတ်နေရေးအကျပ်အတည်း၊ မိသားစုကျန်းမာရေး အကျပ်အတည်းတွေကြားမှာ ရုန်းကန်နေတဲ့ ဒေါ်ခင်မြင့်အတွက် ဖြစ်ချင်နေတဲ့ ဆန္ဒများစွာလည်း ရှိနိုင်သလို ရှိလည်းရှိနေပါလိမ့်မယ်။ ဒါပေမဲ့ လတ်တလော သူအဖြစ်ချင်ဆုံး ဆန္ဒတစ်ခုကတော့ အကြွေးလေးတွေကို ကျေပွန်အောင်ဆပ်နိုင်ဖို့ရယ် ပင်ပန်းလှတဲ့ ဆိုက်ကားနင်းတဲ့အလုပ် (အနှေးယာဉ်မယ်) ဘ၀ကို စွန့်လွှတ်နိုင်ဖို့ပဲ ဖြစ်ပါတယ်။

 

ငြိမ်းချမ်းရေးတစ်ဆို့မှုများကို အဖြေရှာရမည့် ထိပ်သီးအစည်းအဝေး

NCA စာချုပ် လက်မှတ်ရေးထိုးခြင်း နှစ်နှစ်ပြည့် နှစ်ပတ်လည် အခမ်းအနားတွင် အစိုးရ၊ လွှတ်တော်၊ တပ်မတော်နှင့် တိုင်းရင်းသားလက်နက်ကိုင် အဖွဲ့အစည်းများမှ ခေါင်းဆောင်များအား တွေ့ရစဉ်

လာမည့် အောက်တိုဘာ ၁၅ ရက်တွင် အစိုးရ၊ တပ်မတော်နှင့် NCA လက်မှတ်ရေးထိုးထားသော တိုင်းရင်းသားလက်နက်ကိုင် ခေါင်းဆောင်များပါဝင်သည့် ထိပ်သီးအစည်းအဝေးကို နေပြည်တော်တွင် ကျင်းပမည်ဖြစ်သည်။

ထိုနေ့သည် တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ်(NCA) ရေးထိုးခြင်း သုံးနှစ်မြောက် နှစ်ပတ်လည်နေ့လည်း ဖြစ်သည်။

ထိပ်သီးအစည်းအဝေးသို့ အစိုးရဘက်မှ နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်၊ တပ်မတော်ဘက်မှ တပ်မတော် ကာကွယ်ရေးဦးစီးချုပ်ဗိုလ်ချုပ်မှူးကြီး မင်းအောင်လှိုင်နှင့် NCA လက်မှတ် ရေးထိုးထားသော တိုင်းရင်းသား လက်နက်ကိုင်အဖွဲ့များမှ ခေါင်းဆောင်များ တက်ရောက်ကြမည်ဖြစ်ကြောင်း သမ္မတရုံးပြောရေးဆိုခွင့်ရှိသူ ဦးဇော်ဌေးက ပြောကြားထားသည်။

ယခု ထိပ်သီးအစည်းအဝေးသည်  ၂၀၁၈ နှင့် ၂၀၁၉ အတွင်း နောက်ထပ်ပြုလုပ်မည့် ပြည်ထောင်စု ငြိမ်းချမ်းရေး ညီလာခံ -၂၁ ရာစု ပင်လုံအစည်းအဝေးသုံးကြိမ်တွင် ငြိမ်းချမ်းရေးအတွက် အရေးကြီးသော ဒီမိုကရေစီနှင့် ဖက်ဒရယ်ဆိုင်ရာ အခြေခံမူများရရှိရေး ဆောင်ရွက်ရာ၌ အဆင်ပြေစေရန် ရည်ရွယ်၍ ကျင်းပခြင်းဖြစ်ကြောင်း သမ္မတအိမ်တော်တွင် အောက်တိုဘာ ၅ ရက်က ကျင်းပသည့် သတင်းစာ ရှင်းလင်းပွဲ၌ ဦးဇော်ဌေးက ပြောကြားသည်။

ထိပ်သီးခေါင်းဆောင်များ မတွေ့ဆုံမီ အစိုးရ၊ တပ်မတော်၊ လွှတ်တော်ကိုယ်စားလှယ်များနှင့် တိုင်းရင်းသားလက်နက်ကိုင်အဖွဲ့ ကိုယ်စားလှယ်များ ကြိုတင်တွေ့ဆုံ မည်ဖြစ်ပြီး နှစ်ဖက်ကိုယ်စားလှယ် များ၏ ညှိနှိုင်းမှုကို ခေါင်းဆောင်များ ဆုံးဖြတ်နိုင်ရန် တင်ပြမည်ဖြစ်ကြောင်း ဦးဇော်ဌေးက ဆိုသည်။

ထို့ပြင် ယင်းထိပ်သီးအစည်း အဝေးတွင် NCA လက်မှတ်ရေး ထိုးခြင်း မရှိသေးသည့် တိုင်းရင်းသား လက်နက်ကိုင်အဖွဲ့များ၏ ကိစ္စကိုလည်း ဆွေးနွေးမည်ဖြစ်သည်။

ယခုကဲ့သို့ ထိပ်သီးခေါင်းဆောင်များ တွေ့ဆုံဆွေးနွေးခြင်းသည် မြန်မာ့ ငြိမ်းချမ်းရေးလုပ်ငန်းစဉ်တွင် ပထမ ဆုံးအကြိမ်ဖြစ်သည်ဟုဆိုနိုင်ကြောင်း NCA လက်မှတ် ရေးထိုးထားသော တိုင်းရင်းသားလက်နက် ကိုင်အဖွဲ့အစည်းများက ဆိုသည်။

“အခုတစ်ကြိမ် ဆွေးနွေးပွဲကတော့ ထိပ်သီးခေါင်းဆောင်များ အကြား တစ်နည်းအားဖြင့် ပြောရရင် ဆုံးဖြတ်ချက်ချမှတ်နိုင်တဲ့သူတွေ ကြားမှာလုပ်တဲ့ ပထမဆုံးအကြိမ် ဆွေးနွေးပွဲလို့တောင် ပြောလို့ရပါ တယ်” ဟု ပအိုဝ်းအမျိုးသားလွတ်မြောက်ရေးအဖွဲ့(PNLO) မှ ဒုတိယဥက္ကဋ္ဌ ဦးခွန်မြင့်ထွန်းက မှတ်ချက်ပြုသည်။

 

■ ထိပ်သီးအစည်းအဝေး ဖြစ်ပေါ်လာပုံ

ထိပ်သီးအစည်းအဝေး ဖြစ်ပေါ်လာခြင်း၏ မြစ်ဖျားခံရာသည် နေပြည်တော်၌ ပြည်ထောင်စုငြိမ်းချမ်းရေးညီလာခံ-၂၁ ရာစုပင်လုံ တတိယအစည်းအဝေး ကျင်းပနေသည့် အချိန်ကာလတွင် ဖြစ်သည်။

ပြီးခဲ့သည့် ဇူလိုင် ၁၃ ရက်က နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်၊ တပ်မတော် ကာကွယ်ရေးဦးစီးချုပ် ဗိုလ်ချုပ်မှူးကြီးမင်းအောင်လှိုင်နှင့် တိုင်းရင်းသားလက်နက်ကိုင်အဖွဲ့ခေါင်းဆောင်များ တွေ့ဆုံဆွေးနွေးရာတွင် ငြိမ်းချမ်းရေးဖြစ်စဉ်နှင့် နိုင်ငံရေး ဆွေးနွေးပွဲများအတွက် အမှန်တကယ်လိုအပ်နေသည့် အချက် ငါးချက်ကို NCA-s EAO ဘက်က တင်ပြခဲ့သည်။

NCA-s EAO ဘက်က တင်ပြခဲ့သည့် ထိပ်သီးခေါင်းဆောင်များအကြား အရေးတကြီးဆွေးနွေးရန် လိုအပ်နေသော အချက်ငါးချက်မှာ  ပြည်ထောင်စုငြိမ်းချမ်းရေးညီလာခံ- ၂၁ ရာစုပင်လုံ အစည်းအဝေးများကို ဆက်လက်ကျင်းပနိုင်ရေးကိစ္စ၊ နိုင်ငံရေးဆွေးနွေးပွဲများတွင် ပြည်ထောင်စုမှ ခွဲမထွက်ရေး ကိုယ်ပိုင်ပြဋ္ဌာန်းခွင့် အမျိုးသားတန်းတူရေး လူမျိုးစုအခွင့်အရေး ပြည်နယ်ဖွဲ့စည်းမှုစသော ဖက်ဒရယ်မူများ ချမှတ်နိုင်ရေးကိစ္စ၊ ပြည်ထောင်စု တပ်မတော်ဆိုင်ရာကိစ္စ၊ ဆုံးဖြတ်ချက်များ ချမှတ်ရာတွင် ရှင်းလင်းလွယ်ကူစွာ ချမှန်နိုင်မည့် နိုင်ငံရေးဆွေးနွေးမှု ပုံစံများရှာဖွေရေးကိစ္စ၊ အလုပ်အဖွဲ့များ၊ ကော်မတီများဖြင့် ဆုံးဖြတ်ရန် မပြီးပြတ်သည့် ကိစ္စများကို သက်ဆိုင်ရာ ဆုံးဖြတ်နိုင်သည့် ထိပ်ပိုင်းခေါင်းဆောင်များအကြား ဆုံးဖြတ်နိုင်ရေးကိစ္စနှင့် လက်ရှိငြိမ်းချမ်းရေး ဖြစ်စဉ်တွင် ကျန်ရှိနေသော တိုင်းရင်းသားလက်နက်ကိုင်အဖွဲ့အစည်းများ၏ ကိစ္စများပင်ဖြစ်သည်။

NCA-s EAO ဘက်က တင်ပြမှုအပေါ် အစိုးရနှင့် တပ်မတော်က တွေ့ဆုံရန် အချိန်ကျပြီဟု ယူဆလာ သည့်အတွက် ယခုကဲ့သို့ ထိပ်သီးအစည်းအဝေး ပေါ်ပေါက်လာခြင်းဖြစ်ပြီး တပ်မတော်ကာကွယ်ရေးဦးစီးချုပ်ကလည်း လှိုက်လှိုက်လှဲလှဲ ကြိုဆိုကြောင်း သမ္မတရုံး ပြောရေးဆိုခွင့်ရှိသူ ဦးဇော်ဌေးက ပြောကြားထားသည်။

 

■ ဘာတွေတစ်ဆို့နေသလဲ

ပြီးစီးခဲ့သည့် ပြည်ထောင်စု ညီလာခံ ၂၁ ရာစု ပင်လုံအစည်းအဝေးသုံးကြိမ်တွင် အစိုးရနှင့် NCA-s EAO တိုင်းရင်းသား လက်နက်ကိုင်အဖွဲ့များအကြား ပြည်ထောင်စုသဘောတူစာချုပ် အစိတ်အပိုင်းအဖြစ် သဘောတူညီချက် ၅၁ ချက် ရရှိခဲ့သော်လည်း အရေးကြီးသည့် ဒီမိုကရေစီနှင့် ဖက်ဒရယ်ဆိုင်ရာ အခြေခံမူများမှာ ပါဝင်လာခြင်း မရှိသည့်အပေါ် တိုင်းရင်းသား လက်နက်ကိုင်အဖွဲ့အစည်းများက ဘ၀င်မကျ ဖြစ်နေသည်။

၂၀၁၇ မေလကုန်ပိုင်းတွင် ကျင်းပခဲ့သည့် ဒုတိယအကြိမ် ညီလာခံတွင် ကိုယ်ပိုင်ပြဋ္ဌာန်းခွင့်၊ ပြည်နယ်များ၏ ဖွဲ့စည်းပုံအခြေခံ ဥပဒေရေးဆွဲပိုင်ခွင့်စသော ခွဲမထွက်ရေးဆိုင်ရာ ကိစ္စရပ်များနှင့် ပတ်သက်၍ ဆွေးနွေးရန် အစိုးရနှင့် တိုင်းရင်းသားများအကြား  သဘောတူညီမှု ရရှိခဲ့သည်။

သို့သော် ယင်းအချက်များကို ယခုနှစ် ဇူလိုင်တွင် ကျင်းပခဲ့သည့် တတိယအကြိမ် ညီလာခံ၌ ဆက် လက်ဆွေးနွေးနိုင်ခြင်း မရှိခဲ့ပေ။

“တစ်ဆို့မှုတွေ ဖြစ်ခဲ့ကြတယ်။ အဲဒီလို တစ်ဆို့မှုတွေကို မဖြေရှင်းရင်တော့ ရှေ့ကို သွားမယ့် ခရီးလမ်းမှာ အထစ်အငေါ့တွေ ဖြစ်မယ်လို့ ကျွန်မတို့ EAO ဘက်က မြင်ကြတယ်။ အဲဒါကြောင့်မိုလို့ အစိုးရနဲ့ EAO ခေါင်းဆောင်တွေကြားမှာ တွေ့ဖို့လိုတယ် ဆိုပြီးတော့ ကမ်းလှမ်းချက်တွေ ပေးလိုက်တယ်။ အဲဒီလို ကြိုးစားမှုတွေအပေါ်မှာ မူတည်ပြီး အစိုးရဘက်က ပြန်ပြီး EAO ကို ကမ်းလှမ်းလာတယ်။ အဲဒါကြောင့် တစ်ဆို့နေတဲ့ အချက်တွေကို ဖြေရှင်းဖို့က အထူးသဖြင့်ပြောမယ်ဆိုလို့ ရှိရင် ခွဲမထွက်ရဆိုတဲ့ကိစ္စတွေ ပါ တယ်။ ပြီးရင် ကိုယ်ပိုင်ပြဋ္ဌာန်းခွင့်။ ကိုယ်ပိုင်ပြဋ္ဌာန်းခွင့်ကို ဘယ်လောက်အထိ တိုင်းရင်းသားတွေက လိုချင် နေတာလဲ။ တိုင်းရင်းသားတွေဘက်ကလည်း သေချာဖို့လိုတယ်။ ဒီလိုပဲ အစိုးရဘက်ကလည်း တိုင်းရင်းသား တွေရဲ့ လိုလားချက်အပေါ် ဘယ်လောက်အထိ ပေးနိုင်မလဲ။ ဥပမာ တစ်ခုတည်းသော တပ်မတော်ထား ရှိရေးကိစ္စ။ အဲဒါက ပြည်ထောင်စု တပ်မတော်ထားရှိရေးဆိုတာက မူအရရှိတယ်။ အဲဒါကို သိပ်ပြီးတော့ အငြင်းပွားနေစရာ မလိုဘူး။ တိုင်းရင်းသားနယ်မြေတွေမှာ ရှိနေတဲ့ တပ်တွေကို ဘယ်လို နေရာချထား မလဲဆိုတာ စဉ်စားဖို့အချက်တွေ လိုလာတယ်။ ထိုနည်းလည်းကောင်း အပစ်အခတ်ရပ်စဲရေးကို ဘယ်လို ခိုင်မာအောင် လုပ်မလဲ။ ကြားကာလ အစီအစဉ်တွေကို ဘယ်လို စီစဉ်ဆောင်ရွက်မလဲ။ အားလုံးမပြီးသေး တဲ့ ကာလမှာ တိုင်းရင်းသား ခေါင်းဆောင်တွေက ကိုယ့်နယ်မြေမှာ အလုပ်လုပ်ဖို့က လိုတယ်။ အဲဒီတော့ ကိစ္စတွေက တော်တော်များများရှိပါတယ်” ဟု ရခိုင်လွတ်မြောက်ရေးပါတီ (ALP) မှ ဗဟိုအလုပ်အမှု ဆောင်ကော်မတီဝင် ဒေါ်စောမြရာဇာလင်းက ဆိုသည်။

NLD အစိုးရလက်ထက်တွင် ပြည်ထောင်စုငြိမ်းချမ်းရေးညီလာခံ ၂၁ ရာစု ပင်လုံညီလာခံအစည်း အဝေးကို သုံးကြိမ်အထိ ကျင်းပပြီးသော်လည်း ပြည်နယ်များ၏ ကိုယ်ပိုင်ဖွဲ့စည်းပုံ အခြေခံဥပဒေရေးဆွဲခွင့်၊ ခွဲမထွက်ရေး၊ ကိုယ်ပိုင်ပြဋ္ဌာန်း ခွင့်များနှင့် တိုက်ရိုက်ဆိုင်သည့် ကိစ္စရပ်များ၊ တပ်ပိုင်းဆိုင်ရာကိစ္စများသည် အစိုးရ၊ တပ်မတော်နှင့် တိုင်းရင်းသားလက်နက်ကိုင်များ အကြားတွင် ဆက်လက်ညှိနှိုင်းရန် တစ်ဆို့နေခဲ့သည်။

အစိုးရအနေဖြင့် ပြည်ထောင်စုငြိမ်းချမ်းရေးညီလာခံကို ၂၀၁၈ ခုနစ်အတွင်း တစ်ကြိမ်နှင့် ၂၀၁၉ ခုနစ်အတွင်း နှစ်ကြိမ် စုစုပေါင်း သုံးကြိမ်ကျင်းပရန် ရည်မှန်းထားပြီး  ဒီမိုကရေစီနှင့် ဖက်ဒရယ် အခြေခံမူများကို ချမှတ်နိုင်ရန် မျှော်မှန်းထားသည်။

တိုင်းရင်းသားလက်နက်ကိုင်ခေါင်းဆောင်များကလည်း နောင်တွင် ကျင်းပမည့် ပြည်ထောင်စုငြိမ်း ချမ်းရေးညီလာခံများတွင် အစိုးရ၊ တပ်မတော်နှင့် ၎င်းတို့အကြား တစ်ဆို့နေသည့် ကိစ္စရပ်များကို ဆုံးဖြတ် ချက်ချမှတ်နိုင်ရန် လိုလားလျက်ရှိသည်။

“ဒီမိုကရေစီနဲ့ ဖက်ဒရယ် အခြေခံမူတွေကို ဆွေးနွေးဖို့ သဘောတူထားတယ်။ ဒီဆွေးနွေးပွဲမှာ ထိပ်သီးခေါင်းဆောင်တွေကတော့ ဆွေးနွေးရမယ့်မူတွေပဲ ချမယ်ထင်တယ်။ အသေးစိတ်ကတော့ မရနိုင်ဘူး။ အသေးစိတ်ကို အောက်ခြေက သက်ဆိုင်ရာကော်မတီတွေ ဖွဲ့ပြီး တော့ ဆက်လက်ဆွေးနွေးရမယ့် အနေအထားရှိတယ်။ ဆွေးနွေးနိုင်မယ်လို့တော့ ကျွန်တော်တို့ မျှော်လင့်တယ်။ ၂၀၁၉ အထိတော့ ပြတ်ဖို့က နည်းနည်းခက်မယ်။ ဘာလို့ဆိုတော့  ကျွန်တော်တို့ EAO က အဖွဲ့ ၂၀ လောက်ရှိတယ်။ NCA အ၀န်း အ၀ိုင်းထဲ မ၀င်လာသေးတဲ့ တခြားညီနောင်အဖွဲ့တွေလည်း ရှိနေတယ်။ သဘောက ကျွန်တော်တို့ ၁၀ ဖွဲ့တည်း ရဲ့ သဘောထားနဲ့ သွားလို့မရဘူး။ ကျန်တဲ့ ညီနောင်တွေရဲ့ သဘောထားလည်း ပါဖို့လိုတယ်။ အဲဒါက သိပ်အရေးကြီးတယ်။ ဒါကြောင့် ဒီ ဆွေးနွေးပွဲမှာ အားလုံးပါဝင်နိုင်အောင် ဘယ်လိုလုပ်မလဲဆိုတဲ့  ခေါင်းစဉ်တစ်ခုပါတယ်။ အဲဒါလည်း NCA အ၀န်းအ၀ိုင်းထဲကို မလာနိုင်သေးတဲ့ ကျွန်တော်တို့ ညီနောင်အဖွဲ့ တွေ ပါဝင်လာနိုင်အောင် ဖြေရှင်းနိုင်လိမ့်မယ်လို့ ယုံကြည်တယ်” ဟု ငြိမ်းချမ်းရေးလုပ်ငန်းစဉ် ဦးဆောင်အဖွဲ့ (PPST) မှ ပြောရေးဆိုခွင့်ရှိသူ ဗိုလ်မှူးကြီးစိုင်းငင်းက ဆိုသည်။

 

■ ပုပ္ပားမှ နေပြည်တော်သို့

ငြိမ်းချမ်းရေးလုပ်ငန်းစဉ် အောင်မြင်မှုရရှိရေး ဆွေးနွေးမည့် အစိုးရ၊ တပ်မတော်၊ လွှတ်တော်နှင့် NCA လက်မှတ်ထိုး တိုင်းရင်းသား လက်နက်ကိုင်အဖွဲ့ ထိပ်သီးခေါင်းဆောင်များ သီးသန့်ဆွေးနွေးပွဲကို အောက်တိုဘာ ၁၅ ရက်တွင် ပုပ္ပားဒေသ၌ ငါးရက်ကြာကျင်းပရန် သတ်မှတ်ထားကြောင်း သမ္မတရုံး ပြောရေးဆိုခွင့်ရှိသူ ဦးဇော်ဌေးက ပြောကြားခဲ့သည်။

ထိပ်သီးခေါင်းဆောင်များ အစည်းအဝေးကျင်းပချိန်သည် NCA လက်မှတ်ရေးထိုးခြင်း သုံးနှစ်ပြည့်ချိန်ဖြစ်၍ အနှစ်သာရရှိသည့် ပုံစံဖော်ဆောင်ရန် ကြိုးပမ်းခြင်း ဖြစ်ကြောင်း ၎င်းက ရှင်းပြသည်။

ပုပ္ပားထိပ်သီးခေါင်းဆောင်များ ဆွေးနွေးပွဲသို့ NCA လက်မှတ်ထိုးထားသော တိုင်းရင်းသားလက်နက်ကိုင် ၁၀ ဖွဲ့စလုံးမှ ခေါင်းဆောင်များ တက်ရောက်ပေးရန် ဆွေးနွေးထားကြောင်း ဦးဇော်ဌေးက ဆိုသည်။

အစိုးရဘက်က ထိပ်သီးအစည်းအဝေးကို  NCA လက်မှတ်ထိုးထားသော တိုင်းရင်းသား လက်နက်ကိုင် ၁၀ ဖွဲ့စလုံးမှ ခေါင်းဆောင်များ တက်ရောက်ပေးရန် ဆွေးနွေးထားသည်ဟု ဆိုသော်လည်း ကရင် အမျိုးသားအစည်းအရုံး (KNU) နှင့်  ရှမ်းပြည်ပြန်လည်ထူထောင်ရေးကောင်စီ (RCSS) တို့က အစိုးရ  သတ်မှတ်ထားသည့်ရက်တွင် တွေ့ဆုံနိုင်ရန် မသေချာသည့်အနေအထားတွင် ရှိခဲ့သည်။ ၂၀၁၅ ခုနှစ်တွင် NCA စာချုပ်၌ လက်မှတ်ထိုးခဲ့သည့် RCSS သည် တပ်မတော်နှင့် တစ်ကျော့ပြန်တိုက်ပွဲများကြောင့် နှစ်ဖက်အကြား အငြင်းပွားမှုများရှိခဲ့သည်။ တိုက်ပွဲများရပ်တန့်ရေးအတွက် အောက်ခြေအဆင့်တပ်များ တွေ့ဆုံရန် ပြည်ထောင်စုအဆင့် ပစ်ခတ်တိုက်ခိုက်မှုရပ်စဲရေးဆိုင်ရာ ပူးတွဲစောင့်ကြည့်ရေးကော်မတီ (JMC-U) က ဆုံးဖြတ်ထားသော်လည်း လက်တွေ့တွင် အကောင်အထည်ဖော် ဆောင်ရွက်နိုင်ခြင်း မရှိသေးပေ။

ရှမ်းပြည်နယ်အဆင့် ပစ်ခတ်တိုက်ခိုက်မှု ရပ်စဲရေးကော်မတီ (JMC-S) သည် NCA စာချုပ်ပါ အချက်အလက်များအပေါ် လိုက်နာဆောင်ရွက်နိုင်ခြင်းမရှိကြောင်း RCSS က အောက်တိုဘာ ၇ ရက်တွင် ကြေညာချက်ထုတ်ပြန်ခဲ့သည်။

ရှမ်းပြည်နယ်အတွင်းဖြစ်ပွားနေသော အကြမ်းဖက်မှုများအား ကန့်ကွက်ရှုတ်ချပြီး JMC- S တွင် သမာသမတ်ကျခြင်း၊ တန်းတူညီမျှမှုနှင့် တရားမျှတမှုမရှိပါက ရှေ့ဆက် ကျင်းပမည့်JMC-U အစည်းအဝေး များတွင် တက်ရောက်ရေးကို ပြန်လည် စဉ်းစားမည်ဟု ကြေညာချက်တွင် ဖော်ပြထားသည်။

ထို့ပြင် ကရင်အမျိုးသား အစည်း အရုံး (KNU) ကလည်း အောက်တိုဘာ ၅ ရက်နှင့် ၆ ရက်တွင်  ဗဟို အမြဲ တမ်းကော်မတီအစည်းအဝေး ပြုလုပ်၍ ကြေညာထုတ်ပြန်ခဲ့သည်။

ကြေညာချက်ထဲတွင် ထိပ်သီးဆွေးနွေးပွဲကို ကြိုဆိုထောက်ခံကြောင်းနှင့် ရလဒ်ကောင်းများရရှိရေး ပြင်ဆင်မှုများ ပိုမိုပြုလုပ်ရန် လိုအပ်နေသေး၍ နှစ်ဖက်တွေ့ဆုံဆွေးနွေးနိုင်မည့်ရက်ကို ပြန်လည်ညှိနှိုင်းဆွေးနွေးလိုကြောင်း ပါရှိသည်။

တစ်ခုတည်းသော တပ်မတော်ကို လက်ခံရန် တောင်းဆိုသည့်ကိစ္စ၊ ပြည်ထောင်စုမှ ခွဲမထွက်ရေးကိစ္စ၊ NCA အကောင်အထည်ဖော်ခြင်းနှင့် နိုင်ငံရေးဆွေးနွေးပွဲများ ပြုလုပ်ရာတွင် NCA အပေါ် မတူညီသည့် အဓိပ္ပာယ် ဖွင့်ဆိုချက်များကိစ္စတို့ အတွက် ပြင်ဆင်ရန် အချိန်လိုအပ်နေသေးသည်ဟု KNU က ဆိုသည်။

“ကျွန်တော်တို့ အဓိကကတော့ လူကြီးတွေရဲ့ ပြင်ဆင်မှုကို ကောင်းကောင်းလိုအပ်တယ်လေ။နောက်ပြီးတော့ တစ်ဆို့မှုဆိုတဲ့ အပိုင်းမှာလည်း နှစ်ဖက်အယူအဆ ကွာဟနေတဲ့အတွက်ကြောင့်ပေ့ါနော်။ဒါကိုလည်း ကျွန်တော်တို့ ညှိနှိုင်းဖို့ လိုနေသေးတယ်။ ဆိုတော့ အပြန်အလှန် ညှိနှိုင်းမှုတွေတော့ ရှိမှာပေါ့။ကျွန်တော်တို့ သဘောထားကတော့ (ထိပ်သီးအစည်းအဝေး ပြုလုပ်မယ့်ရက်ကို) PPST မှာပဲ ပြန်ပြီးတော့ ညှိနှိုင်းမှာပါ။ ဘယ်ရက်က အဆင်ပြေမလဲ ဆိုတာကတော့ လူကြီးတွေရဲ့ ပြင်ဆင်မှုအပေါ်မှာပဲ မူတည်ပါလိမ့်မယ်}}ဟု KNU အထွေထွေအတွင်းရေးမှူး ပဒိုစောတာဒိုမူးက ပြောကြားသည်။

ထို့ပြင် အနာဂတ်ဖက်ဒရယ် ဒီမိုကရေစီနိုင်ငံတော်ကို အားလုံးပါဝင်မှုဖြင့် တည်ဆောက်နိုင်ရန် NCA မထိုးရသေးသောအဖွဲ့များအား ငြိမ်းချမ်းရေးလုပ်ငန်းစဉ်တွင် ပါဝင်လာနိုင်မည့် အခင်းအကျင်းများ ဖန်တီးပေးရမည်ဟု KNU က ဆိုသည်။

ယင်းကိစ္စနှင့်ပတ်သက်၍ သမ္မတအိမ်တော်တွင် အောက်တိုဘာ  ၅ ရက် ပြုလုပ်သည့် သတင်းစာ ရှင်းလင်းပွဲတွင် ဦးဇော်ဌေးက “ဘာကြောင့်လဲဆိုတော့ ဒီလိုဆွေးနွေးပွဲ တစ်ခါမှ မရှိဖူးဘူး။ မရှိတဲ့အတွက် တကယ့်နိုင်ငံရေး စိတ်ရင်းစေတနာ၊ ငြိမ်းချမ်းရေးနဲ့ ပတ်သက်တဲ့ နိုင်ငံရေး စိတ်ရင်းစေတနာ ဘယ်လောက်ရှိ လဲ၊ မရှိလဲဆိုတာ ဒီပွဲကို တက်ခြင်း၊ မတက်ခြင်းက အရေးကြီးတယ်” ဟု ပြောကြားသည်။

ထို့ပြင် ဆွေးနွေးပွဲ မတက်သည့် ခေါင်းဆောင်များအနေဖြင့် အဘယ်ကြောင့် မတက်ရောက်နိုင်သည်ကို ပြည်သူအား အကြောင်းပြချက်ပေးရန် လိုအပ်သည်ဟု ၎င်းကဆိုသည်။

“တက်မယ်ဆိုရင်တော့ တစ်ဆို့နေတာတွေ ပျောက်မယ်။ မတက်ဘဲနဲ့ ရှောင်နေမယ်ဆိုရင်တော့ ပျောက်ဖို့ခက်တယ်။ ခက်တယ်ဆိုတော့ တကယ့်ငြိမ်းချမ်းရေးကို လိုလားသလား၊ မလိုလားဘူးလား ဆိုတာ ကတော့ ဒီအစည်းအဝေး တက်ခြင်း၊ မတက်ခြင်းနဲ့ ဆိုင်လိမ့်မယ်” ဟု ဦးဇော်ဌေးက ပြောကြားသည်။

ဆွေးနွေးပွဲရက်ရွှေ့ဆိုင်းရန် တိုင်းရင်းသားလက်နက်ကိုင်အဖွဲ့အချို့က လိုလားခဲ့သော်လည်း အစိုးရကမူ သတ်မှတ်ထားသည့် အောက်တိုဘာ ၁၅ ရက်တွင်သာ ကျင်းပရန် ဆုံးဖြတ်ခဲ့သည်။

ပုပ္ပားဒေသတွင် ပြုလုပ်ရန် လျာထားသည့် ထိပ်သီးဆွေးနွေးပွဲ ကို အစိုးရအဆိုပြုထားသည့် ရက်အတိုင်း တက်ရောက်နိုင်ခြင်း ရှိ၊ မရှိ နှင့် ပတ်သက်၍ ဆုံးဖြတ်ချက်ချမည့် ငြိမ်းချမ်းရေးလုပ်ငန်းစဉ်ဦးဆောင်အဖွဲ့ (PPST) အစည်းအဝေးကို အောက်တိုဘာ ၁၀ ရက်နှင့် ၁၁ ရက် တွင် ပြုလုပ်ခဲ့ပြီး ကြေညာချက် ထုတ်ပြန်ခဲ့သည်။

ယင်းကြေညာချက်ထဲတွင် ပုပ္ပားဒေသတွင်ပြုလုပ်မည့် အစိုးရ၊ တပ်မတော်နှင့် တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေး သဘောတူစာချုပ် (NCA) လက်မှတ်ရေးထိုးထားသော တိုင်းရင်းသားလက်နက် ကိုင်အဖွဲ့ခေါင်းဆောင်များ၏ ထိပ်သီးဆွေးနွေးပွဲကို နေပြည်တော်သို့ ပြောင်းရွှေ့ပြုလုပ်ရန် ဆုံးဖြတ်သည်ဟု ပါရှိသည်။

လက်ရှိငြိမ်းချမ်းရေးလုပ်ငန်းစဉ်တွင် နိုင်ငံရေးဆွေးနွေးပွဲအဆင့်ဆင့်၌ ဖြစ်ပေါ်နေသော တစ်ဆို့မှုများအား ကျော်လွှားနိုင်ရေးအတွက် အစိုးရ၊ လွှတ်တော်၊ တပ်မတော်နှင့် တိုင်းရင်းသား လက်နက်ကိုင်တော်လှန်ရေး အဖွဲ့အစည်းများ၏ သက်ဆိုင်ရာ ထိပ်သီးခေါင်းဆောင်များအကြား အလွတ်သဘောတွေ့ဆုံ ဆွေးနွေးပွဲမှတစ်ဆင့် ဆွေးနွေး အဖြေရှာသွားနိုင်ရန် ၂၀၁၈ အောက်တိုဘာ ၁၅ ရက်တွင် နေပြည်တော်၌ ကျင်းပရန် PPST အစည်းအဝေးက သဘောတူဆုံးဖြတ်ခဲ့ခြင်း ဖြစ်သည်။

“အစိုးရဘက်ကတော့ ပြင်ဆင်မှုကတော့ ပုပ္ပားလို့ ပြောတယ်။ ဒါပေမဲ့ကျွန်တော်တို့ဘက်က စဉ်းစားချက်က ဘာလဲဆိုရင် ပုပ္ပားထက်စာရင် ကျယ်ကျယ်ဝန်းဝန်းလည်း ရှိမယ်။ကျွန်တော်တို့ အားလုံး ဆွေးနွေးတိုင်ပင် အပြန်ပြန်အလှန်လှန် ညှိနှိုင်းနိုင်တဲ့ အခင်းအကျင်းမျိုးက ရန်ကုန်မြို့က ပိုပြီးသင့်တော်တယ်လို့ ကျွန်တော်တို့ဘက်က ထပ်ပြီး အဆိုပြုတယ်။ဒါပေမဲ့ နောက်ဆုံး ဆက်လက်ပြီးတော့ ညှိတဲ့အခါမှာတော့ နေပြည်တော်ဟာ ပိုပြီးတော့ အစိုးရရော၊ တပ်မတော်ခေါင်းဆောင်တွေနဲ့ရော လက်လှမ်းမီနိုင်တယ်။ ကျွန်တော်တို့အတွက်ကလည်း ကျယ်ကျယ်ဝန်းဝန်းနဲ့ အဆင်ပြေနိုင်တယ်ဆိုတဲ့အတွက် နေရာက ဘာလဲဆိုရင် နေပြည်တော်ကို ဆုံးဖြတ်ခဲ့တာဖြစ်တယ်”  ဟု မြန်မာနိုင်ငံလုံးဆိုင်ရာ ကျောင်းသားများဒီမိုကရက်တစ်တပ်ဦး (ABSDF) ဥက္ကဋ္ဌ ရဲဘော်သံခဲက ဆိုသည်။

NCA စာချုပ် လက်မှတ်ရေးထိုးခြင်း နှစ်နှစ်ပြည့် နှစ်ပတ်လည်အခမ်းအနားတွင် အစိုးရ၊ လွှတ်တော်၊ တပ်မတော်နှင့် တိုင်းရင်းသား လက်နက်ကိုင် အဖွဲ့အစည်းများမှ ခေါင်းဆောင်များစုပေါင်း ဓာတ်ပုံရိုက်ကူးစဉ်

 

■ ဘာတွေ မျှော်လင့်နေကြသလဲ

အစိုးရ၊ တပ်မတော်နှင့် NCA လက်မှတ်ရေးထိုးထားသော တိုင်းရင်းသား လက်နက်ကိုင်ခေါင်းဆောင်များ ပါဝင်သည့် ထိပ်သီးအစည်းအဝေးတွင် ငြိမ်းချမ်းရေးလုပ်ငန်းစဉ်များ၌ တစ်ဆို့နေသည့် အကြောင်းအရာများကို ဆွေးနွေး အဖြေရှာနိုင်မည်ဟု NCA လက်မှတ်ရေးထိုးထားသော တိုင်းရင်းသား လက်နက်ကိုင်အဖွဲ့များက မျှော်လင့်နေသည်။

ထိပ်သီးအစည်းအဝေးတွင် အမြင့်ဆုံး ခေါင်းဆောင်များ တွေ့ဆုံဆွေးနွေးရာ၌ ဆုံးဖြတ်ချက်ပေးနိုင်သည့် ပုံစံမျိုးဖြစ်နေသည့်အတွက် နိုင်ငံရေး၊ ငြိမ်းချမ်းရေး လုပ်ငန်းစဉ်များတွင် တစ်ဆို့နေမှုများကို ဖြေရှင်းနိုင်မည်ဟု ပအိုဝ်း အမျိုးသားလွတ်မြောက်ရေး အဖွဲ့ (PNLO) မှ ဒုတိယဥက္ကဋ္ဌ ဦးခွန်မြင့်ထွန်းက ဆိုသည်။

“ဒီ ထိပ်သီးအစည်းအဝေးက အလွတ်သဘော  ဆွေးနွေးမှုဆိုတဲ့နေရာမှာ ကိုယ်စားလှယ်တွေကြားမှာပဲ ဆွေးနွေးတာမျိုးမဟုတ်ဘဲနဲ့ အမြင့်ဆုံးခေါင်းဆောင်တွေကြားမှာ ဆွေးနွေးကြမယ်။ ဆုံးဖြတ်ချက်ချမယ့် ပုံစံမျိုးဖြစ်တဲ့အတွက် ဒီဆွေးနွေးမှုမျိုးကို ဒီတစ်ပွဲတည်းတင် မကဘူး။ နောက်ဒီလိုပွဲတွေကို ကျွန်တော်တို့ စဉ်ဆက်မပြတ် ပြုလုပ်သွားခြင်းအားဖြင့် တိုင်းပြည်ရဲ့ ပြဿနာလည်း ပိုပြီးတော့ ဖြေရှင်းနိုင်မယ်။ ငြိမ်းချမ်းရေးအတွက်လည်း ပိုပြီးတော့ အ ထောက်အကူပြုမယ်။ ပြည်ထောင်စု တည်ဆောက်ရေးဆိုင်ရာ မူတွေလည်း ရနိုင်မယ်လို့ မျှော်လင့်ထားပါတယ်” ဟု ဦးခွန်မြင့်ထွန်းက ပြော ကြားသည်။

သို့သော် ယင်းထိပ်သီးအစည်းအဝေးသည် နိုင်ငံရေးဆိုင်ရာ လမ်းညွှန်မှုသာ ချမှနိုင်မည်ဖြစ်ပြီး ရရှိ လာသည့်မူများကို ဆက်လက်လုပ်ဆောင်သွားရမည်ဖြစ်ကြောင်း မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ်တပ်ဦး (ABSDF) မှ ဒုတိယဥက္ကဋ္ဌ ရဲဘော်မျိုးဝင်းက မှတ်ချက်ပြုသည်။

“ဒီထိပ်သီးဆွေးနွေးပွဲ အဆင့်က နိုင်ငံရေးဆိုင်ရာ လမ်းညွှန်မှုလောက်ပဲ ချပေးနိုင်တဲ့ အနေအထား ဖြစ်တယ်။ အသေးစိတ်မူတွေ ဆွေးနွေးမယ့် အနေအထားမျိုးတော့ မဟုတ်ဘူး။ ဒီထိပ်သီးကနေ ချပေးလိုက်တဲ့ မူတွေအပေါ်မှာ အခြေခံပြီးတော့ UPDJC အနေနဲ့ အဆင့်ဆင့် အလုပ်တွေ ဆက်လုပ်ပြီး ဖော်ဆောင်သွားရမှာ ဖြစ်တယ်။ အဲဒီလို မူတွေချမှတ်နိုင်ဖို့ ဒီထိပ်သီးအစည်း အဝေးက လမ်းညွှန်မှုပဲ ချပေးနိုင်ပါလိမ့်မယ်” ဟု ရဲဘော်မျိုးဝင်းက ဆိုသည်။

ယခုပြုလုပ်မည့် ထိပ်သီးအစည်းအဝေးသည် နိုင်ငံရေးဆွေးနွေးမှုပုံစံကို ဒီဇိုင်းပြောင်းရန် စတင်လှမ်းလိုက်သည့် ခြေလှမ်းဖြစ်နိုင်သည်ဟု ငြိမ်းချမ်းရေးလုပ်ငန်းစဉ် ဦးဆောင်အဖွဲ့ (PPST) မှ ပြောရေးဆိုခွင့်ရှိသူ ဗိုလ်မှူးကြီးစိုင်းငင်းက ဆိုသည်။

“ဒီထိပ်သီးအစည်းအဝေးက နိုင်ငံရေးဆွေးနွေးမှုပုံစံကို ဒီဇိုင်းပြောင်းဖို့ ခြေလှမ်းအစဖြစ်လာနိုင်တယ်။ အခုက ထိပ်သီးတွေကနေတစ်ဆင့် ခေါင်းစဉ်ဖြစ်ဖြစ်၊ မူဖြစ်ဖြစ် တစ်ခုခု ရလာမယ်။ အဲဒီရလာတဲ့ဟာကို လူထုကို ပြန်ချပြမဲ့ အနေအထားရှိတယ်။ နောက်ပိုင်းကျရင် မူဘောင်တွေကို ပြန်လည်သုံးသပ်မဲ့ အစည်းအဝေးတွေရှိမယ်။ ဒါကြောင့်မိုလို့ ဆွေးနွေးမှုတွေကို ဘယ်လိုဆက်လုပ်မယ်ဆိုတာက သီးသန့်ထွက်လာ မယ်” ဟု ဗိုလ်မှူးကြီးစိုင်းငင်းက ပြောကြားသည်။

ယင်းထိပ်သီးအစည်းအဝေး တွင် ငြိမ်းချမ်းရေးလုပ်ငန်းစဉ်များ၌ တစ်ဆို့နေသည့်ကိစ္စများကို ဆွေးနွေးအဖြေရှာနိုင်ရန် NCA လက်မှတ်ရေးထိုးထားသည့် တိုင်းရင်းသား လက်နက်ကိုင်များက မျှော်လင့်နေ သကဲ့သို့ NCA လက်မှတ်မထိုးရသေးသည့် တိုင်းရင်းသားလက်နက်ကိုင် အဖွဲ့များကလည်း ထောက်ခံမှု ရှိခဲ့သည်။

‘၀’ အဖွဲ့ ဦးဆောင်သော မြောက်ပိုင်းမဟာမိတ်အဖွဲ့ဟု လူသိများသည့် ပြည်ထောင်စုနိုင်ငံရေး ဆွေးနွေးညှိနှိုင်းရေးကော်မတီ (FPNCC) ကလည်း အောက်တိုဘာ ၁၃ ရက်တွင် ကြေညာချက် ထုတ်ပြန်ခဲ့သည်။

နေပြည်တော်တွင် ပြုလုပ်မည့် ထိပ်သီးအစည်းအဝေးကို FPNCC အနေဖြင့် ထောက်ခံပြီး ယင်းဆွေးနွေးပွဲမှ အပြုသဘောဆောင်သည့် ရလဒ်များရရှိရန် မျှော်လင့်သည်ဟု FPNCC က ဆိုသည်။

ထို့ပြင် NCA လက်မှတ်ရေးထိုးထားသော တိုင်းရင်းသားလက်နက်ကိုင်ဒေသများတွင် ငြိမ်းချမ်းရေးဦး တည်ချက်များကို အောင်မြင်စွာ ဖော်ဆောင်နိုင်ပါက FPNCC အနေဖြင့် NCA အပါအ၀င် ငြိမ်းချမ်းရေးအတွက် အထောက်အကူပြုစေမည့် မည်သည့်လမ်းကြောင်းမျိုးကိုမဆို ကြိုးပမ်းဆောင်ရွက်မှုမှန်သမျှအား အစဉ်အမြဲထောက်ခံကြောင်းနှင့် FPNCC အနေဖြင့် မြန်မာနိုင်ငံမြောက်ပိုင်း ငြိမ်းချမ်းရေးကို ထိထိ ရောက်ရောက် ဖော်ဆောင်နိုင်ရန်အတွက် အစိုးရ၊ တပ်မတော်တို့နှင့် သုံးပွင့်ဆိုင် ထိပ်သီးအစည်းအဝေး ညှိနှိုင်းကျင်းပဆွေးနွေးရန် အဆင်သင့်ရှိကြောင်း ထုတ်ပြန်ခဲ့သည်။

ထိပ်သီးအစည်းအဝေးကို အောက်တိုဘာ ၁၅ ရက်မှ စတင် ကျင်းပမည်ဖြစ်သော်လည်း လက်ရှိ အခြေအနေအရ ကြည့်မည်ဆိုလျှင် အစိုးရ၊ တပ်မတော်နှင့် တိုင်းရင်းသား လက်နက်ကိုင် အဖွဲ့အစည်းများ ကြားတွင် အပေါင်းလက္ခဏာဆောင်သည့် အရိပ်အယောင်များကို တွေ့မြင်နေရသည်။

နေပြည်တော်တွင် ငါးရက်တာ ကျင်းပမည့် ထိပ်သီးအစည်းအဝေးမှ ငြိမ်းချမ်းရေးလုပ်ငန်းစဉ်များတွင် တစ်ဆို့နေသည့် ကိစ္စရပ်များကို ခေါင်းဆောင်များက ဆွေးနွေးညှိနှိုင်းပြီး အဖြေရှာနိုင်ခဲ့မည်ဆိုလျှင် အစိုးရ မျှော်မှန်းထားသည့် ၂၀၁၈ နှင့် ၂၀၁၉ ခုနှစ်အတွင်း ဒီမိုကရေစီဖက်ဒရယ် အခြေခံမူများကို ချမှတ်မည့် မျှော်မှန်းချက်သည် ပြည့်ဝမည်ဖြစ်သကဲ့သို့ တိုင်းရင်းသားလက်နက်ကိုင် အဖွဲ့အစည်းများနှင့်လည်း ယုံ ကြည်မှုကို တိုးချဲ့တည်ဆောက်နိုင်မည်ဖြစ်သည့်အတွက် တစ်ချက်နှစ်ချက်ပြတ်နိုင်မည့်  အနေအထားမျိုးတွင် ရှိနေသည်။

ထို့ကြောင့် အောက်တိုဘာ ၁၅ ရက်တွင် စတင်ကျင်းပမည့် ထိပ်သီးအစည်းအဝေးတွင် မြန်မာ့ငြိမ်းချမ်း ရေးလုပ်ငန်းစဉ်၌ တစ်ဆို့နေသည့် ကိစ္စရပ်များအား မည်မျှအထိ  ဖယ်ရှားရှင်းလင်းနိုင်မည်ဆိုသည့်အပေါ် ဆက်လက် စောင့်ကြည့်ရမည်ဖြစ်သည်။

“ကျွန်မတစ်ယောက်တည်းရဲ့ အမြင်ကတော့ နှစ်ဖက်စလုံးကသာ စေတနာမှန်ရင် ၂၀၁၉ မှာ ရနိုင်တယ်။ စေတနာမှန်ဖို့ပဲလိုတယ်။ တကယ့်ကို ရနိုင်လောက်တဲ့အနေအထား ရှိတယ်လို့ မျှော်လင့်တယ်။ ပွင့်လင်းဖို့ အရေးကြီးတယ်။ တိုင်းရင်းသားတွေ ဘက်ကလည်း ဘာလိုသလဲ။ ဘယ်လိုပုံစံမျိုးနဲ့ တည်ဆောက်မလဲ။ တပ်မတော်ဘက်ကရော၊ အစိုးရဘက်ကရော တိုင်းရင်းသားတွေရဲ့ တောင်းဆိုချက်တွေအပေါ်မှာ ဘယ်လောက်အထိ နားလည်ပေးနိုင်တယ်ဆိုတဲ့ အနေအထားမျိုးကို နှစ်ဖက်စလုံးက အပေးအယူလုပ်ရမှာပေါ့။ Win Win ပေါ်လစီကို ကျွန်မတို့ ကျင့်သုံးဖို့ လိုအပ်တယ်။ နှစ်ဖက်စလုံးက သာတူညီမျှအရေးကို လုပ်ရ မှာဖြစ်တယ်” ဟု ရခိုင်လွတ်မြောက်ရေးပါတီ (ALP) မှ ဗဟိုအလုပ်အမှုဆောင် ကော်မတီဝင် ဒေါ်စောမြရာ ဇာလင်းက ဆိုသည်။